IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g 9/09 iphe. 24-27
  • UHerode Omkhulu—Ingcibi Yokwakha Enobuchule

No video available for this selection.

Sorry, there was an error loading the video.

  • UHerode Omkhulu—Ingcibi Yokwakha Enobuchule
  • Vukani!—2009
  • Imixholwana
  • Amanqaku Afanayo
  • IKesareya—Isixeko Esinezibuko Leenqanawa
  • IYerusalem Netempile KaHerode
  • ISamariya NeYeriko
  • Ibhotwe Elingayiwayo Eliyinqaba
  • “Ngemihla KaKumkani UHerode”
    IMboniselo Evakalisa UBukumkani BukaYehova—2009
  • Kubulawa Umntu Kwipati KaHerode
    UYesu—Indlela, Inyaniso, Ubomi
  • Amadoda Akhokelwa Yinkwenkwezi
    Incwadi Yam Yamabali EBhayibhile
  • Ngaba Ubusazi?
    IMboniselo Evakalisa UBukumkani BukaYehova—2015
Khangela Okunye
Vukani!—2009
g 9/09 iphe. 24-27

UHerode Omkhulu—Ingcibi Yokwakha Enobuchule

WALAWULA kangangeminyaka engamashumi amathathu, oko kwenzeka kwiminyaka engaphezu kwama-2 000 eyadlulayo. Ubukumkani bakhe babusekelwe kwaYuda nakwimimandla ekufutshane apho. Kwiingxelo zembali kuthiwa nguHerode Omkhulu.

UHerode lo ukhunjulwa ngokubulala ngenxa yomona kungekuphela nje intsapho yakhe kodwa neentsizana zabantwana abangamakhwenkwe. Xa abavumisi ngeenkwenkwezi ababevela eMpumalanga bamxelela ukuba kuzelwe umntwana oza kuba ngukumkani, uHerode wenza ngathi unomdla wokuya kumnika imbeko. Wacela ukuba baye kumkhangela lo mntwana baze ke babuyele kuye. Kodwa xa uThixo walumkisa aba bavumisi ukuba bangabuyeli, uHerode wayalela ukuba kubulawe onke amakhwenkwana aneminyaka emibini ubudala nangaphantsi eBhetelehem, sixeko eso aba bavumisi bafumana kuso uYesu nakwizithili ezikufutshane apho.—Mateyu 2:1-18.

Ngoko ke ngaphambilana, uHerode wayeyintandane kwabaninzi ngenxa yokwakha kwakhe izakhiwo ezihle. Wakha iitempile, amaqonga emidlalo, iindawo zemidyarho yamahashe, imisele neenqaba ezinkulu ezineendawo zokuqubha ezingayiwayo. Kangangendlela ezazizihle ngayo izakhiwo zakhe, neenjineli zale mihla zisabamb’ ongezantsi xa zijonga amabhodlo azo.

UHerode wayekhetha iziza ezihle ibe wayeqinisekisa ukuba nantoni ayakhayo ifanelana gingci nendawo eyakhiwe kuyo. Kumabhotwe akhe wawuya kufika kukho uburhocorhoco nobumbejembeje ezindongeni, eluphahleni nasemgangathweni. KwaYuda wakha neendawo zokuhlambela ezifana nezaseRoma ezinamagumbi ashushu nenkqubo yokufudumeza umgangatho. Wada wakha nezixeko, kwesinye sazo wakha izibuko.

IKesareya—Isixeko Esinezibuko Leenqanawa

EKesareya uHerode wakha elona zibuko likhulu eRoma. Indlela elakhiwe ngayo iye yabashiya bebamb’ ongezantsi abembi bezinto zakudala. Kwakukho iiankile ezinokubamba iinqanawa ezilikhulu, nto leyo eyayibubungqina bokuba iKesareya le yayisisazulu sezorhwebo sehlabathi.

Iintsika ezazikho zakhiwa ngobona buchule babusemagqabini ngaloo maxesha. Noko ke, yabamangalisa abaphengululi into yokuba la madoda awaphatha njani loo matye ayeziimitha ezili-15 ubude neemitha ezintathu ububanzi njengoko wazichazayo umbhali-mbali uFlavius Josephus. Kutshanje, iindadi ziye zafumanisa ukuba ezi ntsika zazisetyenziswa nguHerode zazenziwe ngesamente. Azakha ezi ntsika ngokugalela isamente kwizakhelo zamaplanga, azitshonise ngaphantsi kwamanzi zaza zaqina azabi nakushukuma.

Esi sixeko sinezibuko sakhiwe kakuhle, sinetempile eyanikelwa kuKesare Agasto, sinebhotwe, ibala lemidyarho yamahashe, iqonga lemidlalo elinezitulo ezingama-4 000 kunye nenkqubo yokugutyula ilindle engaphantsi komhlaba. Imisele namatonela azisa amanzi eKesareya ayevela kwiNtaba iKarmele ekumgama oziikhilomitha ezintandathu.

IYerusalem Netempile KaHerode

Owona msebenzi mkhulu owenziwa nguHerode kukwakha itempile yaseYerusalem. Itempile eyayikwesi siza yayakhiwe nguKumkani uSolomon owajonga kwiplani uThixo awayinika uyise uDavide. (1 Kumkani 6:1; 1 Kronike 28:11, 12) Loo tempile yatshatyalaliswa ngamaBhabhiloni kwiminyaka engama-420 eyalandelayo kwaza kwengama-90 emva koko iRhuluneli yakwaYuda uZerubhabheli yakha enye itempile eyayingekho mgangathweni.

Ngokuphathelele itempile eyakhiwa nguHerode kwesi siza sinye, uJosephus wabhala: “Onke amacala ayenegolide, eyayisithi xa kuphuma ilanga imenyezele kube nzima ukuwajonga kuba iba ngathi ujonge imitha yelanga. Kubantu abangayiqhelanga le tempile yayifana nentaba egutyungelwe likhephu kuba indawo ezingenayo igolide zazimhlophe qhwa.”

Ayengamawaka amadoda awayebandakanyeke ekwakhiweni kwale tempile ineendonga ezisentshona ezazinobude obuziimitha ezingama-500. Amatye amakhulu ayengadityaniswanga ngodaka. Ngokutsho komnye wabaphengululi, elinye ilitye laliziitoni ezingama-400 yaye, “lalingekho elinokulinganiswa nalo kwixesha lamandulo.” Babefanele ukumangaliswa abafundi bakaYesu! (Marko 13:1) Phezulu kwakukho iqonga elikhulu elalibizwa ngokuba yiTempile eseNtabeni, qonga elo lalilelona likhulu kwawakha enziwa mandulo. Lalilingana namabala angama-25 ebhola ekhatywayo aseMerika.

Zikho nezinye izinto ezakhiwa nguHerode eYerusalem. Enye yazo yayiyinqaba yaseAntonia eyayikufutshane netempile awayeyakhe ngaphambilana. Kanti uHerode wakha ibhotwe nezinye izakhiwo ezithathu ezinemigangatho emininzi ekungeneni kwesixeko.

ISamariya NeYeriko

UKesare Agasto wapha uHerode isixeko samandulo saseSamariya awasithiya ngokuba yiSebaste. Wasihombisa ngezakhiwo ezahlukahlukeneyo, kuquka ibala lemidlalo elalingqongwe luluhlu lweentsika. Wenza nezakhiwo ezikhulu ezazihonjiswe ngemizobo entsonkothileyo.

UHerode wakha ibhotwe elalisetyenziswa ebusika eYeriko, ndawo leyo eyayimalunga neemitha ezingama-250 ngaphantsi komphakamo wolwandle kwiNtlambo yaseYordan enemozulu entle. IYeriko le yayiziihektare ezili-1 000 yaye ingathi sisitiya. Wadibanisa amabhotwe amathathu aba yindawo enkulu, ibhotwe ngalinye walenza laneholo yokwamkela iindwendwe, iindawo zokuhlambela, izitiya namaqula okuqubha. Yiloo nto kanye eyamenza wakuthanda ukuya eYeriko ebusika!

Ibhotwe Elingayiwayo Eliyinqaba

UHerode wayenayo enye indawo awayenokuhlala kuyo ebusika. Wakha inqaba kwithafa elisentabeni elalisaziwa ngokuba yiMasada elaliphakame kangangeemitha ezingama-400 ngaphezu koLwandle Olufileyo. Kuloo ndawo wakha ibhotwe elinemigangatho emithathu neendawo zokuhlambela kwakunye nelinye ibhotwe elalinamaqula afana nalawo aseRoma anemibhobho eshushu ezindongeni nendlu yangasese egungxulwayo!

Kuloo ndawo yayingumqwebedu, uHerode wakha indawo yokuzihlaziya yakomkhulu. Wafaka amatanki amanzi alishumi elinesibini awayegcina amanzi aziilitha ezingama-40 000 000. Ngenxa yokuba le nqaba yayinenkqubo yokukhongozela amanzi emvula, kwakukho amanzi awaneleyo okunkcenkceshela izityalo, awokuqubha nawokuhlamba.

Phakathi kwezakhiwo zobunjineli zikaHerode kwakukho ibhotwe lakhe elikwayinqaba elibizwa ngokuba yiHerodium elalikwinduli eyaziwayo emalunga neekhilomitha ezintlanu kumzantsi-mpuma weBhetelehem. Lalinamacala amabini: elalisezantsi nelalingasentla. Icala elingasentla laliquka ibhotwe elisempuma eliyinqaba elinemigangatho emihlanu—elisele lingamabhodlo—elalikhe lasesona sakhiwo siphezulu. Kwiminyaka emibini eyadlulayo iziko leendaba lehlabathi lasichazela ngengcwaba likaHerode elabonwa kummandla ongaphezulu kwibhotwe lakhe, lisithi obu yayibubungqina bengxelo eyanikelwa nguJosephus ngenkulungwane yokuqala yokuba uHerode wangcwatyelwa apho.

IHerodium engasezantsi yayinodederhu lwezakhiwo zebhotwe neeofisi. Eyona ndawo yayintle yayisisitiya esenziwe ngendlela yaseRoma esasihonjiswe ngemiqolo engqonge ichibi elikhulu elinendawo ebusiqithi. Eli chibi laliphantse liliphinde kabini elo leeOlimpiki lezi mini. Lalisetyenziswa njengequla lamanzi kodwa lalikwasetyenziselwa ukuqubha nokukhwela izikhitshane. Amanzi ayevela emthonjeni okwiikhilomitha ezintlanu ehamba ngomsele.

Omnye owayetyelele kuloo mmandla wathi: “Xa sasisempuma, sasikwazi ukubona yonke into ukuya kutsho kuLwandle Olufileyo. Sabona intlango yakwaYuda apho uDavide wayezimele khona uSawule owayemsukela. Ngenxa yokuba lo mmandla wawunamagingxi-gingxi, siyasiqonda isizathu sokuzimela kwakhe apho, ekubeni wakhulela apho wayeyazi kakuhle le ndawo. Sayicinga nento yokuba xa wayesalusa iigusha, kusenokwenzeka ukuba uDavide wayesenyusa ezo nduli ukuze abukele ubuhle baloo ndawo.”

Zininzi iincwadi eziye zabhalwa ngezakhiwo zikaHerode. Sisafuniselwa isizathu sokwakha kwakhe izakhiwo ezininzi ngolo hlobo. Abanye bathi yayikukuzenzela igama, abanye babeke izizathu zobupolitika. Enoba sasiyintoni na isizathu, la mavandlakanya angqina isibakala sokuba, ngaphandle kokuba wayenguzwilakhe, uHerode Omkhulu lo, wayeyingcibi enobuchule.

[Umfanekiso okwiphepha 25]

EKESAREYA

Umzobo

[Umfanekiso okwiphepha 25]

IBHOTWE LASEYERUSALEM

Umzekelo

[Umfanekiso okwiphepha 25]

ITEMPILE KAHERODE

Umzekelo

[Umfanekiso okwiphepha 26]

IMASADA

Amabhodlo ebhotwe elinemigangatho emithathu

[Inkcazelo]

Pictorial Archive (Near Eastern History) Est.

[Umfanekiso okwiphepha 26]

IHERODIUM

Umzobo

[Inkcazelo Ngemifanekiso ekwiphepha 25]

Caesarea: Hiram Henriquez/National Geographic Stock; Palace: Courtesy of Israel Museum, Jerusalem, and Todd Bolen/Bible Places.com

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share