Ndandiguqulela Ngokufihlakeleyo Iminyaka Engamashumi Amathathu
Kubalisa uOna Mockutė
NgoAprili 1962 ndandikwinkundla yamatyala eyayizele imi ngembambo eKlaipeda, eLithuania ndityatyekwa izityholo zolwaphulo-mthetho. Ngo-Oktobha wonyaka ongaphambi kwalowo ndabanjwa ndityholwa ngomsebenzi wonqulo owawugqalwa njengolwaphulo-mthetho nxamnye noRhulumente waseSoviet. Mandinichazele ngesizathu sokuba ndibanjwe ndize ndivalelwe ngenxa yokuguqulela ngokufihlakeleyo uncwadi lwamaNgqina kaYehova.
NDAZALWA ngowe-1930 kwintshona yeLithuania, kude kufuphi noLwandle lweBaltic. Ngaphambi kokuba ndizalwe, umama wayethandazele ukuba umntwana aya kumzala abe ngunongendi. Kodwa wakha wathi kum: “Ayinakwenzeka into yokuba ndiguqe phambi koSt. Peter okanye nakwesiphi na esinye isithixo esingaphiliyo.” Ngenxa yaloo nto, ndandikuphepha ukuguqa ecaweni, nangona ndandiguqa phambi komnqamlezo onomfanekiso kaYesu xa ndibuya esikolweni.
Kamva, ebudeni beMfazwe Yehlabathi II esusela ngowe-1939 ukuya kowe-1945 ndabona inkohlakalo engathethekiyo, nto leyo eyandikhathaza kakhulu. Ngenye imini ngoxa sasithinjwe ngamaJamani, ndandihamba nomakazi sichola amaqunube ehlathini. Sahamba sadibana nemingxuma emibini emikhulu eyayinegazi eliselitsha. Ukwazi nje ukuba iqela lamaYuda elaliquka abahlobo bam endandifunda nabo esikolweni, uTese noSara, babesandul’ ukubulawa, kwasenza saqonda ukuba kumele ukuba ngala mangcwaba babegalelwe kuwo la. Ndothukile, ndakhwaza ndisithi: “Thixo, ulunge gqitha! Kodwa uyivumela njani inkohlakalo enje?”
Ngowe-1949, ndaphumelela kwisikolo samabanga aphakamileyo eKlaipeda esasikufutshane nasekhaya, ndaza ndaqhubeka ndifundela umculo. Ngowe-1950 ngokufihlakeleyo ndaba lilungu lombutho wabafundi wezobupolitiko kodwa akuzange kube kudala ndangcatshwa ndaza ndabanjwa kunye nabanye abali-12. Ndandivalelwe kwintolongo yaseKlaipeda yaye kulapho ndaqala khona ukudibana nelinye iNgqina likaYehova.
Ndafunda Inyaniso EseBhayibhileni
Kwangena ibhinqa elalisele liqinile lityhalwa kwisisele esasikuso. Lasincumela ngobubele sonke thina mabhinqa asixhenxe aselula awayekweso sisele. Ndalibuza: “Yhazi sisi, amabanjwa adla ngokufika apha ethe khunubembe kodwa wena uncumile! Ungasichazela isizathu sokuba ulapha?”
“Kungenxa yenyaniso,” laphendula ngelitshoyo.
Ndalibuza: “Kodwa yintoni inyaniso?”
Igama leli bhinqa yayinguLydia Peldszus. WayeliJamani elalibanjelwe ukuba liNgqina likaYehova. Saxubusha gqitha nalo ngeBhayibhile. Inyaniso eseBhayibhileni awayesifundisa yona uLydia ayizange iphelele ekutshintsheni ubomi bam, kodwa yanceda namabhinqa amathathu esasihlala nawo kweso sisele.
Indlela Ulwazi Lwam NgeBhayibhile Olwakhula Ngayo
Ngenxa yokubandakanyeka kwam ngokufihlakeleyo kwezobupolitika nxamnye norhulumente waseSoviet, ndagwetywa iminyaka engama-25 entolongweni ndaza ndachitha eminye emihlanu elubhacweni. Ukudibana namaNgqina ngoxa ndandiman’ ukubanjwa nokusebenza kwiinkampu zaseSiberia, kwandenza ndamazi ngakumbi uThixo neenjongo zakhe. Kanye njengoko kwenzeka kuLydia, la maNgqina aye ohlwaywa ngenxa yeenkolelo zawo.
Ukongezelela kulwazi lam olungakumbi ngeBhayibhile, ndashumayela nakwabanye. Nangona ndandingazange ndilifumane ithuba lokuba ndibonise ukuzinikela kwam kuThixo ngokubhaptizwa, amanye amabanjwa ayendigqala njengeNgqina likaYehova. Emva kokuthothoza iminyaka esibhozo entolongweni, ndakhululwa ngowe-1958. Ndabuyela eLithuania sele ndinempilo enkenenkene, kodwa ndinokholo olomeleleyo kuYehova.
Ndaqalisa Ukuguqulela Ngokufihlakeleyo
Ngelo xesha ke, ayembalwa kakhulu amaNgqina aseleyo eLithuania. Amanye ayebanjiwe ngoxa amanye ayethunyelwe eSiberia. Ngowe-1959, amaNgqina amabini abuyela eSiberia aza acebisa ukuba ndiguqulele iimpapasho zethu zeBhayibhile ngesiLithuania. Ndakuvuyela ukwenza oko ndaza ndakugqala njengelungelo.
Ndaqalisa ukuguqulela ngoMatshi 1960, yaye ngoJulayi ndabhaptizwa ngokufihlakeleyo kuMlambo iDubysa. Ngenxa yokutshutshiswa yiKGB (Soviet State Security Committee [iKomiti Yezokhuselo Karhulumente waseSoviet]), kwakunzima ukufumana umsebenzi wokuzixhasa, ngoko ndahlala nabazali bam, ababengenangxaki nonqulo lwam. Ndandisalusa iinkomo zikabawo nezabanye abamelwane. Ngoxa ndandisalusa, ndandikwaguqulela. Ndandineofisi entle, ndihlala kwisikhondo somthi yaye ndingqongwe yingca eluhlaza. Uphahla lwalusisibhakabhaka yaye idesika ilithanga lam.
Noko ke, ndaqonda ukuba ukusebenzela emadlelweni akukhuselekanga ekubeni kwakunokundibhaqisa ngamagosa noontamnani beKGB. Ndathi ndakufumana iindawo zokuzimela endandinokusebenzela kuzo, ndemka ekhaya. Maxa wambi wawunokufika kukho imfuyo eshedini uze xa ujonga kwelinye icala ubone mna ndixakekile ngumatshini wam wokuchwetheza.
Ndandisebenza emini, kuba kwakungekho mbane. Ngelokuzama ukugqumelela ukuxhaxhaza komatshini wokuchwetheza, kwakukho iphiko elalingxola ngaphandle. Kwakuthi kwakuba mnyama ndingene endlwini ndiyokutya. Emva koko ndandibuyela eshedini ndize ndilale phezu kwefula.
Ngo-Oktobha 1961, ndabanjwa namanye amaNgqina amabini xa wabhaqwayo umsebenzi wam wonqulo. Yiloo nto ke eyabangela ukuba ndibe kwinkundla endithethe ngayo yowe-1962 ekuqaleni kweli nqaku. Abasemagunyeni basivumela ukuba sizithethelele phambi kwabantu abaninzi, ibe salivuyela elo thuba kuba sasiza kunikela ubungqina kwabo bantu. (Marko 13:9) Ndagwetywa iminyaka emithathu ndaza ndaya kuvalelwa kwintolongo yaseTallinn, e-Estonia. Ngokolwazi lwam, ngelo xesha yayindim kuphela owayebanjwe ngenxa yonqulo. Ndatyelelwa ngabaphathi besixeko, yaye ndashumayela kubo.
Ndaphinda Ndaqalisa Ukuguqulela
Emva kokukhululwa entolongweni e-Estonia ngowe-1964, ndabuyela eLithuania. Apho ndaqhubeka ndiguqulela iimpapasho zethu ukusuka kwisiRashiya ndizisa kwisiLithuania. Wawumninzi umsebenzi endandiwenza. Nangona ndandincediswa ngabanye abaguquleli, ubukhulu becala yayindim umguquleli wesiLithuania owayesebenza ixesha elizeleyo. Ndandisebenza iveki yonke ndiqala ukuphuma kwelanga de litshone. Ngaphandle koncedo lukaYehova ngendandingazange ndikwazi ukuwuphumeza.
Ngenxa yokuba ndandiyazi indlela obaluleke ngayo lo msebenzi, ndandisoloko ndizama ukulumka. Abazalwana noodade abangamaKristu babedla ngokubeka bona neentsapho zabo esichengeni, ngokundifihla, bandondle baze bandikhusele. Uncedo lwabo lwasenza samanyana nangakumbi. Ngoxa ndandisebenza, intsapho endandihlala nayo yayijonga abantu abanokundixela. Ngelokundilumkisa babeye babethe kabini imibhobho yamanzi ashushu ngentsimbi. Emva kokuba ndive eso silumkiso ndandikhawuleza ndifihle kwanto ebendiyenza.
Ukuba sifumanise ukuba indlu endisebenzela kuyo ibekw’ esweni, ndandikhawuleza ndifudukele kwenye indawo. Ngezo mini kwakulityala ukuba nomatshini wokuchwetheza ngaphandle kwemvume, ngoko ke omnye umntu wayewuthatha awuse kwindawo entsha endandiza kusebenzela kuyo. Ngoko, ndandidla ngokuhamba ngobusuku ukuya kuloo ndawo intsha.
Ngenene uYehova wandikhusela. Nangona ayengenabungqina, amagosa ayekwazi oko ndandikwenza. Ngokomzekelo ngowe-1973, xa amaNgqina kaYehova asibhozo ayesenkundleni, umtshutshisi wandibiza nam ukuza kundincina. Wandibuza ngeliphandle esithi, “Mockutė, zingaphi iimpapasho osele uzishicilele kuyo yonke le minyaka?”
Ndamxelela ukuba andinakukwazi ukuwuphendula loo mbuzo. Waza wandibuza, “Ngoko ke nguwuphi umbuzo oza kuwuphendula?”
Ndaphendula ndathi, “Umbuzo endiza kuwuphendula ngongenanto yakwenza nalo msebenzi.”
Izinto Zatshintsha
Yathi xa isiya ngasekupheleni iminyaka yee-1980, zaqalisa ukutshintsha izinto eLithuania. Kwakungaseyomfuneko ukuzimela amagosa karhulumente. Ngoko ngowe-1990 nabanye baqalisa ukuguqulela. Kwathi ngoSeptemba 1, 1992 kwasekwa iofisi encinane eKlaipeda, isixeko endaphela sele ndihlala kuso.
Lilonke ndiguqulele kangangeminyaka engama-30 kwiindawo ezili-16. Andizange ndibe nandlu. Kodwa ndivuya ngeyona ndlela xa ndibona imiphumo yomsebenzi wethu! Sithethanje kukho amaNgqina kaYehova amalunga nama-3 000 eLithuania. Nalo msebenzi ndandiwenzela emfihlakalweni ezishedini nakumagumbi aphezulu, sele usenziwa ngokukhululekileyo kwiofisi yesebe eseLithuania kufutshane nesixeko saseKaunas.
Ndisayikhumbula nangoku into eyenzeka kwesa sisele sibandayo malunga neminyaka angama-60 eyadlulayo eKlaipeda. Loo nto yabutshintsha ubomi bam! Ndakuhlala ndimbulela uMdali wethu omkhulu uYehova ngokufumana inyaniso ephathelele yena neenjongo zakhe, nesibakala sokuba ndahlulele ubomi bam ukuze ndenze ukuthanda kwakhe.
[Amagama acatshulweyo akwiphepha 13]
Inyaniso eseBhayibhileni awayesifundisa yona uLydia ngoxa sasivalelwe yatshintsha ubomi bethu sobane
[Umfanekiso okwiphepha 12]
Ityala lam laphuma phambili kwiphephandaba laseSoviet ngowe-1962
[Umfanekiso okwiphepha 14, 15]
Nazi ezinye iincwadi ezisekelwe eBhayibhileni endaziguqulela ndisesichengeni sokubanjwa
[Umfanekiso okwiphepha 15]
ULydia wandifundisa inyaniso eseBhayibhileni ngoxa sasisentolongweni
[Umfanekiso okwiphepha 15]
La maNgqina mabini (asekhohlo) andifundisa okungakumbi ngoThixo ngoxa ndandibanjiwe kwinkampu yaseKhabarovsk, eRashiya, ngowe-1956
[Umfanekiso okwiphepha 15]
Umatshini wokuchwetheza endandiwusebenzisa ngoxa umsebenzi wethu wawuvaliwe