Zazi Uze Uzixabise Iziphiwo Onazo

IYAMANGALISA indlela umzimba womntu okwazi ngayo ukwenza izinto ezininzi. Asikho isilwanyana esifikayo ngeziphiwo ebantwini. Enye into esinceda sikwazi ukwenza izinto ezininzi yindlela esidalwe ngayo esinceda singakwazi nje ukubona izinto ezininzi kodwa ekwasenza sikwazi ukwenza izinto ezininzi ngeengalo nezandla zethu. Beziya kuba mbalwa gqitha izinto esinokuzenza ukuba besiza kuhamba ngamanqina neengalo!

Enye yezona zinto zixabisekileyo sinazo yinkqubo yezivamvo, esiza kugxininisa kuyo kweli nqaku. Le nkqubo iquka izandla, iindlebe, amehlo nemithambo-luvo kunye nobuxhakaxhaka bobuchopho. Makhe sihlole nganye yezi zinto.

Isandla Somntu

Iyamangalisa indlela ezisebenza ngayo izandla zethu. Ngazo siyakwazi ukufaka irhali enalitini, sigawule ngezembe, sizobe okanye sidlale ipiyano. Kanti izandla zethu zinemithambo-luvo ebukhali. Akuyomfuneko ukuba ude uyinkamfule into ngaphambi kokuba uyive ukuba buboya, liphepha, lulusu, yintsimbi, ngamanzi okanye liplanga. Eneneni,izandla zethu asizozinto nje zokubamba nokusebenza. Kodwa zisinceda sazi izinto ezisingqongileyo. Zikwasinceda sibonise uthando.

Yintoni eyenza izandla zomntu zikwazi ukwenza izinto ezininzi ngolu hlobo? Zininzi izizathu zoko. Kodwa siza kuthetha ngezine.

1. Zozibini izandla zethu zinamathambo angaphezu kwama-50, nani elo eliyikota yawo onke amathambo asemzimbeni. Indlela entsonkothileyo esenziwe ngayo isandla—amathambo, amalungu nemisipha—yenza isandla somntu sibe bhetyebhetye ngeyona ndlela.

2. Ubhontsi osesandleni uxhaswa ngamalungu amabini. La malungu nezinye izihlunu asebenzisana nazo enza ubhontsi abe bhetyebhetye yaye abe namandla.

3. Isandla silawulwa ziintlobo ezintathu zezihlunu. Ezona zinamandla nezimbini kwezi, zisengalweni yaye zilawula iminwe zisebenzisa imisipha. Ukuba ezi zihlunu bezisesandleni, isandla besiza kuba sikhulu size singabi bhetyebhetye. Uhlobo lwesithathu noluncinane kwezi lusesandleni yaye lwenza iminwe isebenze ngendlela emangalisayo.

4. Singathi iminwe yakho izizivamvo ngokwayo kuba kwindawana nje encinane kwiintupha, kukho izivamvo ezingama-2 500. Ngaphezu koko, kukho iintlobo ezahlukeneyo zezivamvo yaye hlobo ngalunye lunomsebenzi walo njengokuva uburhabaxa bento oyibambayo, ubushushu, ubumanzi, ukushukuma, ubunzima neentlungu. Ngenxa yoko, umnwe womntu lelona lungu linezivamvo ezibukhali.

Indlebe Yomntu

Nangona zikho izilwanyana ezineendlebe ezibukhali kunezomntu, iingcali zokusebenza kweendlebe zithi, indlela indlebe yomntu esebenzisana ngayo nobuchopho ayinakuthelekiswa nanto. Iindlebe zethu zisenza sikwazi ukwahlukanisa phakathi kobungakanani belizwi nendlela esivakala ngayo isandi salo nokuqikelela icala elivela kulo nokuba livela kude kangakanani. Indlebe yomntu ephilileyo inokuva isandi esisusela kuma-20 ukuya kuma-20 000 eehertz. Xa isandi sikwi-1 000 ukuya kuma-5 000 eehertz sivakala ngokucacileyo yaye siyakwazi ukuva nolona tshintsho luncinane kuso.

Eneneni, xa indlebe iphile kakuhle inokuva izandi ezithunyelwa ngamaza omoya alingana nechaphaza. Ngokutsho kwezinye izifundo zaseyunivesithi, “indlebe yomntu ibukhali ngendlela enganakuchazwa. . . . Ukuba indlebe yomntu ibibukhali ngaphezu kokuba injalo ngoku, izandi esizivayo beziya kuba ngusebesebe nje ongenangqiqo, nto leyo ebangelwa kukuyaluzela kweeathom neemolekyuli ezisemoyeni.”

Xa indlebe isiva isandi isidlulisela ngaphakathi isebenzisa amathanjana angaphakathi kuyo abizwa ngokuba yihammer, ianvil nestapes. Kodwa kuthekani ukuba uva ingxolo enganyamezelekiyo? Ukuze zimelane neemeko ezinjalo, iindlebe zinezihlunu ezilungelelanisa la mathanjana ukuze anciphise loo ngxolo. Noko ke, iindlebe azikwazi ukumelana nengxolo engapheliyo. Ingxolo enjalo inokuzenzakalisa iindlebe. Ngoko ke, sinyamekele esi sipho ‘senziwe ngendlela emangalisayo’ nguMdali wakho.—INdumiso 139:14.

Indlebe yakho iphinda ikuncede uqonde apho siphuma khona isandi. Oko kungenxa yezinto eziliqela kuquka indlela owenziwe ngayo umphandle wendlebe, umngxuma wendlebe, umgama ophakathi kwazo zombini iindlebe zakho nobukrelekrele bobuchopho. Ngoko ke, ukuba isandi siyehla njengoko sisuka kwenye indlebe sisiya kwenye okanye eso sandi sithatha iqhezu lomzuzwana ngaphambi kokuba sifike apho siya khona, ngoko nangoko ubuchopho buthumela amehlo kwelo cala sivela ngakulo eso sandi.

Cinga ngomgudu obuya kufuneka ukuba loo nto bekuya kufuneka yenziwe ngumntu! Xa sitheth’ inyaniso bekuya kufuneka loo mntu abe krelekrele ngendlela engaqhelekanga aze enze loo nto ngesantya sombane! Ukuba unonjineli othile ebenokwenza isixhobo sokuva esingaphantsi lee kwindlebe oyinikwe nguMdali, ebeya kufumana amawonga neembasa. Kodwa kukangaphi usiva abantu bezukisa uThixo ngemisebenzi yakhe emangalisayo?—Roma 1:20.

Iliso Lomntu

Abanye abaphandi baqikelela ukuba abantu ababona kakuhle bancedwe ngamehlo abo ukuze bafumane inkoliso yolwazi abanalo. Amehlo ethu asebenzisana nobuchopho ukuze asincede sikwazi ukubona imibala, izinto ezishukumayo nemifanekiso, indlela ezimile ngayo izinto size sikwazi ukubona izinto ezininzi ngaxeshanye. Ukongezelela, siyakwazi ukubona naphantsi kweemeko ezahlukahlukeneyo zokukhanya.

Ziliqela izinto ezisinceda sikwazi ukubona phantsi kweemeko ezahlukahlukeneyo zokukhanya. Ngokomzekelo, ukhozo lweliso luyakwazi ukuvuleka ukusuka kwimilimitha enesiqingatha ukuya kwezisibhozo ukuze kungene ukukhanya okungakumbi. Emva koko ukukhanya kudlula kwilensi yeliso ize yona ikudlulisele kwinwebu yeliso kuze kuncitshiswe. Ngenxa yoko, ungaze ulijonge ngeliso ilanga!

Inwebu yeliso ineentlobo ezimbini zeephotoreceptors—ezokuqala ekuthiwa ziicones (ezimalunga nezigidi ezithandathu) zikunceda ubone imibala eyahlukahlukeneyo nokukhanya okuqaqambileyo, kanti ezinye ekuthiwa ziirods (ezizigidi ezili-120 ukuya kwezili-140) zona zikunceda ubone xa kungakhanyi kakuhle. Irod esebenza kakuhle iyakwazi ukubona nelona litha lincinane.

Enye into eluncedo ziiseli zemithambo-luvo zenwebu yeliso ezikwiicones neerods. IAmerican Optometric Association ithi, “ezi seli zikunceda ubone bhetele ebusuku. Indlela ezisebenza ngayo ezi seli inokufaniswa nekhamera ekwazi ukufota xa kungakhanyi kakuhle naxa kukho ukukhanya okuqaqambe kakhulu.”

Oononjineli benza iikhamera, iikhompyutha nabanye oomatshini abanobuxhakaxhaka obuntsonkothileyo. Kodwa abo matshini abasondelanga kwaukusondela kwinkqubo yethu yemithambo-luvo. Zibuze, ‘Ngaba isengqiqweni into yokuthi inkqubo yethu yemithambo-luvo entsonkothe ngolu hlobo yabakho ngamabona-ndenzile njengoko besitsho abantu abakholelwa ekubeni izinto zazivelela?’ Indoda yamandulo uYobhi wayengayazi njengathi indlela osebenza ngayo umzimba womntu. Sekunjalo waziva enyanzelekile ukuba athi kuThixo: “Izandla zakho zandibumba.”—Yobhi 10:8.

Ubuchopho Bomntu

Ngendlela emangalisayo ubuchopho buyakwazi ukutolika inkcazelo obuyifumana kwimithambo-luvo ivela kwinkqubo yezivamvo. Buyakwazi ukunxulumanisa le nkcazelo kunye naleyo ikwinkumbulo yabo. Kungenxa yoko le nto ivumba elithile likwazi ukwenza ukuba ubuchopho bukhumbule isiganeko esithile owasilibala kudala. Ukuba ubona into ethile ivele nje kancinane, ngokomzekelo umsila wekati, ubuchopho buyakuchazela ukuba kukho ikati ekufutshane.

Kakade ke ubuchopho abuzange budalwe sele bunemifanekiso yeekati, njengokuba bungazange budalwe sele bulazi ivumba leentyatyambo, isandi samanzi okanye bubazi uboya. Ubuchopho bazazi ngokuzifunda ezi zinto. Loo nto iye icace mhlophe kubantu abazalwe beziimfama baze ekuhambeni kwexesha banyangwe ukuze baphinde babone. Ekubeni kungekho nto bakha bayibona ubuchopho babo kuye kufuneke buzifunde ukuze buzazi izinto ngoku abazibonayo. Kwenzeka ntoni kubantu abanjalo?

Kuthiwa kungekudala baye bathi bayakwazi ukwahlukanisa phakathi kwemibala, izinto ezishukumayo nezinye izinto. Kodwa emva koko baye benze inkqubela engafaniyo. Abantwana, ingakumbi abancinane kakhulu bafunda ngokukhawuleza. Kodwa loo nto ayenzeki kubantu abadala. Kuba nzima nokubakhumbula kakuhle abantu. IKoch Laboratory, ekwiCalifornia Institute of Technology ithi, okubuhlungu kukuba uninzi lwabantu ebebekade bengaboni, “ekuqaleni baye bavuye kakhulu baze emva koko baphoxeke kuba bengade bayiqhele imeko yabo entsha baze ngenxa yoko baxinezeleke.”

Ezi zinto zisinceda siwuqonde nangakumbi umkhamo uYesu awabaphilisa ngawo abantu ngoxa wayesemhlabeni. Iimfama nezithulu azizange zibone zize zive nje kuphela kodwa zazikwazi ukuziqonda izinto ezizibonayo nezizivayo. Ngendlela efanayo, ifanele ukuba yayimangalisa into yokuba izithulu zithethe ngendlela eqhelekileyo ingakumbi ezo zazizelwe zinesi siphene. (Mateyu 15:30; Marko 7:32-35; 8:22-25; Luka 7:21, 22) Sinokuqiniseka ukuba azikho iimfama ezaba noxinezeleko emva kokuba ziphiliswe nguYesu. Eneneni, enye indoda eyaphiliswayo yathethelela uYesu kwiintshaba zakhe isithi: “Kwakudala akuzange kuviwe ukuba nabani na wavula amehlo alowo uzelwe eyimfama. Ukuba lo mntu ebengaveli kuThixo, ebengenakwenza nto konke konke.”—Yohane 9:1-38.

Kwinqaku elilandelayo siza kufunda ngezinye zeempawu zethu, njengenkalipho nothando. Ngaba wakha wazibuza ukuba kutheni ingabantu kuphela abakwaziyo ukubonakalisa ezi mpawu? Isibakala sokuba ingabantu kuphela abanezi mpawu siye sabaxaka abantu abathi abantu bavela kwizilwanyana.

[Ibhokisi ekwiphepha 7]

UBUCHOPHO BAKHO BUSEBENZA NGENDLELA EMANGALISAYO

Ubuchopho bukunceda njani ukuba ukwazi ukuva, ukubona nokungcamla? Lo mbuzo uyazixaka izazinzulu. Isazinzulu uGerald L. Schroeder sathi: “Asazi ukuba yintoni le isebuchotsheni ikunceda ukwazi ukuqonda amagama owafundayo.”

Uhlabela mgama athi: “Ukufunyaniswa kwendlela entsonkothileyo obusebenza ngayo ubuchopho kuyenza ithandabuzeke imfundiso yokuzivelela kwezinto.” Wongezelela athi: “Ukuba uDarwin wayeyazi indlela obuntsonkothe ngayo ubomi, ndiqinisekile ukuba ngewayeze nengcamango eyahluke lee kunale wayeyimele.”

[Umzobo/Imifanekiso ekwiphepha 5]

(Ukuba ufuna inkcazelo ehlahlelwe kakuhle, yiya kwimpapasho)

Amathambo antsonkothileyo

Amalungu kabhontsi

Izihlunu

Imithambo-luvo

[Umfanekiso]

Yintoni eyenza izandla zethu zikwazi ukwenza izinto ezininzi?

[Umfanekiso okwiphepha 7]

Ubuchopho bakho butolika izinto eziza nemithambo-luvo buze buzinxulumanise nezinto osele uzazi