Izikhuselo Zomhlaba Ezinamandla

EMAJUKUJUKWINI kukho iingozi ezininzi ezibangelwa yimitha yobushushu neemeteoroid. Sekunjalo, isijikelezi-langa sethu sijikeleza phakathi kweengozi ezininzi kodwa singachaphazeleki. Ngoba? Kuba umhlaba ukhuselwe sisikhuselo esikhethekileyo—amandla emagnethi nomoya okhethekileyo.

Amandla emagnethi avela emazantsi esijikelezi-langa aze aphumele ngaphaya emajukujukwini, apho abangela isikhuselo esingabonakaliyo ekuthiwa yimagnetosphere (eboniswe ngasekunene). Esi sikhuselo sisikhusela kwimitha yobushushu nakwiingozi ezibangelwa lilanga. Oku kuquka umoya osemajukujukwini, onamasuntswana anamandla; amadangatye anehydrogen; neecoronal mass ejection (CMEs), aqhushumba kangangamawaka ezigidi eetoni zezinto ezisuka elangeni. Amadangatye neeCME zikhupha imigca ekhanyayo (eboniswe ekunene ezantsi), imichiza ekhanyayo kufuphi neencam zesijikelezi-langa.

Umoya womhlaba nawo uyakhusela. Lo moya ekuthiwa yistratosphere, uneoksijini ekuthiwa yiozone, ebamba ubushushu obuyiultraviolet (UV) obungama-99 ekhulwini. Ngoko ke, iozone layer ikhusela abantu, izilwanyana nezityalo kubushushu obuyingozi. Okubangela umdla kukuba, iozone ebakho ngexesha elithile ixhomekeke kubushushu beUV obukhoyo ngelo xesha, nto leyo ebangela iozone layer ibe sisikhuselo esinamandla.

Kwalo moya usikhusela kwizigidi zeemeteoroid, ezincinane nezinkulu. Ezi meteoroids ziba ngamalangatye aqaqambileyo ekuthiwa ziimeteor.

Izikhuselo zomhlaba azinqandi ubushushu obubalulekileyo kubomi, njengokufudumala nokukhanya. Lo moya unceda ukudlulisela ukufudumala emhlabeni wonke, yaye ebusuku usebenza njengesigqubuthelo ukuze kufudumale.

Umoya womhlaba namandla emagnethi ziyakhwankqisa yaye azikaqondwa ngokupheleleyo. Kunokuthethwa into efanayo nangamanzi.