Ngubani Ngokwenene Ongumthombo Wobugqi?

IBHAYIBHILE ithi ngoMdali: “UThixo ukukukhanya yaye akukho bumnyama konke konke ngokumanyene naye.” (1 Yohane 1:5) Leyo yinyaniso, ngokukodwa kwizinto eziphathelele unqulo. Ngaba uThixo oyinyaniso ungumthombo wobugqi? Okanye ngaba kukho mntu uthile ungendawo obuxhasayo?

Eziphambili kwizenzo zobugqi kukuvumisa nokusebenzelana nemimoya, okuquka ukuvumisa ngeenkwenkwezi, ukuvumisa ngamanani, ukuvumisa ngokufunda imigca esesandleni, ubugqwirha nokuthetha nabafileyo. Ezi zinto zazikho kwakude kudala yaye uninzi lwazo zivela kwiBhabhiloni yamandulo enamabhodlo aseIraq. (Isaya 47:1, 12, 13) Ubugqi basuka eBhabhiloni baza basasazeka kulo lonke ihlabathi lamandulo yaye babusetyenziswa ziintlanga ezininzi.

Cinga ngoko kwenzeka kwisixeko saseFilipi, kwiMakedoniya yamandulo. Apho, iqela elincinane labashumayeli abangamaKristu ekwakukho kulo umpostile uPawulos nogqirha uLuka, ladibana nentombazana eyayinobugqi. Khawuve ukuba umbhali weBhayibhile uLuka uthi ayevela phi amandla afihlakeleyo obugqi bayo. Uthi: “Sahlangatyezwa sisicakazana esithile esinomoya, idemon yokuvumisa. Sasifudula sizinika iinkosi zaso inzuzo eninzi ngokuqhelisela ubugcisa bokuxela izinto kwangaphambili.”—IZenzo 16:16-18.

Amandla ale ntombazana ayengaveli kuThixo wokwenyaniso uYehova kodwa ayevela kwidemon, umoya ongendawo. Ngoko uPawulos namahlakani akhe abazange bayiphulaphule. Mhlawumbi uyazibuza ukuba: ‘Zingoobani iidemon? Zivela phi?’ Phawula ukuba ithini iBhayibhile.

Zingoobani Iidemon?

Kudala ngaphambi kokuba uYehova adale abantu, wadala “oonyana bakaThixo” abaninzi, abaziingelosi zasezulwini. (Yobhi 38:4, 7) Njengabantu, iingelosi zinelungelo lokuzikhethela oko zifuna ukukwenza yaye zahlala ixesha elide zinyanisekile kuThixo. Kodwa ke asizizo zonke ezahlala zinyanisekile. Yenzeka njani loo nto?

Emva kokuba uThixo edale abantu, enye ingelosi yanyolukela ukunqulwa, nto leyo eyayingayifanelanga. Le ngelosi ingendawo yalukuhla uEva ukuba avukele uMdali isebenzisa inyoka kanye njengokuba nomntu esenokwenza ngathi ilizwi lakhe liphuma kunopopi. (Genesis 3:1-6) IBhayibhile ithi le ngelosi inemvukelo ‘yinyoka yantlandlolo, leyo ibizwa ngokuba nguMtyholi, noSathana.’ (ISityhilelo 12:9) UYesu wathi ‘usisibulala-mntu’ ‘esingazange sime enyanisweni,’ waza wongezelela wathi: “Xa ethetha ubuxoki, uthetha ngokotyekelo lwakhe, kuba ulixoki noyise wabo ubuxoki.”—Yohane 8:44.

Ethubeni nabanye “oonyana boThixo oyinyaniso” bavukela kunye noSathana. (Genesis 6:1, 2) Kamva babizwa ngokuba ‘ziingelosi ezonayo’ okanye ‘iingelosi ezingasigcinanga isigxina sazo santlandlolo, zasuka zayishiya indawo yazo efanelekileyo yokuhlala’ okanye izulu. (2 Petros 2:4; Yude 6) Babizwa ngokuba ziidemon. (Yakobi 2:19) Ukongezelela, zizimisele ukulukuhla abantu abaninzi kangangoko kunokwenzeka ukuba balushiye unqulo lokwenyaniso njengoko enzayo amaSirayeli amaninzi ngamaxesha okubhalwa kweBhayibhile. (Duteronomi 32:16, 17) Nanamhlanje njengokuba kwakunjalo mandulo, uSathana needemon bakhohlisa abantu besebenzisa unqulo.—2 Korinte 11:14, 15.

Zikhusele!

Nangona oomoya abangendawo benamandla angaphezu kwawabantu, uThixo unokusinceda ‘sime nxamnye nabo’ size siboyise. (1 Petros 5:9) Noko ke, ukuze uThixo asincede kufuneka sifunde ngezinto azifunayo size sizenze. Ngokuphathelele amaKristu exesha lakhe, umpostile uPawulos wathi: ‘Asiyekanga ukunithandazela nokunicelela ukuba nizaliswe ngolwazi oluchanileyo lokuthanda kwakhe kubulumko bonke nokuqiqa kokomoya, ukuze nihambe ngokumfaneleyo uYehova nize nimkholise ngokupheleleyo.’—Kolose 1:9, 10.

Phakathi kwabo bafumana ‘ulwazi oluchanileyo’ kwakukho nabantu besixeko sase-Efese ababenobugqi. Phawula indlela ulwazi lwenyaniso olwabatshintsha ngayo. IBhayibhile ithi: “Abaliqela noko kwabo babeqhelisela ubugcisa bomlingo bazizisa ndawonye iincwadi zabo baza bazitshisa phambi kwakhe wonk’ ubani.” Ezi ncwadi zazixabisa “amaqhosha esilivere angamashumi amahlanu amawaka” yaye leyo yayiyimali eninzi! (IZenzo 19:17-19) Lo mzekelo wabantu abakhaliphileyo wabhalwa ukuze kungenelwe thina.—2 Timoti 3:16.

Imigaqo Esikhuselayo

Zikho ezinye izinto esinokuzenza ukuze sizikhusele kwiidemon. Cinga nje ngale migaqo yeBhayibhile ilandelayo.

“Musani ukuwakholelwa onke amazwi aphefumlelweyo, kodwa wavavanyeni amazwi aphefumlelweyo ukuze nibone enoba aphuma kuThixo kusini na.” (1 Yohane 4:1) Ezinye izinto ezithethwa ngabantu abavumisa ngeenkwenkwezi namagqirha zisenokuba yinyani. Ngokomzekelo, intombazana eneedemon eFilipi yayithetha inyaniso xa yathi ngoPawulos namahlakani akhe: “Aba bantu bangamakhoboka oThixo ongOyena Uphakamileyo, abavakalisa kuni indlela yosindiso.” (IZenzo 16:17) Noko ke, uPawulos namahlakani akhe abazange bathethe naye. Kunoko uPawulos wayalela lo moya ungendawo ukuba uphume kuye. Thelekisa oko kuthethwa ziicawa noko iBhayibhile ikutshoyo.—IZenzo 17:11.

“Zithobeni, ke ngoko, kuThixo; kodwa mchaseni uMtyholi, wonibaleka.” (Yakobi 4:7) Iidemon ziintshaba zikaThixo nezakho. Musa ukufuna ukwazi ngeendlela zazo zobumnyama. Kunoko zithobe kuThixo ngokuphulaphula imithetho yakhe yaye loo mithetho ayinzima. (1 Yohane 5:3) Ngokomzekelo, uThixo wathi kumaSirayeli amandulo: “Maze kungafunyanwa namnye kuwe. . . ovumisayo, noqhelisela umlingo, nohlaba izihlabo nokhafulayo, nobopha ngoomabophe, nobuza koneshologu, noyinkunkqele ekuxeleni iziganeko kwangaphambili, nobuzisa kwabafileyo. Kuba uYehova uyamcekisa wonke ubani ozenzayo ezi zinto.” (Duteronomi 18:10-12) UThixo akatshintshanga.—Galati 5:19, 20.

“Akunakusetyenziswa mabophe welishwa nxamnye [nabakhonzi bakaYehova].” (Numeri 23:23) Bonke abo bafuna ukukholisa uYehova abafanele bazoyike iidemon. Eneneni, iidemon ‘ziyatyhwatyhwa’ phambi koThixo, ziyazi ukuba unamandla amakhulu aza kuwasebenzisa ukuze azitshabalalise. (Yakobi 2:19) UThixo uza ‘kuba bonisa amandla akhe abo bantliziyo ziphelele kuye’ yaye “akayi kuliyekela ilungisa lishukunyiswe.”—2 Kronike 16:9; INdumiso 55:22.

“Kuba abaphilayo bayazi ukuba baya kufa; kodwa abafileyo, abazi nto konke konke.” (INtshumayeli 9:5) ILizwi likaThixo lifundisa ukuba abafileyo abazi nto, kuba eneneni bafile. Abafanele boyikwe kuba abakwazi kwenzakalisa nabani na. (Isaya 26:14) Ukuze zikhohlise abantu, ngamanye amaxesha iidemon zizenza imimoya yabantu abafileyo, nto leyo esenza sikwazi ukubona isizathu sokuba abantu befumanisa ukuba umntu obekade enobubele etshintsha ngokupheleleyo xa sele “esisinyanya.”

“Aninakuba nenxaxheba ‘etafileni kaYehova’ nasetafileni yeedemon.” (1 Korinte 10:21, 22) Bonke abantu abamthanda ngokwenene uYehova baya kuziphepha iincwadi, iimovie nemidlalo yekhompyutha ebonisa nekhuthaza ubugqi neenkolelo zabo.a INdumiso 101:3 ithi: “Andiyi kubeka nantoni na yobutshijolo phambi kwamehlo am.” Ukongezelela, iindlela zokuzonwabisa ezinobugqi zikhuthaza ugonyamelo nokuziphatha kakubi, zinto ezo abantu ‘abathanda uYehova’ abazicekisayo.—INdumiso 97:10.

Iidemon zisoloko zizifihla oko zikuko ebantwini. Kodwa azide ziphumelele ngokupheleleyo. EBhayibhileni uYehova uye wazibhenca oko zikuko ezichaza njengamaxoki neentshaba zoluntu ezinolunya. Zahluke ngokupheleleyo kuMdali wethu, uYehova uThixo. Njengoko siza kufunda kwinqaku elilandelayo, uThixo uyasithanda, usoloko esichazela inyaniso yaye ufuna sonwabe ngonaphakade.—Yohane 3:16; 17:17.

[Umbhalo osemazantsi]