Imbono YeBhayibhile

Ngaba UThixo Uyazixhasa Iimfazwe Zanamhlanje?

XA wayethetha ngobugorha bakhe emfazweni, uKumkani uDavide woSirayeli wamandulo wathi: “Izandla zam [uThixo] uzifundisa imfazwe, neengalo zam zigobe isaphetha sobhedu.”—INdumiso 18:34.

Umpostile uPawulos wabhalela amaKristu esithi: “Nakuba sisenyameni, asilwi mfazwe ngokoko sikuko enyameni. Kuba izixhobo zethu zemfazwe ayizizo ezenyama.”—2 Korinte 10:3, 4.

Ngaba ezi Zibhalo ziyaphikisana? Okanye ngaba zikho izizathu ezibambekayo zokuba uThixo avumele uSirayeli wamandulo ukuba alwe iimfazwe, aze namhlanje engawavumeli wona amaKristu ukuba enjenjalo? Ngaba imbono kaThixo ngemfazwe itshintshile? Sifumana iimpendulo ezicacileyo xa sihlola izinto ezintathu ezibalulekileyo ahluke ngazo uSirayeli kwibandla lamaKristu.

Izinto Ezintathu Ezibalulekileyo Ahluke Ngazo USirayeli KumaKristu

1. USirayeli wamandulo wayeyisikelwe nguThixo imida yomhlaba wakhe yaye wayengqongwe ziintlanga ezazimthiyile. Ngenxa yoko, uThixo wayalela abantu bakhe ukuba bawukhusele umhlaba wabo yaye wayede abancede boyise iintshaba zabo. (ABagwebi 11:32, 33) Noko ke, lona ibandla lamaKristu alinamida yaye amalungu alo akho kulo lonke elimiweyo. Ngoko ke, ukuba abalandeli bakaKristu abakwelinye ilizwe bebenokuncedisa xa kuhlaselwa elinye, bebeya kuba balwa namanye amakholwa—abazalwana noodade bawo—abayalelwa ukuba babathande baze babafele.—Mateyu 5:44; Yohane 15:12, 13.

2. USirayeli wayelawulwa ngukumkani ongumntu owayenetrone eyayiseYerusalem. Noko ke, wona amaKristu alawulwa nguYesu Kristu oyingelosi enamandla enetrone esezulwini. (Daniyeli 7:13, 14) UYesu wathi: “Ubukumkani bam abuyonxalenye yeli hlabathi. Ukuba ubukumkani bam bebuyinxalenye yeli hlabathi, abalindi bam bebeya kulwa ukuze ndinganikelwa kumaYuda. Kodwa ubukumkani bam abusuki kulo mthombo.” (Yohane 18:36) Ngoko akakho urhulumente wezopolitiko okanye umlawuli onokuthi ungokaKristu. Kutheth’ ukuthini oku kubalandeli bakaYesu? Ingongoma yesithathu iyaphendula.

3. Njengezinye iintlanga zamandulo, uSirayeli wayedla ngokuthuma abathunywa esinokubabiza namhlanje ngokuba ngoonozakuzaku. (2 Kumkani 18:13-15; Luka 19:12-14) NoKristu wenze okufanayo kodwa kukho izinto ezimbini abahluke ngazo abalandeli bakhe. Okokuqala, bonke abalandeli bakhe bangoonozakuzaku. Kungenxa yaloo nto umpostile uPawulos wabhala wathi ngamaKristu: “Ngoko ke singoonozakuzaku abasendaweni kaKristu.” (2 Korinte 5:20) Ekubeni engoonozakuzaku boxolo, akazisebenzisi izikhali. Okwesibini, abalandeli bakaYesu bashumayela kubo bonke abantu abaphulaphulayo. UYesu wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga.” (Mateyu 24:14) Kwakhona wathi: “Hambani ke ngoko niye kubenza abafundi abantu beentlanga zonke, . . . nibafundisa ukuba bazigcine zonke izinto endiniyalele zona.”—Mateyu 28:19, 20.

Okubuhlungu kukuba abalandeli bakaKristu abasoloko besamkelwa. Ngenxa yoko, uPawulos wabhalela umvangeli ongumKristu uTimoti wathi kuye: “Njengejoni elihle likaKristu Yesu nawe yiba nenxaxheba ezimbandezelweni.” (2 Timoti 2:3) Kakade ke izixhobo zikaTimoti yayizezokomoya yaye zaziquka iLizwi likaThixo elibhaliweyo, elibizwa ngokuba ‘likrele lomoya.’—Efese 6:11-17.

Kwakutheni Ukuze USirayeli Alahlwe Kuze Kusekwe Ibandla LamaKristu?

Kangangeminyaka eli-1 500, uhlanga lakwaSirayeli lwalunolwalamano olukhethekileyo noThixo, olwalusekelwe kumnqophiso okanye isivumelwano. (Eksodus 19:5) Lo mnqophiso owadluliselwa ngoMoses wawuquka iMithetho Elishumi neminye eyayenzelwe unqulo lwenene nemilinganiselo yokuziphatha ephakamileyo. (Eksodus 19:3, 7, 9; 20:1-17) Okubuhlungu kukuba uhlanga lakwaSirayeli aluzange lunyaniseke kuThixo kangangokuba lwade lwabulala nabaprofeti bakhe.—2 Kronike 36:15, 16; Luka 11:47, 48.

Ekugqibeleni, uYehova wathumela uNyana wakhe uYesu Kristu owazalwa engumYuda. Endaweni yokuba lumamkele ukuba unguMesiya, uhlanga lakwaSirayeli lwamgatya. Ngenxa yoko, uThixo wawuphelisa umnqophiso owawukho phakathi kwakhe noSirayeli yaye udonga lokomfuziselo olwalusahlukanisa amaYuda neeNtlanga lwawa.a (Efese 2:13-18; Kolose 2:14) Malunga nelo xesha, uThixo waseka ibandla lamaKristu waza wamisela uYesu ukuba abe yiNtloko yalo. Ukongezelela, yathi iphela inkulungwane yokuqala labe elo bandla liquka abantu beentlanga ngeentlanga. Umpostile uPetros owayengumYuda wathi: “Kwiintlanga zonke umntu omoyikayo [uThixo] aze asebenze ubulungisa wamkelekile kuye.”—IZenzo 10:35.

AmaNgqina kaYehova alandela umzekelo wamaKristu enkulungwane yokuqala. Yiloo nto amaNgqina esaziwa ngokushumayela esidlangalaleni nangokungabandakanyeki kwezopolitiko nasezimfazweni. (Mateyu 26:52; IZenzo 5:42) Akavumeli nantoni na ukuba iwaphazamise ekushumayeleni iindaba ezilungileyo zoBukumkani bukaThixo, obukuphela korhulumente oza kubusiphula neengcambu ubungendawo uze uzise uxolo lukanaphakade emhlabeni. Wayecinga ngelo themba limangalisayo umpostile uPawulos xa wabhala wathi: “Njengabasendaweni kaKristu siyabongoza sisithi: ‘Yibani ngabaxolelanisiweyo noThixo.’” (2 Korinte 5:20) Loo mazwi abaluleke kakhulu namhlanje kuba asifikanga sigalelekile isiphelo sale ‘mihla yokugqibela’ yeli hlabathi lizele bubungendawo.—2 Timoti 3:1-5.

[Umbhalo osemazantsi]

NGABA WAKHA WAZIBUZA?

● Luluphi uphawu olubalaseleyo afanele alubonise amaKristu?—Yohane 13:34, 35.

● Sisiphi esona ‘sixhobo’ samaKristu okwenene?—Efese 6:17.

● Sisiphi isigidimi esibalulekileyo esishunyayelwa ngabameli bakaKristu?—Mateyu 24:14; 2 Korinte 5:20.

[Umfanekiso okwiphepha 23]

AmaNgqina kaYehova akho kwiintlanga nakumazwe ahlukahlukeneyo yaye akalwi kwiimfazwe zaloo mazwe