Ngaba Uxinezelekile?
EHLABATHINI lonke, eyona ngxaki ikhoyo kukungakwazi ukubona into ebalulekileyo phakathi komsebenzi nobomi bentsapho. Njengoko kubonisiwe, ‘ukurhwebelana kweenkampani ezikumazwe ahlukeneyo, izinto ezintsha zobugcisa, ukuqotywa emsebenzini, nemeko yezoqoqosho eyenza abantu bahlale bezizinxadanxada kubangele ukuba abantu bathi tii ngumsebenzi naxa sele besekhaya.’ Ezi zinto ziye zabangela ukuba abantu babe zizityebi ezingawothiyo umlilo. Kodwa le nkqubela iwenzile umonakalo. Omnye umbhali uthi: “Izigidi ngezigidi zethu thina bantu ziqotywa ngumsebenzi, zizizinxadanxada ezingasakwazi nokuzinceda. Xa sithetha inyaniso sixinezelekile.”
Ngaphezu kwayo yonke le nto, kukho ukudodobala kwezoqoqosho okushiya abantu bethe nxokotho. Ehlabathini lonke abantu abasebenza eziofisini nabo benza imisebenzi yezandla baphelelwa yimisebenzi baze balahlekelwe yimizi yabo. Mhlawumbi bavakalelwa kukuba bamele basebenze nzima.
Makhe sibone ubungakanani bezi ngxaki:
▶ Ngokomlinganiselo abasebenzi baseYurophu abathandathu kwabali-10 baxinezelekile ngenxa yomsebenzi.
▶ Phakathi kwabo basebenza eUnited States, malunga nomntu omnye kwabathathu uqotywa ngumsebenzi.
▶ Ngokomlinganiselo abemi ababini kwabathathu baseKhanada abakwazi ukwahlula eyona nto ibalulekileyo phakathi kwentsapho nomsebenzi.
▶ Kuqikelelwa ukuba abasebenzi abangaphezu kwezigidi ezingama-600, ama-22 ekhulwini abasebenzi abasehlabathini, bachitha iiyure ezingama-48 ngeveki besemsebenzini.
La manani abonisa ubunzima abajongene nabo abantu. Uhlolisiso luthi ukusebenza iiyure ezininzi kukhoboza impilo kwabanye, konakalisa ulwalamano lwabanye, kwabangela ukuba abazali bangabahoyi abantwana babo, izibini ezitshatileyo zahlukana zaza ezinye zaqhawula umtshato.
Kuthekani ngawe? Ngaba uqotywa ngumsebenzi? Okanye ngaba uphakathi kwezigidi ngezigidi ezingenamsebenzi sithethanje? Ukuba kunjalo, unokuwufumana njani umsebenzi?
[Ibhokisi/Umfanekiso okwiphepha 3]
“UMSEBENZI WESIBINI”
Elinye ibhinqa eliphangelayo lithi: “Xa ndigoduka ndifika endlini, ndipheke, ndicoce indlu, ndihlambe iimpahla, ndiye kulanda abantwana, ndibancedise kumsebenzi wabo wesikolo ndize ndiqiniseke ukuba bahlambile ngaphambi kokuba balale. Yithi ke ngelo xesha ndifile kukudinwa.” Izigidi ngezigidi phakathi kweebhiliyoni ezi-1,2 zamabhinqa aphangelayo zenza lo “msebenzi wesibini” unzima, kanye njengokuba amadoda amaninzi esenza. Noko ke, uhlolisiso lubonise ukuba amadoda amaninzi adla ngokungafuni ukwenza umsebenzi wasekhaya. Wonke lo msebenzi uphela usenziwa ngamabhinqa, enoba ayasebenza okanye akunjalo.