Liya Kuba Njani Ikamva Lakho?

UKUBA uThixo uSomandla akukho nto angayaziyo, esazi zonke izinto esele zenzekile, ezenzekayo, nezizakwenzeka, ngaba izinto azimele zenzeke kanye ngendlela uThixo azibone ngayo kusengaphambili? Ukuba uThixo uye wabona waze wamisela kusengaphambili indlela nesiphelo somntu ngamnye, ngaba ngokwenene kunokuthiwa sikhululekile ukuzikhethela indlela esinokuphila ngayo, nekamva lethu?

Sele kuziinkulungwane kushukuxwa le mibuzo. Unanamhla le mpikiswano isazenza zibe ziintlaba zahlukane iinkonzo ezinkulu eziliqela. Ngaba ukwazi kukaThixo kusengaphambili okuza kwenzeka kunokunxulunyaniswa nenkululeko yomntu yokuzikhethela? Sinokuzifumana phi iimpendulo kule mibuzo?

Izigidi zabantu emhlabeni ziya kuvuma ukuba uThixo uye wanxibelelana noluntu ngeLizwi lakhe elibhaliweyo awalidlulisela ngezithethi zakhe, abaprofeti. Ngokomzekelo, iKoran ithi izityhilelo zivela kuThixo: iTaurāh (iTorah, uMthetho, okanye iincwadi ezintlanu zikaMoses), iZabūr (IiNdumiso), neInjīl (incwadi yeVangeli, iZibhalo zamaKristu zesiGrike, okanye “iTestamente Entsha”), kwakunye nezinto ezazityhilelwe abaprofeti bakwaSirayeli.

KwiZibhalo zamaKristu zesiGrike, sifunda oku: “Sonke iSibhalo siphefumlelwe nguThixo kwaye siyingenelo ekufundiseni, ekohlwayeni, ekubekeni izinto ngokuthe tye.” (2 Timoti 3:16) Licace mhlophe elokuba, naluphi na ukhokelo okanye inkcazelo esiyifumanayo ifanele ukuba ibe ivela kuThixo ngokwakhe. Ngoko ke, ngaba bekungayi kuba bubulumko ukuhlolisisa incwadi zabaprofeti bakaThixo bamandulo? Zityhila ntoni ngekamva lethu?

Ikamva Limiselwe Kusengaphambili

Nabani na okhe wazifunda iZibhalo Ezingcwele uyazi ukuba ngokwenene ziqulethe amakhulu eziprofeto. Iziganeko ezingokwembali ezinjengokuwa kweBhabhiloni, ukwakhiwa kwakhona kweYerusalem (ngenkulungwane yesithandathu ukusa kweyesihlanu Ngaphambi kweXesha Eliqhelekileyo), ukuqalisa nokuwa kokumkani wamandulo wamaMedi namaPersi nowaseGrisi konke oko kwakuxelwe kwangaphambili ngokweenkcukucha. (Isaya 13:17-19; 44:24–45:1; Daniyeli 8:1-7, 20-22) Ukuzaliseka kwezo ziprofeto bobunye ubungqina obunokuthenjwa bokuba ngokwenene iZibhalo Ezingcwele ziliLizwi likaThixo, kuba uThixo unamandla okubona kusengaphambili ibe uyakwazi oko kuza kwenzeka kwikamva. Ngale ndlela iZibhalo Ezingcwele ngokwenene zinengxelo yezinto zexesha elizayo ezibhalwe phantsi kusengaphambili.

UThixo uvakalisa oku: “NdinguThixo, akukho wumbi; ndinguThixo, akukho namnye unjengam; ukuxelayo kwasekuqaleni okungasemva, nakwabamandulo okungekenzeki, ndisithi, Icebo lam liya kuma, ndikwenze konke ukuthanda kwam; . . . nditshilo, ewe, ndiya kukufeza; ndiyilile, ewe, ndiya kukwenza.” (Isaya 46:9-11; 55:10, 11) Igama awazazisa ngalo uThixo kubaprofeti bakhe bamandulo lelithi Yehova, ngokoqobo elithetha “Ubangela Kubekho.”a (Genesis 12:7, 8; Eksodus 3:13-15; INdumiso 83:18) UThixo uzityhila enguLowo uba nguMzalisekisi welizwi lakhe, lowo uziphumezayo iinjongo zakhe.

Ngaloo ndlela, uThixo usebenzisa amandla akhe okwazi kusengaphambili ukuphumeza iinjongo zakhe. Ngokufuthi uye wawasebenzisa ekulumkiseni abangendawo ngomgwebo ozayo nokunika abakhonzi bakhe ithemba lokusinda. Kodwa ngaba uThixo usebenzisa la mandla ngendlela engenamda? Ngaba bukho ubungqina kwiZibhalo Ezingcwele bezinto uThixo aye wakhetha ukungazazi kusengaphambili?

Ngaba UThixo Uyazi Kusengaphambili Yonke Into?

Zonke iingxubusho ezixhasa ukumiselwa kusengaphambili zisekelwe kuqikelelo lokuba ekubeni uThixo ngokungenakukhanyelwa enamandla okwazi kusengaphambili aze aziqonde iziganeko zingekenzeki, umele azi kusengaphambili ngayo yonke into, kuquka izenzo zomntu ngamnye. Noko ke, ngaba olu qikelelo luyinyaniso? Oko uThixo akutyhilayo kwiZibhalo Ezingcwele kwahlukile.

Ngokomzekelo, iZibhalo zithi “uThixo wamvavanya uAbraham” ngokumyalela ukuba enze idini elinyukayo ngonyana wakhe uIsake. Xa uAbraham wayesele ekulungele ukunikela uIsake njengedini, uThixo wammisa waza wathi: “Kuba ndiyazi ngoku ukuba uyamoyika uThixo; akunqabanga nonyana wakho kum, emnye kuwe.” (Genesis 22:1-12, akekeliswe sithi.) Ngaba uThixo ngewayethethe loo mazwi ukuba wayesazi kusengaphambili ukuba uAbraham wayeya kuwuthobela umyalelo wakhe? Ngaba yayiya kuba luvavanyo olunyanisekileyo?

Ukongezelela, abaprofeti bamandulo bathi uThixo wathetha ngokuphindaphindiweyo ngaye ‘njengowazohlwayayo’ ngenxa yento awayeyenzile okanye awayecinga ukuyenza. Ngokomzekelo, uThixo wathi ‘wayezohlwaya [ngokusuka kwigama lesiHebhere elithi na·chamʹ] ngenxa yokuba emenze ukumkani uSawule kwaSirayeli.’ (1 Samuweli 15:11, 35; thelekisa uYeremiya 18:7-10; Yona 3:10.) Ngenxa yokuba uThixo efezekile, ezi ndinyana azinakuba zithetha ukuba uThixo wenza impazamo ngokunyula uSawule ukuba abe ngukumkani wokuqala kwaSirayeli. Kunoko, kumele ukuba zibonisa ukuba uThixo waba buhlungu ngoSawule owaphelelwa lukholo waza akathobela. Ukusebenzisa kukaThixo ibinzana elinjalo ebhekisela kuye bekungayi kuba nangqondo ukuba wayezazi kusengaphambili izenzo zikaSawule.

Kwaeli binzana libonakala kwiZibhalo zamandulo eziliqela apho, xa libhekisela kwiintsuku zikaNowa, lithi: “Wazohlwaya uYehova, ngokuba emenzile umntu ehlabathini, kwaba buhlungu kuye entliziyweni. Wathi uYehova, Ndiya kumcima umntu endimdalileyo, angabikho . . . ngokuba ndizohlwaya ngokuba ndizenzile ezo zinto.” (Genesis 6:6, 7) Kwakhona, oku kubonisa ukuba izenzo zomntu azimiselwa nguThixo kusengaphambili. UThixo wazohlwaya, wakhathazeka waza wabuhlungu kungekuba izenzo zakhe zaziyimpazamo, kodwa ngenxa yokuba ubungendawo babantu babubukhulu gqitha. UMdali wazohlwaya ngenxa yokuba kwade kwafuneka atshabalalise lonke uluntu ngaphandle kukaNowa nentsapho yakhe. UThixo uyasiqinisekisa: “Unakanye ukuba kube mnandi kum ukufa kongendawo.”—Hezekile 33:11; thelekisa iDuteronomi 32:4, 5.

Ngoko ngaba uThixo wakwazi kusengaphambili wada wakumisela ukuwela kuka-Adam esonweni, nangeentlekele oku okwakuya kuzibangela kwintsapho yoluntu? Oko sikuhlolisisileyo kubonisa ukuba oku akunakuba yinyaniso. Ukongezelela, ukuba uThixo wayekwazi kusengaphambili konke oku, wayeya kuba ngumseki wesono xa wenza umntu, yaye uThixo wayeya kuba netyala lokubangela ubungendawo nokubandezeleka kwabantu. Licacile elokuba, oku akuvisisani noko uThixo akutyhilayo ngaye eZibhalweni. UnguThixo onothando nobulungisa obuthiyileyo ubungendawo.—INdumiso 33:5; IMizekeliso 15:9; 1 Yohane 4:8.

Iindawo Ezimbini Aphelela Kuzo Umntu

IZibhalo Ezingcwele azibonisi ukuba ikamva lethu thina ngabanye lixelwa kusengaphambili ngandlel’ ithile, okanye limiselwe kusengaphambili, nguThixo. Kunoko, oko zikubonisayo kukuba uThixo uxele kusengaphambili iindawo ezimbini anokuphelela kuzo umntu. UThixo unika wonke umntu inkululeko yokuzikhethela ukuze akhethe oko liya kuba kuko ikamva lakhe. Kudala umprofeti uMoses wathi kumaSirayeli: “Ndibeke phambi kwenu ubomi nokufa, . . . nyula ke ubomi, ukuze uphile, wena nembewu yakho; ukuba umthande uYehova uThixo wakho, uliphulaphule ilizwi lakhe, unamathele kuye: ngokuba bubomi bakho; nokolulwa kweemini zakho.” (Duteronomi 30:19, 20, akekeliswe sithi.) Umprofeti kaThixo uYesu walumkisa: “Ngenani ngesango elimxinwa; ngenxa yokuba ibanzi yaye iphangalele indlela ekhokelela entshabalalweni, ibe baninzi abo bangena ngayo; kanti limxinwa isango kwaye imxinwa indlela ekhokelela ebomini, yaye bambalwa abo bayifumanayo.” (Mateyu 7:13, 14) Zimbini iindlela, neziphelo zibini. Ikamva lethu lixhomekeke kwizenzo zethu. Ukuthobela uThixo kuthetha ubomi, ukungamthobeli kuthetha ukufa.—Roma 6:23.

UThixo “ngoku uxelela uluntu ukuba lufanele lonke kuyo yonk’ indawo luguquke. Ngenxa yokuba umise imini anenjongo ngayo yokuba agwebe umhlaba omiweyo ngobulungisa.” (IZenzo 17:30, 31) Kanye njengokuba inkoliso yabantu bexesha likaNowa yakhetha ukungamthobeli uThixo yaza yatshatyalaliswa, ngokufanayo namhlanje inkoliso ayiyithobeli imithetho kaThixo. Sekunjalo, uThixo akakenzi sigqibo sokuba ngubani oya kutshatyalaliswa nokuba ngubani oya kusindiswa. Enyanisweni, iLizwi likaThixo lithi “akanqweneli ukuba kutshabalale nabani na kodwa unqwenela ukuba bonke bafikelele enguqukweni.” (2 Petros 3:9) Kwanabantu abangendawo gqitha banokuguquka, bathobele, baze benze iinguqulelo ezifunekayo ukuze bakwazi ukwamkelwa nguThixo.—Isaya 1:18-20; 55:6, 7; Hezekile 33:14-16; Roma 2:4-8.

Kwabo bathobekileyo, uThixo uthembisa ubomi obungunaphakade kwiparadesi enoxolo, umhlaba ococwe kubo bonke ubungendawo, ugonyamelo nemfazwe, ihlabathi ekungasayi kuphinda kubekho indlala, ukubandezeleka, ukugula nokufa. (INdumiso 37:9-11; 46:9; Isaya 2:4; 11:6-9; 25:6-8; 35:5, 6; ISityhilelo 21:4) Kwanabafileyo baya kuvuswa baze banikwe ithuba lokukhonza uThixo.—Daniyeli 12:2; Yohane 5:28, 29.

Umdumisi uthi: “Gcina ogqibeleleyo, ukhangele othe tye; ngokuba izivela-mva zezomntu woxolo. Ke bona abangendawo batshatyalaliswa kuphele; izivela-mva zongendawo ziyanqanyulwa.” (INdumiso 37:37, 38) Liya kuba yintoni ikamva lakho? Konke oko kuxhomekeke kuwe. Abapapashi beli phephancwadi baya kukuvuyela ukudlulisela kuwe inkcazelo eyongezelelekileyo ukuze ukwazi ukuzifumanela ikamva elonwabisayo nelinoxolo.

[Imibhalo esemazantsi]

[Amagama acatshulweyo akwiphepha 6]

UThixo usebenzisa amandla akhe okwazi kusengaphambili ukuphumeza iinjongo zakhe

[Amagama acatshulweyo akwiphepha 8]

UThixo “akanqweneli ukuba kutshabalale nabani na kodwa unqwenela ukuba bonke bafikelele enguqukweni.”

2 Petros 3:9

[Umfanekiso okwiphepha 7]

Ukuba uThixo wayesazi kusengaphambili ukuba uAbraham wayeya kukulungela ukunikela ngonyana wakhe, ngaba yayiya kuba luvavanyo olunyanisekileyo?