IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g 10/06 iphe. 3-4
  • Ngaba Umabonwakude Utya Ixesha?

No video available for this selection.

Sorry, there was an error loading the video.

  • Ngaba Umabonwakude Utya Ixesha?
  • Vukani!—2006
  • Amanqaku Afanayo
  • Ukulawula Indlela Owubukela Ngayo
    Vukani!—2006
  • Ngaba Umabonwakude Ukuguqule?
    Vukani!—1991
  • Ukumsebenzisa Kakuhle Umabonwakude
    Vukani!—2000
  • Umabonwakude—“Umfundisi Ofihlakeleyo”
    Vukani!—2006
Khangela Okunye
Vukani!—2006
g 10/06 iphe. 3-4

Ngaba Umabonwakude Utya Ixesha?

UKUBA umntu onokukuthembisa ngezigidi zeerandi ukuba nje uyeke ukubukela umabonwakude ubomi bakho bonke, ubunokuthini? Kwenziwa olu hlolisiso kubantu baseMerika yaye kwafunyaniswa ukuba umntu omnye kwabane wathi akanako ukwahlukana nomabonwakude wakhe. Kolunye uhlolisiso kwabuzwa oko kufunwa kakhulu ngamadoda. Uninzi lwawo lwathi, lunqwenela ukuba kubekho uxolo nolonwabo. Ezo zinto ke phofu zazilandela emva kweyona nto babeyifuna kakhulu, umabonwakude omkhulu!

Umabonwakude waziwa nanguthathatha ehlabathini lonke. Emva phayaa ngowe-1931, xa umabonwakude wawusaqala, usihlalo woMbutho Woonomathotholo baseMerika wathi: “Ababukeli bakamabonwakude basenokwanda kangangomlinganiselo wabemi bomhlaba.” Kwakungathi noko izinto ziyabaxwa ngelo xesha, kodwa namhlanje, sitheth’ eny’ into. Oomabonwakude abasehlabathini lonke baqikelelwa kwiwaka elinesiqingatha lezigidi nababukeli abangaphezulu kwelo nani. Uwuthanda okanye ungawuthandi, umabonwakude unendima ephambili kubomi babantu.

Ixesha abantu abalichitha bebukele umabonwakude lixhomis’ amehlo. Kutshanje, uhlolisiso oluye lwenziwa ehlabathini lonke, ngokomlinganiselo, ludiza ukuba abantu babukela umabonwakude malunga neeyure ezintathu suku ngalunye. Abantu abahlala kuMntla Merika babukela umabonwakude iiyure ezine suku ngalunye, njengokuba iJapan inkqenkqeza phambili ngeeyure ezintlanu suku ngalunye. Lixesha elininzi elo ukuba uyalidibanisa. Masithi sibukela umabonwakude iiyure ezine suku ngalunye, xa sele sineminyaka engama-60 ubudala siya kuba sele sichithe iminyaka elishumi kumabonwakude. Kaloku, akukho namnye kuthi ofuna ngenye imini kwilitye lengcwaba lakhe kubhalwe kuthiwe: “Ilel’ apha ke into kaNantsi isihlobo sethu esisenyongweni, ochithe iminyaka elishumi yobomi bakhe ebukele umabonwakude.”

Ngaba abantu babukela umabonwakude kuba nje kumnandi ukubukela? Akusoloko kunjalo. Abantu abaninzi abachitha ixesha elininzi bebukele umabonwakude baziva benetyala ngenxa yokuba bengalisebenzisi kakuhle ixesha labo. Abanye bathi “bangamakhoboka kamabonwakude.” Noko ke, ikhoboka likamabonwakude nekhoboka leziyobisi abo bantu abafani ngokupheleleyo, kodwa zikho izinto abafana ngazo. Amakhoboka eziyobisi achitha ixesha elininzi kwiziyobisi. Nakuba efuna ukunciphisa ixesha alichitha kuzo okanye ayeke ukuba ngamakhoboka azo, kodwa bayoyisakala. Ancama ixesha lezinto ezibalulekileyo nokuchitha ixesha neentsapho zawo yaye akuyondlwan’ iyanetha ukuyeka ukusebenzis’ iziyobisi. Konke oku kunokwenzeka kumntu obukela umabonwakude ngokugqithiseleyo.

UKumkani uSolomon osisilumko wabhala wathi: “Ukudla ubusi obuninzi akulunganga.” (IMizekeliso 25:27) Lo ngumgaqo ofanayo nangokubukela umabonwakude. Nakuba umabonwakude uneenkqubo esinokufunda okuthile kuzo, ukuwubukela ngokugqithiseleyo kunokunciphisa ixesha esimele silichithe neentsapho zethu, kunokubenza abantwana bangazifundi ngokwaneleyo iincwadi zabo, bangaqhubi kakuhle nasesikolweni yaye kunokubenza batyebe ngokugqithiseleyo. Ukuba uchitha ixesha elide kakhulu ubukela umabonwakude, bubulumko ukucinga ngoko ukuzuzayo ngokumbukela. Ixesha lethu lixabiseke kakhulu ukuba singalisafaza. Kubalulekile nokucinga ngezinto esizibukelayo. Siza kukhe sinabe ngalo mbandela kwinqaku elilandelayo.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share