Imbono YeBhayibhile

Ngaba Ukholo Luyaphikisana Nokukholelwa Kwizinto Ezinobungqina Obucacileyo?

ISITHANDI-SOBULUMKO saseBritani uA. C. Grayling uthi: “Ukholo luchasene nokukholelwa kwizinto ezixhaswa bubungqina obucacileyo.” Amazwi akhe azichaza kakuhle iimvakalelo zababhali nezithandi-zobulumko ezininzi ebezikade zisithi ukholo aluvisisani nokukholelwa kwizinto ezinobungqina obucacileyo.

Ezinye iimfundiso zeecawa azinasihlahla. Kodwa phawula oku: Iinkolelo ezininzi zenzululwazi kuye kwafunyaniswa ukuba zibubuxoki. Ngaba loo nto ithetha ukuba zonke izinto ezifundiswa yinzululwazi zibubuxoki yaye azixhaswa bubungqina obucacileyo? Kutheni uzijonga ngendlela eyahlukileyo iinkolelo zeecawa? Ukholo oluchazwe eBhayibhileni lusekelwe kulwazi nobungqina obucacileyo. Njengokuba uhlola ubungqina phawula indlela ukholo oluvisisana ngayo nokukholelwa kwizinto ezixhaswa bubungqina obucacileyo.

Ukholo Lusekelwe Kubungqina Obucacileyo

Ngokomzekelo, iBhayibhile ithi ukuze unqulo lwakho ‘lwamkeleke kuThixo’ lufanele lwenziwe ‘ngokwamandla akho engqiqo.’ Loo nto ithetha ukuba ufanele unqule uThixo “ngendlela ezifanele zinqule ngayo izidalwa ezikwaziyo ukucinga.” (Roma 12:1; The Jerusalem Bible) Ngoko, ukholo oluchazwe eBhayibhileni aluthethi ukukholelwa kumampunge. Kwakhona aluthethi ukuba nguvuma zonke. Kunoko yinto oyicingisise nzulu—ekukhokelela ekubeni uthembe uThixo neLizwi lakhe, yaye oko kusekelwe kubungqina obucacileyo.

Kakade ke, ukuze uqiqe ngendlela efanelekileyo kufuneka ube nenkcazelo echanileyo. Nezona nkqubo zekhompyutha zisebenza kakuhle ziyaphazamiseka xa zifakwa inkcazelo engachananga. Ngendlela efanayo, ukholo lwakho luxhomekeke kakhulu koko ukuvayo nendlela echane ngayo inkcazelo oyifumanayo. Yiloo nto iBhayibhile isithi “ukholo lulandela oko kuviweyo.”—Roma 10:17.

Eyona nto ifunekayo ukuze ube nokholo ‘lulwazi oluchanileyo lwenyaniso.’ (1 Timoti 2:4) IBhayibhile ithi ‘yinyaniso kuphela eya kukukhulula’ kwiimfundiso zobuxoki, enoba zezenzululwazi okanye zezecawa. (Yohane 8:32) IBhayibhile ithi awufanele ukholelwe ‘onke amazwi’ owevayo. (IMizekeliso 14:15) Kunoko ithi ufanele ‘uqiniseke ngezinto zonke’ okanye uzincine izinto ngaphambi kokuba uzikholelwe. (1 Tesalonika 5:21) Kutheni ufanele uzincine izinto ozikholelwayo? Ukuba nokholo olusekelwe kubuxoki kukuzikhohlisa. Abanye abantu besixeko saseBhereya samandulo bangumzekelo omhle wendlela yokufumana olona kholo. Nangona aba bantu babefuna ukuzikholelwa izinto ababezifundiswa ngabathunywa bevangeli abangamaKristu, ‘bazincina ngenyameko iZibhalo mihla le mayela nokuba zinjalo kusini na ezo zinto.’—IZenzo 17:11.

Ukuba Nokholo EBhayibhileni

Kodwa kuthekani ukuba awuqinisekanga ngokuchana kweBhayibhile? Yintoni enokukunceda uqiniseke ukuba izinto ezifundisayo ziyinyaniso? Wenza njani ukuze ubathembe abantu? Ngokuchitha ixesha kunye nabo nokujonga nendlela abazenza ngayo izinto. Kutheni ungenzi okufanayo nangeBhayibhile?a

IBhayibhile ithi ukholo “lulindelo oluqinisekisiweyo lwezinto ezithenjiweyo, ubungqina obucacileyo bezinto zokwenene nangona zingabonwa.” (Hebhere 11:1) Kunokuba akholelwe yonk’ into le, umntu onokholo lokwenene usekela iinkolelo zakhe kwinkcazelo aye wayincina. Ukucingisisa ngale nkcazelo kukwenza ube nentembelo yokuba nezinto ezingabonakaliyo ngeliso lenyama ziyinyaniso.

Kuthekani ukuba oko ukufundayo kuyaphikisana nezinto ozikholelwayo? Ngaba ufanele ukubethe ngoyaba oko? Akunjalo. Xa kunjalo kuya kuba kuhle ukuba uhlolisise ubungqina obuphikisanayo noko ukukholelwayo. EBhayibhileni, uThixo uthembisa ukuba uya kubavuza abo bafuna inyaniso ngokubanika ulwazi, ukuqonda namandla okucinga.—IMizekeliso 2:1-12.

Ukholo olusekelwe kwiimfundiso zeBhayibhile luyavisisana nokufuna ubungqina obucacileyo. Luhlobo olunjani lokholo onalo? Abantu abaninzi bazincanc’ ebeleni iinkolelo zabo yaye abazange bakha bazihlola enoba zichanile kusini na. Noko ke, asikokungabonisi ntlonipho ukuhlola oko ukukholelwayo ‘ukuze ukungqine ngokwakho’ ukuba indlela ocinga ngayo iyavumelana neLizwi likaThixo. (Roma 12:2) IBhayibhile isibongoza isithi, “wavavanyeni amazwi aphefumlelweyo ukuze nibone enoba aphuma kuThixo kusini na.” (1 Yohane 4:1) Ukuba wenjenjalo, uya ‘kukulungela ukuzithethelela phambi kwakhe wonk’ ubani ofuna kuwe isizathu sethemba elikuwe’ naxa abanye bekuphikisa.—1 Petros 3:15.

[Umbhalo osemazantsi]

NGABA WAKHA WAZIBUZA?

● Ngaba iBhayibhile ayikukhuthazi ukufuna ukusekela iinkolelo zakho kubungqina obucacileyo?—Roma 12:1, 2.

● Luhlobo olunjani lolwazi olufunekayo ukuze ube nokholo lokwenene?—1 Timoti 2:4.

● Sifunda ntoni kwindlela iBhayibhile eluchaza ngayo ukholo?—Hebhere 11:1.

[Amagama acatshulweyo akwiphepha 29]

UThixo uyabavuza abo bafuna inyaniso