Ubomi KwiParadesi Ebuyiselweyo

UYESU wathetha ngokuphila kwakhona, waza waqinisekisa abafundi bakhe ukuba oko kuya kwenzeka. Wathi: ‘Ekudalweni okutsha niya kudla ilifa ubomi obungunaphakade.’ Wayethetha ukuthini uYesu xa wayethetha ‘ngokudalwa okutsha’?—Mateyu 19:25-29.

Kwingxelo efanayo yombhali weBhayibhile uLuka, uYesu wathi ‘kwinkqubo yezinto ezayo’ abafundi bakhe baya kufumana “ubomi obungunaphakade.” (Luka 18:28-30) Kutheni iBhayibhile isithi ‘inkqubo yezinto ezayo’ iyafana ‘nokudalwa okutsha’?

Igxininisa ekubeni uYehova uThixo uqinisekisa ukuba injongo yakhe yantlandlolo yokuba uluntu luphile ngonaphakade kwiparadesi esemhlabeni uya kuyiphumeza. Abantu baya kubuyiselwa kwimfezeko eyayinanditshwa nguAdam noEva ngaphambi kokuba babe nesono. Ngoko ‘kwinkqubo yezinto ezayo,’ kuya ‘kudalwa ngokutsha’ iimeko ezifana nezeParadesi yase-Eden.

Indlela Eza Kubuyiselwa Ngayo IParadesi

Ngoxa wayesemhlabeni, uYesu wafundisa abafundi bakhe ukuba bathandazele urhulumente kaThixo aza kuwusebenzisa ekwenzeni umhlaba wonke ube yiparadesi. UYesu wathi masithandaze sithi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mateyu 6:10) UThixo wamisela uNyana wakhe ukuba abe nguMlawuli woBukumkani obuya kuphumeza injongo kaThixo yokuba umhlaba wonke ube yiParadesi.

Ithetha ngaLowo umiselwe nguThixo ukuba abe nguMlawuli, iBhayibhile ithi: ‘Sizalelwe umntwana, sinikwe unyana; yaye ukuphatha njengenkosana kuya kuba segxalabeni lakhe. Igama lakhe liya kubizwa ngokuba yiNkosana yoXolo. Akayi kuyeka ukuphatha njengenkosana, noxolo aluyi kuphela.’ (Isaya 9:6, 7) Sekunjalo, lo rhulumente uphantsi kwale ‘nkosana yoxolo’ uya kuqiniseka njani ukuba kwenziwa ukuthanda kukaThixo?

IBhayibhile ithi: “Ngemihla yabo kumkani uThixo wezulu uya kumisa ubukumkani [ukuphatha kwenkosana] obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani, buze bona bume ukusa kwixesha elingenammiselo.”—Daniyeli 2:44.

Makhe sibone ukuba ziya kuba njani iimeko kwiParadesi ebuyiselweyo, xa izinto ‘zidalwe ngokutsha,’ naxa uNyana kaThixo sele elawula ‘njengeNkosana yoxolo’ kuBukumkani bukaYise.

Ubomi EParadesi

Ukuvuswa kwabafileyo

“Liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe baze baphume.”—Yohane 5:28, 29.

“Kuza kubakho uvuko lwamalungisa nabangengomalungisa.”—IZenzo 24:15.

Ukugula, ukwaluphala nokufa akusekho

“Ngelo xesha aya kuvulwa amehlo eemfama, zivulwe neendlebe zezithulu. Isiqhwala siya kutsiba njengexhama, nolwimi lwesimumu luya kumemelela ngochulumanco.”—Isaya 35:5, 6.

“Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:3, 4.

Intabalala yokutya

“Umhlaba uya kunika imveliso yawo; uThixo, uThixo wethu, uya kusisikelela.”—INdumiso 67:6.

“Kuya kubakho ukudla okuziinkozo okuninzi emhlabeni; Encotsheni yeentaba kuya kubakho ukuphuphuma.”—INdumiso 72:16.

Amakhaya afanelekileyo nomsebenzi onanditshwa ngabo bonke

“Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; abayi kutyala kudle abanye.”—Isaya 65:21, 22.

Ulwaphulo-mthetho, ugonyamelo okanye iimfazwe azisekho

“Bona ke abangendawo, baya kunqunyulwa emhlabeni.”—IMizekeliso 2:22.

“Ziwakhande amakrele azo abe ngamakhuba nemikhonto yazo ibe zizikere zokuthena imithi. Uhlanga aluyi kuphakamisela uhlanga ikrele, zingayi kuphinda zifunde nemfazwe kwakhona.”—Isaya 2:4.

Uloyiko luya kuphela yaye kuya kubakho uxolo kuyo yonk’ indawo

“Ziya kuhlala ngonqabiseko, kungekho bani uzingcangcazelisayo.”—Hezekile 34:28.

“Aziyi kwenzakalisa okanye zonakalise entabeni yam yonke engcwele; ngenxa yokuba umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.”—Isaya 11:9.

Hayi indlela ekuya kuba mnandi ngayo xa umhlaba wonke uya kube uzaliswe ngabantu abathanda uThixo nabathandanayo! (Mateyu 22:37-39) Siqinisekile ukuba ziya kuzaliseka zonke izithembiso zikaThixo. UThixo uthi: “Ndikuthethile oko . . . yaye ndiya kukwenza.”—Isaya 46:11.

Kusenokwenzeka ukuba zininzi izinto onomdla wokuzazi ngokuphathelele uYehova uThixo nehlabathi elitsha alithembisileyo. Ngokomzekelo, bubuphi ubungqina esinabo bokuba ihlabathi elitsha lisemnyango? Iya kwenzeka njani into yokuba uBukumkani bukaThixo buthabathe indawo yabo bonke oorhulumente? Yintoni eya kubangela ukuba oko kwenzeke? AmaNgqina kaYehova aya kukuvuyela ukuphendula le mibuzo. Ukuze ufumane inkcazelo engakumbi, funda iphepha 32 leli phephancwadi.

Umnqweno wokuphila kwihlabathi elitsha, ekukudala abantu benawo sele uza kuzaliseka. Abantu abaninzi abaye bafa, baza kuphila kwakhona. Oku akulophupha nje—kukuthanda kukaThixo. Ngokwenene abantu baza kuphila kwakhona! Obu ‘bubomi benene,’ ‘ubomi obuzayo.’—1 Timoti 4:8; 6:19.

[Umfanekiso okwiphepha 7]

IParadesi esaphulukana nayo isibini sokuqala ngenxa yokungathobeli, iya kubuyiselwa