Imbono YeBhayibhile
Kuthekani Ngokuhlalisana Ngaphambi Kokutshata?
UBUNGAYITHENGA na isuti okanye ilokhwe ngaphambi kokuqala uyilinganise? Akunakuyenza loo nto. Ngapha koko, ukuba kamva ufumanisa ukuba loo mpahla ayikulingani, uya kube udlale ngexesha nemali yakho.
Abantu abaninzi bawujonga ngolo hlobo umtshato. Bavakalelwa kukuba kubhetele indoda nomfazi bahlalisane kuqala ngaphambi kokuba bazibophelele njengendoda nomfazi. Baqiqa ngelithi, ‘ukuba indoda nomfazi abalungelani, banokusuka nje bahlukane ngaphandle kokufuneka bangene ezindlekweni zokuqhawula umtshato.’
Mhlawumbi abanye kwabo bavakalelwa ngolo hlobo baye babona abahlobo babo beneengxaki kwimitshato yabo. Okanye kusenokwenzeka ukuba baye babona abantu behleli kwimitshato engenaluthando. Ngenxa yoko, banokugqala ukuhlalisana njengesenzo sobulumko.
Ithini yona iBhayibhile kulo mba? Ukuze sifumane impendulo, kufuneka siqale sihlole oko kuthethwa liLizwi likaThixo ngelungiselelo lomtshato.
“Babe Nyama-nye”
IBhayibhile ichaza imbono ephakamileyo ngomtshato, yaye oku akumangalisi kuba eli lungiselelo lagunyaziswa laza lamiselwa nguYehova uThixo. (Genesis 2:21-24) Kwasekuqaleni, uYehova wayenenjongo yokuba umtshato wenze indoda nomfazi babe “nyama-nye.” (Genesis 2:24) Emva kokucaphula le ndinyana eBhayibhileni apho oku kuchazwe khona, uYesu wongezelela ngelithi: “Oko uThixo akubophelele ngedyokhwe ndawonye makungahlukaniswa mntu.”—Mateyu 19:6.
Kuyavunywa ukuba, abantu abatshatayo banokuqhawula umtshato kamva.a Noko ke, xa oko kusenzeka, akubangelwa kukuba ilungiselelo lomtshato linengxaki; kodwa kungenxa yokusilela kweqabane elinye okanye omabini ukubambelela kwizifungo awazenzayo xa ayetshata.
Ngokomzekelo: Masithi indoda nomfazi banemoto, kodwa abayinyamekeli ngokwemiyalelo yenkampani eyenzileyo. Ukuba loo nto ibangela ukuba imoto yonakale, lityala likabani elo? Ngaba lelenkampani eyenzileyo, okanye ngaba lelabanini bemoto abasileleyo ukuyinyamekela ngendlela efanelekileyo?
Kunjalo ke nangomtshato. Xa indoda nomfazi belunyamekela ulwalamano lwabo baze bazimisele ukulungisa iingxaki zabo ngokuvisisana nemigaqo yeBhayibhile, akunakufane kwenzeke ukuba baqhawule umtshato. Bobabini baziva bekhuselekile emtshatweni wabo kuba lungu ngalinye lizibophelele kuwo. Ngoko ulwalamano lomtshato lusekelwa eluthandweni.
‘Khwebukani Kuhenyuzo’
Sekunjalo, abanye banokuzibuza: ‘Kutheni singakhe siqale sihlalisane? Ngaba ukuqala sihlalisane ngaphambi kokuzibophelela ngomtshato akubonisi ukuba siyabugqala ubungcwele bawo?’
IBhayibhile ikuphendula ngokucacileyo oku. UPawulos wabhala wathi: ‘Khwebukani kuhenyuzo.’ (1 Tesalonika 4:3) Ibinzana elithi “uhenyuzo” libhekisela kuzo zonke iintlobano zesini ezingaphandle komtshato. Oko kuquka iintlobano zesini phakathi kwesibini esihlalisanayo, enoba sineenjongo zokutshata. Ngoko ke, ngokutsho kweBhayibhile, akufanelekanga ukuba isibini sihlalisane—enoba sineenjongo zokutshata kamva.
Ngaba le mbono yeBhayibhile ishiywe lixesha? Abanye basenokuvakalelwa ngolo hlobo. Ngapha koko, kumazwe amaninzi, ukuhlalisana—enoba nineenjongo zokutshata okanye akunjalo—kugqalwa njengento eqhelekileyo. Kodwa cinga nje ngemiphumo yako. Ngaba abantu abahlalisanayo baye bayifumana imfihlelo yokuphumelela kwentsapho? Ngaba bonwabile kunezibini ezitshatayo? Ngaba izibini ezihlalisanayo ngaphambi kokutshata zithembeka ngakumbi emva kokuba zitshatile? Uhlolisiso luye lwafumanisa ukuba akunjalo. Eneneni, kuye kwafunyaniswa ukuba izibini eziqale zahlalisana, zixabana gqitha xa sele zitshatile yaye ziphela sele ziyiqhawule nalo mitshato.
Ezinye iingcaphephe ziye zathi olo hlolisiso aluyonyani. Esinye isazi ngezengqondo sithi: “Abantu abakhetha ukutshata bengakhange bahlalisane abaqhelekanga kunabo baqala bahlalisane.” Sima ngelithi ukuhlalisana akuyongxaki; kodwa eyona nto ibalulekileyo “kukuxabisa ukutshata.”
Enoba oko kunjalo, le nto ibethelela ukubaluleka kokuba nembono kaThixo ngomtshato. IBhayibhile ithi: “Umtshato mawubekeke phakathi kwenu nonke.” (Hebhere 13:4) Xa indoda nomfazi besenza isifungo sokuqhubeka benyama-nye baze babonise intlonelo ngelungiselelo lomtshato, baba neqhina elingenakuqhawulwa lula.—INtshumayeli 4:12.
Ngoko xa sibuyela kumazwi asekuqaleni eli nqaku, kusengqiqweni ukulinganisa isuti okanye ilokhwe ngaphambi kokuyithenga. Kodwa ke, loo nto ayidibani nganto nokuhlalisana. Kunoko ithetha ukuthatha ixesha elaneleyo lokwazi umntu oceba ukutshata naye. Eli nyathelo libalulekileyo nelingasoloko lithathelwa ingqalelo liyenye kwiimfihlelo ezininzi zokuphumelela kwentsapho.
[Umbhalo osemazantsi]
a IBhayibhile iyavuma ukuba ungaqhawulwa umtshato kuphindwe kutshatwe nabanye abantu ukuba elinye iqabane liba neentlobano zesini ngaphandle komtshato.—Mateyu 19:9.
NGABA WAKHA WAZIBUZA?
◼ Kutheni iBhayibhile isithi iintlobano zesini zifanele ziphelele kumaqabane atshate kunye?—INdumiso 84:11; 1 Korinte 6:18.
◼ Ziziphi iimpawu ofanele uzijonge kulowo uza kuba liqabane lakho?—Rute 1:16, 17; IMizekeliso 31:10-31.
[Ibhokisi ekwiphepha 29]
“WONA NXAMNYE NOMZIMBA WAKHE”
IBhayibhile ithi: “Lowo uqhelisela uhenyuzo wona nxamnye nomzimba wakhe.” (1 Korinte 6:18) Kumashumi eminyaka akutshanje iye yabonakala loo nto kwizigidi ngezigidi zabantu eziye zabulawa nguGawulayo nezinye izifo ezidluliselwa ngeentlobano zesini. Kodwa akuphelelanga apho. Uhlolisiso lubonisa ukuba uxinezeleko nokuzama ukuzibulala kuxhaphakile kulutsha oluziphethe kakubi ngokwesini. Ukuziphatha kakubi ngokwesini kubangela ukuba lukhulelwe lungafuni, nto leyo ebangela ukuba lufune ukuqhomfa iintsana ezingekazalwa. Ngenxa yezi zibakala, sinokugqiba ngelithi imilinganiselo yeBhayibhile ayishiywanga lixesha.