Ubomi Esibufumane Ngenxa Yakhe

“KHANGELA! Ukumkani uya kulawula ngobulungisa.” Isithembiso esichukumisayo njengesi esithetha ngokulawula kukaYesu eBukumkanini ngumxholo weBhayibhile. Esinye isithembiso sithi: “Uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. Uya kuba nosizi ngesisweli nangehlwempu, nemiphefumlo yabangamahlwempu uya kuyisindisa. . . . Negazi labo liya kuxabiseka emehlweni akhe.”—Isaya 32:1; INdumiso 72:12-14.

Ngaba ukho umntu onokulikhanyela elokuba abantu ehlabathini lonke bafuna umlawuli onjalo, onokusesikweni? UYesu wabongoza abalandeli bakhe ukuba bahlale becinga ngoBukumkani bukaThixo. Ebafundisa ukuthandaza wathi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.”—Mateyu 6:9, 10.

Ubungqina Bokuba UBukumkani BukaThixo Bukufuphi

Sinokwazi njani ukuba uBukumkani buza kufika nini? Abalandeli bakaYesu bangaphambili befun’ ukwazi babuza: “Uya kuba yintoni na umqondiso wobukho bakho [njengoKumkani olawulayo] nowokupheliswa kwenkqubo yezinto?” UYesu waphendula wathi: “Uhlanga luya kuvukelana nohlanga . . . , yaye kuya kubakho ukunqongophala kokutya neenyikima zomhlaba kwiindawo ngeendawo. Zonke ezi zinto zikukuqala kwenimba.” Kwakhona walumkisa esithi: “Ngenxa yokwanda kokuchas’ umthetho luya kuphola uthando lwabaninzi.”—Mateyu 24:3-12.

Esinye isiprofeto seBhayibhile sithi, “ngemihla yokugqibela kuya kufika amaxesha amanqam ekunzima ukujamelana nawo. Kuba abantu baya kuba ngabazithandayo, abathandi bemali, abazidlayo, abanekratshi, abanyelisi, abangathobeli bazali, abangenambulelo, abanganyanisekanga, abangenawo umsa wemvelo, abangayifuni kwaphela imvisiswano, abanyelisi, abangenakuzeyisa, iindlobongela, abangathandi kulunga, abangcatshi, abaneentloko ezilukhuni, abakhukhumele likratshi, abathandi beziyolo kunokuba bathande uThixo, benembonakalo yozinikelo lobuthixo kodwa bengaphili ngokuvisisana nalo.”—2 Timoti 3:1-5.

Ngokuqinisekileyo uyavumelana nendlela echazwa ngayo “imihla yokugqibela,” ifana twatse namaxesha esiphila kuwo. Buninzi ubungqina obubonisa ukuba ngoku lixesha lokuba kuzaliseke esi siprofeto silandelayo, esithi: “UThixo wezulu uya kumisa ubukumkani obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani, buze bona bume ukusa kwixesha elingenammiselo.”—Daniyeli 2:44.

Umlawuli woBukumkani “iNkosana Yoxolo,” iya kususa nantoni na eya kuphazamisa uxolo lwabo baya kusinda ekuphelisweni kweli hlabathi. (Isaya 9:6) Isiprofeto seBhayibhile sithembisa sisithi: “Ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.” (1 Yohane 2:17) Ukupheliswa kweli hlabathi kuya kuvulela ithuba abo bangabenzi bokuthanda kukaThixo banandiphe oko kwalahlwa ngabazali bethu bokuqala, uAdam noEva, ngokona kwabo uThixo.

Ubomi Bukufuphi

UYesu wathi: “Ekudalweni okutsha,” ‘uNyana womntu uhlala phantsi kwitrone yakhe ezukileyo.’ (Mateyu 19:28) Kuthethwa ukuthini ‘ukudala ngokutsha?’ Eny’ indlela eliguqulelwa ngayo eli binzana ithi “ukwenziwa ntsha kwezinto zonke.” (New International Version) Umzekelo okwingxelo yeBhayibhile ukubiza ngale ndlela, “inkqubo yezinto ezayo.” (Luka 18:30) Ngelo xesha, uYesu uya kulisebenzisa igunya alinikwe nguThixo njengeNkosana Yoxolo ngokubanika ubomi obungunaphakade bonke abo baye banokholo kwidini lentlawulelo.—Yohane 5:21.

Kwinkqubo yezinto kaThixo, abantu baya kunandipha ubomi uThixo awayebunike uAdam noEva xa wayebabeke kwiParadesi eyayisemhlabeni. Khumbula ukuba uThixo wabayalela ukuba babe nabantwana, ewe ‘bawuzalise umhlaba baze bawoyise.’ Babenembopheleleko yokuyandisa iParadesi eyayise-Eden ibe semhlabeni wonke! (Genesis 1:28) Ngokufanayo, xa kudalwa ngokutsha umhlaba uya kuzala ngabantu abasindileyo, abantwana babo nabo bebefile baza bavuswa. Imbopheleleko abaza kube benayo kukwenza umhlaba ube yiparadesi kanye njengokuba yayiyinjongo kaThixo leyo.

Makhe siqwalasele ezinye iintsikelelo eziya kunanditshwa ngabantu kwihlabathi elitsha elinobulungisa.—2 Petros 3:13.

Nangona ezi zithembiso zisenokubonakala zingenakwenzeka, “kwinkqubo yezinto ezayo” ngokuqinisekileyo ziza kuzaliseka. Ethandaza kuThixo, uYesu wachaza esimele sikwenze ukuze sinandiphe ezo ntsikelelo, esithi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) Kwanga ungaphakathi kwabo bafuna olo lwazi lunik’ ubomi.

[Amagama acatshulweyo akwiphepha 7]

“Igama lakhe liya kubizwa ngokuba . . . iNkosana yoXolo. Akayi kuyeka ukuphatha njengenkosana, noxolo aluyi kuphela.”—Isaya 9:6, 7.

[Ibhokisi/Imifanekiso ekwiphepha 8, 9]

Bonke Abantu Baza Kuba Namakhaya Nemisebenzi

“Ngokuqinisekileyo baya kwakha izindlu baze bahlale . . . Abayi kutyala kudle abanye.”—Isaya 65:21, 22.

Ukutya Kuza Kube Kudlal’ Abantwana

“Umhlaba uya kunika imveliso yawo.” “Kuya kubakho ukudla okuziinkozo okuninzi emhlabeni.”—INdumiso 67:6; 72:16.

Nezilwanyana Ziza Kube Ziseluxolweni

“Ingcuka iya kuhlala ithutyana nenkunzi yemvana, ihlosi libuthe netakane, . . . nenkwenkwana iziqhube ezo zinto.”—Isaya 11:6.

Akusayi Kubakho Mfazwe, Kuya Kubakho Uxolo Ngonaphakade

“Uhlanga aluyi kuphakamisela uhlanga ikrele, zingayi kuphinda zifunde nemfazwe kwakhona.” “Akayi kuyeka ukuphatha njengenkosana, noxolo aluyi kuphela.”—Isaya 2:4; 9:7.

Abantu Abafileyo Baza Kuvuswa

“Liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe [uYesu] baze baphume.”—Yohane 5:28, 29.

Abantu Baza Kube Bengabikwa Hlaba Yaye Abayi Kufa

“Akakho ummi wakhona oya kuthi: ‘Ndiyagula.’” “Kungabi sabakho kufa . . . Izinto zangaphambili zidlule.”—Isaya 33:24; ISityhilelo 21:3, 4.