Umfazi Equleni

Emva kwePasika, xa uYesu nabafundi babebuyela eGalili, badlula eSamariya. Kufuphi nedolophu iSikare, uYesu wema ngakwiqula elibizwa ngokuba liqula likaYakobi. Ngoxa wayephumle apho, abafundi bakhe bangena edolophini baya kuthenga ukutya.

Kwafika umfazi eze kukha amanzi kweli qula. UYesu wathi kuye: “Ndiphe amanzi ndisele.” Wathi: ‘Uthethelani nam? NdingumSamariyakazi. AmaYuda awavani namaSamariya.’ UYesu wathi: ‘Ukuba ubusazi ukuba ndingubani, ubuza kuwacela kum amanzi, kuba mna bendiza kukunika amanzi obomi.’ Wambuza: ‘Utheth’ ukuthini? Awunayo nento le yokukha amanzi nje.’ UYesu wathi: ‘Nabani na osela amanzi endimpha wona akasoze aphinde anxanwe.’ Umfazi wathi: “Mhlekazi, khawundiphe la manzi.”

UYesu wathi kuye: ‘Yiza nomyeni wakho.’ Yena wathi: ‘Andinamyeni.’ UYesu wathi: ‘Unyanisile. Utshate kayi-5, ngoku uhlala nendoda ongatshatanga nayo.’ Umfazi wathi: ‘Wena ungumprofeti. AmaSamariya athi sinokumkhonza uThixo kule ntaba, kodwa wona amaYuda athi simele sikhonze eYerusalem kuphela. Ndikholelwa ukuba akufika uMesiya, uza kusifundisa indlela yokukhonza uThixo.’ UYesu wamxelela into ebengekayithethi nakomnye umntu: ‘Ndim uMesiya.’

Lo mfazi wabaleka waya kuxelela amanye amaSamariya: ‘Ndicinga ukuba ndimfumene uMesiya. Akukho nto angayaziyo ngam. Yizan’ obona!’ Baya equleni waza uYesu wabafundisa.

AmaSamariya acela uYesu ukuba ahlale kwidolophu yawo. Wahlala nawo iintsuku eziyi-2, ewafundisa. Amaninzi kuwo aba nokholo kuye. Athi kumfazi owayebabizile: ‘Izinto ezifundiswa yile ndoda, zisenza siqiniseke ukuba yiyo eza kusindisa ihlabathi.’