Incwadi Onokuyithemba—Icandelo 7

Igunya Lehlabathi Lesixhenxe

Eli linqaku lokugqibela kwasixhenxe “kaVukani!” athetha ngamagunya ehlabathi asixhenxe akwimbali yeBhayibhile. Injongo yala manqaku kukubonisa ukuba iBhayibhile inokuthenjwa, iphefumlelwe nguThixo yaye ithetha ngethemba lokupheliswa kokubandezeleka kwabantu okubangelwa kukulawulwa ngabantu abakhohlakeleyo.

SIPHILA kwixesha elibalulekileyo nelamanqam—ixesha lokuvela kwegunya lesixhenxe kwimbali yeBhayibhile. Ngaphezu koko, kuba eli gunya lilo kuphela ekuthethwa ngalo eBhayibhileni kuphela xa kuprofetwa, kuba amanye amathandathu kuyathethwa ngawo nakwimbali yeBhayibhile. IBhayibhile yaprofeta ngala magunya asixhenxe okanye “ookumkani” isithi: “Kukho ookumkani abasixhenxe: abahlanu bawile, omnye ukho, omnye akakafiki, kodwa xa athe wafika umele ahlale ithuba elifutshane.”a—ISityhilelo 17:10

Xa kwakubhalwa loo mazwi kwiminyaka nje engaphezu kwe-1 900 eyadlulayo, “ookumkani” okanye amagunya ezopolitiko amahlanu kwasixhenxe ayesele ‘ewile.’ Loo magunya yayiyiYiputa, iAsiriya, iBhabhiloni, amaMedi namaPersi neGrisi. Ibinzana elithi “omnye ukho” libhekisela kwiRoma. Kodwa ke iRoma yayingazi kulawula ngonaphakade. Kwakuseza kuvela obunye ubukumkani, kodwa isiprofeto sathi: “Akakafiki.” Njengokuba isiprofeto seBhayibhile sasitshilo, ‘ubukumkani’ besixhenxe bafika. Bubuphi obu bukumkani? Ngaba buza kulawula ngonaphakade? Ukuba akunjalo, buza kuyeka nini ukulawula? Iimpendulo zeBhayibhile zicacile.

Isiprofeto Esinokuthenjwa

Igunya lesixhenxe laqalisa ukuvela xa iNgilani yaqalisa ukuba namandla kumntla-ntshona woBukhosi baseRoma. Ngeminyaka yee-1760 olu hlanga lusesiqithini lwaba buBukhosi baseBritani obunamandla. IBritani yaqhubeka ichuma yaye isiba namandla ibe ngenkulungwane ye-19 yayilelona lizwe lityebileyo nelinamandla emhlabeni. Enye incwadi ithi “uBukhosi baseBritani babubobona bukhulu kobakha bakho emhlabeni. Babunabemi abazizigidi ezingama-372 yaye babunomhlaba ozizigidi ezingama-28 zezikwe khilomitha.”

Noko ke, imfazwe yehlabathi yokuqala yowe-1914-1918 yabangela ukuba iBritani iqalise ubuhlobo obukhethekileyo nelaseUnited States, ilizwe elalikade lilithanga layo. Waba yintoni umphumo? UBukhosi baseBritani bathathelw’ indawo lumanyano lwaMangesi namaMerika, igunya lehlabathi lamazwe amabini athetha isiNgesi nelisekho nanamhl’ oku.—Funda ibhokisi enomxholo othi “Umanyano Olukhethekileyo.”

Isiprofeto esikwiSityhilelo 17:10 singqinelana nesinye isiprofeto esikwincwadi kaDaniyeli. UDaniyeli wabhala ‘ngomfanekiso omkhulu’ owabonwa nguKumkani uNebhukadenetsare waseBhabhiloni kumbono awawunikwa nguThixo. (Daniyeli 2:28, 31-43) UDaniyeli waxelela lo Kumkani ukuba amalungu omzimba alo mfanekiso amela amagunya ezopolitiko ayeza kulandelelana ukususela kwiBhabhiloni eyayiligunya lehlabathi ngelo xesha. (iYiputa neAsiriya zazisele ziwile.) Imbali iyazingqina ezi zinto zilandelayo:

Intloko yegolide yayimela uBukhosi baseBhabhiloni.

Isifuba neengalo zesilivere zazimela amaMedi namaPersi.

Isisu namathanga obhedu zazimela iGrisi yamandulo.

Imilenze yentsimbi yayimela uBukhosi baseRoma.

Iinyawo ezingumxube wentsimbi nodongwe zimela imeko yezopolitiko neyezentlalo engazinzanga ngexesha lokulawula kwegunya lamaNgesi namaMerika.

Ngokutsho kweSityhilelo 17:10 igunya lehlabathi lesixhenxe ‘limele lihlale ithuba elifutshane.’ Liza kuba ngakanani elo xesha? Eli gunya liza kuwa njani? Kuza kwenzeka ntoni emva koko? UDaniyeli uyayiphendula le mibuzo.

Isithembiso Onokusikholelwa

Emva kokuchaza umfanekiso okhankanywe ngasentla, uDaniyeli wabhala wathi: “Kwaqephuka ilitye [entabeni] kungengazandla, lawubetha umfanekiso lowo ezinyaweni zawo zentsimbi nodongwe oluxonxiweyo, lazityumza.” (Daniyeli 2:34) Kwakuthetha ntoni oku?

UDaniyeli uhlabela mgama esithi: “Ngemihla yabo kumkani [bokugqibela] uThixo wezulu uya kumisa ubukumkani obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani [zehlabathi], buze bona bume ukusa kwixesha elingenammiselo.”b (Daniyeli 2:44, 45) Phawula ezi ngongoma zibalulekileyo:

1. UBukumkani oboyisa ezinye izikumkani nobumelwa lilitye elikhulu ‘bumiselwa’ nguThixo ngokwakhe kungekhona ‘izandla’ zabantu. Ngenxa yoko, kuyafaneleka ukuba kuthiwe buBukumkani bukaThixo.

2. UBukumkani bukaThixo ‘buza kuzityumza’ zonk’ izikumkani zabantu kuquka negunya lesixhenxe lehlabathi. Ngoba kutheni? Zonke ezi zikumkani ziza kwala ukuzibeka phantsi iintambo yaye ziza kulwa nxamnye noThixo kwimfazwe enkulu yokugqibela eza kuba kwindawo yokomfuziselo ekuthiwa yiHarMagedon okanye iArmagedon. IBhayibhile itsho ngokucacileyo ukuba kule mfazwe kuza kulwa ‘ookumkani bomhlaba omiweyo uphela.’—ISityhilelo 16:13, 14, 16.

3. Ngokungafaniyo nookumkani bomhlaba abangalawuli ngonaphakade, kuquka namagunya asixhenxe ehlabathi, uBukumkani bukaThixo ‘abuyi kuze bonakaliswe.’ Kwakhona, buza kulawula wonk’ umhlaba.—Daniyeli 2:35, 44.

Ukutshatyalaliswa okokugqibela kweentshaba zikaThixo kuza kuzalisekisa isiprofeto esikwiGenesis 3:15, ekuthethwe ngaso kwinqaku lokuqala lolu ngcelele. UYesu Kristu oyimbewu yomfazi wayeza kuyityumza inyoka yokomfuziselo uSathana kunye nembewu yakhe. (Galati 3:16) Imbewu kaSathana iquka bonke abantu abangendawo njengaye nabakhuthaza uzimele-geqe endaweni yokulawulwa nguThixo noKristu.—INdumiso 2:7-12.

Oku kusifikisa kumbuzo obalulekileyo: Iza kufika nini le ntshabalalo yokugqibela? Eli “litye” elibuBukumkani bukaThixo liza kulususa nini ulawulo lwabantu? IBhayibhile iphendula lo mbuzo ‘ngomqondiso’ wemihla yokugqibela.—Mateyu 24:3.

Wuqonde “Umqondiso”!

Umqondiso wesiphelo uquka iimfazwe ezenzeka ehlabathini lonke, “iinyikima zomhlaba ezinkulu,” ‘iindyikitya zokufa’ “nokunqongophala kokutya.” (Luka 21:10, 11; Mateyu 24:7, 8; Marko 13:8) Kwakhona, ‘imihla yokugqibela’ yayiza kubonakala ngokuwohloka kakhulu kwemilinganiselo yokuziphatha nokunganqulwa kukaThixo ngendlela efanelekileyo. (2 Timoti 3:1-5) Ngaba zenzekile “zonke ezi zinto?” (Mateyu 24:8) Ewe zenzekile, kangangokuba abantu bayaloyika ikamva. Iphephandaba iThe Globe and Mail lathi: “Ezona nkcuba-buchopho zenzululwazi nentlalo-ntle zaziwayo zithi abantu baza kutshabalala.”

Noko ke, kukho nto ithile ezingachananga kuyo ezi nkcuba-buchopho—abantu abazi kutshabalala baphele. Ukufika koBukumkani bukaThixo kuyakuqinisekisa oko! Ethetha ngomqondiso wesiphelo, uYesu Kristu wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Siye sazaliseka njani esi siprofeto?

Kumazwe angaphezu kwama-230 amaNgqina kaYehova ashumayela ngoBukumkani bukaThixo. Eneneni, elona phephancwadi lawo liyintloko yiMboniselo Evakalisa UBukumkani BukaYehova—uYehova ligama likaThixo. (INdumiso 83:18) Imfundo yeBhayibhile eqhutywa ngamaNgqina inceda inkitha yabantu neentsapho ukuba balahle imikhwa emibi baze baphile ubomi obukholis’ uThixo nobunoxolo. (1 Korinte 6:9-11) Ngenxa yoko, izigidi zabantu ehlabathini lonke ziqinisekile ukuba ziya kukhuselwa nguThixo xa uBukumkani buqalisa ukulawula abantu.

Ziya kuzibonela ngamehlo azo ukuzaliseka komthandazo kaYesu obizwa ngokuba nguMthandazo weNkosi nonamazwi athi: “Mabufike uBukumkani bakho. Makwenziwe ukuthanda kwakho nasemhlabeni njengokuba kusenziwa emazulwini.” (Mateyu 6:10, iBhayibhile YesiXhosa) Ngaba wakha wazibuza ukuba buza kuba njani ubomi emhlabeni xa bonke abantu bemthanda yaye bemthobela uThixo? Ezi zicatshulwa zeBhayibhile zilandelayo ziya kukunceda uqonde isizathu sokuba lifanelekile ibinzana elithi “iindaba ezilungileyo.”

Xa Ukuthanda KukaThixo Kusenziwa Emhlabeni . . .

● Kuya kubakho uxolo lokwenene emhlabeni kungekhona nje ukungabikho kwemfazwe. ‘UYehova . . . uphelisa iimfazwe kuse esiphelweni somhlaba. Waphula isaphetha nomkhonto; iinqwelo uzitshisa emlilweni.’ (INdumiso 46:8, 9) “Abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”—INdumiso 37:11.

● Bonke abantu baya kuba nentabalala yokudla. “Kuya kubakho ukudla okuziinkozo okuninzi emhlabeni; encotsheni yeentaba kuya kubakho ukuphuphuma.”—INdumiso 72:16.

● Bonke abantu baza kuba yimiqabaqaba. “Akakho ummi wakhona oya kuthi: ‘Ndiyagula.’”—Isaya 33:24.

● Wonk’ umntu uza kuba nekhaya elisemgangathweni. “Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; abayi kutyala kudle abanye.”—Isaya 65:21, 22.

● Konk’ ukubandezeleka kuza kuphela. “Intente kaThixo iphakathi koluntu, . . . uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:3, 4.

Ngaba unomdla kwezi zithembiso? Ukuba kunjalo, amaNgqina kaYehova akukhuthaza ukuba ufunde iBhayibhile. Ngokwenjenjalo uya kubona ubungqina obungakumbi bokuba ukulawulwa kwabantu ngabalawuli abakhohlakeleyo sele kuza kuphela. Kwakhona, uya kubona ukuba ufanele uyithembe iBhayibhile nokuba iphefumlelwe nguThixo.—2 Timoti 3:16.c

[Imibhalo esemazantsi]

[Ibhokisi/Umfanekiso okwiphepha 17]

UMANYANO OLUKHETHEKILEYO

Kwinkomfa nonoondaba awayeyibambe kunye neNkulumbuso yaseBritani uDavid Cameron ngoJulayi 2010, uMongameli waseUnited States uBarack Obama wathi: “Siphelelwa ngamazwi okuluchaza olu manyano. IUnited States neBritani zinobuhlobo obukhethekileyo. Sinemvelaphi efanayo. Sinemilinganiselo efanayo. . . . Ngaphezu kwako konke, umanyano lwethu luhlala luhleli kuba lusenza sifeze iinjongo zethu. . . . Xa iUnited States neBritani zisima kunye, abantu bethu—nabantu abasehlabathini jikelele—baziva bekhuselekile yaye bayachuma. Lilonke, iUnited States ayinaye omnye umhlobo okanye iqabane elisondele njengeBritani.”

[Umzobo okwiphepha 16]

(Ukuba ufuna inkcazelo ehlahlelwe kakuhle, yiya kwimpapasho)

IBhabhiloni

AmaMedi NamaPersi

IGrisi

IRoma

AmaNgesi namaMerika

[Umfanekiso okwiphepha 18]

IBhayibhile ithembisa ukuba phantsi koBukumkani bukaThixo kuya kubakho uxolo lokwenene

[Inkcazelo Ngemifanekiso ekwiphepha 15]

Time line: Egyptian wall relief and bust of Nero: Photograph taken by courtesy of the British Museum; Persian wall relief: Musée du Louvre, Paris