Abantu Abaselula Bayabuza

Ndingenza Njani Ukuze Ndikuthande Ukufunda IBhayibhile?

Uyifunda kangaphi iBhayibhile? (Faka uphawu)

□ Yonk’ imihla

□ Veki nganye

□ Ezinye․․․․․

Gqibezela esi sivakalisi silandelayo.

Ndidla ngokungakuthandi ukufunda iBhayibhile xa . . . (Faka uphawu)

□ Ndingenamdla

□ Ndididekile

□ Ndiphazamisekile

□ Ezinye․․․․․

NGABA akukuthandi ukufunda iBhayibhile? Ukuba kunjalo, mhlawumbi uyavumelana noWill oneminyaka eli-18 ubudala, othi, “IBhayibhile isenokuba yindinisa.” Sekunjalo uthi: “Oko kunokubangelwa kukungayazi indlela yokuyifunda.”

Kutheni ufanele uyiqonde indlela yokufunda iBhayibhile? Ngaba ungathanda ukukwazi

◼ ukwenza izigqibo ezifanelekileyo?

◼ ukuba nabahlobo bokwenene?

◼ ukuhlangabezana noxinezeleko?

IBhayibhile inamacebiso aluncedo ngale mibandela neminye. Ukufumana la macebiso kufuna umgudu. Kodwa ukuze uwafumane kufana nokukhangela ubuncwane: Nangona kulucelomngeni, uthi uvuye xa uye wabufumana!—IMizekeliso 2:1-6.

Unokubufumana njani ubuncwane eBhayibhileni? Ibhokisi esekunene ichaza indlela yokufunda iBhayibhile yaye ibhokisi ekwiphepha elilandelayo ichaza izinto ongakhetha ukuqala ngazo xa uyifunda. Kwakhona, zama la macebiso alandelayo kwiphepha elilandelayo abangel’ umdla kuwe.

Amanye amanqaku athi “Abantu Abaselula Bayabuza” afumaneka kwiWeb site ethi www.watchtower.org/ype

Ukuba uneInternet, unako ukuyifunda iBhayibhile kwiWeb site ethi www.watchtower.org/e/bible

OMELE UCINGE NGAKO

Kusoloko kusithiwa uzuza okungakumbi ngenxa yegalelo oba nalo.

◼ Ayinyaniso kangakanani la mazwi xa kufikelelwa ekufundeni iBhayibhile?

◼ Unokuzenzela njani ixesha lokufundisisa iBhayibhile?

[Ibhokisi/Umfanekiso okwiphepha 23]

INDLELA YOKUFUNDA IBHAYIBHILE

Ngaphambi kokuyifunda . . .

◼ Qiniseka ukuba indawo oza kufundela kuyo ayinaziphazamiso ukuze ukwazi ukunikela ingqalelo.

◼ Thandazela ukuyiqonda.

Njengokuba uyifunda . . .

◼ Sebenzisa imaphu nemifanekiso yezinye iingxelo zeBhayibhile ukuze zikuncede ube nomfanekiso-ngqondweni wazo.

◼ Cinga ngezinto ezenzekayo, uze uqwalasele iinkcukacha.

◼ Qwalasela imibhalo esemazantsi neseludinini.

◼ Zibuze imibuzo, enjengale:

OKO UKUFUNDAYO: Kwenzeka nini oku? Ngubani owayethetha la mazwi? Ayebhekiswa kubani?

INTSINGISELO: Ndingamcacisela njani omnye umntu oku?

INJONGO: Kutheni uYehova uThixo eyifakile le ngxelo eLizwini lakhe? Ibonisa ntoni ngobuntu bakhe okanye indlela azenza ngayo izinto? Yintoni endiyifundayo kuyo?

Emva kokuyifunda . . .

◼ Yenza uphando olungakumbi. Sebenzisa iincwadi ezipapashwe ngamaNgqina kaYehova, njengeInsight on the Scriptures nethi “Sonke Isibhalo Siphefumlelwe NguThixo Kwaye Siyingenelo,” ukuba ziyafumaneka ngolwimi lwakho.

◼ Thandaza kwakhona. Mxelele uYehova oko ukufundileyo nendlela oza kukusebenzisa ngayo. Mbulele ngeLizwi lakhe, iBhayibhile.

[Ibhokisi/Umfanekiso okwiphepha 24]

UZA KUQALA NGAPHI UKUFUNDA IBHAYIBHILE?

Iindlela ezahlukahlukeneyo zokuyifunda . . .

□ Yiqale ekuqaleni uyokuyiqhina ekugqibeleni.

□ Funda iincwadi zeBhayibhile ngokulandelelana kwexesha ezabhalwa ngalo okanye ngokulandelelana kweziganeko.

□ Suku ngalunye funda inxalenye eyahlukileyo.

NgoMvulo: Funda imbali ebangel’ umdla (Ukususela kwiGenesis ukusa kuEstere)

NgoLwesibini: Funda ngobomi bukaYesu neemfundiso zakhe (Ukususela kuMateyu ukusa kuYohane)

NgoLwesithathu: Funda ngamaKristu Okuqala (IZenzo)

NgoLwesine: Funda ngeziprofeto nemilinganiselo yokuziphatha (Ukususela kuIsaya ukusa kuMalaki, kwakunye neSityhilelo)

NgoLwesihlanu: Funda ngemibongo neengoma (UYobhi, IiNdumiso, INgoma yazo iingoma)

NgoMgqibelo: Funda ngobulumko (IMizekeliso, INtshumayeli)

NgeCawa: Funda iileta ezazisiya emabandleni (Ukususela kwabaseRoma ukusa kuYude)

Nayiphina indlela oyikhethayo, qiniseka ukuba uyakhumbula apho uphele khona! Yenza olu phawu ✔ kwisahluko ngasinye osigqibileyo, okanye zenzele ingxelo yezahluko ozifundileyo.

Sika le bhokisi, uze uyifake kwiBhayibhile yakho!

[Ibhokisi/Umzobo okwiphepha 24]

ZENZE ZIPHILE IZIBHALO!

Zibandakanye koko ukufundayo. Ngokomzekelo:

□ Bhala phantsi umlibo wokuzalwa woludwe lwamagama abantu.

□ Zenzele izicangca. Ngokomzekelo, njengoko ufunda ngabantu abathembekileyo, nxulumanisa iimpawu nezenzo zabo kunye neentsikelelo abazifumanayo.—IMizekeliso 28:20.

[Umzobo]

Umhlobo KaThixo

↑ Ukuthobela

↑ Ukuthembeka

↑ ↑

UAbraham

□ Zoba imifanekiso ebonisa oko ukufundileyo kuloo ngxelo.

□ Zoba neminye imifanekiso elula ebonisa indlela iziganeko ezithile ezilandelelana ngayo. Cacisa oko kwenzekayo kumfanekiso ngamnye.

□ Zakhele izakhiwo ezincinane ezifuzisela izakhiwo ezithile, njengomkhombe kaNowa.—Ngokomzekelo, funda uVukani! kaJanuwari 2007, kwiphepha 22.

□ Funda ngokuvakalayo nabahlobo okanye amalungu entsapho. Icebiso: Yabela umntu omnye afunde ibali. Abanye banokufunda iinxalenye zabalinganiswa.

□ Khetha ingxelo uze ubalise iindaba ngayo. Chazela abanye ngeso siganeko ngokuthi wenze “udliwano-ndlebe” nabalinganiswa abaphambili namangqina aziboneleyo.

□ Funda ingxelo yomlinganiswa owathabatha ikhondo elingelolabulumko uze ucinge ngoko bekuya kwenzeka ukuba wayethabathe ikhondo elahlukileyo! Ngokomzekelo, cinga ngoPetros owakhanyela uYesu. (Marko 14:66-72) Yiyiphi indlela eyahlukileyo uPetros awayenokusabela ngayo kuloo meko?

□ Bukela okanye uphulaphule imidlalo yeBhayibhile erekhodiweyo.

□ Zibhalele owakho umdlalo. Bandakanya izifundo ezinokufundwa kuloo ngxelo.—Roma 15:4.

ICEBISO: Wudlale lo mdlalo kunye nabahlobo bakho.

[Ibhokisi/Umfanekiso okwiphepha 25]

IZINTO EZINOKUKUKHUTHAZA

◼ Zibekele usukelo! Bhala ngezantsi usuku ofuna ukuqala ngalo ufundo lwakho lweBhayibhile.

․․․․․

◼ Khetha inxalenye yeBhayibhile onomdla kuyo. (Funda ibhokisi ethi “Uza Kuqala Ngaphi Ukufunda IBhayibhile?”) Wandule ke ubhale ngezantsi inxalenye ofuna ukuyifunda kuqala eBhayibhileni.

․․․․․

◼ Qala ngokufunda inxalenye emfutshane. Kubhetele ukuyifunda imizuzu eli-15 iBhayibhile, kunokungayifundi kwaphela. Bhala ngezantsi ixesha ofuna ukulisebenzisela ukufunda.

․․․․․

Icebiso: Yiba neBhayibhile oyisebenzisela ukufunda kuphela. Bhala kuyo amanqaku. Krwelela iindinyana ezinentsingiselo ekhethekileyo kuwe.

[Ibhokisi/Imifanekiso ekwiphepha 25]

OKO KUTHETHWA NGOONTANGA BAKHO

“Ndiye ndizame ukufunda iindinyana ezimbalwa zeBhayibhile ngaphambi kokuba ndilale. Oku kundenza ndibe nento yokucinga njengoko ndilala.”—UMegan.

“Ndiye ndihlolisise indinyana enye kangangemizuzu eli-15. Ndifunda yonke imibhalo esemazantsi, iimbekiselo eziseludinini ndenze nophando. Ngamanye amaxesha andikugqibi ukufunda ngendinyana enye, kodwa ndizuza lukhulu xa ndisebenzisa le ndlela!”—UCorey.

“Ngesinye isihlandlo, ndayifunda iBhayibhile ngeenyanga ezili-10. Andizange ndiphawule indlela iindinyana zeBhayibhile ezahlukahlukeneyo ezingqamana ngayo.”—UJohn.

[Ibhokisi ekwiphepha 25]

UYAZIKHETHELA!

□ Khetha isiganeko. IBhayibhile ineengxelo ezininzi ezibangel’ umdla. Zikhethele ingxelo ebangel’ umdla kuwe, uze uyifunde uyiqale ekuqaleni uyokuyiqhina ekugqibeleni.

Icebiso: Ukuze uzuze lukhulu kwingxelo ethile, funda iphepha 292 lencwadi ethi Imibuzo Yabantu Abaselula—Iimpendulo Eziluncedo, Umqulu 2, epapashwe ngamaNgqina kaYehova.

□ Khetha iVangeli. Funda uMateyu (ivangeli yokuqala eyabhalwayo), uMarko (owaziwa ngokuba nengxelo equphayo nechulumancisayo), uLuka (onikela ingqalelo ekhethekileyo kumthandazo nakumabhinqa), okanye uYohane (ogubungela oko kungakhankanywanga kwezinye iiVangeli).

Icebiso: Ngaphambi kokuba uyifunde incwadi ethile eBhayibhileni, ngokufutshane khangela inkcazelo nombhali wayo ukuze usiqonde ngakumbi isizathu sokuba loo Vangeli ibe yekhethekileyo.

□ Khetha indumiso. Ngokomzekelo:

Ukuba uziva ulilolo kwaye ungenabahlobo, funda INdumiso 142.

Ukuba udimazekile bubuthathaka bakho, funda INdumiso 51.

Ukuba uyakuthandabuza ukubaluleka kwemilinganiselo kaThixo, funda INdumiso 73.

Icebiso: Gcina uluhlu lweendumiso oye wazifunda eziye zakukhuthaza.

[Ibhokisi ekwiphepha 26]

PHANDA NZULU

◼ Cinga ngezinto ezazisenzeka apho. Phawula ixesha, indawo nezinto ekuthethwa ngazo kuloo nxalenye uyifundayo.

Umzekelo: Funda uHezekile 14:14. Wayeneminyaka emingaphi uDaniyeli xa uYehova wambalula njengomzekelo omhle kunye noNowa noYobhi?

Inkcazelo enokukunceda: UHezekile isahluko 14 sabhalwa nje kwiminyaka emihlanu emva kokuba uDaniyeli wayesekuthinjweni eBhabhiloni—kuyabonakala ukuba wayekwishumi elivisayo.

Ubuncwane obufihlakeleyo: Ngaba uDaniyeli wayeselula kakhulu ukuba angabonwa ethembekile nguYehova? Ziziphi izigqibo ezilungileyo ezakhokelela ekubeni asikelelwe? (Daniyeli 1:8-17) Umzekelo kaDaniyeli unokukunceda njani ukuba wenze izigqibo ezifanelekileyo?

◼ Qwalasela iinkcukacha. Ngamanye amaxesha kuninzi onokukuzuza kwigama elinye okanye amabini.

Umzekelo: Thelekisa uMateyu 28:7 noMarko 16:7. Kutheni uMarko wanikela iinkcukacha zokuba kungekudala uYesu wayeza kubonakala kubafundi bakhe ‘nakuPetros?’

Inkcazelo enokukunceda: UMarko wayengelilo ingqina lokuzibonela ezi ziganeko; kuyabonakala ukuba wachazelwa konke oku nguPetros.

Ubuncwane obufihlakeleyo: Kutheni uPetros waziva eqinisekile ukuba uYesu wayefuna ukumbona kwakhona? (Marko 14:66-72) UYesu wazingqina njani ukuba wayengumhlobo wokwenene kuPetros? Unokumxelisa njani uYesu yaye nawe ube ngumhlobo wokwenene kwabanye?

◼ Yenza uphando olungakumbi. Funda iincwadi ezisekelwe eBhayibhileni ukuze ufumane inkcazelo.

Umzekelo: Funda uMateyu 2:7-15. Zamtyelela nini izazi uYesu?

Inkcazelo enokukunceda: Funda IMboniselo kaJanuwari 1, 2008, iphepha 31, epapashwe ngamaNgqina kaYehova.

Ubuncwane obufihlakeleyo: Kubonakala ukuba, uYehova wayinyamekela njani ngokwezinto eziphathekayo intsapho yakuloYesu ngoxa yayiseYiputa? Ukuthembela kuThixo kunokukunceda njani ukuba uhlangabezane neemeko ezinxunguphalisayo?—Mateyu 6:33, 34.