Ukuthatha Ukutya Okushushu Endlwini Kusiwe Eziofisini—ZaseMumbai

UHAMBA umgama omde xa usiya emsebenzini yonk’ imihla, uphuma endlwini ngentsimbi yesihlanu ntsasa nganye. Ngexesha lesidlo sasemini ungakuvuyela ukutya okuphekwe ekhaya okunongwe ngendlela oyithandayo. Kubantu abaninzi abasebenza eMumbai, eseIndiya, oku kuyenzeka, ngenxa yeedabbawala eziphathela abantu ukutya okuphekwe ekhaya.a

Babona Ithuba

Ngasekupheleni kwenkulungwane ye-19, iMumbai eyayisaziwa ngoko njengeBombay yayiqhuba kakuhle kwezoqoqosho yaye oosomashishini baseBritani naseIndiya babehamba umgama omde xa besiya emsebenzini. Izithuthi zazicotha yaye iivenkile zokutyela zazimbalwa yaye zikude. Ukutya okuphekwe ekhaya kwakunqweneleka, ngoko kwakuqeshwa abantu abaza kuzisela umqeshi wabo eofisini ukutya okuphekwe endlwini. Ebona ithuba lokwenza ishishini omnye usomashishini oneliso elibukhali wathatha ulutsha olungasebenziyo lwasezilalini waza waluqeshela ukuthatha ukutya endlwini luze lukuse eziofisini. Eli shishini likhulu ngoku laqala ngolo hlobo.

Abantu basakufuna nangoku ukutya okuphekwe ekhaya. Kuyavunywa ukuba ngoku zininzi iivenkile zokutyela kodwa ukutya okuphekwe endlwini konga imali yaye kuyathandwa. Ngaphezu koko, abantu abaninzi baneengxaki zempilo yaye kukho izinto abangavumelekanga ukuba bazitye. Abanye ziyabalela iicawa zabo ukuba batye uhlobo oluthile lokutya. Ngokomzekelo, abanye abantu abalityi itswele ngoxa abanye bengayityi ikonofile. Uninzi lwezi zinto luyagalelwa ekutyeni okuthengiswa kwiivenkile zokutyela, ngoko ukutya okuphekwe endlwini kuyayicombulula le ngxaki.

Umsebenzi Wabo Bawenza Ngokuthembeka

Ukutyhubela iminyaka, le ndlela yokuhambisa ukutya ayitshintshanga kangako, kusuke nje kwanda inani labantu abafuna oku kutya. Sithethanje, angaphezu kwama-5 000 amadoda kuquka namabhinqa ambalwa athatha izidlo zasemini ezingaphezu kwama-200 000 ngosuku azise kwiiofisi eziqeleleneyo kule dolophu enabantu abangaphezu kwezigidi ezingama-20. Zihamba umgama oziikhilomitha ezingama-60 ukusuka apho zithatha khona ukutya, ezinye iidabbawala zihamba ngeenyawo—mhlawumbi zikhwelisa iibhekile zazo ezingama-30 okanye ezingama-40 kwiinqwelwana ezityhalwa ngesandla—ngoxa ezinye zisebenzisa iibhayisekile okanye oololiwe. Enoba zenza kanjani, ukutya zikusa kumntu ezifanele zikuse kuye ngexesha elifanelekileyo. Phofu kuthiwa kubantu abazizigidi ezili-16, zenza impazamo kumntu omnye! Zikwenza njani oku?

Ngowe-1956 iidabbawala zabhaliswa njengeziko lokunceda elinesigqeba esiphezulu namanye amagosa. Ziyahlulahlulwa zibe ngamaqela abantu abasebenzayo abanomphathi. Noko ke, bonke bayalingana, banesabelo bonke kwinkampani—yaye bakholelwa ukuba yiloo nto ebangela ukuba umsebenzi wabo uphumelele. Phofu, akuzange kukhe kubekho bantu baqhankqalazayo emsebenzini ukususela oko laqalayo eli shishini kwiminyaka eli-100 eyadlulayo.

Iidabbawala ziphatha ikhadi yaye zibonakala ngeehempe zazo ezimhlophe, iibhulukhwe zazo eziwakuwaku neekepusi ezimhlophe. Ukuba azinxibanga ikepusi, zifika emva kwexesha okanye azikho emsebenzini ngesizathu esingavakaliyo okanye zibhaqwe zisela utywala ngexesha lomsebenzi, ziyahlawuliswa.

Umsebenzi Wazo Wemihla Ngemihla

Nge-8:30 kusasa, kubakho umntu, ngokuqhelekileyo inkosikazi, olungiselela kwangaphambili ukutya aze akufake kwiinkonkxa zokutya—idabba. Iidabba zinamacandelo amaninzi, candelo ngalinye libekwa phezu kwelinye yaye onke aqanyangelwa ngentsimbi. Idabbawala iqokelela iinkonkxa kwingingqi ethile, izikhwelise kwibhayisekile okanye kwinqwelwana yayo ize ikhawulezise izise kwisikhululo sikaloliwe apho ifika idibane nabanye beqela layo. Apho balungelelanisa iinkonkxa zabo ngokweendawo abaza kuzisa kuzo njengonoposi olungelelanisa iileta.

Nkonkxa nganye inoonobumba, iinombolo nemibala yendawo apho ukutya bekuphekwa khona, yesikhululo esikufutshane, yesikhululo ekuyiwa kuso, igama lesakhiwo nenombolo yomgangatho. Iinkonkxa eziya endaweni enye ziyadityaniswa zize zifakwe kwinto ende eyenziwe ngamaplanga ethwala iiemele ezingama-48. Xa uloliwe efika, ezi nkonkxa zikhweliswa kwikhareji elikhethekileyo elisecaleni komqhubi. Xa uloliwe efika kwisikhululo esikhulu ezi nkonkxa ziphinda zilungelelaniswe zize zisiwe kwisikhululo eziya kuso. Xa efika apho zilungelelaniswa okokugqibela ngokwendawo eziya kuzo, zisiwe ngebhayisekile okanye ngenqwelwana etyhalwa ngesandla.

Ezi ndlela zokuhambisa ukutya azenzi nje umsebenzi uhambe kodwa azibizi mali ingako. Ukongezelela, iidabbawala azivalelwa zizithuthi ezininzi endleleni kuba zikwazi ukuhamba ecaleni endleleni okanye phakathi kweemoto. Ngenxa yoko, kuthi kubetha u-12:30 emva kwemini ukutya kuba sele kufikile eziofisini. Phakathi kwentsimbi ye-1:15 neye-2:00 emva kwemini emva kokuba idabbawala esebenze nzima sele isityile isidlo sayo sasemini ibuyel’ emva ize iqokelele iinkonkxa ezingenanto ize izibuyisele kumnikazimzi, apho zifika zihlanjwe zilungele usuku olulandelayo. Njengaselugqatsweni yonke le nkqubo ihamba kakuhle yaye iyakhawuleza ukususela nje ekuqaleni ukuya kutsho ekugqibeleni.

Umsebenzi Ophantsi Kodwa Oxatyiswa Kakhulu

Iidabbawala ziyaziwa yaye uyaqatshelwa umsebenzi wazo omhle. Ezinye iinkampani ziye zayijonga le nkqubo yazo yokuhambisa ukutya, ukuze ziyisebenzise kwezinye iinkalo zoshishino. Kuye kwenziwa iifilimu ngeedabbawala. IForbes Global Magazine yazinika imbasa eyiSix Sigma ngenxa yomsebenzi wazo osemagqabini. Zikhe zakhankanywa nakwiThe Guinness Book of World Records nakwizifundo eHarvard Business School, eUnited States. Iidabbawala zakha zatyelelwa naziindwalutho kuquka ilungu lentsapho yasebukhosini yaseBritani elalichukumisekile ngumsebenzi wazo kangangokuba lade lamemela ezinye emtshatweni walo eNgilani.

Namhlanje iidabbawala zisebenzisa iikhompyutha neefowuni ukuze zithathe iioda nokuze zigcine ingxelo. Kodwa ayikatshintshi indlela ezikusa ngayo ukutya. Xa kusondela ixesha lesidlo sasemini, abantu abaninzi abasebenza eziofisini zaseMumbai baqinisekile ukuba baza kuphathelwa ukutya okuphekwe ekhaya—yaye oku kutya akuzi kufika emva kwexesha!

[Umbhalo osemazantsi]

[Umfanekiso okwiphepha 11]

Kukhweliswa “iidabba” kuloliwe zisiwa ebantwini

[Umfanekiso okwiphepha 11]

“Iidabba” zinamacandelo awahlukahlukeneyo yaye candelo ngalinye libekwa phezu kwelinye, nto leyo eyenza kube lula ukuzithwala

[Umfanekiso okwiphepha 12]

Amashishini amaninzi aye afunda kwinkqubo “yeedabbawala” yokuhambisa ukutya