Ikhethe Nocalucalulo—Ukungena Ezingcanjini Zalo
“Bonke abantu bazalwa bekhululekile yaye belingana ngesidima nangamalungelo. Banikwe amandla okuqiqa yaye bafanele baphathane ngomoya wobuzalwana.”—Inqaku 1 LeSindululo Sehlabathi Lonke Samalungelo Abantu.
NAKUBA kukho imithetho ekumgangatho ophezulu njengalo ungasentla, abantu bayaqhubeka benocalucalulo. Okulusizi kukuba oku akubonisi ixesha esiphila kulo kuphela kodwa kukwabonisa nokungafezeki kwabantu. (INdumiso 51:5) Sekunjalo, le meko ayifanele isenze siphelelwe lithemba. Liyinyaniso elokuba sisenokungakwazi ukwenza nto ngocalucalulo esilubonayo, kodwa ke sinokulisusa ikhethe elisezintliziyweni zethu.
Okokuqala nje kuza kufuneka sivume ukuba wonke umntu unokuba nalo ikhethe. Incwadi ethi, Understanding Prejudice and Discrimination ithi: “Kusenokwenzeka ukuba zibaluleke gqitha izigqibo ekuye kwafikelelwa kuzo xa bekuphengululwa umbandela wekhethe: (1) akakho umntu okwaziyo ukucinga nokuthetha ongenalo ikhethe, (2) kufuneka wenze umgudu yaye ube nolwazi ukuze ulwe ikhethe (3) ibe oko unokukwenza ukuba uzimisele.”
Kudla ngokuthiwa imfundo “yeyona nto inokukunceda” ukuze ulwe nokuba nekhethe. Imfundo efanelekileyo inako ukusinceda sazi isizathu sokuba nekhethe, isincede sizihlolisise, sizihlab’ amadlala size sikwazi ukumelana nalo xa singamaxhoba alo.
Ukungena Ezingcanjini Zalo
Ikhethe libangela ukuba abantu bagqwethe, bazichaze ngendlela abafuna ngayo okanye bangafuni ukuziva izibakala eziza kuphikisa izinto abasele bezixelele zona. Unokuyibona eyona mvelaphi yekhethe xa uhlolisisa indlela ebonakala ngathi ayinabungozi kodwa etenxileyo yokukhuliswa kwabantwana, kanti linokubangelwa nangabantu abathi ngabom basasaze iimbono ezigqwethekileyo ngezinye iintlanga. Ikhethe linokukhuthazwa bubuhlanga neemfundiso zonqulo lobuxoki. Kwakhona linokubangelwa likratshi eligqithiseleyo. Njengoko ucingisisa ngezi ngongoma zilandelayo nangemigaqo esekelwe eBhayibhileni, unokuhlolisisa uluvo lwakho uze ubone enoba kuya kufuneka ulutshintshe kusini na.
Abahlobo. Abantu badalelwe ukuba nabahlobo yaye yintw’ entle leyo. Enyanisweni neBhayibhile ithi, “ozahlulayo uya kufuna ulangazelelo lwakhe lokuzingca” yaye unokude aphambuke kubulumko bobuqili. (IMizekeliso 18:1) Sekunjalo, sifanele sibakhethe ngobulumko abahlobo kuba banokusiphembelela ngamandla. Ngoko ke, abazali abalumkileyo bamele babe nomdla okhethekileyo kubahlobo babantwana babo. Uhlolisiso lubonise ukuba nabantwana abaneminyaka emithathu ubudala banokuba nobuhlanga ababufunde kwindlela abanye abathetha nabenza ngayo xa bebhekisela kwabanye. Kwabona abazali bamele benze unako nako wokuba ngumzekelo omhle, bazi ukuba nantoni na abayenzayo yiyo ebumba ubuntu nemilinganiselo yabantwana babo.
◼ Ithini iBhayibhile? “Yiqeqeshe inkwenkwe [okanye intombazana] ngokwendlela yayo; naxa indala ayisayi kuphambuka kuyo.” (IMizekeliso 22:6) “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.” (IMizekeliso 13:20) Ukuba ungumzali unokuzibuza: ‘Ngaba abantwana bam ndibakhulisa ngendlela yenyaniso nemkholisayo uThixo? Ngaba ndinxulumana nabantu abanokundakha? Ngaba ndiyabakha abanye?’—IMizekeliso 2:1-9.
Ubuhlanga. Esinye isichazi-magama sithi ubuhlanga “kukuthanda uhlanga oluthile, ulugqala njengolungaphezu kwezinye, usithi lona luchubekile kunezinye iintlanga.” UIvo Duchacek, unjingalwazi wenzululwazi yezopolitiko, wathi kwincwadi yakhe ethi Conflict and Cooperation Among Nations: “Ubuhlanga benza abantu babe ziintlaba-zahlukane. Into yokuqala efikayo ebantwini kukuba ndingumMerika, umRashiya, iTshayina, umYiputa, okanye umPeruvia, yaye abafane bacinge ukuba bangabantu.” Owayesakuba ngusosiba-jikelele weZizwe Ezimanyeneyo wabhala wathi: “Iingxaki ezininzi esinazo namhlanje zizalwa zizimo zengqondo ezigqwethekileyo yaye ezinye kwezi zimo zengqondo zibangena abanye abantu bengaqondanga. Xa sele benobuhlanga abaqiqi, wobeva besithi ‘lilizwe lam eli enoba sekumnyam’ entla.’”
◼ Ithini iBhayibhile? “Kuba uThixo walithanda kakhulu ihlabathi [lonke uluntu] kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.” (Yohane 3:16) “UThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZenzo 10:34, 35) Khawuzibuze, ‘Ukuba uThixo unothando olungakhethi buso’—esamkela abantu beentlanga zonke, nam ngaphezulu—ngaba andimele ndizame ukumxelisa, ingakumbi xa ndisithi ndiyamhlonela?’
Intiyo Ebangelwa Bubuhlanga. Abantu abanale ntiyo bacinga ukuba “isibakala sokuba abantu benobuntu nobuchule obungafaniyo sibangelwa luhlanga abalulo yaye olo hlanga lubhetele kunezinye,” sitsho njalo esinye isichazi-magama. Noko ke, ngokutsho kweThe World Book Encyclopedia, abaphengululi “abakhange bafumane bungqina bungokwenzululwazi obuxhasa ukuba kukho [uhlanga] olubhetele kunezinye.” Ukukhohlakalelwa kwabantu okubangelwa yintiyo yobuhlanga, njengokubandezwa kwabo amalungelo, kububungqina obunganyamezelekiyo bokuba intiyo yobuhlanga isekelwe kubuxoki.
◼ Ithini iBhayibhile? “Inyaniso iya kunikhulula.” (Yohane 8:32) “[UThixo] wazenza ngokuphuma kumntu omnye zonke iintlanga zabantu.” (IZenzo 17:26) “Indlela abona ngayo umntu [asiyondlela abona ngayo uThixo], ngenxa yokuba umntu nje ubona okubonakalayo emehlweni; kodwa uYehova yena, ubona oko ikuko intliziyo.” (1 Samuweli 16:7) Khawuzibuze: ‘Ngaba bonke abantu ndibajonga ngendlela abajonga ngayo uThixo? Ngaba ndiye ndizame ukubazi kakuhle abantu bezinye iintlanga ngokwakha ubuhlobo kunye nabo?’ Ukwakha ubuhlobo nabantu, kuyasinceda siyeke ukubajonga ngokusekelwe kwiingcamango ezingenasihlahla.
Unqulo. Incwadi ethi The Nature of Prejudice ithi: “Abantu baqala ukwenza izinto eziziintloni xa besebenzisa unqulo lwabo ukuze bathethelele [ukuzingca kwabo] yaye eyona nto iphambili iluhlanga lwabo. Ludibana apho ke unqulo nekhethe.” Kwale ncwadi iphinda ithi, eyona nto yothusayo yindlela abantu abaninzi abathanda icawa “abatshintsha ngayo babe nekhethe.” Ukuba yinyaniso kwala mazwi kubonakala kubukho beecawa ezininzi ezamkela iintlanga ezithile kuphela, ezinentiyo nezilwa ngogonyamelo nezinye iimvaba, kwakunye nezo ziphembelela ubugrogrisi.
◼ Ithini iBhayibhile? ‘Ubulumko obuvela phezulu [kuThixo] boboxolo, bunengqiqo yaye abucaluli ngokukhetha ubuso.’ (Yakobi 3:17) “Abanquli bokwenyaniso baya kumnqula uBawo ngomoya nenyaniso [yonqulo].” (Yohane 4:23) ‘Zithandeni iintshaba zenu, nibathandazele abo banitshutshisayo.’ (Mateyu 5:44) Khawuzibuze: ‘Ngaba unqulo endikulo lukhuthaza ukuba bonke abantu bathandane ngokunyaniseka, kuquka abo basenokufuna ukundenzakalisa? Ngaba unqulo endikulo lwamkela zonke iindidi zabantu, kungakhathaliseki ukuba ngabaluphi na uhlanga, banebala elinjani, ngamadoda okanye amabhinqa, bamkela imali engakanani, okanye bakuwuphi na umgangatho wokuphila?’
Ikratshi. Xa umntu ezithembe ngokugqithiseleyo okanye ephakamile, ikratshi linokumenza atyekele ekubeni nekhethe. Ngokomzekelo, ikratshi linokubangela ukuba umntu abaphakamele abantu abangafundanga kangako okanye abo bangathathi ntweni. Kanti linokumenza akholelwe iingcamango zokuba uhlanga okanye isizwe sakhe sibhetele kunezinye. Amaqili asasaza iingcamango zobuxoki, njengozwilakhe wamaNazi uAdolf Hitler, aye aphehla umoya wobuzwe nobuhlanga ukuze afumane inkxaso yabantu abaninzi aza athetha kakubi ngabantu abagqalwa njengabahlukileyo nabangafunwayo.
◼ Ithini iBhayibhile? “Wonk’ ubani onekratshi entliziyweni uyinto ecekisekayo kuYehova.” (IMizekeliso 16:5) “Ningenzi nanye into ngokusukuzana okanye ngokuzigwagwisa, kodwa ngokuthobeka kwengqondo, nibagqala abanye njengabongamileyo kunani.” (Filipi 2:3) Khawuzibuze: ‘Ngaba kuthi ngco kum xa ndisiva abantu bencoma uhlanga endilulo okanye benyelisa abantu bezinye iintlanga? Ngaba ndityekele ekubeni nomona ngabo baneziphiwo endingenazo, okanye ngaba ndiyabuvuyela ubuchule abanabo?’
Eneneni, kufanelekile ukuba iBhayibhile ilumkise ngelithi: “Ngaphezu kwako konke okunye okumele kulondolozwe, londoloza intliziyo yakho, kuba iphuma kuyo imithombo yobomi.” (IMizekeliso 4:23) Ngoko yixabise ngokwenene intliziyo yakho uze ungavumeli nantoni na ukuba iyonakalise! Kodwa, yondle ngobulumko bukaThixo. Kungelo xesha aya kuthi, ‘amandla okucinga akulinde, ukuqonda kukulondoloze ukuze kukuhlangule endleleni embi, emntwini othetha izinto ezigwenxa.’—IMizekeliso 2:10-12.
Noko ke, yintoni onokuyenza xa ulixhoba lekhethe nobuhlanga? Inqaku elilandelayo liza kukhe liwuhlolisise lo mbandela.
[Amagama acatshulweyo akwiphepha 6]
Ukwakha ubuhlobo nabantu, kuyasinceda siyeke ukubajonga ngokusekelwe kwiingcamango ezingenasihlahla.