Iingxaki Zepolitiki Zizalisekisa Into Eyathethwa YiBhayibhile
Abantu namhlanje bohlulelene kakhulu kwezepolitiki. Abavumelani nemithetho ebekiweyo echaphazela ubomi babo, ibe xa bechaza indlela abaziva ngayo bathetha benomsindo. Kurhulumente, abantu abenza umthetho nezinye iinkokheli zeepolitiki bakhe bangavumelani okanye bangafuni ukumamela. Oku kungavumelani kwenza kubekho iingxabano kwezepolitiki aze urhulumente angakwazi ukuwenza kakuhle umsebenzi wakhe.
Ezi ngxaki zepolitiki zenzeka kakhulu eUnited States naseBritani (eyaziwa ngokuba yiUnited Kingdom). Le nto yenzeka kuba iBhayibhile yachaza kudala ngezi ngxabano zaziza kwenzeka phakathi kwezi ntlanga zimbini. Yachaza nokuba ezi zinto zaziza kwenzeka kanye xa urhulumente wasezulwini kaThixo engenelela kwiingxaki zabantu.
Iingxaki zepolitiki “ekupheleni kwemihla”
IBhayibhile ichaza isiprofeto esimangalisayo esibhalwe kwincwadi kaDaniyeli. Kweso siprofeto wachaza “into eza kwenzeka ekupheleni kwemihla,” eyayithetha ngexesha elizayo elibalulekileyo kwimbali yabantu.—Daniyeli 2:28.
Esi siprofeto seBhayibhile sachazwa kwiphupha uThixo awenza ukumkani waseBhabhiloni waliphupha. Kwelo phupha, ukumkani wabona umfanekiso omkhulu owenziwe ngeentsimbi ezingafaniyo. Emva koko umprofeti uDaniyeli wachaza ukuba ukusuka entloko ukuya kutsho ezinyaweni, lo mfanekiso wawumela amazwe aza kuba negunya kwimbali yabantu.a Ekuhambeni kwexesha, lo mfanekiso wawuza kubethwa lilitye uze uphele. Eli litye limela uBukumkani bukaThixo.—Daniyeli 2:36-45.
Ngokutsho kwesiprofeto, uBukumkani bukaThixo buza kususa bonke oorhulumente babantu buze bungene endaweni yabo. UYesu wayethetha ngabo xa wayekhuthaza abalandeli bakhe ukuba bathandaze bathi: “Mabufike uBukumkani bakho.”—Mateyu 6:10.
Kodwa kwisiprofeto esiseBhayibhileni kuchazwa phi ukuba kuza kubakho iingxaki zeepolitiki? Qaphela ukuba kulo mfanekiso iinyawo “ziyintsimbi exutywe nodongwe.” (Daniyeli 2:33) Indlela ezenziwe ngayo ezi nyawo yahlukile kuzo zonke ezinye iindawo ezikulo mfanekiso, kuba ezinye iindawo zenziwe ngeentsimbi. Le nto ibonisa ukuba kuza kubakho igunya elinye elahlukileyo kwamanye. Njani? Isiprofeto sikaDaniyeli siyacacisa:
Ngokutsho kwesi siprofeto, igunya lehlabathi elimelwa ziinyawo laliza kuba neengxaki zepolitiki. Kaloku nangona linamandla, laliza kwenziwa lingomeleli ngabantu balo.
Isiprofeto sikaDaniyeli siyenzeka namhlanje
Iinyawo ezikulo mfanekiso zimela igunya lehlabathi elinamandla namhlanje, ukusebenzisana kweUnited States neBritani. Izinto ezenzekayo namhlanje ziyibonisa njani loo nto?
Iinyawo zalo mfanekiso “ziyintsimbi exutywe nodongwe,” ngenxa yaloo nto azomelelanga. (Daniyeli 2:42) Namhlanje igunya laseUnited States neBritani alomelelanga ngenxa yokuba abantu balo mazwe abamanyenanga. Ngokomzekelo abantu bala mazwe omabini baxabana bodwa. Bayatoyi-toya belwela amalungelo abo. Abantu ababavotelayo baye bangakwazi ukuvumelana kwizinto ezininzi. Ngenxa yokuba abantu babo bohlulelene, oorhulumente bala mazwe abakwazi ukwenza izinto abagqibe kuzo.
Imeko yoorhulumente yayichazwe kwangaphambili kwisiprofeto esikuDaniyeli isahluko 2
Jonga ukuba ezinye izinto ezikwisiprofeto sikaDaniyeli zithetha ukuthini ibe zenzeka njani namhlanje:
Isiprofeto: “Obo bukumkani buza kwahlulelana, . . . kodwa inxalenye yabo iza komelela okwentsimbi.”—Daniyeli 2:41.
Le nto ithetha ukuba: Nangona bengavani abantu bakula mazwe kwezepolitiki, iUnited States neBritani ineyona mikhosi inamandla. Ngenxa yaloo nto, anegunya elichaphazela onke amazwe kuba omelele njengentsimbi.
Indlela Esenzeka Ngayo
Xa bekuchazwa imali esetyenziwe ngamazwe athile kwizinto zasemkhosini ngo-2023, kubonakala ukuba xa kudityaniswa iUnited States neUnited Kingdom isebenze imali eninzi kakhulu ukogqitha amazwe ayi-12.—IStockholm International Peace Research Institute.
“Ukusebenzisana komkhosi waseUnited Kingdom nowaseUnited States . . . kwenze salelona qela linamandla. . . . Sisebenza kunye, siyaxhasana, silwa kunye.”—IStrategic Command, U.K. Ministry of Defence, ngoAprili 2024.
Isiprofeto: “Yaye njengokuba iinzwane ziyintsimbi exutywe nodongwe, obo bukumkani buza kuba neendawo ezomeleleyo, zibekho nezithambileyo.”—Daniyeli 2:42.
Le nto ithetha ukuba: Nangona iUnited States neBritani zinamandla kakhulu emkhosini, la mazwe awakwazi ukwenza nantoni na ayifunayo ngenxa yendlela oorhulumente abasebenza ngayo. Ngenxa yokungaxhaswa ngabantu abaninzi, aba rhulumente abakwazi ukwenza izinto abafuna ukuzenza.
Indlela Esenzeka Ngayo
“Iingcali zepolitiki zithi ukwahlulelana koorhulumente baseMerika kwenza kube nzima [ngeUnited States] ukwenza izinto ezithembisa ihlabathi, njengezinto ezinokwenza nokhuseleko okanye amashishini.”—‘I-The Wall Street Journal.’
“Kuye kwabakho iingxaki ezininzi zepolitiki eBritani ezingazange zabakho ngaphambili. Loo nto iye yabaphazamisa abantu beepolitiki. Ngenxa yaloo nto abasebenzi bakarhulumenteb abakwazi ukwenza utshintsho abafuna ukulwenza.”—I-Institute for Government.
Isiprofeto: ‘Obo bukumkani buza kuxubana nabantu abaqhelekileyo, kodwa abazukuncamathelana.’—Daniyeli 2:43, umbhalo osemazantsi.
Le nto ithetha ukuba: Abantu badla ngokucebisa urhulumente, kodwa urhulumente uye angawamameli loo macebiso kuquka nabantu abamvoteleyo.
Indlela Esenzeka Ngayo
“Kule mihla, abantu baseMerika bathetha kakubi ngeepolitiki neenkokheli zazo.”—I-Pew Research Center.
“Ithemba abantu abanalo koorhulumente nakubantu bezepolitiki kuquka nendlela abazenza ngayo izinto liye lehla kakhulu kule minyaka iyi-50 idlulileyo.”—‘I-National Centre for Social Research.’
Isiprofeto sikaDaniyeli kwixesha elizayo
Ngokutsho kwesiprofeto sikaDaniyeli, ukusebenzisana kweUnited States neBritani kuza kuba lelona gunya lehlabathi linamandla xa uBukumkani bukaThixo butshabalalisa bonke oorhulumente babantu.—Daniyeli 2:44.
Kwisiprofeto esifanayo esikwincwadi yeSityhilelo, iBhayibhile ibonisa ukuba ‘ookumkani bomhlaba wonke’ baza kudibana ukuze balwe noYehovac uThixo ngeArmagedon, ‘eyimfazwe yemini enkulu kaThixo uSomandla.’ (ISityhilelo 16:14, 16; 19:19-21) Kule mfazwe uYehova uza kususa bonke oorhulumente babantu. Ngaloo ndlela, uza kususa onke amagunya ehlabathi amelwa ngumfanekiso okwisiprofeto sikaDaniyeli.
Ukuze ufunde nezinye izinto, jonga inqaku elithi “Yintoni Imfazwe YeArmagedon?”
Isiprofeto sikaDaniyeli ngeengxabano zepolitiki sinokukunceda
IBhayibhile yazichaza kwangaphambili ngokuchanileyo zonke iingxaki zepolitiki eziseUnited States naseBritani, ibe ukuzifunda kunokukunceda uzijonge ngendlela eyahlukileyo izinto ezenzekayo ngoku.
Uza kusiqonda isizathu sokuba uYesu athi abalandeli bakhe bamele bangathathi cala kwizinto zepolitiki. (Yohane 17:16) Uza kuphinda uqonde ukuba kwakutheni ukuze uYesu ongumlawuli okhethiweyo woBukumkani bukaThixo athi: “UBukumkani bam ayibubo obeli hlabathi.”—Yohane 18:36.
Ukwazi ukuba uBukumkani bukaThixo sele buza kuzilungisa iingxaki zethu nokuba xa bulawula buza kusenzela izinto ezintle kuza kukukhuthaza.—ISityhilelo 21:3, 4.
Uza kuqiniseka ngekamva, ibe awuzukubanalo ixhala lokuba iingxaki zakwamanye amazwe ziza kuwumosha umhlaba wethu.—INdumiso 37:11, 29.
Isiprofeto sikaDaniyeli sibonisa ukuba ukusebenzisana kweUnited States neBritani kuza kuba ligunya lokugqibela lokulawula abantu. Into eza kulandela emva koko ngurhulumente wasezulwini oza kubalawula kakuhle abantu—uBukumkani bukaThixo!
Ukuze ubone ukuba yintoni uBukumkani bukaThixo obuza kuyenzela abantu, bukela ividiyo ethi Yintoni UBukumkani BukaThixo?
a Jonga ibhokisi ethi “Leliphi Igunya Lehlabathi Elachazwa Sisiprofeto SikaDaniyeli?”
b Abasebenzi bakarhulumente “ngabo bonke abaqeshwe nguye.”—I-Merriam-Webster’s Unabridged Dictionary.
c UYehova ligama likaThixo. (INdumiso 83:18) Jonga inqaku elithi “Ngubani UYehova?”