Isahluko 2

Ukulungiselela Umtshato Ophumelelayo

1, 2. (a) UYesu wakubethelela njani ukubaluleka kokuceba? (b) Ukuceba kubaluleke kuwuphi umbandela?

UKWAKHA indlu kufuna ukulungiselelwa ngenyameko. Ngaphambi kokubeka isiseko, kumele kufunyanwe umhlaba kuze kuzotywe iiplani. Noko ke, kukho enye into ebalulekileyo. UYesu wathi: “Ngubani na kuni othi efuna ukwakha inqaba angahlali phantsi kuqala aze abale indleko, ukuze abone ukuba unokwaneleyo kusini na kokuyigqiba?”—Luka 14:28.

² Oko kwenziwa xa kusakhiwa indlu kuyasebenza nasekwakheni umtshato ophumelelayo. Abaninzi bathi: “Ndifuna ukutshata.” Kodwa bangaphi abaziduba ngokubala iindleko? Nangona iBhayibhile ithetha kakuhle ngomtshato, ikwathetha nangocelomngeni oluziswa ngumtshato. (IMizekeliso 18:22; 1 Korinte 7:28) Ngoko ke, abo bacinga ngokutshata kufuneka baziphonononge ngononophelo iintsikelelo neengxaki zokutshata.

3. Kutheni iBhayibhile iluncedo olubalulekileyo kwabo baceba ukutshata, yaye yiyiphi imibuzo emithathu ekuya kukunceda ukuyiphendula?

³ IBhayibhile inokuba luncedo. Isiluleko sayo siphefumlelwe nguMsunguli womtshato, uYehova uThixo. (Efese 3:14, 15; 2 Timoti 3:16) Sisebenzisa imigaqo ekule ncwadi yesikhokelo yamandulo kodwa esesexesheni, makhe sibone ukuba (1) Umntu angazazi njani ukuba sele ekulungele ukutshata? (2) Yintoni amele ayijonge kwiqabane alifunayo? nokuba (3) Ukuthandana ngaphambi komtshato kunokuqhutywa njani ngentlonelo?

NGABA UWULUNGELE UMTSHATO?

4. Yintoni ebalulekileyo ekulondolozeni umtshato ophumelelayo, yaye ngoba?

⁴ Ukwakha indlu kusenokubiza imali eninzi, kodwa ukuqhubeka uyinyamekela nako kuyabiza. Kunjalo ke nangomtshato. Ukutshata kubonakala kungumcimbi kukodwa nje; noko ke, kumele kucingwe nangokuqhubeka unyamekela ulwalamano lomtshato minyaka le. Yintoni efunekayo xa kunyanyekelwa olo lwalamano? Eyona nto ibalulekileyo kukuzibophelela ngentliziyo iphela. IBhayibhile iluchaza ngolu hlobo ulwalamano lomtshato: “Indoda yomshiya uyise nonina, inamathele kumkayo, babe nyama-nye ke.” (Genesis 2:24) UYesu Kristu wachaza ekuphela kwesizathu esingokweZibhalo sokuqhawula umtshato aze umntu aphinde akwazi ukutshata—“uhenyuzo,” oko kukuthi, ukuba neentlobano zesini ngaphandle emtshatweni. (Mateyu 19:9) Ukuba ucinga ngokutshata, khumbula le milinganiselo yeZibhalo. Ukuba akukulungele oku kuzibophelela ngokunzulu, akukawulungeli ke nomtshato.—Duteronomi 23:21; INtshumayeli 5:4, 5.

5. Nangona ukuzibophelela okunzulu emtshatweni kuboyikisa abanye, kutheni kumele kuxatyiswe ngabo bafuna ukutshata?

⁵ Abaninzi bayoyika xa kuthethwa ngokuzibophelela ngokunzulu. “Ukwazi ukuba siya kuhlala kunye ubomi bethu bonke kwakunditsho ndizive ndibotshelelwe, ndiqanyangelwe, ndisengxingongweni ngokupheleleyo,” wavuma watsho omnye umfana. Kodwa ukuba umthanda ngokwenene umntu ofuna ukumtshata, akuyi kukubona kuluxanduva ukuzibophelela naye. Kunoko, uya kukujonga njengokuzikhusela. Ukucinga ngokuzibophelela emtshatweni kuya kwenza isibini sihlale kunye ebumnandini nasebubini size sixhasane nokuba sekumnyam’ entla. Umpostile ongumKristu uPawulos wabhala wathi ngothando lokwenyaniso “luthwala izinto zonke” ibe “lunyamezela izinto zonke.” (1 Korinte 13:4, 7) Elinye ibhinqa lithi: “Ukuzibophelela emtshatweni kundenza ndizive ndikhuselekile. Ndiyaluthanda ulwaneliseko olubangelwa kukuvumelana nakukuvuma ekuhleni ukuba sifuna ukuhlala kunye.”—INtshumayeli 4:9-12.

6. Kutheni kukuhle ukuba ungakhawulezi utshate uselula?

⁶ Ukuze uhlale ubambelele koko kuzibophelela kufuneka uqole. Ngaloo ndlela, uPawulos unikela isiluleko sokuba amaKristu kuhle angatshati de adlule “entlahleni,” xesha elo ezinamandla ngalo iimvakalelo zesini nezisenokuthi ziyigqwethe ingqondo yomntu. (1 Korinte 7:36) Abantu abaselula batshintsha ngokukhawuleza njengoko bekhula. Abaninzi abatshate besebancinane kakhulu bafumanisa ukuba emva kweminyaka embalwa iintswelo neminqweno yabo, neyamaqabane abo, iyatshintsha. Ubalo ludiza ukuba abo batshata besekwishumi elivisayo badla ngokungonwabi baze bafune ukuwuqhawula loo mtshato ngokukhawuleza kunabo balinda ithutyana. Ngoko musa ukuwungxamela umtshato. Ukuchitha iminyaka ethile ungumntu oselula okhulileyo nongatshatanga kuya kukupha amava aluncedo aya kukwenza uqole yaye ukufanelekele ngakumbi ukuba liqabane lomtshato elifanelekileyo. Ukulinda ungatshati kunokukunceda uzazi ngakumbi—nto leyo efunekayo ukuze wakhe ulwalamano oluphumelelayo emtshatweni wakho.

ZAZI WENA KUQALA

7. Kutheni abo baceba ukutshata befanele bazihlole kuqala?

⁷ Ngaba ukufumanisa kulula ukuchaza iimpawu zeqabane olifunayo? Inkoliso yabantu injalo. Noko ke, uthini ngezakho? Yiyiphi imikhwa onayo eya kufak’ isandla ekuphumeleleni komtshato wenu? Uya kuba yindoda okanye umfazi onjani? Ngokomzekelo, ngaba uzivuma ngokulula iimpazamo zakho uze wamkele icebiso, okanye usoloko uzithethelela xa ulungiswa? Ngaba uhlala udlamkile yaye unethemba, okanye usoloko unxubile, ukhalaza? (IMizekeliso 8:33; 15:15) Khumbula, umtshato awuyi kutshintsha ubuntu bakho. Ukuba ngoxa ungekatshati unekratshi, unochuku, okanye usoloko udakumbile, uya kuba njalo naxa utshatile. Ekubeni kunzima ukubona izinto ezibonwa ngabanye kuthi, kutheni ungabuzi umzali okanye umhlobo omthembileyo akuchazele aze akunike amacebiso angqalileyo? Xa uphawula ukuba kukho utshintsho omele ulwenze, qala ngalo ngaphambi kokuba uthabathe amanyathelo okutshata.

8-10. Sisiphi isiluleko esinikelwa yiBhayibhile esiya kunceda ubani alungiselele umtshato?

⁸ IBhayibhile isikhuthaza ukuba sivumele umoya oyingcwele kaThixo usebenze kuthi, uvelise iziqhamo ‘ezinjengothando, uvuyo, uxolo, ukuzeka kade umsindo, ububele, ukulunga, ukholo, ubulali ukuzeyisa.’ Kwakhona isixelela ukuba ‘senziwe batsha kumandla aqhuba iingqondo zethu’ size ‘sambathe ubuntu obutsha, obadalwa ngokokuthanda kukaThixo ngobulungisa bokwenyaniso nokunyaniseka.’ (Galati 5:22, 23; Efese 4:23, 24) Ukusebenzisa esi siluleko kwangoku ungekatshati kuya kufana nokuvalela imali ebhankini—nto leyo eya kukunceda gqitha kwixa elizayo, xa utshatile.

⁹ Ngokomzekelo, ukuba ulibhinqa, zifundise ukunikela ingqalelo engakumbi ‘kumntu ofihlakeleyo wentliziyo’ kunembonakalo yangaphandle. (1 Petros 3:3, 4) Ukuthozama nokuphila engqondweni kuya kukunceda ube nobulumko, ‘obusisithsaba sokuhomba’ sokwenyaniso. (IMizekeliso 4:9; 31:10, 30; 1 Timoti 2:9, 10) Ukuba uyindoda, zifundise ukuba nobubele uze uwahlonele amabhinqa. (1 Timoti 5:1, 2) Ngoxa ufunda ukwenza izigqibo nokuthwala iimbopheleleko, zifundise ukuthozama nokuthobeka. Ukuba nguzwilakhe kuya kukufaka enkathazweni xa utshatile.—IMizekeliso 29:23; Mika 6:8; Efese 5:28, 29.

¹⁰ Nangona ukuhlaziya amandla engqiqo kule miba kungeyondlwan’ iyanetha, onke amaKristu amele azabalazele ukukwenza. Ibe oku kuya kukunceda ube liqabane lomtshato elilunge ngakumbi.

OKO UMELE UKUJONGE KWIQABANE LOMTSHATO

11, 12. Abantu ababini banokufumanisa njani ukuba bayafanelana okanye abafanelani?

¹¹ Ngaba kwindawo ohlala kuyo kulisiko ukuba umntu azikhethele iqabane lomtshato? Ukuba kunjalo, ufanele wenze ntoni xa ufumanisa umntu wesini esahlukileyo enomtsalane kuwe? Qala uzibuze, ‘Ngaba ngokwenene ndifuna ukutshata?’ Kukukhohlakala ukudlala ngeemvakalelo zomnye umntu ngokumenza alindele into ongasayi kuyenza. (IMizekeliso 13:12) Yandula ke uzibuze, ‘Ngaba ndikulungele ukutshata?’ Ukuba uphendula ngokuthi ewe kule mibuzo yomibini, uya kwandula ke uthabathe amanyathelo ngokwesiko lasekuhlaleni. Kwamanye amazwe, emva kokumbukela okwethutyana umntu lowo, usenokuya kuye uze umchazele ukuba unqwenela ukumazi ngakumbi. Ukuba akavumi, musa ukuba lukhwekhwe lwexhwili de adikwe nguwe. Khumbula, naloo mntu unelungelo lokuzenzela isigqibo kulo mbandela. Noko ke, ukuba uyavuma, usenokulungiselela ukuba nichithe ixesha kunye kwizinto ezakhayo. Oku kuya kukunika ithuba lokubona enoba kuya kuba bubulumko kusini na ukutshata lo mntu.a Xa kulapha ke yintoni omele uyijonge?

¹² Ukuphendula loo mbuzo, khawucinge nje ngezixhobo ezibini zomculo, mhlawumbi ipiyano nesiginci. Ukuba ilungiswe kakuhle, nganye ingatsho ngoncuthu lwengoma iyodwa nje. Ukanti, kwenzeka ntoni xa ziza kudlalwa kunye? Xa kunjalo ke zimele zilungelane. Kunjalo ke nangawe nalowo uza kuba liqabane lakho. Ngamnye kuni kusenokwenzeka ukuba ebesiwa evuka “elungisa” ubuntu bakhe. Kodwa umbuzo ngulo: Ngaba nilungelene? Ngamanye amazwi, ngaba niyafanelana?

13. Kutheni kungebobulumko kwaphela ukuthandana ngaphambi komtshato nomntu ongakholwa naye?

¹³ Kubalulekile ukuba nobabini nikholelwe kwinto enye nibe nemigaqo efanayo. Umpostile uPawulos wabhala wathi: “Musani ukubotshwa edyokhweni ngokungalinganiyo kunye nabangakholwayo.” (2 Korinte 6:14; 1 Korinte 7:39) Ukutshata nomntu ongenalo ukholo olunjengolwakho kuThixo kuwenza maninzi amathuba okungavisisani. Kwelinye icala, ukuzinikela kwenu nobabini kuYehova uThixo kusesona siseko siluqilima somanyano. UYehova ufuna nonwabe nize nimanyane kangangoko kunokwenzeka nomntu otshate naye. Ufuna nimanyaniswe naye ngeqhina elintlu-ntathu lothando.—INtshumayeli 4:12.

14, 15. Ngaba ukuba nokholo olufanayo kuphela kwento emanyanisayo emtshatweni? Cacisa.

¹⁴ Nangona ukunqula uThixo kunye kuyeyona nto ibalulekileyo ukuze nimanyane, zikho nezinye izinto ezifunekayo. Ukuze nitsalele calanye, wena nalowo uza kuba liqabane lakho nifanele nibe nosukelo lwezinto ezifanayo. Ziintoni eninosukelo lwazo? Ngokomzekelo, nicinga ntoni ngokuba nabantwana? Ziziphi ezona zinto zibalulekileyo ebomini benu?b (Mateyu 6:33) Kumtshato ophumelela ngokwenene, isibini siba ngabahlobo bokwenene yaye siyayoliswa kukuba kunye. (IMizekeliso 17:17) Ukuze senze oku, kufuneka sibe nomdla kwizinto ezifanayo. Kunzima ukuhlala ninobuhlobo obusondeleyo—kungasathethwa ke emtshatweni—xa ningenjalo. Noko ke, ukuba iqabane lakho lithanda izinto ezithile, njengokubethwa ngumoya ezintabeni, ube wena ungakuthandi, ngaba oku kuthetha ukuba animele nitshate? Noko akuthethwa loo nto. Mhlawumbi ninazo ezinye izinto ezibalulekileyo eninomdla kuzo. Ngaphezu koko, ungamonwabisa lowo uza kuba liqabane lakho ngokwenza naye izinto ezakhayo kuba zimyolisa yena.—IZenzo 20:35.

¹⁵ Eneneni, ubukhulu becala, ukufanelana kuxhomekeke kububhetyebhetye benu kungekhona ekufaneni kwenu kwinto yonke. Kunokubuza oku, “Ngaba sivumelana kwinto yonke?” kusenokuba bhetele ukubuza oku: “Kwenzeka ntoni xa singavumelani? Ngaba siyakwazi ukuxubusha izinto sizolile siphathane ngentlonelo nangesidima? Okanye xa sixubusha okuthile sisoloko sixambulisana?” (Efese 4:29, 31) Ukuba ufuna ukutshata, mlumkele umntu onekratshi nobambelela kwiimbono zakhe kuphela, ongafuni kuyekelela, okanye osoloko efuna izinto ngetshova nozama ukuba kwenziwe into efunwa nguye.

PHANDA KUSENGAPHAMBILI

16, 17. Yintoni enokujongwa yindoda okanye libhinqa kulowo uza kuba liqabane lomtshato?

¹⁶ Ebandleni lamaKristu, abo bathwaliswe iimbopheleleko ‘bayavavanywa kuqala.’ (1 Timoti 3:10) Nawe unokuwusebenzisa lo mgaqo. Ngokomzekelo, ibhinqa lisenokubuza oku, “Lo mfo udume ngantoni? Ngoobani abahlobo bakhe? Ngaba ubonakalisa ukuzeyisa? Ubaphatha njani abantu abakhulileyo? Uphuma kwintsapho enjani? Uphilisana njani nayo? Sinjani isimo sakhe sengqondo ngakwimali? Ngaba ubusebenzisa kakubi utywala? Ngaba ucaphuka msinya, ade abe nalo nogonyamelo? Unaziphi iimbopheleleko ebandleni, ibe uzisingatha njani? Ngaba ndingakwazi ukumhlonela ngokunzulu?”—Levitikus 19:32; IMizekeliso 22:29; 31:23; Efese 5:3-5, 33; 1 Timoti 5:8; 6:10; Tito 2:6, 7.

¹⁷ Indoda isenokuzibuza, “Ngaba eli bhinqa libonakalisa ukumthanda nokumhlonela uThixo? Ngaba lingakwazi ukunyamekela ikhaya? Ziintoni eziya kulindelwa yintsapho yakowalo kuthi? Ngaba lilumkile, likhuthele, linoqoqosho? Ziintoni elincokola ngazo? Ngaba likukhathalele ngokwenene ukulungelwa kwabanye, okanye licingela lona lodwa, ligxuphuleka kwizinto zabanye? Ngaba linokuthenjwa? Ngaba likulungele ukuzithoba kubuntloko, okanye lineenkani, mhlawumbi linayo nemvukelo?”—IMizekeliso 31:10-31; Luka 6:45; Efese 5:22, 23; 1 Timoti 5:13; 1 Petros 4:15.

18. Xa niphawula ubuthathaka obungephi ngoxa nithandana ngaphambi komtshato, yintoni enimele niyikhumbule?

¹⁸ Ungalibali ukuba yinzala ka-Adam engafezekanga le usebenzisana nayo, asingomntu wephupha ofunde ngaye kwincwadi yothando. Akukho nzwana ingenasiphako, ibe ezinye zazo kuya kufuneka zibethwe ngoyaba—ezakho nezalowo uza kuba liqabane lakho. (Roma 3:23; Yakobi 3:2) Ngapha koko, ukusilela okuthile kunokuninika ithuba lokukhula. Ngokomzekelo, masithi ngoxa nithandana ngaphambi komtshato niyaphikisana. Khumbula kaloku: Nabantu abathandanayo nabahlonelanayo bakhe bangavumelani. (Thelekisa iGenesis 30:2; IZenzo 15:39.) Akungebi ke kusafuneka nikuhlakulele ngakumbi ‘ukubamba umoya wenu’ nize nifunde indlela yokuzinzisa imicimbi ngoxolo? (IMizekeliso 25:28) Ngaba lowo uza kuba liqabane lakho ubonakala ekunqwenela ukuphucula? Kuthekani ngawe? Ngaba ungazifundisa ukwahlukana nochuku, ungacatshukiswa yinto yonke? (INtshumayeli 7:9) Ukufunda ukucombulula iingxaki kunganakhela isiseko sokunxibelelana ngokunyanisekileyo nto leyo ebaluleke gqitha xa nitshata.—Kolose 3:13.

19. Yintoni ekuya kuba bubulumko ukuyenza, ukuba ngoxa nisathandana ngaphambi komtshato kuvela iingxaki ezinzulu?

¹⁹ Noko ke, kuthekani xa ubona izinto ezingakuxolisiyo kwaphela? Umele uwaphicothe kakuhle loo makhwiniba. Enoba umthanda kangakanani na okanye ukufuna kangakanani na ukutshata, musa ukuzibetha ngoyaba iintsilelo ezinzulu. (IMizekeliso 22:3; INtshumayeli 2:14) Ukuba unolwalamano nomntu ongaqinisekanga ngaye, kubhetele uluqhawule olo lwalamano ungazibopheleli ngaye ubomi bakho bonke.

UKUTHANDANA KWENU NGAPHAMBI KOMTSHATO MAKUHLALE KUBEKEKILE

20. Isibini esithandana ngaphambi komtshato sinokuyigcina njani ihambo yaso ingagxekeki?

²⁰ Ukuthandana kwenu ngaphambi komtshato kunokuhlala njani kubekekile? Okokuqala, qinisekani ukuba imilinganiselo yehambo yenu ayihlatywa madlala. Kwindawo enihlala kuyo, ngaba ukubambana ngezandla, ukuncamisana, okanye ukuwolana kujongwa njengento ezifaneleyo izibini ezingatshatanga? Enoba ezo ndlela zokubonisa uthando azigxekekanga, nifanele nizibonakalise kuphela xa kulwalamano lwenu niqinisekile ukuba niceba ukutshata. Lumkani ukubonakalisa kwenu uthando kungagabadeli kude kube yihambo engcolileyo, okanye kude kukhokelele kuhenyuzo. (Efese 4:18, 19; thelekisa INgoma yazo iiNgoma 1:2; 2:6; 8:5, 9, 10.) Ngenxa yokuba intliziyo inenkohliso, kuya kufuneka nilumke nikuphephe ukuzikhetha endlwini, egumbini, kwinqwelo-mafutha emileyo, okanye nakuyiphi na indawo enokuninika ithuba lehambo ephosakeleyo. (Yeremiya 17:9) Ukwenza ukuthandana kwenu ngaphambi komtshato kuhlale kucocekile kuya kudandalazisa elokuba ngamnye kuni uyazeyisa ibe ukukhathalele ngokungazingci ukulungelwa komnye. Okubaluleke ngakumbi kukuba ukuthandana ngaphambi komtshato okucocekileyo kuya kukholisa uYehova uThixo, oyalela abakhonzi bakhe ukuba baphephe ukungcola nohenyuzo.—Galati 5:19-21.

21. Ukuze ukuthandana kwenu ngaphambi komtshato kuhlale kubekekile kukuphi ukunxibelelana okunyanisekileyo okusenokufuneka?

²¹ Okwesibini, ukuthandana ngaphambi komtshato okubekekileyo kuquka ukunxibelelana ngokunyanisekileyo. Njengokuba ukuthandana kwenu ngaphambi komtshato kusondela emtshatweni, kukho imibandela ekuza kufuneka niyixubushe ngokuphandle. Niza kuhlala phi? Ngaba nobabini niza kuphangela? Ngaba nifuna ukuba nabantwana? Kwakhona, bubuntu ukuchaza izinto, mhlawumbi ezenzeka kudala, ezinokuchaphazela umtshato. Ezi zinto zisenokuba ngamatyala amakhulu okanye iimbopheleleko okanye imibandela yempilo, njengezigulo okanye imeko enzulu osenokuba kuyo. Ekubeni abantu abaninzi abane-HIV (intsholongwane ebangela uGawulayo) bengakhawulezi ukubonakala, akuyi kuba kokuphosakeleyo ukuba umntu okanye abazali abanenkathalo bacele ukuba kuhlolwe uGawulayo egazini lalowo wayekhe waziphatha vakalala ngokwesini ngaphambili okanye owayesebenzisa iziyobisi ngokuzitofela. Ukuba kufunyaniswa ukuba unesi sifo, akafanele anyanzele lowo obeza kuba liqabane lakhe aqhubeke nolwalamano ukuba yena ufuna ukuluqhawula. Ngokwenene, kungakuhle ubani obephila ubomi obebumbeka esichengeni azifunele ukuhlolwa uGawulayo egazini lakhe ngaphambi kokuqalisa ukuthandana ngaphambi komtshato.

UKUKHANGELA NGEMVA KOMSITHO WOMTSHATO

22, 23. (a) Kungenzeka njani ukuba ningalungelelani xa nilungiselela umsitho womtshato? (b) Yiyiphi imbono elungeleleneyo enifanele nibe nayo xa nilungiselela umsitho womtshato nomtshato wenu?

²² Kwiinyanga ezandulela umtshato, niya kube nibila nisoma nilungiselela umsitho womtshato. Ningaziphungulela umthwalo ngokuba ziingcathu. Izalamane nabantu basekuhlaleni basenokusivuyela isihikahika somtshato, kodwa sisenokubashiya abo bebetshata neentsapho zabo befile kukudinwa yaye bengenayo nesenti. Ukulandela amanye amasiko asekuhlaleni kusengqiqweni, kodwa ukubotshelelwa ngawo mhlawumbi nokhuphiswano kunokuyigqumelela intsingiselo yeso sihlandlo yaye kusenokunenza ningabi nalo uvuyo enifanele nibe nalo. Nangona kumele kucingelwe iimvakalelo zabanye, ngumyeni onembopheleleko yokugqiba ngoko kuya kwenzeka kwitheko lomtshato.—Yohane 2:9.

²³ Khumbula ukuba umsitho womtshato lusuku olunye kuphela, kodwa umtshato wona ngowobomi bonke. Kuphephe ukumilisela ingqondo kumsitho womtshato. Kunoko, funa ukhokelo lukaYehova uThixo, uze ubucebele kusengaphambili ubomi bomtshato. Ngoko ke uya kuba uwulungiselele kakuhle umtshato ophumelelayo.

[Imibhalo esemazantsi]

LE MIGAQO YEBHAYIBHILE INGAMNCEDA NJANI . . . UMNTU ALUNGISELELE UMTSHATO OPHUMELELAYO?

Indoda nomfazi bamele bazibophelele.—Genesis 2:24.

Umntu wangaphakathi ubalulekile kunowangaphandle.—1 Petros 3:3, 4.

“Musani ukubotshwa edyokhweni ngokungalinganiyo.”—2 Korinte 6:14.

Abantu abangacocekanga ngokuziphatha abazani noThixo.—Efese 4:18, 19.

[Ibhokisi ekwiphepha 17]

AMASIKO NEBHAYIBHILE

Ikhazi: Kwamanye amazwe intsapho yakulo myeni kulindelwe ukuba inike eyakulo mtshakazi imali (ikhazi). Kwamanye, intsapho yakulo mtshakazi inika imali eyakulo myeni. Kusenokungabikho nto iphosakeleyo kula masiko lo gama nje esemthethweni. (Roma 13:1) Noko ke, kula masiko omabini, intsapho ebiza imali ifanele iphephe ukuthi ngokubawa ibize imali eninzi okanye iimpahla ezininzi ngokungekho ngqinqweni. (IMizekeliso 20:21; 1 Korinte 6:10) Ngapha koko, ukukhupha ikhazi akumele kugqwethwe ngokungathi umfazi yimpahla nje ethengiweyo; yaye indoda ayifanele icinge ukuba imbopheleleko enayo kumkayo nakubakhwe bayo yimali kuphela.

Isithembu: Kwezinye izithethe indoda iyavunyelwa ibe nabafazi abaninzi. Kuloo meko, indoda isenokuba ngukumkani othile kunokuba ibe ngumyeni nobawo. Ngaphezu koko, olu hlobo lomtshato lwenza abafazi bakhuphisane. AmaKristu, iBhayibhile iwavumela ukuba angatshati okanye atshate umfazi omnye.—1 Korinte 7:2.

Umtshato Wolingelo: Izibini ezininzi zimi ngelokuba ukuhlalisana ngaphambi komtshato kuya kuzinceda zibone enoba ziyafanelana kusini na. Ukanti, kumtshato wolingelo akujongwa eyona nto ibalulekileyo emtshatweni—ukuzibophelela. Alikho elinye ilungiselelo elikhusela abo babandakanyekileyo njengomtshato—kuquka nabantwana esisenokuba nabo eso sibini. KuYehova uThixo, ukuhlalisana ningatshatanga kukuhenyuza.—1 Korinte 6:18; Hebhere 13:4.

[Imifanekiso ekwiphepha 19]

Kwanangoku ungekatshati, hlakulela iimpawu, imikhwa nobuchule obuya kukunceda emtshatweni