Ibali Lobomi

Ubomi Bokuzincama Obanelisayo Nobonwabisayo

KUBALISA UMARIAN NOROSA SZUMIGA

INdumiso 54:6 ithi: “Ndiya kubingelela kuwe ngokuzithandela.” La mazwi ebesoloko enkenteza ezindlebeni zikaMarian Szumiga nomfazi wakhe, uRosa, abahlala eFransi. Kutshanje baye babalisa iimbalasane zobomi babo obude nobanelisayo enkonzweni kaYehova.

UMARIAN: Abazali bam babengamaRoma Katolika asuka ePoland. Utata wayengafundanga. Noko ke, ebudeni bemfazwe yehlabathi yokuqala, wafunda ukulesa nokubhala ngoxa wayelijoni. Utata wayeyindoda ehlonel’ uThixo, kodwa icawa yayidla ngokumphoxa.

Kukho esinye isiganeko awayengasilibali. Ngenye imini ebudeni bemfazwe, omnye umfundisi wasemkhosini watyelela icala awayesebenza kulo uTata. Xa kwadubula ibhombu kude kufuphi, lo mfundisi wabaleka ephakuzela, waza wabetha ihashe lakhe ngomnqamlezo ukuze liphale. Utata wothuswa kukuba “ummeli” kaThixo asebenzise into “engcwele” ukuze abaleke. Phezu kwazo nje izinto ezinjalo ezazisenzeka neziganeko zemfazwe ezoyikekayo awazibonayo, ukholo lukaTata kuThixo aluzange lugungqe. Wayesoloko embulela uThixo ngokubuya kwakhe esindile emfazweni.

“IPoland Encinane”

Ngowe-1911, utata watshata nentombi ehlala kwidolophana ekufuphi. Igama layo yayinguAnna Cisowski. Kamsinya emva kwemfazwe, ngowe-1919, uTata noMama balishiya elasePoland baza bafudukela eFransi apho utata wafumana umsebenzi emgodini wamalahle. Ndazalwa ngoMatshi 1926 eCagnac-les-Mines, emzantsi-ntshona weFransi. Emva koko, abazali bam bahlala kwindawo eyayihlala abemi basePoland eLoos-en-Gohelle, kufuphi naseLens emantla eFransi. Umbhaki walapho, unosilarha nomfundisi, bonke babengabemi basePoland. Akumangalisi ke ngoko, ukuba le ndawo yayibizwa ngokuba yiPoland Encinane. Abazali bam babexakekile yimisebenzi yasekuhlaleni. UTata wayedla ngokuququzelela imiboniso, eyayiquka umdlalo weqonga nomculo. Kwakhona wayedla ngokuba neengxoxo ezithile nomfundisi, kodwa wayenganeliseki xa umfundisi wayedla ngokumphendula esithi, “Zininzi izinto eziyimfihlelo.”

Ngenye imini ngowe-1930, kwankqonkqoza amabhinqa amabini ekhayeni lethu. AyengaBafundi beBhayibhile, njengoko amaNgqina kaYehova ayebizwa njalo ngelo xesha. Utata wafumana iBhayibhile kuwo, incwadi awayefuna ukuyifunda kangangeminyaka. Kwakhona yena noMama bafunda ngolangazelelo iincwadi ezisekelwe eBhayibhileni ezashiywa ngaloo mabhinqa. Abazali bam bachukumiseka ngokunzulu koko babekufunda kwezi ncwadi. Nangona yayingabantu abaxakekileyo, abazali bam baqalisa ukuya kwiintlanganiso zaBafundi beBhayibhile. Iingxoxo nomfundisi zaziya zisiba shushu ngakumbi de ngenye imini wasongela abazali bam esithi ukuba bayaqhubeka benxulumana naBafundi beBhayibhile, udade wethu uStéphanie uza kugxothwa kwisikolo secawa. UTata wamphendula esithi: “Ungazikhathazi. Ukususela ngoku, intombi yam nabanye abantwana baza kuhamba nathi ukuya kwiintlanganiso zaBafundi beBhayibhile.” UTata warhoxa ecaweni, yaye ebutsheni bowe-1932, abazali bam babhaptizwa. Ngelo xesha, kwakukho malunga nabavakalisi boBukumkani abanokuba ngama-800 kuphela eFransi.

URosa: Abazali bam babesuka eHungary yaye, njengentsapho yakuloMarian, baya kuhlala emantla eFransi ukuze basebenze emgodini wamalahle. Ndazalwa ngowe-1925. Ngowe-1937, omnye wamaNgqina kaYehova, uAuguste Beugin, okanye uPapa Auguste njengoko sasimbiza njalo, waqalisa ukuphathela abazali bam IMboniselo ngolwimi lwesiHungary. Babewafumanisa ebangela umdla la maphephancwadi, kodwa abazange babe ngamaNgqina kaYehova.

Nangona ndandiselula, intliziyo yam yayichukumiseka koko ndandikufunda kwiMboniselo, yaye umolokazana kaPapa Auguste, uSuzanne Beugin, waba ngumhlobo wam. Abazali bam bamvumela ukuba ahambe nam ukuya kwiintlanganiso. Kamva, xa ndaqalisa ukuphangela, ukuya kwam kwiintlanganiso zangeCawa kwakumcaphukisa utata. Nangona wayengumntu olungileyo ngokwemvelo, wakhalaza esithi, “Ebudeni beveki akubikho, yaye ngeeCawa uya kwezi ntlanganiso zakho!” Sekunjalo, ndaqhubeka ndisiya. Ngoko ke ngenye imini utata wathi, “Thabatha konke okwakho uhambe!” Kwakusebusuku. Ndandineminyaka nje eli-17 ubudala, yaye ndandingazi apho ndifanele ndiye khona. Ndaya ekhayeni likaSuzanne, ndingalili nje kuphela, kodwa ndigixa. Ndahlala noSuzanne kangangeveki ngaphambi kokuba uTata athumele udade wethu ukuba aze kundiphuthuma. Ndandingumntu oneentloni, kodwa amazwi akweyoku-1 kuYohane 4:18 andinceda ndema ndiqinile. Eso sibhalo sithi “uthando olugqibeleleyo luluphosela phandle uloyiko.” Ngowe-1942, ndabhaptizwa.

Ilifa Lokomoya Elixabisekileyo

UMarian: Ndabhaptizwa ngowe-1942, kunye noodadewethu uStéphanie noMélanie nomkhuluwa wam uStéphane. Ekhaya, lalixatyiswe gqitha iLizwi likaThixo. Njengoko sonke sasihlala etafileni, uTata wayesifundela iBhayibhile ngesiPolish. Ngokuhlwa sasidla ngokuhlala size siphulaphule abazali bethu njengoko besibalisela ngoko badibene nako kumsebenzi wokushumayela ngoBukumkani. La mathuba alukhuthazo ngokomoya asifundisa ukumthanda uYehova nokumthemba ngakumbi nangakumbi. Ngenxa yempilo enkenenkene kwanyanzeleka ukuba utata ayeke ukusebenza, kodwa waqhubeka esinyamekela ngokomoya nangokwenyama.

Ekubeni ngoku uTata wayenexesha elongezelelekileyo, wayeqhuba isifundo seBhayibhile ngesiPolish nolutsha lwasebandleni kanye ngeveki. Apho ndafunda ukulesa isiPolish. Kwakhona uTata wayekhuthaza ulutsha nangezinye iindlela. Ngesinye isihlandlo xa uMzalwan’ uGustave Zopfer, ngeloo xesha owayesongamela umsebenzi wamaNgqina kaYehova eFransi, watyelela ibandla lethu, uTata walungiselela ukuba kubekho ikwayala nomdlalo weBhayibhile ekwakunxitywe kuwo iimpahla zamandulo nowawusekelwe kwisidlo sikaKumkani uBheleshatsare kunye nombhalo oseludongeni. (Daniyeli 5:1-31) Indima kaDaniyeli yayidlalwa nguLouis Piéchota, kamva owama ngokuqinileyo nxamnye namaNazi.a Le yimeko esakhulela kuyo njengabantwana. Saphawula ukuba abazali bethu babesoloko bexakekile zizinto zokomoya. Namhlanje, ndiyabona ukuba abazali bam basishiyela elona lifa lixabisekileyo.

Xa kwaqalisa IMfazwe Yehlabathi II ngowe-1939, umsebenzi wokushumayela wamaNgqina kaYehova wavalwa eFransi. Ngesinye isihlandlo, idolophana yethu yagqogqwa. Zonke izindlu zazirhangqwe ngamajoni amaJamani. UTata wayenze enye indawo ewodrophini esasifihle kuyo iincwadi ezininzi zeBhayibhile. Noko ke, imibhalo eliqela yencwadana ethi Fascism or Freedom yayikwidrowa yetafile. Ngokukhawuleza uTata wayifihla kwipokotho yebhatyi eyayixhonywe epasejini. Amajoni amabini kunye nepolisa elingumFrentshi agqogqa ikhaya lethu. Sasothukile. Elinye ijoni laqalisa ukukhangela kwiimpahla ezazixhonywe epasejini, yaye kamsinya emva koko langena ekhitshini, apho sasikho, yaye laliphethe iincwadana. Lasijonga, labeka ezo ncwadana etafileni, laza laqhubeka ligqogqa kwezinye iindawo. Ngokukhawuleza ndazithabatha ezi ncwadana ndaza ndazifaka kwidrowa eyayisele igqogqiwe leli joni. Eli joni alizange lizibuze ezi ncwadana—kwakungathi lizilibele ngokupheleleyo!

Ukuqalisa Inkonzo Yexesha Elizeleyo

Ngowe-1948, ndagqiba kwelokuba ndikhonze uYehova ixesha elizeleyo kwinkonzo yobuvulindlela. Kwiintsuku ezimbalwa kamva, ndafumana ileta eyayivela kwiofisi yesebe lamaNgqina kaYehova eFransi. Le leta yayinesabelo sam sokuba nguvulindlela kwibandla laseSedan, kufuphi naseBelgium. Abazali bam bavuyiswa gqitha kukundibona ndisamkela inkonzo kaYehova ngolo hlobo. Sekunjalo, uTata, wandichazela ngeliphandle ukuba ubuvulindlela abuyondlwan’ iyanetha. Iza kuba ngumsebenzi onzima. Noko ke, wathi ndiya kusoloko ndamkelekile ekhaya yaye ndinokuza kuye xa ndineengxaki. Nangona abazali bam babengenamali ingako, bandithengela ibhayisekile entsha. Ndisenayo nangoku irisithi yaloo bhayisekile, yaye xa ndiyijonga, amehlo am asuke athi gwantyi ziinyembezi. UTata noMama bafa ngowe-1961, kodwa amazwi kaTata obulumko asankenteza ezindlebeni zam nangoku; aye andikhuthaza aza andithuthuzela ebudeni beminyaka yam yenkonzo.

Omnye umntu owayendikhuthaza yayingudade ongumKristu uElise Motte owayeneminyaka engama-75 ubudala nowayesebandleni laseSedan. Ehlotyeni, ndandiqhuba ibhayisekile yam ndiye kushumayela kwiidolophana ezisemaphandleni, yaye uElise wayelandela ngololiwe. Noko ke, ngenye imini abaqhubi boololiwe bagwayimba, yaye uElise wayengakwazi ukugoduka. Ekuphela kwento endandinokucinga ngayo yayikukuba ndimkhwelise kwindawo ehlala umthwalo kwibhayisikile yam, ndize ndimgoduse—wayeza kuhlala kabuhlungu. Ngosuku olulandelayo, ndaphatha umqamelo ndaza ndaya kumphuthuma uElise ekhayeni lakhe. Wayeka ukuhamba ngololiwe, yaye wayekwazi ukuthenga into ephungwayo ebudeni besidlo sasemini ngemali awayemele ukuba ukhwele ngayo. Ngubani owayenokucinga ukuba ibhayisekile yam ingaba sisithuthi?

Iimbopheleleko Ezingakumbi

Ngowe-1950, ndacelwa ukuba ndibe ngumveleli wesiphaluka kuwo wonke ummandla osemantla weFransi. Ekubeni ndandineminyaka engama-23 kuphela ubudala, ekuqaleni ndandisoyika. Ndandicinga ukuba iofisi yesebe yenze impazamo! Ndazibuza imibuzo emininzi: ‘Ngaba ndiyafaneleka ngokomoya nangokwasemzimbeni ukwenza lo msebenzi? Ngaba ndiza kukwazi ukuhlala kwiindawo ezahlukahlukeneyo veki nganye?’ Okungakumbi, ukususela xa ndandineminyaka emithandathu ubudala, ndaba ligxwem. Ndandisoloko ndiziva ndineentloni gqitha ngenxa yoku, ndixhalabele indlela abanye abaza kundijonga ngayo. Okuvuyisayo kukuba, ngeso sihlandlo uStefan Behunick, owayevela kwisikolo sabavangeli basemazweni saseGiliyadi, wandinceda gqitha. UMzalwan’ uBehunick wagxothwa ePoland ngenxa yomsebenzi wakhe wokushumayela waza wanikwa esinye isabelo eFransi. Inkalipho yakhe yayindichukumisa ngokwenene. Wayenentlonelo enzulu ngoYehova nangenyaniso. Abanye babecinga ukuba wayengqongqo kum, kodwa ndafunda lukhulu kuye. Inkalipho yakhe yandenza ndanentembelo ngakumbi.

Umsebenzi wesiphaluka wandenza ndakwazi ukufumana amava amnandi asentsimini. Ngowe-1953, ndacelwa ukuba ndiye kuMnumzana Paoli, owayehlala emzantsi weParis nowayerhumela IMboniselo. Sadibana, yaye ndafumanisa ukuba ngaphambili wayelijoni yaye ngoku ekumhlala-phantsi yaye wayekuthanda gqitha ukufunda IMboniselo. Wandixelela ukuba emva kokuba efunde inqaku elithetha ngeSikhumbuzo sokufa kukaKristu kwinkupho entsha, wabhiyozela iSikhumbuzo yedwa yaye wachitha phantse yonke ingokuhlwa efunda IiNdumiso. Sancokola phantse yonke imvakwemini. Ngaphambi kokuba ndihambe, sathetha kwanangobhaptizo. Kamva ndamthumelela isimemo sokuba aye kwindibano yethu yesiphaluka, eyayiza kuba sebutsheni bowe-1954. UMzalwan’ uPaoli weza, yaye wayephakathi kwabantu abangama-26 ababhaptizwa kuloo ndibano. Amava anjalo asandivuyisa nangoku.

URosa: Ngo-Oktobha 1948, ndaqalisa ukuba nguvulindlela. Emva kokuba ndisebenze eAnor, kufuphi naseBelgium, ndathunyelwa eParis, kunye nomnye uvulindlela, uIrène Kolanski (ngoku onguLeroy). Sasihlala kwigumbi elincinane eSaint-Germain-des Près embindini wesixeko. Ekubeni ndandikhulele emaphandleni, ndandiziva ndimncinane phakathi kwabantu baseParis. Ndandicinga ukuba bonke babeziinkcuba-buchopho. Kodwa kamsinya ngokushumayela kubo ndafumanisa ukuba babengahlukanga kwabanye abantu. Sasidla ngokugxothwa ngoonogada, yaye kwakunzima ukuqalisa izifundo zeBhayibhile. Sekunjalo, abanye abantu basamkela isigidimi sethu.

Ebudeni bendibano yesiphaluka ngowe-1951, kwenziwa udliwano-ndlebe kunye nam noIrène sibuzwa ngenkonzo yobuvulindlela. Khawuqashele ukuba ngubani owayesibuza loo mibuzo? Yayingumveleli wesiphaluka oselula uMarian Szumiga. Sasikhe sadibana ngaphambili, kodwa emva kwaloo ndibano, saqalisa ukubhalelana. Mna noMarian sasinomdla kwizinto ezifanayo ezininzi, kuquka nento yokuba sabhaptizwa ngonyaka omnye saza saba ngoovulindlela kwangonyaka omnye. Noko ke, okona kubalulekileyo kukuba, sobabini sasifuna ukuhlala kwinkonzo yexesha elizeleyo. Ngoko emva kokucingisisa nokuthandaza, ngoJulayi 31, 1956 satshata. Emva koko, ndaqalisa ukuphila ubomi obahluke ngokupheleleyo. Kwakufuneka ndiqhele kungekhona nje ukuba yinkosikazi kuphela kodwa nokuhamba noMarian kumsebenzi wesiphaluka, nto leyo eyayithetha ukulala kumakhaya awahlukahlukeneyo veki nganye. Ekuqaleni, kwakunzima gqitha, kodwa, sasilindelwe zizinto ezininzi ezivuyisayo.

Ubomi Obanelisayo

UMarian: Kwiminyaka edluleyo, besinelungelo lokuncedisa ekulungiseleleni iindibano ezininzi. Ndisayikhumbula kakuhle enye eyayingowe-1966, eBordeaux. Ngelo xesha, umsebenzi wamaNgqina kaYehova wawuvaliwe ePortugal. Ngenxa yoko ucwangciso lwendibano lwaqhutywa kwanangolwimi lwesiPhuthukezi ukuze amaNgqina awayeze eFransi azuze nawo. Abazalwana bethu noodade abangamaKristu abaninzi abavela ePortugal bafika, kodwa sasinengxaki yendawo esasiza kubahlalisa kuyo. Ekubeni amaNgqina aseBordeaux ayengenamagumbi aneleyo emakhayeni awo, saqesha iholo yemiboniso ukuze ibe yindawo yokulala. Sasusa zonke izitulo, yaye ikhethini eyayiseqongeni sohlula ngayo le holo ukuze ibe namagumbi amabini okulala, elinye libe lelabazalwana lize elinye libe leloodade. Kwakhona safaka iishower nezitya zokuhlambela, sabeka ingca eyomileyo saza sayigquma ngamashiti. Wonke umntu wayenelisekile leli lungiselelo.

Emva kwendibano, sasityelela abazalwana bethu noodade kumagumbi abo okulala. Kwakuba mnandi gqitha. Hayi indlela awayesikhuthaza ngayo amava abo phezu kwayo nje iminyaka yenkcaso! Xa babegoduka ekupheleni kwendibano, sonke sasizibambe ngeenkophe iinyembezi.

Ndaba nelinye ilungelo kwiminyaka emibini ngaphambilana, ngowe-1964, xa ndacelwa ukuba ndibe ngumveleli wesithili. Kwakhona ndazibuza enoba ndandifaneleka kusini na. Kodwa ndazixelela ukuba xa abo baneembopheleleko bendicela ukuba ndamkele esi sabelo, ngokuqinisekileyo bacinga ukuba ndingasiphumeza. Yayingamava amnandi ukusebenza ngokusondeleyo nabanye abaveleli abahambahambayo. Ndafunda okuninzi kubo. Uninzi lwabo lungumzekelo wokwenene ekubonakaliseni umonde nonyamezelo, iimpawu ezibalulekileyo emehlweni kaYehova. Ndiye ndaqonda ukuba xa sifunda ukuba nomonde, uYehova uya kuba kunye nathi.

Ngowe-1982 kwakhona iofisi yesebe yasicela ukuba sinyamekele iqela elincinane labavakalisi abali-12 abathetha isiPolish eBoulogne-Billancourt, kumaphandle aseParis. Le nto ndandingayilindelanga. Ndandiwazi amagama ezinto zobuthixo ngesiPolish, kodwa ndandinengxaki yokwakha izivakalisi. Sekunjalo, ububele nokusebenzisana nam ngovuyo kwabo bazalwana kwandinceda gqitha. Namhlanje, kukho abavakalisi abali-170 kwelo bandla, kuquka noovulindlela abamalunga nama-60. Kamva, mna noRosa sasityelela amaqela esiPolish namabandla aseOstriya, eDenmark naseJamani.

Ukuguquka Kweemeko

Ukutyelela amabandla awahlukahlukeneyo kwakuyinxalenye yobomi bethu, kodwa ngenxa yempilo yam enkenenkene ngowama-2001 kwafuneka siwuyeke umsebenzi wethu wokuhambahamba. Safumana indlu eqeshiswayo kwidolophu yasePithiviers, apho udadewethu uRuth ahlala khona. Ngobubele iofisi yesebe yasimisela njengoovulindlela abakhethekileyo yaza yasihlisela iiyure ngokweemeko zethu.

URosa: Kwakunzima gqitha kum ngonyaka wethu wokuqala siwuyekile umsebenzi wesiphaluka. Le yayiyinguqulelo enkulu kangangokuba ndavakalelwa kukuba ndandingaseyonto yanto. Ndandula ke ndazikhumbuza ndisithi, ‘Usenokuqhubeka usebenzisa ixesha lakho namandla osenawo kakuhle njengovulindlela.’ Namhlanje, ndiyakuvuyela ukusebenza nabanye oovulindlela ebandleni lethu.

UYehova Ebesoloko Esinyamekela

UMarian: Ndimbulela gqitha uYehova ngenxa yokuba uRosa eye waba liqabane lam kangangeminyaka engama-48 edluleyo. Ebudeni bayo yonke loo minyaka sikumsebenzi wokuhambahamba, ebendixhasa gqitha. Andizange ndikhe ndimve nangemini enye esithi, ‘Akwaba besinokuyeka ukuhambahamba size sibe nendlu yethu.’

URosa: Maxa wambi omnye umntu ebeye athi, “Aniphili ubomi obuqhelekileyo. Nisoloko nihlala nabantu.” Kodwa eneneni buyintoni “ubomi obuqhelekileyo”? Sisoloko singqongwe zizinto ezininzi ezinokuba ngumqobo kusukelo lwethu lwezinto zokomoya. Eyona nto siyifuna ngokwenene yibhedi efanelekileyo, itafile nezinye izinto ezimbalwa eziyimfuneko. Njengoovulindlela asinazinto zingako, sekunjalo sinayo yonke into eyimfuneko ukuze senze ukuthanda kukaYehova. Maxa wambi ndandiye ndibuzwe, “Uza kwenza ntoni xa sele waluphele ungenandlu yakho nemali yomhlala-phantsi.” Ndandiye ndicaphule amazwi akwiNdumiso 34:10 athi: “Abo bafuna uYehova, abayi kuswela nantoni na elungileyo.” UYehova ebesoloko esinyamekela.

UMarian: Leyo yinyaniso! Eneneni, uYehova uye wasinika okungakumbi kunoko kuyimfuneko. Ngokomzekelo, ngowe-1958, ndakhethwa ukuba ndiye kumela isiphaluka sethu kwindibano yezizwe ngezizwe eNew York. Noko ke, sasingenamali yokuthenga itikiti likaRosa. Ngenye ingokuhlwa omnye umzalwana wasinika imvulophu eyayibhalwe “New York”. Isipho esasingaphakathi senza ukuba uRosa akwazi ukuhamba nam!

Mna noRosa asizisoli kwaphela ngeminyaka esiyichithe kwinkonzo kaYehova. Akukho nto esiye saphulukana nayo kodwa sifumene yonke into—ubomi obanelisayo nobonwabisayo kwinkonzo yexesha elizeleyo. UYehova unguThixo omangalisayo. Siye safunda ukuthembela kuye ngokupheleleyo, yaye siye samthanda ngokunzulu. Abanye babazalwana bethu abangamaKristu baye bafa ngenxa yokuthembeka kwabo. Noko ke, ndikholelwa ukuba njengoko iminyaka ihamba, ubani unokuncama ubomi bakhe ngokuthe ngcembe. Leyo yinto mna noRosa esiye sazabalazela ukuyenza de kube ngoku, yaye yinto esizimisele ukuyenza kwixesha elizayo.

[Umbhalo osemazantsi]

[Umfanekiso okwiphepha 20]

UFrançois noAnna Szumiga nabantwana babo, uStéphanie, uStéphane, uMélanie noMarian malunga nowe-1930. UMarian ume phezu kwesitulo

[Umfanekiso okwiphepha 22]

Ngasentla: Ndihambisa iincwadi zeBhayibhile kwindawo yentengiso eArmentières, kumntla weFransi, ngowe-1950

[Umfanekiso okwiphepha 22]

Ekhohlo: UStefan Behunick noMarian ngowe-1950

[Umfanekiso okwiphepha 23]

URosa (ungowokuqala ekhohlo) kunye neqabane lakhe elinguvulindlela uIrène (ungowesine ukusuka ekhohlo), babhengeza indibano ngowe-1951

[Umfanekiso okwiphepha 23]

UMarian noRosa ngosuku lwangaphambi kokuba batshate

[Umfanekiso okwiphepha 23]

Ebudeni botyelelo lwesiphaluka ezona zithuthi zazisetyenziswa yayiziibhayisikile