Imbono YeBhayibhile

Ngaba Singakwazi Ukuthanda Iintshaba Zethu?

UYesu Kristu wathi: “Ndithi kuni: Qhubekani nizithanda iintshaba zenu, nibathandazele abo banitshutshisayo; ukuze nizingqine ningoonyana boYihlo osemazulwini, ekubeni elenza ilanga lakhe liphume kubantu abangendawo nabalungileyo nemvula eyinisa kubantu abangamalungisa nabangengomalungisa.”—Mateyu 5:44, 45.

NGABA ucinga ukuba unqulo lukhuthaza uthando noxolo okanye intiyo nogonyamelo? Namhlanje abantu abaninzi bathi unqulo lungunobangela wentiyo nogonyamelo ngokukodwa xa lubandakanyeke kwezopolitiko, ubuhlanga okanye ubuzwe. Kodwa njengokuba amazwi kaYesu ebonisa, ‘oonyana bakaThixo’ bokwenene babonisa uthando lukaThixo—kuquka nakwiintshaba zabo.

Omnye umkhonzi kaThixo wathi: “Ukuba utshaba lwakho lulambile, luphe ukutya; ukuba lunxaniwe, lunike into yokusela . . . Musa ukuzivumela woyiswe bububi, kodwa hlala uboyisa ububi ngokulungileyo.” (Roma 12:20, 21) Kodwa ngaba ngokwenene lungaboniswa uthando olunjalo kweli hlabathi lizintlaba-zahlukane? AmaNgqina kaYehova atsho ngaphandle kokuthandabuza ukuba oko kunokwenzeka! Makhe sihlole umzekelo kaYesu nabalandeli bakhe bangaphambili.

Babezithanda Iintshaba Zabo

UYesu wafundisa inyaniso ngoThixo yaye abantu abaninzi babekuthanda ukumphulaphula. Noko ke, abanye bamchasa, kuba nje babelahlekiswa ziintshaba zakhe. (Yohane 7:12, 13; IZenzo 2:36-38; 3:15, 17) Sekunjalo, uYesu waqhubeka eshumayela kubo bonke kuquka nakubantu ababemchasa. (Marko 12:13-34) Kutheni wayesenjenjalo? Wayesazi ukuba abanye babenokutshintsha indlela abazenza ngayo izinto, baqonde ukuba unguMesiya baze bathobele inyaniso ekwiLizwi likaThixo.—Yohane 7:1, 37-46; 17:17.

Nangobusuku awabanjwa ngabo ziintshaba zakhe ezixhobileyo, uYesu wabonisa uthando kuzo. Waphilisa enye indoda eyayimbambile, umpostile uPetros awayixabela ngekrele. Ngeso sihlandlo uYesu wamisela umgaqo obalulekileyo osasebenzayo nakubalandeli bakhe banamhlanje. Wathi: “Bonke abathabatha ikrele baya kutshabalala ngekrele.” (Mateyu 26:48-52; Yohane 18:10, 11) Emva kweminyaka engama-30 kamva, uPetros wabhala wathi: ‘UKristu wabandezeleka ngenxa yenu, enishiya nomzekelo, ukuze nilandele emanyathelweni akhe ngokusondeleyo. Xa wayebandezeleka, akazange asongele, kodwa wahlala ezinikele [kuThixo].’ (1 Petros 2:21, 23) Licacile elokuba, uPetros wafunda ukuba abalandeli bokwenyaniso bakaKristu bafanele babonise uthando bangaziphindezeleli.—Mateyu 5:9.

Bonke abo ‘bawalandela ngokusondeleyo amanyathelo kaYesu’ babonisa uthando nobubele. Eyesi-2 kuTimoti 2:24 ithi: “Ikhoboka leNkosi akufuneki lilwe, kunoko kufuneka lithantamise kubo bonke, . . . linyamezela ububi.” Ezo mpawu ziya kubonakala kwindlela aphila ngayo umKristu njengokuba seluxolweni nabanye abantu.

‘Oonozakuzaku BakaKristu’ Baseluxolweni

Umpostile uPawulos wawabhalela wathi amanye amaKristu: “Singoonozakuzaku abasendaweni kaKristu . . . Njengabasendaweni kaKristu siyabongoza sisithi: ‘Yibani ngabaxolelanisiweyo noThixo.’” (2 Korinte 5:20) Oonozakuzaku ababandakanyeki kwezobupolitika nakwiimfazwe zamazwe abakuwo. Kunoko, bahlala bengathabathi cala. Umsebenzi wabo kukumela urhulumente welizwe abalizakuzelayo.

Kunjalo ke nangoonozakuzaku nabameli abangamaKristu. Bamjonga uYesu njengoKumkani yaye bamela uBukumkani basezulwini ngokushumayela ngoxolo iindaba ezilungileyo. (Mateyu 24:14; Yohane 18:36) UPawulos wabhalela amaKristu exesha lakhe wathi: “Asilwi mfazwe ngokoko sikuko enyameni. Kuba izixhobo zethu zemfazwe ayizizo ezenyama, kodwa ngaye uThixo zinamandla okubhukuqa . . . iingcinga nayo yonke into ephakamileyo ephakanyiswa nxamnye nolwazi lukaThixo.”—2 Korinte 10:3-5; Efese 6:13-20.

Xa uPawulos wabhala la mazwi, amaKristu ayetshutshiswa kwiindawo ezininzi. Ngokuqinisekileyo ayenokuziphindezelela. Kunoko aqhubeka ezithanda iintshaba zawo kwaye eshumayela isigidimi soxolo kubo bonke ababephulaphula. IEncyclopedia of Religion and War ithi: “Abalandeli bakaYesu bokuqala babengayi emfazweni nasemkhosini,” kuba babesazi ukuba oko “kunxamnye nothando lukaYesu nesibongozo sakhe sokuba bathande iintshaba zabo.”a

NjengamaKristu okuqala, amaNgqina kaYehova ayazi ukuba uYesu unguKumkani wawo. Kwakhona amgqala njengoKumkani woBukumkani bukaThixo—urhulumente wasezulwini oza kuthi kungekudala azise uxolo nonqabiseko ngonaphakade emhlabeni. (Daniyeli 2:44; Mateyu 6:9, 10) Njengoonozakuzaku nabameli, ashumayela ngezinto ezintle eziya kwenziwa bobu Bukumkani. Kwangaxeshanye, azabalazela ukuba ngabemi abalungileyo kumazwe ahlala kuwo ngokuhlawula irhafu nangokuthobela imithetho engangqubaniyo nekaThixo.—IZenzo 5:29; Roma 13:1, 7.

Noko ke, okulusizi kukuba njengamaKristu okuqala, awaziwa kakuhle amaNgqina, ayagculelwa aze atshutshiswe. Nakuba kunjalo, akaziphindezeleli. Kunoko, azama “ukuba noxolo nabantu bonke,” enethemba lokuba abo bawachasayo ‘baya kuba ngabaxolelanisiweyo noThixo’ baze babe nethemba lokuphila ngonaphakade.b—Roma 12:18; Yohane 17:3.

[Imibhalo esemazantsi]

NGABA WAKHA WAZIBUZA?

◼ AmaKristu afanele aziphathe njani iintshaba zawo?—Mateyu 5:43-45; Roma 12:20, 21.

◼ Wasabela njani uYesu, xa wayetshutshiswa?—1 Petros 2:21, 23.

◼ Kwakutheni ukuze amaKristu okuqala angafuni ukuya emfazweni?—2 Korinte 5:20; 10:3-5.