Inkundla YaseSpeyin Inika Umama Ilungelo Lokukhulisa Abantwana
● Ubunokuvakalelwa njani xa kunokuthiwa ungumzali ongakufanelekelanga ukukhulisa abantwana? Kuthekani ukuba omnye umntu unokuthi abantwana bakho abakwazi ukuhlalisana kakuhle nabanye abantu, abakwazi ukwahlula okulungileyo nokubi, yaye ingqondo yabo ayilingani neminyaka yabo—ngenxa yempembelelo yakho?
URosa López, umama waseSpeyin onamantombazana amabini, wayejamelene nezo zityholo xa owayesakuba ngumyeni wakhe wayefuna ukubathabathela kuye ngokusemthethweni abantwana babo. URosa ngomnye wamaNgqina kaYehova, yaye lo wayesakuba ngumyeni wakhe wathi iinkolelo zakhe ziyabumosha ubomi babantwana babo, indlela abaqhuba ngayo esikolweni nendlela abaziphethe ngayo. Xa inkundla yasekuhlaleni yazikhaba ngawo omane ezo zityholo, wabhenela kwinkundla yephondo.
Xa ixoxwa ityala elinjalo, inkundla izama ukungabi namkhethe yaye ayifaki zingxoxo zonqulo nezinokuvavanya ukholo lukabani. Kunoko, ixoxa ngemibandela enjengokuba: Ziziphi izinto eziyimfuneko emntwaneni? Ngaba impembelelo yomzali omkhulisayo inokummosha ngandlela ithile? Nguwuphi oyena mzali okufanekelayo ukukhulisa umntwana?
Ukuze inkundla ikwazi ukufumana iimpendulo zale mibuzo kwimeko kaRosa, yacela esinye isazi ngengqondo ukuba sidlan’ indlebe nabantwana kunye nabazali. Yintoni eyafunyaniswa sesi sazi? Safumanisa ukuba nangona aba bantwana bekhuliswe ngunina kangangeminyaka emithandathu, baqhuba kakuhle kuzo zonke iinkalo zobomi—esikolweni, xa bekunye nabantu nasentsatsheni. Ngenxa yezo zinto nobungqina obafunyaniswa yinkundla ngokuphathelele abazali, ijaji zange ifumane nto ibonisa ukuba “aba bantwana baye bamosheka ngandlel’ ithile kuba bekhulele phakathi kwamaNgqina kaYehova.” Kwakhona yathi izityholo zowayesakuba ngumyeni kaRosa “azinasihlahla.”
Ngenxa yokungaluthandi unqulo lwamaNgqina kaYehova okanye ukungalwazi kakuhle, abanye babecinga ukuba abantwana bamaNgqina abakhuliswa ngendlela “eqhelekileyo.” Kodwa, abantwana abakhuliswe ngemigaqo yeBhayibhile bakhuliswa kakuhle. Bayancedwa ukuba balungelelane, babe nenkathalo yaye bakwazi ukuphumelela ebomini.—Efese 6:4; 2 Timoti 3:15-17.
[Umfanekiso okwiphepha 14]
URosa López wafumana ilungelo lokukhulisa amantombazana akhe ababini