Imbono YeBhayibhile

Ngaba Ikamva Lakho Limiselwe Kwangaphambili?

Abantu abaninzi bakholelwa ukuba ubomi nekamva labo limiselwe kwangaphambili nguThixo. Bavakalelwa kukuba umntu esazalwa nje, uThixo sele elazi ikamva lakhe. Bathi: ‘Kaloku, uThixo unamandla yaye wazi zonke izinto, uyazazi izinto ezenzeka ngaphambili, ezenzeka ngoku neziza kwenzeka kwikamva.’

UCINGA ntoni? Ngaba uThixo ubumisela kwangaphambili ubomi nekamva lethu? Ngamanye amazwi, ngaba sinenkululeko yokuzikhethela okanye akunjalo? Ithini iBhayibhile kule nkalo?

Ngaba Uyazikhetha Izinto Afuna Ukuzazi Kwangaphambili?

IBhayibhile itsho ngokucacileyo ukuba uThixo uzazi kwangaphambili izinto eziza kwenzeka. UIsaya 46:10 uthi: “Lowo uxela ukuphela kwasekuqaleni.” Wasebenzisa abantu ukuba babhale iziprofeto ezininzi. (2 Petros 1:21) Ngapha koko, ezo ziprofeto zisoloko zichanile kuba uThixo unobulumko namandla okuzizalisekisa. Ngoko ke, uThixo akazi izinto eziza kwenzeka nje kuphela kodwa uyakwazi nokuchaza nezinto eziza kwenzeka xa ekhetha njalo. Noko ke, ngaba uThixo uchaza izinto eziza kwenzeka kumntu ngamnye kuquka nenani elipheleleyo labo baza kusindiswa? Ngokutsho kweBhayibhile ikamva lomntu lixhomekeka kukhetho lwakhe.

IBhayibhile ifundisa ukuba uThixo uyazikhetha izinto afuna ukuzichaza ngekamva. Ngokomzekelo, uThixo waxela kwangaphambili ukuba “isihlwele esikhulu” sabantu abangamalungisa siya kusinda kwintshabalalo yabangendawo ekuphelisweni kwale nkqubo yezinto. (ISityhilelo 7:9, 14) Phawula ukuba, uThixo akazange alichaze inani eliqingqiweyo lesihlwele esikhulu. Siyintoni isizathu? UThixo akalimiseli kwangaphambili ikamva lomntu ngamnye. UThixo unjengobawo onothando kwintsapho enkulu. Uyazi ukuba abanye babantwana Bakhe baya kumthanda, kodwa akalichazanga inani labo.

Makhe sibone umahluko kwindlela uThixo asebenzisa ngayo ukwazi kwakhe kwangaphambili nendlela asebenzisa ngayo amandla akhe. NjengoSomandla, uThixo unamandla angasikelwanga mda. (INdumiso 91:1; Isaya 40:26, 28) Kodwa ngaba amandla akhe uwasebenzisa nakanjani na? Akunjalo. Ngokomzekelo, akazange awasebenzise amandla akhe nxamnye neBhabhiloni, utshaba lukaSirayeli wamandulo, kwade kwafika ixesha elililo. UThixo wathi: “Ndaqhelisela ukuzeyisa.” (Isaya 42:14) Lo mgaqo uyawusebenzisa nakwindlela akhetha ngayo ukwazi izinto kusengaphambili. UYehova ubonakalisa ukuzeyisa ngokusivumela sisebenzise inkululeko esinayo yokuzikhethela.

Indlela uThixo akhetha ngayo ukusebenzisa amandla akhe akuthethi kuthi usikelwe umda. Kunoko, ibalaselisa ubukhulu bakhe, isisondeza kuye, yaye ibonisa ukuba nangona enamandla okwazi yonke into kusengaphambili, uyayihlonela inkululeko yokuzikhethela yezidalwa zakhe ezikrelekrele.

Kwelinye icala, ukuba uThixo ebemisela zonke izinto kwangaphambili, kuquka nento nganye embi eyenzekayo, ngaba ebengenokubekek’ ityala ngako konke ukubandezeleka okwenzekayo ehlabathini? Eneneni, le mfundiso yokumiselwa kwekamva kwangaphambili ayimzukisi uThixo, kunoko iyamnyelisa. Imenza ngathi ukhohlakele, akakho sikweni, yaye akanaluthando—nto leyo eyahluke mpela koko kuthethwa yiBhayibhile ngaye.—Duteronomi 32:4.

Ukhetho Lolwakho

Ngomkhonzi wakhe uMoses, uThixo wathi kuhlanga lakwaSirayeli: “Ndibeke phambi kwakho ubomi nokufa, . . . nyula ke ubomi . . ngokuthi umthande uYehova uThixo wakho, uliphulaphule ilizwi lakhe, unamathele kuye; ngokuba ububomi bakho nokolulwa kwemihla yakho.” (Duteronomi 30:19, 20) Ukuba uThixo wayesazi kwangaphambili ukuba mSirayeli ngamnye wayeza kumthanda aze azuze ubomi okanye angamthobeli aze afe, ebengayi kuwathetha la mazwi. Ngaba ukholelwa kwelokuba uThixo oluthando, ‘nomthandi wokusesikweni,’ ebeya kwenza ngobuqhophololo?—INdumiso 37:28; 1 Yohane 4:8.

Isicelo sikaThixo kubakhonzi bakhe sokukhetha ubomi sisebenza nakakhulu kuthi namhlanje, ngenxa yokuba inzaliseko yeziprofeto zeBhayibhile ibonisa ukuba le nkqubo yezinto sele iza kuphela. (Mateyu 24:3-9; 2 Timoti 3:1-5) Sibukhetha njani ubomi? Sikwenza oko ngendlela efanayo nohlanga lakwaSirayeli.

‘Unokubukhetha Njani Ubomi?’

Sibukhetha ubomi ‘ngokuthanda uYehova,’ ‘ngokuphulaphula ilizwi lakhe’ ‘nangokunamathela kuye.’ Enyanisweni, ezi zinto sinokuzenza kuphela xa simazi uThixo yaye sikwazi oko akufunayo kuthi. Ethandaza kuThixo, uYesu Kristu wathi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Akekeliswe sithi; Yohane 17:3, iBhayibhile yesiXhosa.

Olo lwazi luxabisekileyo lufumaneka kwiBhayibhile Engcwele, ekwabizwa ngokuba liLizwi likaThixo. (Yohane 17:17; 2 Timoti 3:16) Eneneni, esi sipho sokomoya sibubungqina obucacileyo bokuba uThixo akalimiselanga kwangaphambili ikamva lethu kodwa ufuna senze izigqibo ezisekelwe kulwazi asinike lona.—Isaya 48:17, 18.

NgeBhayibhile, uThixo uthi kuthi: ‘Le yinjongo yam ngokuphathelele abantu nomhlaba, naku enifanele nikwenze ukuze nifumane ubomi obungunaphakade. Ningakhetha ukundiphulaphula okanye ningandiphulaphuli.’ Ngoko ke, nangona uThixo enamandla okwazi izinto kusengaphambili, uyalihlonela ilungelo lethu lokuzikhethela! Ngaba uza kukhetha ubomi ‘ngokuphulaphula ilzwi [likaThixo] nokunamathela kuye?’

NGABA WAKHA WAZIBUZA?

◼ Kuxa kutheni xa uThixo ekhetha ukwazi izinto kusengaphambili?—Duteronomi 30:19, 20; Isaya 46:10.

◼ Kutheni uThixo engakhethi ukwazi kwangaphambili zonke izinto, kuquka nezinto ezimbi ezenzeka ebantwini?—Duteronomi 32:4.

◼ Yintoni eya kugqiba ngekamva lethu?—Yohane 17:3.

[Amagama acatshulweyo akwiphepha 13]

IBhayibhile ifundisa ukuba uThixo uyazikhetha izinto afuna ukuzichaza ngekamva