ULUTSHA LUYABUZA
Ndingakwazi Njani Ukuzibamba Xa Ndilingwa?
Umpostile uPawulos wabhala wathi: “Xa ndinqwenela ukwenza izinto ezilungileyo, kusuke kuthi qatha izinto ezimbi.” (Roma 7:21) Ngaba nawe wawukhe waziva ngolo hlobo? Ukuba kunjalo, eli nqaku lingakunceda ukwazi ukuzibamba xa ulingwa ukuba wenze izinto ezingalunganga.
Into omele uyazi
Ukulingwa kunokwenziwa kukukhuthazwa ngabanye ukuba wenze into embi. Kangangokuba iBhayibhile ithi “ukuba nabahlobo abangalunganga, konakalisa imikhwa elungileyo.” (1 Korinte 15:33) Izinto ezithethwa ngabanye okanye ezikwiwebhsayithi zinokwenza kukhule umnqweno entliziyweni yakho. Loo nto inokukwenza ufune ukwenza izinto ezingalunganga okanye ulandele “umndilili owenza ububi.”—Eksodus 23:2.
“Ukufuna ukuthandwa nokwamkeleka kwabanye kunokwenza wenze nantoni na ukuze wamkeleke kubo.”—UJeremy.
Cinga ngalento: Kutheni kusenokuba nzima ukulwa nesilingo xa usazi ukuba abanye abantu bazokujonga njani?—IMizekeliso 29:25.
Into esiyithethayo yile: Ungavumeli izinto ezenziwa ngoontanga bakho zikwenze wenze izinto ongazikholelwayo.
Into onokuyenza
Yazi into okholelwa kuyo. Ukuba awuyazi into okholelwa kuyo, abanye abantu basenokukulawula. Kubalulekile ukumamela icebiso leBhayibhile elithi: “Qinisekisani zonke izinto, nize nibambelele kwezo zilungileyo.” (1 Tesalonika 5:21) Xa uzazi kakuhle izinto ozikholelwayo, kuza kuba lula ukubambelela kuzo uze ulwe nomqweno wokwenza into eyahlukileyo.
Cinga ngalento: Ngaba uyakholelwa ukuba imithetho kaThixo yokuziphatha yenzelwe ukunceda thina?
“Xa ndihlala ndithembekile kwizinto endizikholelwayo, ndingazivumeli nezinto ezindilingayo, abanye baye bandihloniphe ngaloo nto.”—UKimberly.
Umntu onokumlinganisa oseBhayibhileni: UDaniyeli. Ngoxa wayesemtsha, uDaniyeli “wagqiba entliziyweni” ukuba uzokuthobela imithetho kaThixo.—Daniyeli 1:8.
Ukuba awuyazi eyona nto uyikholelwayo, uza kufana nopopayi olawulwa ngabanye
Zazi izinto ezinokukwenza ulingeke. IBhayibhile ithetha ‘ngeminqweno yobutsha’—iimvakalelo eziba namandla xa usemtsha. (2 Timoti 2:22) Apha akuthethwa nje ngokunqwenela isondo, kodwa kuthethwa nangokufuna ukwamkelwa ngabanye nokufuna ukuzenzela izigqibo usemncinci.
Cinga ngalento: IBhayibhile ithi “umntu ulingwa ngokutsalwa nangokubanjiswa ngumnqweno wakhe.” (Yakobi 1:14) Yeyiphi into okhe uyifune ekulinga kakhulu?
“Zazi ezona zinto ezenza kube lula ukuba ulingeke. Phanda ngazo, uze ubhale phantsi izinto ezinokukunceda xa ulingeka. Loo nto iza kukunceda uyazi into omawuyenze xa kukho izinto ezikulingayo.”—USylvia.
Umntu onokumlinganisa oseBhayibhileni: UDavide. Ngamanye amaxesha wayenikezela xa elingwa ngabanye nazizinto azinqwenelayo. Kodwa uDavide wafunda kwiimpazamo zakhe waza wenza izinto ngendlela elungileyo. Wathandaza kuYehova wathi “dala ngaphakathi kum intliziyo esulungekileyo, uze undifake umoya omtsha, ongagungqiyo.”—INdumiso 51:10.
Into onokuyenza. IBhayibhile ithi: “Sukuzivumela woyiswe bububi.” (Roma 12:21) Le nto ithetha ukuba ungakwazi ukungazivumeli izinto ezikulingayo, uze ukhethe ukwenza izinto ezilungileyo.
Cinga ngalento: Xa ulingelwa ukuba wenze into erongo, unokuqinisekisa njani ukuba wenza into elungileyo?
“Xa ndilingwa ndiye ndicinge ngendlela endiza kuziva ngayo. Ngaba ndiza kuziva bhetele? Mhlawumbi, kodwa okwexeshana. Ngaba kuza kubanjalo nasemva kwexesha elithile? Hayi, ndiza kuzisola. Ngaba le nto ibaluleke ngaphezulu kobuhlobo bam noYehova? Hayi!”—USophia.
Umntu onokumlinganisa oseBhayibhileni: UPawulos. Nangona wayekhe anqwenele ukwenza izinto ezimbi, wakwazi ukuzibamba. Wabhala wathi: “Ndiyawunyanzela umzimba wam ndize ndiwenze ikhoboka.”—1 Korinte 9:27.
Into esiyithethayo yile: Ixhomekeke kuwe indlela oza kumelana ngayo nezilingo.
Khumbula, izinto ezikulingayo azizuhlala zikhona. UMelissa oneminyaka eyi-20 uthi “Izinto ezazibonakala ngathi zinkulu xa ndandisesikolweni, azisabalulekanga ngoku. Xa ndicinga ngale nto ndiye ndicinge ukuba izilingo endizifumanayo ngoku nazo ziza kudlula, ibe ngenye imini ndiza kuvuya ukuba ndiye ndakwazi ukumelana nazo.”