Abantu Abaselula Bayabuza

Ndinokuyeka Njani Ukukhathazeka Kangaka?

“Ndisoloko ndikulungele ukunceda abahlobo bam kwiingxaki abajamelene nazo ndize ndibenze bazive bhetele. Kodwa ndithi ndakufika ekhaya—xa ndingekho phakathi kwabantu—ndingene egumbini lam ndize ndikhale.”—UKellie.a

“Xa ndikhathazekile, ndiyazikhetha kwabanye abantu. Naxa ndimenywa ndiba nesizathu sokungayi. Andifuni bayazi indlela endivakalelwa ngayo ekhaya. Bacinga ukuba ndonwabile.”—URick.

NGABA indlela ovakalelwa ngayo iyafana nekaKellie okanye uRick? Ukuba kunjalo, musa ukukhawuleza ugqibe kwelokuba kukho into ephosakeleyo ngawe. Eneneni, sonke sikhe sikhathazeke ngamanye amaxesha. Namadoda namabhinqa aseBhayibhileni ayekhe akhathazeke.

Kwezinye iimeko uyayazi eyona nto ikukhathazayo kodwa kwezinye usenokungayazi. UAnna oneminyaka eli-19 ubudala uthi: “Usenokuziva ubuhlungu kungekho nto ikwehleleyo. Enoba ubomi bakho abunazingxaki kubakho amaxesha okufikelwa ziingcinga ezibuhlungu. Nangona le nto ingaqhelekanga, iyenzeka!”

Enoba siyintoni isizathu—okanye naxa kubonakala singekho—yintoni onokuyenza xa ukhathazeke ngokugqithiseleyo?

Inyathelo #1: Thetha ngentlungu yakho. IBhayibhile ithi: “Iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.”—IMizekeliso 17:17.

UKellie: “Xa ndithethe nomnye umntu ndifumana isiqabu. Ekugqibeleni, nomnye umntu uyayazi intlungu endityhubela kuyo. Unokundinceda ndiyoyise kutsho kuthi qabu!”

Nali icebiso: Bhala apha ngezantsi igama ‘leqabane lokwenyaniso’ onokuzityand’ igila kulo xa wonganyelwe ziingcinga ezibuhlungu.

․․․․․

Inyathelo #2: Yibhale phantsi intlungu okuyo. Ukuba indlela okhathazeke ngayo ichaphazela indlela obujonga ngayo ubomi, zibhale phantsi iingcinga zakho. Ngamanye amaxesha uDavide wayekhe achaze indlela awayeba buhlungu ngayo. (INdumiso 6:6) Ukubhala ngeemvakalelo ezinjalo kunokukunceda ‘ulondoloze ubulumko bobuqili namandla okucinga.’—IMizekeliso 3:21.

UHeather: “Ukubhala phantsi kundinceda ndikwazi ukucingisisa ngezinto ezindikhathazayo. Xa ukwazi ukuchaza iimvakalelo zakho uze uzame ukuqonda oyena nobangela wendlela ovakalelwa ngayo unokuziva ubhetele.”

Nali icebiso: Abanye bakhetha ukuba nencwadi ababhala kuyo izinto ezenzeka ebomini babo. Ukuba nawe unayo, yintoni onokuyibhala kuyo? Xa ukhathazekile, zama ukuchaza indlela ovakalelwa ngayo noko ucinga ukuba kusenokuba ngunobangela. Emva kwenyanga, khawubuyele koko ukubhalileyo. Ngaba itshintshile indlela obukade uvakalelwa ngayo? Ukuba kunjalo, bhala into ekuncedileyo.

Inyathelo #3: Yithandazele. IBhayibhile ithi ukuba uyazithandazela izinto ezikuxhalabisayo, ‘uxolo lukaThixo olungaphaya kokuqonda luya kuyilinda intliziyo yakho namandla akho engqondo.’—Filipi 4:7.

UEsther: “Ndandicinga ndincame ukuba ndikhathazwa yintoni. Ndabongoza uYehova ukuba andincede ndiphinde ndonwabe. Yayindikruqula into yokusuka nje ndikhathazeke. Kodwa ekugqibeleni ndahlukana nokuhlala ndidakumbile. Ungaze uwajongele phantsi amandla omthandazo!”

Nali icebiso: Sebenzisa iNdumiso 139:23, 24 njengomzekelo wendlela onokuthandaza ngayo kuYehova. Phalaza imbilini yakho uze umcele akuncede uyazi eyona nto ikukhathazayo.

Ukongezelela kula macebiso angasentla unomthombo oluncedo, iLizwi likaThixo. (INdumiso 119:105) Ukuzalisa ingqondo yakho ngezinto ezakhayo ezifumaneka eBhayibhileni kunokukunceda uphucule indlela ocinga ngayo nendlela ozenza ngayo izinto. (INdumiso 1:1-3) Incwadi yeBhayibhile yeZenzo ineengxelo ezibangel’ umdla nezichukumisayo. Amacebiso angakumbi okufunda iindinyana zeBhayibhile eziluncedo unokuwafumana ngokuqwalasela amaphepha alithoba anomxholo othi “Umzekelo Wokuxeliswa” kwincwadi ethi Imibuzo Yabantu Abaselula—Iimpendulo Eziluncedo, Umqulu 2, epapashwe ngamaNgqina kaYehova. Phakathi kweengxelo zeBhayibhile ekuthethwe ngazo kuloo maphepha kukhankanywe uYosefu, uHezekiya, uLidiya noDavide. Kwiphepha 227, uza kubona nendlela umpostile uPawulos awaphumelela ngayo ekulweni neemvakalelo ezidimazayo awayesiba nazo ngenxa yokungafezeki.

Kodwa kuthekani ukuba ngaphezu kwemigudu oyenzileyo usaqhubeka uziva ukhathazekile?

Xa Ungayekiyo Ukukhathazeka

URyan uthi: “Ngezinye iintsasa ndiye ndivakalelwe ngathi kubhetele ndingavuki kunokuba ndivukele ilize.” URyan uxinezelekile yaye asinguye yedwa onale ngxaki. Uphando lubonisa ukuba omnye kwabane kubantu abaselula uba noxinezeleko oluthile ngaphambi kokuba abe mdala.

Unokuzazi njani xa uxinezelekile? Ezinye iimpawu ziquka ukutshintsha ngokukhawuleza kwendlela ovakalelwa ngayo nozenza ngayo izinto, ukuzenza ikheswa, ukungabi namdla wokwenza nantoni na, ukutshintsha ngokuphawulekayo kwendlela otya ngayo, ukungalali kakuhle nokuziva ungaxabisekanga okanye ukuzibek’ ityala ngokungeyomfuneko.

Enyanisweni, sonke siba nazo ezi mpawu ngamanye amaxesha. Kodwa ukuba kuqengqeleka iiveki unazo, thetha nabazali bakho niye kubona ugqirha. Ugqirha unokukunceda ubone enoba uyagula kusini na.b

Ukuba uxinezelekile, ungabi nazintloni. Ngokufumana unyango, uninzi luye lwaziva lubhetele—mhlawumbi lwada lwafumana isiqabu olungazange lwasifumana. Ngenxa yoko, enoba ukukhathazeka kwakho kubangelwa kukuxinezeleka okanye akunjalo khumbula amazwi athuthuzelayo eNdumiso 34:18 athi: “UYehova usondele kwabo baphuke intliziyo; yaye abo bamoya utyumkileyo uyabasindisa.”

Amanye amanqaku athi “Abantu Abaselula Bayabuza” afumaneka kwiWeb site ethi www.watchtower.org/ype

[Imibhalo esemazantsi]

OKO UMELE UCINGE NGAKO

● Ngaba ukulila kuyanceda?

“Andingomntu ukhawuleza alile kodwa ziyazehlela xa ndikhathazekile. Ukulila kukunceda uphinde ukwazi ukulawula indlela ovakalelwa ngayo. Ndiye ndiqalise ukucinga kakuhle—ndibe nethemba lokuba ndiza kuphinda ndonwabe.”—ULeanne.

● Banokukunceda njani abanye abantu ukuze ukwazi ukumelana nentlungu okuyo?

“Xa ndikhathazekile ndiyakuphepha ukuzenza ikheswa. Ewe kona, kuyafuneka khe ndibe ndedwa ndicingisise ngeemvakalelo zam mhlawumbi ndide ndilile nokulila. Kodwa emva koko, ndiyayazi ukuba ndimele ndibe phakathi kwabantu ukuze ndiyeke ukucinga ngayo nantoni na endikhathazayo.”—UChristine.

[Ibhokisi/Imifanekiso ekwiphepha 21]

OKO KUTHETHWA LOLUNYE ULUTSHA

“Ndidla ngokukhathazeka xa ndicinga kakhulu ngeengxaki zam. Xa ndinceda abanye nditsho ndikwazi ukunikela ingqalelo kubo yaye loo nto indenza ndonwabe.”

“Ukwenza umthambo rhoqo kundinceda ndingasoloko ndikhathazekile ndize ndizithembe. Xa ndisenza umthambo, ndithi ndigqiba ndibe ndidinwe kangangokuba andibi nalo ixesha lokukhathazeka.”

[Imifanekiso]

UDrenelle

URebekah

[Umfanekiso okwiphepha 22]

Xa ucela uncedo uze uzimisele, unokuhlangulwa kwintlungu okuyo