Ulonwabo Lukanaphakade—Ngaba Luza Kuba Sezulwini Okanye Emhlabeni?

NGABA ngokuyintloko ulonwabo lwakho luxhomekeke kwindawo ohlala kuyo? Uninzi lwabantu beluya kuvuma ngokulula ukuba ulonwabo luxhomekeke kakhulu kwizinto ezifana nokuba sempilweni, ukuba nenjongo ebomini nokuba nolwalamano oluhle nabanye. Umzekeliso weBhayibhile ukubeka ngolu hlobo oku: “Silunge ngakumbi isidlo semifuno apho kukho uthando kunenkunzi yenkomo eyondliwe emkhumbini kunye nentiyo.”—IMizekeliso 15:17.

Noko ke, okulusizi kukuba ukutyhubela imbali ikhaya lethu elingumhlaba belizaliswe yintiyo, ugonyamelo nezinye iintlobo zobungendawo. Kodwa kuthekani ngezulu, okanye ummandla womoya, apho abantu abaninzi banethemba lokuya khona emva kokufa? Ngaba belisoloko liyindawo yolonwabo noxolo, kungekho siphazamiso nangayiphi na indlela, njengoko kumele kube njalo?

IBhayibhile ifundisa ukuba uThixo uhlala ezulwini kunye nezigidi zezidalwa zomoya ezibizwa ngokuba ziingelosi. (Mateyu 18:10; ISityhilelo 5:11) Zichazwa ‘njengoonyana bakaThixo’ bokomoya. (Yobhi 38:4, 7) Njengabantu, iingelosi nazo zinenkululeko yokuzikhethela; azifani neerobhothi. Ngoko ke, kucacile ukuba nazo zinokuzikhethela ukwenza okulungileyo okanye okuphosakeleyo. Ngaba iingelosi beziya kukhetha ukwenza okuphosakeleyo? Kusenokumangalisa kwabanye ukufumanisa ukuba kumawaka eminyaka eyadlulayo, iingelosi ezininzi zakwenza oko, eneneni, zona uThixo—zamvukela!—Yude 6.

Abavukeli Basezulwini

Isono sabakho kummandla womoya ngenxa yokuvukela kwengelosi, eyabizwa ngokuba nguSathana (uMchasi) noMtyholi (uMhlebi). Le ngelosi eyayifudula ithobela yakhetha ukwenza okuphosakeleyo ngokuzithandela. Emva koko yaba nempembelelo eyonakalisayo kwezinye izidalwa zomoya, kangangokuba ngexesha likaNowa, ngaphambi koNogumbe, ezininzi kuzo zathelela uSathana ekuvukeleni uThixo.—Genesis 6:2, umbhalo osemazantsi weNW eneembekiselo; 2 Petros 2:4.

Ezi ngelosi zonileyo azizange zigxothwe ngoko nangoko ezulwini. Kunoko, zazivunyelwe ukungena—mhlawumbi zinikwe imiqathango ethile—kangangamawaka eminyaka.a Noko ke, xa uThixo wayekayo ukubanyamezela aba benzi bobubi, ‘baphoswa’ ngaphandle kwezulu, ukuze ekugqibeleni batshatyalaliswe. Kwandula ke kwaphuma ilizwi ezulwini lisithi: “Ngoko chulumancani, nina mazulu nani nihlala kuwo!” (ISityhilelo 12:7-12) Kucacile ukuba, iingelosi ezithembekileyo zavuya kakhulu kukuba, ekugqibeleni, abo baqhwayi benkathazo baziinjubaqa bekhutshiwe ezulwini!

Xa siqwalasela ezi nkcukacha zingaziwayo ngabantu ngokubanzi, sibona ngokucacileyo ukuba alunakubakho uxolo lokwenyaniso nanini na xa kukho izidalwa ezikrelekrele ezityeshela imithetho nemigaqo kaThixo. (Isaya 57:20, 21; Yeremiya 14:19, 20) Kwelinye icala, xa bonke abantu bethobela umthetho kaThixo, kubakho uxolo nenzolo. (INdumiso 119:165; Isaya 48:17, 18) Ngoko ukuba bonke abantu bebemthanda yaye bemthobela uThixo nabo bethandana, ngaba umhlaba ubungayi kuba yindawo yolonwabo noyolo lokwenene? Impendulo yeBhayibhile nguewe!

Kodwa kuthekani ngabo bathi ngenxa yokuzingca bangavumi ukuguqula iindlela zabo ezingendawo? Ngaba baya kuluphazamisa ngonaphakade uxolo lwabo bakufuna ngokwenene ukwenza ukuthanda kukaThixo? Akunjalo, uThixo wayisingatha imeko yeengelosi zasezulwini ezingendawo yaye uya kuyisingatha nemeko yabantu basemhlabeni abangendawo.

Umhlaba Ocociweyo

UThixo wathi: “Amazulu ayitrone yam, umhlaba sisihlalo seenyawo zam.” (Isaya 66:1) Ekubeni engoyena mntu ungcwele, uThixo akayi kuvumela ukuba ‘isihlalo seenyawo zakhe’ singcoliswe ngobungendawo ngonaphakade. (Isaya 6:1-3; ISityhilelo 4:8) Njengoko wayikhuphayo imimoya engendawo ezulwini, uya kubasusa bonke abantu abangendawo emhlabeni, njengoko ezi ndinyana zilandelayo zeBhayibhile zibonisa:

“Abenzi bobubi baya kunqunyulwa, kodwa abathembela kuYehova baya kuwudla ilifa umhlaba.”—INdumiso 37:9.

“Abathe tye bona baya kuhlala emhlabeni, nabangenakusoleka baya kusala kuwo. Bona ke abangendawo, baya kunqunyulwa emhlabeni; ke wona amaqhophololo, aya kuncothulwa kuwo.”—IMizekeliso 2:21, 22.

“Kububulungisa kuye uThixo ukubabuyekeza ngembandezelo abo banibandezelayo, aze nina babandezelwayo, anikhulule kunye nathi ekutyhilekeni kweNkosi uYesu ivela ezulwini kunye neengelosi zayo ezinamandla isemlilweni odangazelayo, ibaphindezela abo bangamaziyo uThixo nabo bangazithobeliyo iindaba ezilungileyo ezingeNkosi yethu uYesu. Bona baya kuva isohlwayo sesigwebo sentshabalalo engunaphakade bemke phambi kweNkosi nakuzuko lwamandla ayo.”—2 Tesalonika 1:6-9.

“Ihlabathi [loluntu olungendawo] liyadlula nenkanuko yalo, kodwa lowo wenza ukuthanda kukaThixo uhleli ngonaphakade.”—1 Yohane 2:17.

Ngaba Umhlaba Uya Kuhlala Useluxolweni?

Nangona iZibhalo zibonisa ngokucacileyo ukuba ukuvumela kukaThixo ubungendawo kuza kuphela, sinokuqiniseka njani ukuba ubungendawo, emva kokuba buphelisiwe abuyi kuphinda bubekho? Ngapha koko, emva koNogumbe womhla kaNowa, kungekudala baphinda babakho kangangokuba uThixo kwafuneka awakatyise amacebo angendawo abantu ngokudubaduba intetho yabo.—Genesis 11:1-8.

Eyona nto iphambili ebangela ukuba sibe nentembelo yokuba ubungendawo abuyi kuphinda bubekho kungenxa yokuba umhlaba awuyi kulawulwa ngabantu njengoko kwaba njalo ngokukhawuleza emva koNogumbe. Kunoko, uya kulawulwa buBukumkani bukaThixo. Obu Bukumkani buya kulawula busezulwini yaye buya kuba kuphela korhulumente wasemhlabeni. (Daniyeli 2:44; 7:13, 14) Buya kuthabatha amanyathelo ngokukhawuleza nxamnye naye nabani na ozama ukuzisa ubungendawo kwakhona. (Isaya 65:20) Eneneni, ekugqibeleni buya kutshabalalisa oyena msunguli wobungendawo—uSathana uMtyholi—kunye needemon zakhe, iingelosi ezingendawo ezamlandelayo.—Roma 16:20.

Ukongezelela, uluntu aluyi kuba nankxalabo ngokutya, impahla, ikhusi nomsebenzi wengqesho—nto ezo xa ubani engenazo, zimbangela ukuba abe sisaphuli-mthetho. Ewe, umhlaba uphela uya kuguqulelwa ekubeni yiparadesi enemveliso nenentabalala yazo zonke izinto.—Isaya 65:21-23; Luka 23:43.

Okubaluleke nangakumbi kukuba, uBukumkani buya kubafundisa abalawulwa babo ukuba baphile ngoxolo ngoxa kwangaxeshanye buya kubenza bafikelele eyona ncopho yemfezeko. (Yohane 17:3; Roma 8:21) Emva koko, uluntu aluyi kuphinda luwe luvuka lusilwa nobuthathaka kunye notyekelo lwesono, nto leyo eya kwenza lukwazi yaye lukunandiphe ukuthobela uThixo ngokugqibeleleyo, njengoko kwakunjalo ngendoda efezekileyo, uYesu. (Isaya 11:3) Eneneni, uYesu wahlala enyanisekile kuThixo kwanaxa wayelingwa yaye ethuthunjiswa ngeyona ndlela ibuhlungu—nto ezo ziya kuba zingekho kwaukubakho eParadesi.—Hebhere 7:26.

Isizathu Sokuba Abanye Baye Ezulwini

Noko ke, abantu abaninzi abafunda iBhayibhile bayawaqonda amazwi kaYesu athi: “Endlwini kaBawo zininzi iindawo zokuhlala. . . . Ndiyemka ndize ndinilungiselele indawo.” (Yohane 14:2, 3) Ngaba oku akuphikisani nengcamango yethemba lokuphila ngonaphakade kwiparadesi esemhlabeni?

Ezi mfundiso aziphikisani. Eneneni, ziyaxhasana. Okokuqala, iBhayibhile ithi linani elilinganiselweyo lamaKristu athembekileyo kuphela—oko kukuthi, ali-144 000 kuwo—elivuselwa kubomi basezulwini njengezidalwa zomoya. Yintoni ebangela ukuba livuzwe ngale ndlela ingummangaliso? Ngenxa yokuba libumba iqela elabonwa nguYohane embonweni, ‘elabuyela ebomini laza lalawula njengookumkani noKristu iminyaka eliwaka.’ (ISityhilelo 14:1, 3; 20:4-6) Xa lithelekiswa nabantu abangamawaka ezigidi abaza kuphila emhlabeni, i-144 000 ngokwenene ‘lingumhlambi omncinane.’ (Luka 12:32) Ngaphezu koko, ekubeni linamava eengxaki eziqhelekileyo ebantwini, njengoYesu liya kukwazi ‘ukuvelana nobuthathaka bethu’ njengoko lisalathisa ukubuyiselwa koluntu nomhlaba kwimeko yangaphambili.—Hebhere 4:15.

Umhlaba—Ikhaya Loluntu Likanaphakade

Ngokulungiselela idini lentlawulelo likaYesu Kristu, uThixo waqalisa ukuhlanganisa abali-144-000 kwiminyaka emalunga nama-2 000 eyadlulayo, yaye izibakala zibonisa ukuba ngoku eli qela sele liphelele. (IZenzo 2:1-4; Galati 4:4-7) Noko ke, idini likaYesu lalingenzelwanga izono zabali-144 000 kuphela, “kodwa kwanezehlabathi liphela.” (1 Yohane 2:2) Ngenxa yoko, bonke abaqhelisela ukholo kuYesu banethemba lobomi obungunaphakade. (Yohane 3:16) Abo balele emangcwabeni kodwa bekwinkumbulo kaThixo baya kuvuselwa ukuphila emhlabeni ocociweyo, kungekhona ezulwini. (INtshumayeli 9:5; Yohane 11:11-13, 25; IZenzo 24:15) Yintoni ebalindeleyo apho?

ISityhilelo 21:1-4 siyaphendula, sisithi: “Khangela! Intente kaThixo iphakathi koluntu . . . Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” Khawufan’ ucinge—abantu bakhululwe ekufeni, yaye intlungu nokukhala okubangelwa kukufa kuya kube kungasekho ngonaphakade! Ekugqibeleni, injongo yantlandlolo kaYehova ngomhlaba nangoluntu iya kuzaliseka ngokuzukileyo.—Genesis 1:27, 28.

Ukhetho Lwethu—Ubomi Okanye Ukufa

UAdam noEva abazange banikwe ukhetho lokuya ezulwini. Babemele bakhethe ukuthobela uThixo baze baphile ngonaphakade kumhlaba oyiparadesi okanye bangamthobeli baze bafe. Okulusizi kukuba, bakhetha ukungathobeli baza ngaloo ndlela babuyela “kwaseluthulini” lomhlaba. (Genesis 2:16, 17; 3:2-5, 19) Ayizange ibe yinjongo kaThixo ukuba intsapho yabantu ngokubanzi ife nokuba iqale engcwabeni ngaphambi kokuba iye kuphila ezulwini. UThixo wadala izigidi zeengelosi ukuba ziphile ezulwini; ezi zidalwa zomoya azingobantu ababefile baza bavuselwa kubomi basezulwini.—INdumiso 104:1, 4; Daniyeli 7:10.

Yintoni esimele siyenze ukuze sifumane intsikelelo yokuphila ngonaphakade kwiParadesi esemhlabeni? Inyathelo lokuqala kukufundisisa iLizwi likaThixo, eliyiBhayibhile Engcwele. UYesu ethandaza wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso nangalowo umthumileyo, uYesu Kristu.”—Yohane 17:3.

Elinye inyathelo elikhokelela kulonwabo olungunaphakade eParadesi kukusebenzisa olo lwazi. (Yakobi 1:22-24) Abo baphila ngokuvisisana neLizwi likaThixo banethemba lokuzibonela ngawabo amehlo inzaliseko yeziprofeto ezibangel’ imincili njengeso sibhalwe kuIsaya 11:9, esithi: ‘Abantu abayi kwenzakalisa okanye bonakalise entabeni yam yonke engcwele; ngenxa yokuba umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.’

[Umbhalo osemazantsi]

[Imifanekiso ekwiphepha 7]

“Amalungisa aya kuwudla ilifa umhlaba, ahlale kuwo ngonaphakade.”—INdumiso 37:29