Okwenzeka Ehlabathini

“Ngowama-2008, ehlabathini lonke kuye kwachithwa [ii-R11 092 zeebhiliyoni] kwizinto zasemkhosini. Oku kubonisa ukuba ezi ndleko ziye zanda . . . ngama-45 ekhulwini ukususela ngowe-1999.”—ISTOCKHOLM INTERNATIONAL PEACE RESEARCH INSTITUTE, ESWEDEN.

“IGoogle ibonisa ukuba mihla le kufakwa iiweb pages ezintsha kwi-Internet.”—INEW SCIENTIST, EBRITANI.

“Inani labantu abathwaxwa linxele likaKhetsekile ehlabathini lonke liye lantinga ngowama-2009 suku ngalunye ngabantu abali-1 020 lezigidi ababhuqwa lilo.”—IFOOD AND AGRICULTURE ORGANIZATION OF THE UNITED NATIONS, EITALY.

Inkamela Yokuqala Enguzenzele

Ukususela ngowe-1996, xa abaphengululi baqalisa ukuvelisa igusha enguzenzele, kuye kwaveliswa nezinye izilwanyana ezanyisayo—eziquka iinkomo, iibhokhwe namahashe—ngendlela efanayo. Ngoku izazinzulu ezikwiziko lokuphengulula ngezilwanyana eDubai ziye zavelisa inkamela yokuqala enguzenzele. Le mazi yenkamela iye yabizwa ngokuba nguInjaz, igama lesiArab elithetha “impumelelo.” Iphephandaba laseAbu Dhabi iThe National lithi: “Zininzi gqitha izilwanyana ezingozenzele . . . eziye zaveliswa. Kwixa elizayo, kuza kusetyenziswa le nkqubo ukubona ukuba akunakwenzeka kusini na ukuthabatha incindi ekwiiseli zeenkamela zomdlalo nezo zanyisayo ukuze kuveliswe ezinye iinkamela.”

Ukungqubana KweeSatellite

IScience News ithi: “Sele kuqengqeleke iminyaka emininzi kuxinene kwindlela ezihamba kuyo izijikelezi-langa ingakumbi ezo zingentla komhlaba, kangangokuba ngoFebruwari [2009] kwenzeka into engazange yakha yabonwa, kwangqubana ii-satellite ezimbini.” Malunga nomgama oziikhilomitha ezingama-800 ngaphezu kweSiberia kuye kwangqubana isatellite yonxibelelwano yaseMerika nesixhobo somkhosi esingasasebenziyo saseRashiya. Loo nto yenza kwathi saa iingceba ezininzi ezimalunga nama-700. Ubuninzi bezi ngceba bunokubangela ukuba kuphinde kubekho ezinye iingozi. Amaziko ahlola indlela yezijikelezi-langa aye abona iingceba ezili-18 000 ezisemajukujukwini yaye ezinye zazo zingaphezu kweesentimitha ezilishumi ubukhulu. Sekunjalo, ukungqubana neceba elingaphezu kokhozo kunokubangela iingxaki ezinkulu kwiisatellite nakwezinye izinto ezibhabhayo.

Izinto Ezenza Iimoto Zingahambi

IThe Wall Street Journal ithi: “Bambalwa abantu abangazihlawuliyo iindleko zeeselfowuni zabo ngenxa yokuba besazi ukuba ziya kuvalwa xa bengazihlawuli.” Ngoku abathengisi beemoto bafuna ukwenza into efanayo. Eli phephandaba lithi: “Abathengisi beemoto ezindala bafaka isixhobo abakwaziyo ukusilawula ukuze bayicime imoto ingahambi xa sele kudlule ixesha elide umniniyo engasayihlawuli.” Esi sixhobo—singena kumngxunya wesitshixo—sifakwa kwiimoto zabathengi abangenaso isiqinisekiso sentlawulo size sikhutshwe xa lihlawulwe lonke ityala. Kodwa ke, kwaeli phephandaba liyayichaza into yokuba akude kufuneke ukuba sisetyenziswe esi sixhobo. Kunoko, kufakwa izibane ezidanyazayo “ezibangela ukuba abathengi bahlawule kwangethuba.”