Ngaba Kwadalwa?

Umlomo WeToucan

◼ Ekubeni ingakwazi ukubhabha kakuhle, itoucan ekuMbindi nakuMzantsi Merika iyatsiba-tsiba xa ihamba. Yenza isandi esifana nesesele, kodwa yona iyangxola. Unokuyiva kumgama ongangekhilomitha. Kodwa ke, eyona nto imangalisa izazinzulu, ngumlomo wayo.

Khawucinge ngoku: Ezinye iitoucan zinomlomo ophantse ulingane nemizimba yazo. Ukhangeleka unzima, kodwa akunjalo. Isazinzulu uMarc André Meyers sithi: “Umlomo wayo unekeratin, ekhoyo nakwiinzipho nasezinweleni. Lo mlomo unemicu emininzi ngokungathi ziitile zophahla.”

Umlomo wetoucan ufaniswa nesiponji esiqinileyo. Uligobhogobho yaye ezinye iindawo zenziwe ngeebeam nangenwebu ethile. Ngenxa yoko umlomo wayo ulula kodwa uqinile. Lo kaMeyers uthi: “Ungacinga ukuba itoucan inolwazi ngezobunjineli.”

Umlomo wetoucan uyayikhusela kwiingozi. Izazinzulu zikholelwa ukuba oononjineli beenqwelo-moya neemoto banokufunda okuthile kumlomo wale ntaka. UMeyers uthi: “Iimoto ezakhiwe zaqina njengomlomo wetoucan zinokukwazi ukukhusela abaqhubi beemoto kwiingozi.”

Ucinga ntoni? Ngaba umlomo wetoucan olula kodwa oqinileyo wazenzekela? Okanye ngaba wadalwa?

[Umzobo/Umfanekiso okwiphepha 17]

(Ukuba ufuna inkcazelo ehlahlelwe kakuhle, yiya kwimpapasho)

Indawo eligobhogobho

Indawo efana nesiponji