Nceda Abantwana Bakho Babuqale Kakuhle Ubomi
NGUMBHALI KAVUKANI! EKHANADA
◼ Ingxelo ekwiThe New York Times ithi: “Umabonwakude sisixhobo esihle sokufundisa.” Noko ke, “ukuhlala nje phambi kwale bhokisi kangangeeyure ezininzi konakalisa imizimba neengqondo zabantwana,” kubavimba amathuba okukhulisa ubuchule babo, kubenza bangakwazi ukufunda baze babe nobunzima bokuqhubana nabanye abantu.
Emva kokuhlolisisa imikhwa yabantwana abangama-2 500, abaphengululi abakwiSibhedlele Sabantwana eSeattle, eWashington, eUnited States, “bafumanise ukuba xa abantwana abanonyaka omnye ukuya kwemithathu ubudala bembukela kakhulu umabonwakude, baba nengxaki yokungakwazi ukunikela ingqalelo xa befika kwiminyaka esixhenxe ubudala,” latsho eli phephandaba. Abo bantwana baba ndlongondlongo, baphelelwe ngumonde baze bangakwazi ukunikela ingqalelo. Enye ingcali ngezemfundo, uGqr. Jane M. Healy uthi, “abazali abaninzi abanabantwana abanengxaki yokunikela ingqalelo bafumanise ukuba into eyenze umahluko kwimeko yabantwana babo kukubavimba ilungelo lokubukela umabonwakude kakhulu.”
Yintoni enokwenziwa ngabazali ukunciphisa ixesha elichithwa ngabantwana babo bebukele umabonwakude? Le ngxelo inikela la macebiso: Beka ixesha lokubukela umabonwakude suku ngalunye. Umabonwakude makangabi yinto yokugcina abantwana. Kunoko, qiniseka ukuba umntwana wakho uyancedisa kangangoko kunokwenzeka kwimisetyenzana yekhaya. Zikhethe iinkqubo ezinokubukelwa ngumntwana wakho uze umcime umabonwakude xa ziphelile. Ukuba kunokwenzeka, zibukele naye ezo nkqubo nize nincokole ngezinto enizibona apho. Nawe linciphise ixesha olichitha ubukele umabonwakude.
Ukunceda abantwana babe nobuchule baze bakwazi ukuqhubana nabantu kufuna ixesha, ukuzimisela nokulungelelana. Akunakuze uzisole ngemiphumo emihle onokuyifumana ngokwenjenjalo. Oku kungqinwa ngumzekeliso wamandulo othi: “Yiqeqeshe inkwenkwe ngokwendlela yayo; naxa indala ayisayi kuphambuka kuyo.” (IMizekeliso 22:6) Inxalenye ebalulekileyo yolo qeqesho iquka ukufundisa abantwana imilinganiselo efanelekileyo yokuziphatha.
AmaNgqina kaYehova aye aphumelela ekusebenziseni incwadi yawo ethi Funda Kumfundisi Omkhulu ngenjongo yokubethelela imilinganiselo yokuziphatha eyamkelekileyo kubantwana bawo. Eneneni, xa abazali benxibelelana nabo baze banikele ingqalelo kubantwana babo besebancinane ngokuqinisekileyo baya kufumana imiphumo emihle. Ayikho enye into engaphezu kokuba abazali babukele abantwana babo bekhula baze babengabantu abadala abahlonelwayo nabaqolileyo.