Ndaloyisa Ucelomngeni Lokukhonza UThixo

KUBALISA UIVAN MIKITKOV

“Ukuba uza kuhlala kule dolophu yethu, uza kuphinda uye kuthothoza ngaphaya kwezitshixo,” landilumkisa ngelitshoyo igosa leSoviet State Security Committee (iKGB). Ndandisandul’ ukukhululwa emva kokuthothoza iminyaka eli-12 entolongweni. Utata nomama babegulela ukufa ngoko kwakufuneka ndiye kubonga. Ndandiza kuthini kwimeko enjalo?

NDAZALWA ngowe-1928 kwidolophana yaseT̩aul, eMoldova.a Xa ndandinonyaka ubudala, utata, uAlexander, watyelela eIas̩i, eRomania, apho wadibana khona naBafundi beBhayibhile, njengokuba amaNgqina kaYehova ayebizwa njalo ngoko. Ukubuyela kwakhe eT̩aul, wathetha nentsapho nabamelwane bakhe ngoko wayekufundile. Kungekudala kwasekwa iqela elincinane laBafundi beBhayibhile eT̩aul.

Ekubeni ndandingowokugqibela kubantwana abane—sonke singamakhwenkwe—ukususela ebusaneni ndandihlala nabantu abaxunele kwizinto zokomoya, abaye bandimisela umzekelo omhle. Kwasebutsheni lalizicacele elokuba ukukhonza uYehova kwakuza kuvusa inkcaso—nto leyo ekungelula ukujamelana nayo. Ndikhumbula kakuhle amapolisa efika ngokuphindaphindiweyo egqogqa indlu yasekhaya, ekhangela uncwadi lweBhayibhile. Ezo zihlandlo azizange zindinkwantyise. Kwisifundo sethu seBhayibhile ndafunda ukuba uNyana kaThixo, uYesu Kristu, nabalandeli bakhe, batshutshiswa. Ebudeni beentlanganiso sasisoloko sikhunjuzwa ukuba abalandeli bakaYesu bafanele bayilindele intshutshiso.—Yohane 15:20.

Somelezwa Ukuze Simelane Nentshutshiso

Ngowe-1934, xa ndandineminyaka emithandathu kuphela ubudala, kwafundwa ileta ebandleni lethu laseT̩aul isixelela ngokubandezeleka kwamaKristu kwiJamani yamaNazi. Sakhuthazwa ukuba siwathandazele. Nangona ndandiselula kakhulu, zange ndiyilibale loo leta.

Kwiminyaka emine kamva ukuthembeka kwam kwavavanywa. Ebudeni bezifundo zonqulo esikolweni, umfundisi wamaOthodoki ngokuphindaphindiweyo wandiyalela ukuba ndinxibe umnqamlezo emqaleni. Xa ndakukhaba ngaw’ omane oko, wacela bonke abanye abantwana eklasini ukuba banxibe eyabo iminqamlezo njengomqondiso wokuba bangamalungu ecawa azinikeleyo. Esalatha kum, lo mfundisi wabuza iklasi esithi: “Ngaba niyamfuna umntu onjengaye eklasini yenu? Bonke abangamfuniyo, phakamisani izandla.”

Ekubeni abafundi babemoyika umfundisi, bonke baphakamisa izandla. Ethetha nam wathi: “Uyabona, akukho mntu ufuna ukuzidibanisa nawe. Phum’ uphele apha ngokukhawuleza.” Emva kweentsuku ezimbalwa, inqununu yasesikolweni yafika ekhaya. Emva kokuba ithethe nabazali bam, yandibuza enoba ndandifuna ukuqhubeka ndisiya esikolweni kusini na. Ndayixelela ukuba ndiyafuna. Yaphendula yathi: “Ngoxa ndiseyinqununu uza kuya esikolweni yaye umfundisi akanakukuyekisa.” Yakugcina oko yayikuthethile, umfundisi akazange aphinde andikhathaze.

Intshutshiso Iyanda

Ngowe-1940 ummandla esasihlala kuwo, owawubizwa ngokuba yiBessarabia, waba yinxalenye yeSoviet Union. NgoJuni 13-14, 1941, bonke abo bangamaqhaji kwezobupolitika nakwezentlalo banikwa uphum’ aphele basiwa eSiberia. AmaNgqina kaYehova akazange achaphazeleke koko. Noko ke, ukususela ngelo xesha besiziqhuba iintlanganiso zethu yaye sishumayela ngobulumko.

Ngasekupheleni kukaJuni 1941, iJamani yamaNazi yahlasela iSoviet Union ingalindelanga, ilizwe elalilihlakani layo ukuza kuthi ga ngelo xesha. Kungekudala emva koko, imikhosi yamaRoma yayithimba kwakhona iBessarabia. Oko kwaphumela ekubeni siphinde sibe phantsi kolawulo lwaseRomania.

Kwiidolophana ezikufuphi amaNgqina angafuniyo ukuya emkhosini abanjwa yaye uninzi lwawo lwagwetywa iminyaka engama-20 lusebenza ezinkampini. Utata wabizelwa kwisikhululo samapolisa yaye wabethwa kanobom kuba nje eliNgqina. Nam ndathatyathwa ngenkani esikolweni ndasiwa ecaweni.

Izinto zatshintsha ebudeni beMfazwe Yehlabathi II. NgoMatshi 1944 amaSoviet ngokukhawuleza awuthimba umntla weBessarabia. Wath’ ebetha uAgasti abe sel’ elithimbe lonke elo lizwe. Ndandiphakathi kwiminyaka yeshumi elivisayo kuphela ubudala ngelo xesha.

Ngokukhawuleza, onke amadoda asempilweni kwidolophana endandihlala kuyo abizelwa emkhosini ngamaSoviet. Kodwa amaNgqina akazange avume. Ngenxa yoko agwetywa iminyaka elishumi entolongweni. NgoMeyi 1945, IMfazwe Yehlabathi II eYurophu yaphela xa iJamani yanikezelayo. Sekunjalo, amaNgqina amaninzi eMoldova avalelwa entolongweni de kwangowe-1949.

Iinkxwaleko Emva Kwemfazwe

Emva kokuba imfazwe iphelile ngowe-1945, iMoldova yathwaxwa yimbalela. Nangona kwakukho imbalela, urhulumente waseSoviet wanyanzela amafama ukuba amnike eyona nxalenye inkulu yemveliso ngalo ndlela ehlawula irhafu. Le nto yabangela indlala ebomvu. Ngowe-1947, kwakuqungquluze izidumbu kwizitrato zaseT̩aul. Umntakwethu uYefim wafa, yaye kangangeveki eziliqela ndandibuthathaka ngenxa yendlala, kangangokuba kwakunzima nokuhamba. Kodwa indlala yaphela, yaye amaNgqina awayesaphila aqhubeka eshumayela esidlangalaleni. Ngoxa ndandishumayela ngasekhaya, umkhuluwa wam uVasile, owayemdala kum ngeminyaka esixhenxe, wayeshumayela kwiidolophana ezikufutshane.

Njengoko amaNgqina ayeshumayela ngenzondelelo, abasemagunyeni baqalisa ukuwaphawula. Ukushumayela nokungavumi kwethu ukuba nenxaxheba kwezobupolitika okanye ukungavumi ukuya emkhosini, kwambangela urhulumente waseSoviet waqalisa ukugqogqa amakhaya ethu ekhangela uncwadi lweBhayibhile ibe wasibamba. Ngowe-1949 amanye amaNgqina asuka kumabandla akufutshane, agxothelwa eSiberia. Ngoko ke abo basalayo kuthi kwafuneka baphinde balumke xa beshumayela.

Ngelo xesha impilo yam yayiqalise ukuba nkenenkene yaye yaya isiba mbi nangakumbi. Ekugqibeleni oogqirha bathi ndinesifo sephepha esihlasela amathambo, yaye ngowe-1950 umlenze wam wasekunene wafakwa isamente.

Ukugxothelwa ESiberia

NgoApril 1, 1951, umlenze wam usenesamente, mna nentsapho yakowethu sabanjwa, yaye sikunye namanye amaNgqina, sasiwa eSiberia.b Ekubeni sasingenaxesha lingako lakulungiselela, saphatha ukudla okuncinane. Kungabanga thuba lide kwaphela oko kutya.

Ekugqibeleni, emva kweeveki ezinokuba mbini sikuloliwe, safika eAsino, kwisithili saseTomsk. Apho sothulwa ngokungathi kothulwa iinkomo. Nangona kwakubanda kakhulu, kwakuvuyisa ukufumana umoya ohlaziyayo. NgoMeyi, xa umkhenkce osemlanjeni wawuqalisa ukunyibilika, sahamba ngenqanawa iikhilomitha ezili-100 sisiya eTorba, apho kwakukho inkampu enemithi egawulweyo kumahlathi eSiberia. Apho saqalisa isigwebo sethu sokusebenza nzima—yaye saxelelwa nokuba siza kuhlala apho ngonaphakade.

Nakuba ukusebenza nzima kwinkampu yemithi kwakungafani nokuba sentolongweni, ngalo lonk’ ixesha sasisoloko sigadiwe. Ebusuku, thina njengentsapho sasilala sonke ekharejini. Ebudeni belo hlobo sakha izindlu—amaxobongwana nje anamagumbi angaphantsi nangaphezulu emhlabeni—ukuze asikhusele ebudeni bobusika obabusiza.

Ngenxa yesamente eyayisemlenzeni, ndasinda ekusebenzeni emahlathini, kwathiwa mandenze izikhonkwane. Lo msebenzi wandivulela ithuba lokushicilela ngokufihlakeleyo imibhalo yephephancwadi IMboniselo nezinye iimpapasho zeBhayibhile. Ezi mpapasho zazithutyeleziswa rhoqo kwindawo esasihlala kuyo zisuka entshona Yurophu, ekumawaka eekhilomitha.

Ukubanjwa Nokuvalelwa Entolongweni

Ngowe-1953 isamente eyayisemlenzeni wam yasuswa. Kodwa, ngelo xesha, nangona ndandizama ukuba ndingabhaqwa, umsebenzi wam wezinto zokomoya, oquka ukuvelisa uncwadi lweBhayibhile, wawusele uphawulwe ngamagosa eKGB. Ngenxa yoko, ndikunye namanye amaNgqina, ekugqibeleni ndagwetywa iminyaka eli-12 ndithothoza entolongweni. Noko ke, ebudeni bokuthethwa kwetyala, sonke sakwazi ukushumayela gqitha ngoThixo wethu, uYehova, nangeenjongo zakhe zothando ngoluntu.

Ekugqibeleni thina mabanjwa sathunyelwa kwiinkampu ezahlukahlukeneyo kufuphi naseIrkutsk, umgama oziikhilomitha ezingamakhulukhulu ngasempuma. Ezi nkampu zazenzelwe ukohlwaya abo kwakucingwa ukuba baziintshaba zikaRhulumente waseSoviet. Ukususela ngoAprili 8, 1954, ukusa ekuqaleni kowe-1960, ndasebenza nzima kwiinkampu ezili-12 ezahlukahlukeneyo. Emva koko ndafuduselwa kwiikhilomitha ezingaphezu kwezingama-3 000 ngasentshona kwinkampu enkulu yamabanjwa eseMordova, iikhilomitha ezinokuba ngama-400 ngakumzantsi-mpuma weMoscow. Apho ndafumana ithuba lokuba kunye namaNgqina athembekileyo asuka kwimimandla eyahlukahlukeneyo yeSoviet Union.

Amagosa aseSoviet ayeqonda ukuba xa amaNgqina evunyelwa ukuba abe kunye namabanjwa angengomaNgqina, athile kuwo aba ngamaNgqina. Ngoko ke, kwintolongo yaseMordovia eneenkampu ezininzi neyayiziikhilomitha ezingama-30 nangaphezulu ubukhulu, kwenziwa umzamo wokusahlukanisa namanye amabanjwa. AmaNgqina angaphezu kwama-400 ayevalelwe kunye kule nkampu. Kumgama oziikhilomitha ezimbalwa, oodade abangamaKristu abanokuba likhulu babekwenye inkampu kwakuloo ntolongo.

Kwinkampu endandikuyo ndandixakekile ndilungiselela ukuba kubekho iintlanganiso zamaKristu nokwenziwa kwemibhalo yoncwadi lweBhayibhile, eyayithutyeleziswa apho enkampini. Kuyabonakala ukuba abasemagunyeni bakubhaqa oko sasikwenza. Kungekudala emva koko, ngoAgasti 1961 ndagwetywa unyaka, kwintolongo endala neyayidume ngempatho-mbi ebizwa ngokuba yiVladimir Prison, kwiikhilomitha ezinokuba ngama-200 ngakumntla-mpuma weMoscow. Umqhubi wenqwelo-moya waseUnited States uFrancis Gary Powers, nowayekwinqwelo-moya eyayize kuhlola ilizwe laseRashiya eyadutyulwa yaza yawa ngoMeyi 1, 1960,, wayelibanjwa naye apho de kwangoFebruwari 1962.

Ngoxa ndandikwiVladimir Prison, ndandiphiwa nje ukutya kokundigcina ndiphila. Ndandikwazi ukujamelana nendlala, ekubeni ndandiyiqhele ndisengumntwana, kodwa ingqele yasebusika yowe-1961 ukusa kowe-1962 kwakunzima ukuyinyamezela. Imbawula yentolongo yayonakele, yaye kwakubanda gqitha. Ugqirha wayibona imeko elusizi endandikuyo waza wacela ukuba ndithunyelwe kwintolongo engabandi kangako.

Ukomelezelwa Ukuze Ndimelane Nobunzima

Iingcinga ezingakhiyo zinokumdimaza ubani emva kokuba evalelwe kangangeenyanga, ibe yiloo nto kanye amagosa entolongo ayenethemba lokuba iza kwenzeka. Noko ke, ndathandaza ngokuzingisileyo yaye uYehova wandomeleza ngomoya wakhe nangezibhalo endandikwazi ukuzikhumbula.

Ngoxa ndandikwiVladimir Prison ndawaqonda ngakumbi amazwi kampostile uPawulos athi: “Siyabandezelwa ngandlela zonke, kodwa asixineki ngokokude singabi nakushukuma; yaye siyathingaza, kodwa kungekhona ngokokude singabi nayo kwaphela indlela yokuphuma.” (2 Korinte 4:8-10) Emva konyaka, ndabuyiselwa kwinkampu yaseMordova. Kwezi nkampu, ndasigqiba isigwebo sam seminyaka eli-12 ngoApril 8, 1966. Xa ndandikhululwa, ndachazwa njengomntu “ongenakutshintshwa.” Kum, obo yayibubungqina bokuba ndiye ndahlala ndithembekile kuYehova.

Ndandisoloko ndibuzwa ukuba sasiyifumana size siyenze njani imibhalo yoncwadi lweBhayibhile ngoxa sikwiinkampu neentolongo zaseSoviet Union ekubeni sasithintelwa ukuba sikwenze oko. Leyo yimfihlelo eyaziwa ngabambalwa, ngokutsho kwebanjwa lezobupolitika laseLatvia nelachitha iminyaka emine kwinkampu eyiPotma yamabhinqa. Emva kokuba likhululiwe ngowe-1966 labhala lathi: “Nokuba iimeko zazinjani na amaNgqina ayelufumana uncwadi lube luninzi. Kwakungathi izithunywa zezulu zibhabha ngaphezulu ebusuku zize ziluphose uncwadi,” liqukumbela ngelitshoyo. Enyanisweni, kuphela yayiluncedo lukaThixo olwasenza sawufeza lo msebenzi!

Inkululeko Yokwexeshana

Emva kokuba ndikhululwe, abo bakhokelayo kumsebenzi wokushumayela bandicela ukuba ndifudukele kwintshona yeUkraine, kufuphi neMoldova, ukuya kunceda abazalwana baseMoldova. Noko ke, njengokuba ndandilibanjwa yaye ndigadiwe yiKGB, zazimbalwa izinto endandinokuzenza. Emva kweminyaka emibini, ndasongelwa ngokubuyiselwa entolongweni, ngenxa yoko ndafudukela kwiriphabliki yaseKazakhstan, eSoviet Union, apho abasemagunyeni babengafane bawahlole amaphepha-mvume. Emva koko, ngowe-1969, xa abazali bam babegula kakhulu, ndaya eUkraine ukuya kubanyamekela. Apho, kumntla wesixeko esikhulu saseDonetsk, kwidolophu yaseArtyomosk, igosa leKGB landisongela ngokundibuyisela entolongweni, njengokuba bekubonisiwe ekuqaleni kweli nqaku.

Kwathi kanti, eli gosa lalizama nje ukundoyikisa. Yayingekho into elalindimangalela ngayo. Ekubeni ndandizimisele ukuqhubeka ndishumayela, iKGB yayindigadile naphi na apho ndandisiya khona, ngoko ndaqhubeka ndinyamekela abazali bam. Bobabini uTata noMama bafa besathembekile kuYehova. UTata wafa ngoNovemba 1969, kodwa uMama waphila de kwanguFebruwari 1976.

Ndandineminyaka engama-40 ubudala ukubuyela kwam eUkraine. Ngoxa ndandinyamekela abazali bam apho, kwibandla endandikulo kwakukho ibhinqa eliselula elinguMaria. Lalineminyaka esibhozo kuphela ubudala xa lona nabazali balo banikwa uphum’ aphele eMoldova basiwa eSiberia ekuqaleni kuka-Aprili 1951, kanye njengokuba kwaba njalo ngentsapho yakowethu. UMaria wathi uyayithanda indlela endicula ngayo. Leyo yindlela obaqala ngayo ubuhlobo phakathi kwethu, yaye nangona sobabini sasixakekile kubulungiseleli, sakwazi ukuzinika ixesha lokwakha ubuhlobo. Ngowe-1970, ndameyisela ukuba sitshate.

Kungekudala kwazalwa intombazana yethu, uLidia. Ngowe-1983, xa uLidia wayeneminyaka elishumi ubudala, ndangcatshwa kwiKGB ngumntu owayesakuba liNgqina. Ngelo xesha phantse iminyaka elishumi ndandingumveleli ohambahambayo kwimpuma yeUkraine iphela. Abo babengawuthandi umsebenzi wethu njengamaKristu babekwazi ukufumana abantu abaza kungqina ubuxoki ngathi xa kuthethwa ityala, yaye ndagwetywa iminyaka emihlanu.

Entolongweni ndahlukaniswa namanye amaNgqina. Nangona ndandindedwa kangangeminyaka, kwakungekho mntu okanye nantoni na eyayinokundithintela ukuba ndithethe noYehova, yaye wayesoloko endomeleza. Ukongezelela, ndafumana ithuba lokunikela ubungqina kwamanye amabanjwa. Ekugqibeleni, emva kokuvalelwa iminyaka emine, ndakhuIulwa yaye saphinda sahlala kunye nomfazi nentombi yam, yaye babesathembekile kuYehova.

Ukubuyela EMoldova

Sachitha omnye unyaka eUkraine, saza sabuyela ngokusisigxina eMoldova apho kwakukho imfuneko yabazalwana abaqolileyo nabanamava. Ngelo xesha, urhulumente waseSoviet wayengakwaleli ukufudukela kwenye indawo. Ngowe-1988 saya eBălţi, apho uMaria wayehlala khona ngaphambi kokuba bagxothwe kwiminyaka enokuba ngama-37 eyadlulayo. Ngowe-1988 amaNgqina ayemalunga nama-375 kule dolophu iyeyesibini ngobukhulu eMoldova; ngoku angaphezu kwe-1 500! Nangona sasihlala eMoldova, ndandingumveleli ohambahambayo eUkraine.

Ngexesha lokubhaliswa ngokusemthethweni kombutho wethu eSoviet Union ngoMatshi 1991, abantu abaninzi babesele bephelelwe lithemba ngenxa yokusilela kobuKomanisi. Uninzi lwaludidekile yaye lungenalo ithemba ngekamva. Njengoko iMoldova yayisiba yiriphabliki ezimeleyo, abamelwane bethu kuquka nabo babesitshutshisa ngaphambili baqalisa ukusiphulaphula. Emva kokugxothwa kwethu ngowe-1951, ayembalwa kakhulu amaNgqina awayesele eMoldova, kodwa ngoku angaphezu kwama-18 000 kwilizwe elinabantu abazizi-4 200 000. Ukuba namava amnandi kusenze sakulibala ukubandezeleka kwethu kwixesha elidlulileyo!

Phakathi kwiminyaka yowe-1990 ngenxa yempilo kwafuneka ndiyeke ukuba ngumveleli ohambahambayo. Kubakho amaxesha xa imeko yempilo yam iye indidimaze. Kodwa, ndiyaqonda ukuba uYehova uyayazi into esiyifunayo ukuze asomeleze. Olo khuthazo lufika kanye ngexesha elifanelekileyo. Ukuba bendinokunikwa ithuba lokuqala phantsi ndiphile, ngaba bendinokukhetha enye indlela yokuphila? Akunjalo. Kunoko, ndinqwenela ukuba ngendandinenkalipho ngakumbi kubulungiseleli yaye ngendandikhuthele ngakumbi.

Ndicinga ukuba uYehova uye wandisikelela yaye bonke abakhonzi bakhe uyabasikelela kungakhathaliseki ukuba iimeko zabo zinjani na. Sinethemba eliqinisekileyo, ukholo olungagungqiyo, yaye siqinisekile ukuba kungekudala siza kuba yimiqabaqaba kwihlabathi elitsha likaYehova.

[Imibhalo esemazantsi]

[Umfanekiso okwiphepha 28, 29]

Ikhaya lethu ngoxa sasigxothelwe eTorba, eSiberia, ngowe-1953. UTata noMama (ekhohlo), nomntakwethu uVasile nonyana wakhe (ekunene)

[Umfanekiso okwiphepha 29]

Kwinkampu yentolongo, ngowe-1955

[Umfanekiso okwiphepha 31]

Oodade abangamaKristu eSiberia, xa uMaria (ongasezantsi ekhohlo) wayeneminyaka enokuba ngama-20 ubudala

[Umfanekiso okwiphepha 31]

Sikunye nentombi yethu, uLidia

[Umfanekiso okwiphepha 31]

Xa sasitshata ngowe-1970

[Umfanekiso okwiphepha 31]

Ndikunye noMaria namhlanje