Isijikelezi-langa Sethu
UMHLABA unezinto ezininzi eziphilayo. Uninzi lwezi zinto, ezikwintlabathi, emoyeni nasemanzini azikwazi ukubonwa ngamehlo enyama. Ngokomzekelo, igram enye nje kuphela yentlabathi ineentsholongwane ezingama-10 000! Ezinye izinto eziphilayo unokuzifumana kwiikhilomitha ezintathu ngaphantsi komhlaba!
Kukho nezinye izinto eziphilayo emoyeni ngaphandle kweentaka, amalulwane nezinambuzane. Kuxhomekeke kwixesha lonyaka, umoya uzala umungu, yaye kwezinye iindawo, kubakho namawaka eentsholongwane ezahlukahlukeneyo. Iphephancwadi iScientific American lithi: “Iintsholongwane ezahlukahlukeneyo emoyeni ziyalingana nezisentlabathini.”
Kuphinda kubekho nezinye izinto eziphilayo ezingaziwayo kwiilwandle, kuba kunzima ngezazinzulu ukufunda ngazo, ekubeni kubiza imali eninzi ukusebenzisa izixhobo ezifunekayo. Kukwakho nezinto ezininzi eziphilayo ezingaziwayo kwizityalo zaselwandle, nangona kufundwa ngazo rhoqo.
Kodwa ke, into esiyaziyo kukuba zininzi izinto eziphilayo eMhlabeni, kangangokuba imichiza ethile yomhlaba iyatshintsha apho kukho izinto eziphilayo. Ngokomzekelo, kwiilwandle, icalcium carbonate ekonookrwece nakwiikorale izinzisa imichiza emanzini “njengokuba kunjalo nangeantacid esesiwini,” itsho njalo iU.S. National Oceanic and Atmospheric Administration. Izityalo kwakunye nezityalo ezifumaneka kufuphi namachibi neelwandlekazi zilawula icarbon dioxide neoksijini emanzini nasemoyeni. Yaye kwintlabathi, iintsholongwane nomngundo zisebenza njengomgquba ukuze zondle izityalo. Ngoko, umhlaba siso sodwa isijikelezi-langa esinezinto eziphilayo.
Sekunjalo, izinto bezingenako ukuphila ukuba ukulungelelana kwendalo bekungekho, yaye oko akukhange kuqondakale de kwaba yinkulungwana yama-20. Oko kulungelelana kuquka oku kulandelayo:
1. Indawo umhlaba omi kuyo kumnyele iMilky Way nakummandla wezijikelezi-langa, indlela ehanjwa ngumhlaba, indlela omi ngayo, isantya ojikeleza ngaso nenyanga
2. Imagnethi yomhlaba kunye nomoya ezisebenza njengekhaka elikhuselayo
3. Namanzi amaninzi
4. Imijikelo yendalo ehlaziya necoca iindawo ekuphila kuzo izinto
Njengoko ufunda la manqaku alandelayo, zibuze: ‘Ngaba izinto ezikhoyo emhlabeni zazivelela okanye zadalwa ngumntu okrelekrele? Ukuba zadalwa, yayiyintoni injongo yoMdali ngomhlaba?’ Inqaku lokugqibela kolu ngcelele liza kuwuphendula lo mbuzo.
[Ibhokisi ekwiphepha 3]
“UTHIXO AKANGENI NDAWO KWINZULULWAZI”
Phezu kwabo nje ubungqina bokuba umhlaba ubonakala uyilwe kakuhle ngeyona ndlela, ungazenzekelanga, izazinzulu ezininzi azifuni ukukholelwa kuMdali. URichard C. Lewontin okholelwa kwindaleko uthi, inzululwazi ayinyanzeli abantu abangakholelwayo kuThixo ukuba indalo yabakho ngaphandle koMdali. Kunoko uthi, bakholelwa koko kuba “kakade bengenalo ixesha lezinto zokomoya.” Xa ethethela ezinye izazinzulu, wongezelela esithi: “Ngoko uThixo akangeni ndawo kwinzululwazi.”
Ngaba kububulumko ukuba nenkolelo enjalo, ingakumbi xa kukho ubungqina obuninzi bokuba ukho uMdali? Ucinga ntoni?—Roma 1:20.