Abantu Abaselula Bayabuza

Ngaba Ndikulungele Ukushiya Ikhaya?

“Maxa wambi ndivakalelwa kukuba abantu bandijonga kakubi kuba ndineminyaka eli-19 ubudala ndibe ndisahlala ekhaya, ngokungathi andisokuze ndikhule de ndibe ndiyazihlalela.”—UKatie.a

“Ndineminyaka ephantse ibe ngama-20 ubudala kwaye andiyithandi into yokuba ndingenakwenza nantoni na endiyifunayo ngobomi bam. Ndikhe ndacinga ngokushiy’ ikhaya kuba ndidikwe yinto yokuba abazali bam abasoze khe bandiphulaphule yaye basoloko bendixelela ukuba bazi yonk’ into.”—UFiona.

USENOKUQALA ukufun’ ukuzimela ungekakulungeli ukushiya ikhaya. Yinto eqhelekileyo leyo. Kakade ke, uThixo wayefuna ukuba ulutsha lukhule luze ekugqibeleni lushiye abazali lube neentsapho zalo. (Genesis 2:23, 24; Marko 10:7, 8) Kodwa ngaba ukufuna kwakho inkululeko kutheth’ ukuba kufike ixesha lokuba ulishiye ikhaya? Kusenokwenzeka ukuba kunjalo. Kodwa ke unokwazi njani ukuba nyhani ukulungele ukulishiya ikhaya? Khawucinge ngale mibuzo mithathu ekufuneka uyiphendule. Owokuqala ngulo . . .

Yintoni Ebangela Ukuba Ushiye Ikhaya?

Hlola ezi zizathu zilandelayo uze ubone ukuba sisiphi esibangela ukuba ufune ukulishiya ikhaya. Zilandelelanise ngokokubaluleka kwazo izizathu zokuba ufune ukuhamba.

․․․ Ukubaleka iingxaki zasekhaya

․․․ Ukufuna inkululeko engakumbi

․․․ Ukufuna ukuhlonelwa ngabahlobo

․․․ Ukunceda umhlobo ofuna umntu aza kuhlala naye

․․․ Ukuya kusebenza njengetsha-ntliziyo kwenye indawo

․․․ Ukufuna ukuziphilela

․․․ Ukungafuni ukuhlawulelwa yonke into ngabazali

․․․ Nezinye izinto ․․․

Akukho nto imbi nangesinye kwezi zizathu zingasentla. Noko ke, into ebangela ukuba ushiye ikhaya inokuluchaphazela ulonwabo lwakho xa sele ungasahlali nabazali bakho. Ngokomzekelo, xa ushiya ikhaya kuba ubaleka iingxaki okanye ufuna inkululeko, uya kufumana into obungayilindelanga!

UDanielle owakha walishiya ikhaya lakhe xa wayeneminyaka engama-20 ubudala, wafunda lukhulu kuloo nto. Uthi: “Sonke sifanele sinqandwe kwizinto ezithile. Xa uzihlalela, izinto onokuzenza zilawulwa ngamaxesha akho omsebenzi nokungabi namali.” UCarmen, owafudukela phesheya kolwandle kangangeenyanga ezintandathu uthi: “Kwakumnandi gqitha ukuhlala apho kodwa lalingekho ixesha lokuba ndikhe ndingenzi nto! Kwakufuneka ndenze imisebenzi yasendlini—ukucoca indlu, ukulungisa izinto, ukususa ukhula, ukuhlamba impahla, ukucoca umgangatho nezinye izinto.”

Liyinyaniso elokuba, ukushiy’ ikhaya kunokukunika inkululeko engakumbi yaye kunokukwenza uhlonelwe ngabahlobo bakho. Kodwa nguwe oza kuhlawula amatyala, uziphekele, ucoce indlu uze uzonwabise xa abahlobo nentsapho yakowenu ingekho. Ngoko ke, musa ukubavumela abanye abantu ukuba bakwenzise isigqibo sokungxama. (IMizekeliso 29:20) Naxa unezizathu ezivakalayo zokushiya ikhaya, kufuneka okungakumbi kunokuba neentshukumisa ezintle. Kufuneka ukwazi ukuzinyamekela—nto leyo esikhokelela kumbuzo wesibini . . .

Ngaba Ukulungele?

Ukuya kuzihlalela kufana nokunyuk’ intaba entlango. Ngaba ubuya kuya emaphandleni ungakwazi ukumisa intente, ukubas’ umlilo, ukupheka okanye ukufunda imaphu? Akunjalo! Sekunjalo, luninzi ulutsha olushiy’ ikhaya lungakwazi kakuhle ukunyamekela ikhaya.

Ukumkani uSolomon osisilumko wathi, “onobuqili uyawaqwalasela amanyathelo akhe.” (IMizekeliso 14:15) Ukuze ubone ukuba ukulungele ukuzihlalela khawuhlole le mixholo ilandelayo. Beka olu phawu ✔ ecaleni kwezinto okwaziyo ukuzenza uze ubeke olu X ecaleni kwezo usafanele uzifunde.

◯ Ukuyisebenzisa kakuhle imali USerena, oneminyaka eli-19 ubudala uthi: “Akuzange kukhe kufuneke ukuba ndihlawule nantoni na. Ndiyoyika ukushiya ikhaya ndize ndinyanzeleke ukuba ndiqingq’ indlela endimele ndiyisebenzise ngayo imali.” Unokukufunda njani ukusebenzisa imali?

Umzekeliso weBhayibhile uthi: “Umntu osisilumko uya kuphulaphula aze angenise uyalelo olungakumbi.” (IMizekeliso 1:5) Ngoko ke, unokubuza abazali bakho ngeendleko zomntu omnye nyanga nganye zerente, indlu, zokutya, zemoto nezesithuthi sikawonke wonke. Emva koko, cela abazali bakho ukuba bakufundise indlela yokuqingq’ imali nendlela yokuhlawula amatyala. Kutheni kubalulekile ukuzifundisa ukuba usoloko usenza uqingqo-mali? UKevin, oneminyaka engama-20 ubudala uthi: “Xa sele uzihlalela, ziba ninzi iindleko obungazilindelanga. Ukuba akulumkanga, kusenokufuneka ukuba uzilahlele nofele emsebenzini kuba uzama ukuhlawula amatyala onawo.”

Ngaba uyafuna ukuyazi eyona nyaniso? Ukuba uyasebenza, khawukhe unike abazali bakho nyanga nganye imali eyanele ukutya, indawo yokuhlala nezinye iindleko. Ukuba akukwazi okanye akuzimiselanga ukuhlawula iindleko zokuhlala kwakho kowenu, awukakulungeli ukushiya ikhaya.—2 Tesalonika 3:10, 12.

◯ Imisebenzi yasekhaya UBrian, oneminyaka eli-17 ubudala uthi eyona nto ayoyikayo ngokushiy’ ikhaya kukuba kuza kufuneka azihlambele iimpahla. Unokwazi njani xa sele ukulungele ukuzinyamekela? UAron, oneminyaka engama-20 ubudala ucebisa athi: “Khawukhe uzame ukuphila ngathi uyazihlalela kangangesithuba seveki. Ziphekele ukutya ozithengele kona evenkileni ngemali oyisebenzeleyo. Nxiba iimpahla ezihlanjwe nezolulwe nguwe. Yicoce ngokwakho indlu. Zama ukuziyela kwiindawo ofuna ukuya kuzo kungekho mntu uza kukusa okanye akulande.” Ukulisebenzisa eli cebiso kuya kukunceda ngeendlela ezimbini: Kuya kukunceda (1) ukwazi ukwenza izinto ezibalulekileyo, uze (2) ube nombulelo ngezinto ozenzelwa ngabazali bakho.

◯ Ukusebenzisana nabanye abantu Ngaba uyavana nabazali bakho nabantwana bakowenu? Ukuba akunjalo, usenokucinga ukuba uza kuphila ubomi obubhetele xa uhlala nomhlobo wakho. Kusenokuba njalo. Kodwa cinga ngoko kuthethwa nguEve, oneminyaka eli-18 ubudala: “Abahlobo bam ababini bashiya amakhaya abo baza baya kuhlala kunye. Babengabahlobo abasenyongweni ngaphambi kokuba bahlale kunye kodwa kwakunzima gqitha ukuba bahlale bobabini. Omnye wayelihomba, omnye elixelegu. Omnye wayemthanda kakhulu uThixo, omnye wayedlulisa nje usana kunina. Babengavani kwaphela!”

UErin, oneminyaka eli-18 ubudala ufuna ukushiya ikhaya. Sekunjalo, uthi: “Uyakwazi ukufunda ukuhlala nabantu ngoxa usahlala kowenu. Ufunda indlela yokucombulula iingxaki nokuncamela abanye abantu izinto. Eyona nto ndiyiphawulileyo kukuba abo bashiya amakhaya abo kuba bebaleka ukungevani nabazali babo bafunda ukubaleka iingxwabangxwaba kunokuba bazicombulule.”

◯ Ucwangciso lokwenza izinto zonqulo Abanye bashiya ikhaya kuba nje bebaleka ucwangciso lwabazali babo lokwenza izinto zonqulo. Abanye bayazimisela ukufunda iBhayibhile baze banqule kodwa ekuhambeni kwexesha baqalisa ukwenza imikhwa emibi. Unokukuphepha njani ‘ukophukelwa yinqanawa elukholo lwakho’?—1 Timoti 1:19.

Ungasuki nje ulandele izinto ezikholelwa ngabazali bakho. UYehova uThixo ufuna ukuba sonke sizibonele ngokwethu izinto esizikholelwayo. (Roma 12:1, 2) Ngoko ke, zenzele ucwangciso lokufunda iBhayibhile nokunqula uze unamathele kulo. Unokuzibhalela olwakho ucwangciso kwikhalenda uze ubone enoba unokukwazi kusini na ukululandela kwisithuba senyanga ungakhange ukhunjuzwe ngabazali bakho.

Umbuzo wesithathu nowokugqibela omele ucinge ngawo ngulo . . .

Yintoni Eyona Nto Ndifuna Ukuyenza?

Abanye abantu badla ngokushiya ikhaya kuba bebaleka iingxaki okanye bengasafuni ukuba phantsi kwegunya labazali. Eyona nto bacinga ngayo yile bayenzayo kunalapho baya khona. Kodwa loo ndlela yokucinga ifana nqwa nokuzama ukuqhuba ujonge isipili esikubonisa ngasemva. Xa umqhubi ejonge ngasemva akanakuzibona izinto eziphambi kwakhe. Yintoni esiyifundayo koku? Ukuze uphumelele, musa ukucinga nje ngokushiy’ ikhaya—cingisisa ngezinto ezibalulekileyo ofuna ukuzenza.

Olunye ulutsha oluqolileyo olungamaNgqina kaYehova luye lwafudukela kwimihlaba ekwanti ekumazwe akwamawalo okanye phesheya kolwandle ngenjongo yokushumayela. Olunye luye lwaya kuncedisa ekwakheni iindawo zonqulo okanye lwaya kusebenza kwiofisi yesebe yamaNgqina kaYehova. Kanti olunye lufuna ukuzihlalela okwethutyana ngaphambi kokuba lutshate.b

Sicela ubhale usukelo ongathanda ukulufikelela ngokushiya ikhaya. ․․․․․

Kodwa kuyenzeka maxa wambi ukuba umntu ahlale kowabo ixesha elide kakhulu kangangokude angabufundi ubuchule obuya kumnceda xa sele ezihlalela. Sekunjalo, musa ukukhawuleza ufune ukwenza isigqibo. Cingisisa ngaphambi kokuba wenze isigqibo. IBhayibhile ithi: “Amacebo okhutheleyo ngokuqinisekileyo ayingenelo, kodwa wonk’ ubani ongxamayo ngokuqinisekileyo usingisa ekusweleni.” (IMizekeliso 21:5) Liphulaphule icebiso labazali bakho. (IMizekeliso 23:22) Wuthandazele lo mbandela. Njengoko usenza isigqibo, cinga ngemigaqo yeBhayibhile ekuthethwe ngayo kweli nqaku.

Umbuzo asingowokuba Ukulungele na ukushiya ikhaya? Kodwa ngowokuba Ungakwazi na ukuzinyamekela? Ukuba uyakwazi ukuzinyamekela, mhlawumbi selifikile ixesha lokuba uye kuzimela.

Amanye amanqaku athi “Abantu Abaselula Bayabuza” afumaneka kwiWeb site ethi www.watchtower.org/ype

[Imibhalo esemazantsi]

OKO UMELE UCINGE NGAKO

● Enoba ubomi bunzima ekhaya, kunokukunceda njani ukuqhubeka uhlala kowenu?

● Ngoxa usahlala kowenu, yintoni onokuyenza eza kunceda intsapho yakowenu ize ikwenze ulungele ukunyamekela owakho umzi?

[Ibhokisi/Imifanekiso ekwiphepha 11]

OKO KUTHETHWA LOLUNYE ULUTSHA

“Xa abazali bakho bekunika iimbopheleleko—ezifana nezo ubuya kuba nazo xa ubuzihlalela—ukuhlala ekhaya bekuya kuba yeyona ndawo ifanelekileyo yokufunda ukuzimela ngeny’ imini.”

“Iqhelekile into yokuba umntu afune ukuzimela. Kodwa ukuba eyona nto ikubangela ukuba ufun’ ukushiy’ ikhaya kukubaleka imithetho, loo nto ithetha ukuba awukakulungeli ukushiy’ ikhaya.”

[Imifanekiso]

USarah

UAron

[Ibhokisi ekwiphepha 13]

UMYALEZO OYA KUBAZALI

USerena, okhankanywe kwinqaku elihambisana nale bhokisi uyakoyika ukushiy’ ikhaya. Ibangelwa yintoni loo nto? Uthi: “Nokuba sendifuna ukuthenga into ngemali yam, uTata akandivumeli. Uthi, yimbopheleleko yakhe leyo. Ngoko ke kuyandoyikisa ukucinga ngokuba kuza kufuneka ndizihlawulele amatyala.” Asinakuyiphikisa into yokuba utata kaSerena ufuna ukwenza okulungileyo, kodwa ngaba uyayinceda intombi yakhe ukuba ilungiselele ukunyamekela ikhaya layo ngeny’ mini?—IMizekeliso 31:10, 18, 27.

Ngaba abantwana bakho bakhuseleke kangangokuba abakulungelanga ukuzimela? Unokuyazi njani loo nto? Cinga ngezinto ezine onokuzenza ekuthethwe ngazo kwinqaku elihamba nale bhokisi, kodwa uzijonge njengomzali.

Ukuyisebenzisa kakuhle imali. Ngaba abantwana bakho abasele bebadala bayakwazi ukuzalisa iphepha lerhafu okanye bayazazi izinto abafanele bazenze ukuze bathobele imithetho yerhafu? (Roma 13:7) Ngaba bayakwazi ukuthenga ngetyala bengadyakrazi? (IMizekeliso 22:7) Ngaba bayakwazi ukuyisebenzisa kakuhle imali abayamkelayo? (Luka 14:28-30) Ngaba bakhe bazithengela into ngemali abayisebenzeleyo? Ngaba bakhe baphisa ngexesha nangezinto abanazo ukuze bancede abanye?—IZenzo 20:35.

Imisebenzi yasekhaya. Ngaba iintombi noonyana bakho bayakwazi ukupheka? Ngaba ubafundisile ukuhlamba nokuayina iimpahla? Ukuba banemoto, ngaba bayakwazi ukulungisa izinto ezincinci njengokutshintsha ifuse, ioli, okanye itayara eligqabhukileyo?

Ukusebenzisana nabanye abantu. Xa abantwana bakho abadala bengavisisani, ngaba usoloko ungenelela ngokubanik’ isicombululo? Okanye, ngaba abantwana bakho ubafundise ukuzicombulula beseluxolweni iingxaki zabo baze emva koko bakuchazele indlela abayisingathe ngayo loo ngxaki?—Mateyu 5:23-25.

Ucwangciso lokwenza izinto zonqulo. Ngaba uyabaxelela abantwana bakho ngezinto abafanele bakholelwe kuzo okanye ngaba uyabeyisela? (2 Timoti 3:14, 15) Endaweni yokusoloko uyiphendula imibuzo abanayo engonqulo nangokuziphatha, ngaba uyabanceda bahlakulele “amandla okucinga” ukuze ‘bawaqeqeshele ukwahlula okulungileyo nokubi’? (IMizekeliso 1:4; Hebhere 5:14) Ngaba ufuna bafunde iBhayibhile ngendlela wena oyifunda ngayo okanye ufuna benze okubhetele kunoko?

Ayinakuphikiswa into yokuba ukuqeqesha abantwana bakho ngale ndlela kufuna ixesha nomgudu. Kodwa kuyanceda ukwenza oko ingakumbi xa kufika loo mini yokuthi ndlela-ntle.

[Umfanekiso okwiphepha 12]

Ukuya kuzihlalela kufana nokunyuk’ intaba entlango—kufuneka ufunde ukuzinyamekela ngaphambi kokuba uthabathe uhambo