Umthombo Wolwalathiso Nowethemba Onokuthenjwa
NGOKWAHLUKILEYO kwiidemon, uYehova uThixo ulumkile yaye unamandla angapheliyo. Kwakhona uluthando lumntwisiwe. (1 Yohane 4:8) Icebiso lakhe lisoloko lisebenza, lifumaneka simahla yaye uThixo usoloko efuna siphumelele. Lahluke ngokupheleleyo kwicebiso labavumisi nabanye abantu abanobugqi. UThixo uthi: “Wenani, nonke nina ninxaniweyo [ninxanelwe ulwazi lweBhayibhile]! Yizani emanzini. Nabo bangenamali! Yizani, nithenge nize nidle. Ewe, yizani, nithenge iwayini nobisi ngaphandle kwemali nangaphandle kwexabiso. Kutheni na naqhubeka nihlawula imali ngenxa yoko kungesosonka, kwaye yini na ukuba nibulaleke ngenxa yoko kungananelisiyo? Phulaphulani ngenyameko kum, nize nidle okulungileyo, yaye imiphefumlo yenu mayiyoliswe ngokugqibeleleyo kukutyeba.”—Isaya 55:1, 2.
Ngenxa yokuba iphefumlelwe nguMdali wethu onothando, iBhayibhile isenza sibe nethemba, sikhuseleke kukholo lwethu, ithetha ngenjongo yobomi nemigaqo esinokuphila ngayo. Khawucinge ngale mibuzo nezi zicatshulwa zeBhayibhile zilandelayo.
[Ibhokisi ekwiphepha 7]
● Ndinokulufumana njani uxolo lwengqondo? IBhayibhile ithi: “Utsho uYehova, uMhlawuleli wakho, Lowo Ungcwele kaSirayeli, ukuthi: ‘Mna, Yehova, ndinguThixo wakho, Lowo ukufundisa okuyingenelo kuwe, Lowo ukubangela unyathele endleleni ofanele uhambe ngayo. Owu ukuba nje kuphela okunene ubunganikela ingqalelo kwimiyalelo yam! Ngoko uxolo lwakho beluya kuba njengomlambo, nobulungisa bakho njengamaza olwandle.’”—Isaya 48:17, 18.
● Ngaba ubungendawo buya kuhlala bukho? “Kuba abathe tye bona baya kuhlala emhlabeni, nabangenakusoleka baya kusala kuwo. Bona ke abangendawo, baya kunqunyulwa emhlabeni; ke wona amaqhophololo, aya kuncothulwa kuwo.” (IMizekeliso 2:21, 22) Abantu abangendawo neengelosi ezingendawo baya kutshatyalaliswa ngonaphakade ngokungathi kungomlilo.—ISityhilelo 20:10, 14.
● Ngaba kuya kuze kuphele ukugula nokubandezeleka? “Khangela! Intente kaThixo iphakathi koluntu, yaye uya kuhlala nalo, lube ngabantu bakhe. Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili [iingxaki zanamhlanje] zidlule.”—ISityhilelo 21:3, 4.
Ngokwahlukileyo kwiidemon, uThixo akakhe axoke. Enyanisweni, ‘akanakuxoka.’ (Tito 1:2) Ngaphezu koko, njengokuba siza kufunda kwinqaku lokugqibela kolu ngcelele, inyaniso kaThixo iyakhulula yaye inika ubomi.—Yohane 8:32; 17:3.