Abantu Abaselula Bayabuza . . .

Ukuqhelisela Ubugqi—Ngaba Kuyingozi?

NGABA ngokwenene abantu abaselula banomdla kubugqi? Iqela labaphandi lazama ukufumana impendulo ngokwenza uhlolisiso kubafundi abali-115 abakwizikolo zamabanga aphakathi nezamabanga aphakamileyo. Uhlolisiso lwaba nezi ziphumo zothusayo: Abangaphezu kwesiqingatha kwabo babehlolwa (ama-54 ekhulwini) bathi banomdla kubugqi nakwizinto ezinamandla angaphaya kwawemvelo, ngoxa ikota (ama-26 ekhulwini) yathi “inomdla wokwenene.”

Abaphandi beUniversity of Alaska eseAnchorage babhala bathi: “Amabali amaphephandaba namaphephancwadi aphathelele ukwanda kwehlelo lobusathana . . . aye anda ngokukhawuleza kule minyaka yakutshanje.” Iingcali zithi buncinane kakhulu ubungqina obuxhasa ukwanda kobuSathana phakathi kwabantu abaselula. Sekunjalo, alithandabuzeki elokuba abantu abaselula abaninzi banomdla kwizinto eziphathelele ubuSathana nobugqi, nokuba mncinane kangakanani na umdla abanawo.

Ngoko, bambi abantu abaselula banokubuza, ‘Yiyiphi ingozi ekhoyo ngokuqhelisela ubugqi?’ Ukuze siphendule loo mbuzo, masiqale sijonge ezinye iindlela abantu abaselula ababandakanyeka ngazo kubugqi.

Umgibe Wobugqi

Inqaku leU.S.News & World Report lathi “namhlanje abantwana nolutsha olukwishumi elivisayo lunokufumana inkcazelo eninzi ephixanis’ ingqondo—maxa wambi ephazamisayo—ebekunokuba nzima ukucinga ukuba ingaze ifumaneke kwiminyaka engama-20 edluleyo.” Ukufun’ ukwazi kwenza abantu abaselula abaninzi bafunde iincwadi namaphephancwadi, babukele iividiyo okanye bakhangele izinto ezithetha ngobugqi kwi-Internet.

Ngokutsho kweBBC News Online, iinkqubo zikamabonwakude ezidumileyo ezibonisa ubugqwirha nezithunzela ekuthiwa zifunxa igazi labantu “kuthiwa zikhuthaza ukuba abantwana babe nomdla kubugqwirha.” Ngokufanayo umculo onesingqi esinamandla uthetha ngobundlobongela okanye iidemon. Umbhali uTom Harpur wabhala oku kwiphephandaba laseToronto iThe Sunday Star: “Ndimele ndilumkise ngokungqongqo ngoko kwenzekayo [kwezomculo]. . . . Andizange ndikubone ukuqaqadeka okunje. Iingoma zizele ngamazwi athetha ngempambano, ukulawulwa ziidemon, ukuphalazwa kwegazi, izithuko, ugonyamelo lweentlobo ngeentlobo, kuquka nokudlwengula, ukuzenzakalisa, ukubulala kunye nokuzibulala. Ukufa nentshabalalo, iziprofeto zomgwebo, ukungathandwa kwento entle nokwamkelwa kwezinto ezimbi nobungendawo yimixholo ephambili.”

Ngaba ngokwenene ukuphulaphula umculo onjalo kwenza abantu babe nesimilo esiyingozi? Kuyabonakala ukuba kwaba njalo ubuncinane kumntu omnye—koselula oneminyaka eli-14 ubudala waseUnited States owahlaba waza wabulala unina emva koko wazibulala. Iindonga zegumbi lakhe zazizele imifanekiso yabantu abacula umculo werock onesingqi esinamandla. Kamva uyise wenza esi sibongozo: “Xelelani abazali ukuba babe neliso elibukhali kuhlobo lomculo ophulaphulwa ngabantwana babo.” Wathi kwiveki engaphambi kokuba unyana wakhe abulale unina, wayevuma ingoma “ethetha ngokuphalaza igazi nokubulala umama wakho.”

Kwakhona kukwakho nemidlalo yamaqhawe, eminye yayo efuna ukuba umntu adlale indima yegqwirha okanye umntu oqhelisela ubugqi. Uninzi lwale midlalo lukhuthaza ugonyamelo olwenziwa ziidemon.a

Sekunjalo, umbutho wophando iMediascope uthi: ‘Uhlolisiso lubonisa ukuba ukukhetha umculo onesingqi esinamandla kunokuba luphawu olubonisa ukuzikhwebula komntu othile ebantwini, ukusebenzisa kakubi isiyobisi esithile, ukungalungelelani engqondweni, ukuba sengozini yokufuna ukuzibulala okanye yokwenza izinto eziyingozi ngexesha lokufikisa, kodwa asingomculo obangela ukuziphatha okulolu hlobo. Kucingelwa ukuba ulutsha olusele lusilwa nezo ngxaki lunokuthanda umculo onesingqi esinamandla, kuba amazwi awo athetha ngeengxaki olujamelene nazo.’

Abaphandi basenokungavumelani bonke ngeengozi zokuphulaphula umculo wehlelo lobusathana. Kodwa ngaba ukubukela iividiyo, umculo, okanye imidlalo ekhuthaza ugonyamelo okanye ukuzitshabalalisa akunakuba yingozi? Noko ke, ukuqhelisela ubugqi kunenye ingozi enkulu nangakumbi kumaKristu.

Imbono KaThixo Ngobugqi

Kweyoku-1 kwabaseKorinte 10:20, umpostile uPawulos walumkisa amaKristu ngelithi: “Andifuni nibe nesabelo needemon.” Kodwa ngoobani iidemon, yaye kutheni kuyingozi ukuba nento yokwenza nazo? Impendulo ilula, iidemon yayiziingelosi ezakhetha ukulandela uSathana uMtyholi. Ibinzana elithi uSathana lithetha “uMchasi” yaye elithi uMtyholi lithetha “uMhlebi.” Ngokutsho kweBhayibhile, lo nyana kaThixo owayesakuba yingelosi wazenza umchasi nomhlebi ngokukhetha ukuvukela uThixo. Ekuhambeni kwexesha, walukuhla ezinye iingelosi ukuba zimthelele kwikhondo lakhe lemvukelo. Ngaloo ndlela amahlakani akhe aba ziidemon.—Genesis 3:1-15; 6:1-4; Yude 6.

UYesu wambiza uSathana ngokuthi “umlawuli weli hlabathi.” (Yohane 12:31) USathana needemon zakhe ‘unomsindo omkhulu’ ngokutshatyalaliswa kwakhe okusemnyango. (ISityhilelo 12:9-12) Akumangalisi ke ngoko ukuba, abo baye banento yokwenza needemon bafumanise ukuba zinogonyamelo. Elinye ibhinqa elakhulela kwintsapho eyayisebenzelana nemimoya eSuriname lazibonela ngokwalo indlela iidemon “ezikuthanda ngayo ukungcungcuthekisa amaxhoba angafuniyo ukusebenzisana nazo.”b Ngoko ke ukuba nento yokwenza nangayiphi na indlela nezi zidalwa zokomoya zikhohlakeleyo kuyingozi kakhulu!

Ngenxa yesi sizathu, uThixo wayalela abantu bakhe bamandulo, amaSirayeli, ukuba baluphephe lonke uqheliselo lobugqi. IDuteronomi 18:10-12 ilumkisa ngelithi: “UYehova uyamcekisa wonke ubani ozenzayo ezi zinto.” Ngokufanayo amaKristu alunyukiswa ukuba abo ‘basebenzelana nemimoya’ baya kutshatyalaliswa nguThixo. (ISityhilelo 21:8) UThixo uyalugweba naluphi na uhlobo lokubandakanyeka kubugqi. IBhayibhile iyalela ukuba ‘singayichukumisi into engahlambulukanga.’—2 Korinte 6:17.

Ukwahlukana Noqheliselo Lobugqi

Ngaba wakha wayenza impazamo yokuqhelisela ubugqi? Ngoko cinga ngoko kwenzeka kwinkulungwane yokuqala kwisixeko sase-Efese. Abantu balapho abaninzi “babeqhelisela ubugcisa bomlingo.” Kodwa abanye bachukunyiswa yimisebenzi enamandla yompostile uPawulos awayenza ngoncedo lomoya oyingcwele. Waba yintoni umphumo? “Abaliqela noko kwabo babeqhelisela ubugcisa bomlingo bazizisa ndawonye iincwadi zabo baza bazitshisa phambi kwakhe wonk’ ubani. Yaye bawabala ndawonye amaxabiso azo, bazifumana zixabisa amaqhosha esilivere angamashumi amahlanu amawaka. Ngaloo ndlela ilizwi likaYehova lahlala likhula yaye lisoyisa ngendlela enamandla.”—IZenzo 19:11-20.

Kusixelela ntoni oku? Kusixelela ukuba xa umntu efuna ukukhululeka kumakhamandela eedemon, umele atshabalalise zonke izinto eziphathelele unqulo lwehlelo lobusathana! Oku kuquka zonke iincwadi, amaphephancwadi, imifanekiso, iincwadi ezinemifanekiso, iividiyo, amakhubalo (izinto ezinxitywa ngenjongo “yokuzikhusela”) kunye nezinto zobudemon ezithatyathwe kwi-Internet. (Duteronomi 7:25, 26) Umele ulahle zonke izinto ezinokusetyenziswa ekuvumiseni njengeebhola zekristale, okanye iibhodi zeOuija. Kwakhona, umele ulahle umculo okanye iividiyo ezinemixholo yobusathana.

Kufuneka ube nesibindi nokuzimisela ukuze ukwazi ukuthabatha amanyathelo enkalipho anjalo. Kodwa zinokuba ninzi iingenelo. Elinye ibhinqa elingumKristu elinguJeanc lathenga umdlalo wekhompyutha owawubonakala ungeyongozi ekuqaleni. Njengoko lalizama ukufikelela amanqanaba aphezulu kulo mdlalo, laphawula ukuba lo mdlalo unento yokwenza nokusebenzelana nemimoya. Kungekudala laqalisa ukuba namaphupha amabi ogonyamelo! UJean uthi: “Ndavuka ezinzulwini zobusuku ndawatshabalalisa loo macwecwe omdlalo.” Waba yintoni umphumo? “Andizange ndiphinde ndibe nengxaki ukususela ngoko.”

Ukuba uzimisele ukwahlukana nalo mkhwa, uya kuphumelela. Khumbula indlela uYesu awayezimisele ngayo xa uMtyholi wazama ukumlukuhla ukuba yena Yesu amkhonze. “UYesu wathi kuye: ‘Hamb’ umke, Sathana! Kuba kubhaliwe kwathiwa, “NguYehova uThixo wakho omele umnqule, yaye nguye yedwa omele unikele inkonzo engcwele kuye.”’ Wandula ke uMtyholi wamshiya.”—Mateyu 4:8-11.

Ungabi Wedwa Kulo Mlo

Umpostile uPawulos usikhumbuza ukuba onke amaKristu ‘azamazamana . . . nemikhosi yoomoya abangendawo kwezasezulwini iindawo.’ (Efese 6:12) Kodwa ungazami ukulwa noSathana needemon zakhe uwedwa. Funa uncedo kubazali bakho aboyika uThixo nakubadala bebandla lamaKristu lasekuhlaleni. Unokuba neentloni ukubaxelela ukuba ubandakanyeke kubugqi, kodwa ukwenjenjalo kuya kubangela ukuba ufumane inkxaso oyifunayo.—Yakobi 5:14, 15.

Kwakhona, khumbula ukuba iBhayibhile ithi: “Mchaseni uMtyholi, wonibaleka. Sondelani kuThixo, naye uya kusondela kuni.” (Yakobi 4:7, 8) Ewe, uYehova uThixo uya kukuxhasa! Uya kukunceda ukhululeke kubukhoboka bobugqi.

[Imibhalo esemazantsi]

[Umfanekiso okwiphepha 20]

Lahla zonke izinto ezinxulumene nonqulo lwehlelo lobusathana

[Umfanekiso okwiphepha 20]

Zilumkele iinkqubo ze-Internet ezikhuthaza ukunxibelelana nemimoya