Amanzi Akhokelela Ebomini
UYesu wayekhenketha lonke elaseSamariya, ukuya kumntla weYerusalem. Wayediniwe yaye enxaniwe. Njengoko wayehleli emthonjeni, wacela umfazi ongumSamariya ukuba amphe amanzi asele. Emangalisiwe ngumYuda owayecela amanzi kuye, ekubeni ngenkulungwane yokuqala, amaYuda ayengadlelani namaSamariya.
Edidekile lo mfazi wambuza: “Kwenzeka njani ukuba wena, phezu kwako nje ukuba ungumYuda, ucele kum into eselwayo, ndakuba mna ndingumfazi ongumSamariya?”
UYesu wamphendula wathi: “Ukuba ubusazi isipho sesisa sikaThixo nokuba ngubani na lo uthi kuwe, ‘Ndiphe ndisele,’ unge ucele kuye wena, wakupha amanzi aphilayo.”
UYesu wolek’ umsundulu wathi kuye: “Wonk’ ubani osela kula manzi uya kunxanwa kwakhona. Nabani na osela kumanzi endiza kumpha wona akasayi kuze anxanwe konke konke, kodwa kuye amanzi endiya kumnika wona aya kuba ngumthombo wamanzi ampompozayo anika ubomi obungunaphakade.”—Yohane 4:1-15.
Wayebhekisela kwawaphi amanzi uYesu?
IBHAYIBHILE imbiza uMdali, uYehova uThixo, ngokuthi ‘ungumthombo wamanzi aphilayo.’ (Yeremiya 2:13) Ubomi sisipho esivela kuThixo, yaye ukuphila kwethu kuxhomekeke ekuthabatheni kwethu la manzi, ngokwengqiqo yokwenyama kunye neyomoya.
Abantu abaninzi namhlanje bafuna ukukhokelwa ngokomoya, kunanini na kunangaphambili. Ngokwenene, kunokutshiwo ukuba abantu abaninzi balambile ngokomoya. Abantu bafuna iimpendulo kwimibuzo enjengethi: Baphi abafileyo? Ngaba likhona ithemba lokubabona kwakhona? Kutheni uThixo evumela ukubandezeleka? Ngaba ikamva liya kuzisa isiqabu kwiimfazwe, ulwaphulo-mthetho, indlala, kunye nokugula? AmaNgqina kaYehova akholelwa ukuba iimpendulo zale mibuzo ezihlaziyayo zinokufunyanwa “kumanzi” ali Lizwi likaThixo, iBhayibhile.
Xa uYesu wathetha nomfazi ongumSamariya emthonjeni, njengoko kuchaziwe ngaphambili, wayebhekisela kumanzi obomi enyaniso efumaneka eLizwini likaThixo. AmaNgqina kaYehova ayakumema ukuba ungcamle kula manzi enyaniso. Esi simemo sigxininiswa kwincwadi yokugqibela yeBhayibhile ethi: “Lowo unxaniweyo makeze; lowo uthandayo makawathabathe amanzi obomi ngesisa.”—ISityhilelo 22:17.
Ukuze ufunde okungakumbi ngendlela uBukumkani bukaThixo obuza kubazuzisa ngayo abantu, nceda uqhagamshelane namaNgqina kaYehova kwiHolo yoBukumkani ekufutshane nawe okanye ubhalele kwiadresi efanelekileyo kwiphepha lesi-5 leli phephancwadi. Usenokuya kwiWeb site ethi www.watchtower.org.
[Ibhokisi ekwiphepha 8, 9]
NGABA UNQULO LUYE LWAYANELISA INTSWELO YABANTU?
Amanzi ahlaziyayo enyaniso akanakufunyanwa nje ngokuya kuphela eCaweni okanye ukuzibanga ungumntu wonqulo. Inyaniso yeyokuba, iinkonzo ezininzi namhlanje ziye zangunobangela weengxaki zabantu kunokuba zizicombulule. Ngokomzekelo: Ngamaxesha emfazwe, amaKatolika ebebulala amaKatolika, amaProtestanti ebulala amaProtestanti—omabini la maqela ecela ukuncedwa nguThixo!
Ukongezelela koko kukho iingxelo ezahlukeneyo zokuba abefundisi barhwaphiliza imali okanye baxhaphaz abantwana abancinane ngokwesini. Enyanisweni, amanzi aye anikelwa zicawa ezininzi angqineke engcolile. (ISityhilelo 17:4-6; 18:1-5) Le meko ichazwe eBhayibhileni kuTito 1:16 ngokuthi: “Bavakalisa esidlangalaleni ukuba bayamazi uThixo, kodwa bayamkhanyela ngemisebenzi yabo.” Ukusa kumkhamo omkhulu, unqulo alukwazanga ukwanelisa intswelo yabantu yokomoya.
[Ibhokisi/Umfanekiso okwiphepha 9]
Kwizahluko ezili-19, zencwadi enamaphepha angama-224 ethi Yintoni Ngokwenene Efundiswa YiBhayibhile? zinikela iimpendulo zemibuzo yeBhayibhile enjengale:
“Yintoni injongo kaThixo ngomhlaba?”
“Baphi abafileyo?”
“Ngaba Siphila ‘Kwimihla Yokugqibela’?”
“Kutheni UThixo Evumela Ukubandezeleka?”
[Umfanekiso okwiphepha 9]
Unokuwafumana la ‘manzi enyaniso’ kwiHolo yoBukumkani yasekuhlaleni