Makude Kuphele Ukubandezeleka!

Intlungu kaKhieu yaqala mhla utata wakhe wabulawa ngenxa yokuyek’ iinkomo zingene kwifama yombona. Emva koko, umama wakhe nodadewabo babulawa kwimfazwe yamaKhmer Rouge eKhambodiya. Kamva, uKhieu wenzakaliswa yibhombu. Wahlala kangangeentsuku ezili-16 ehlathini elindele uncedo. Umlenze wakhe kwafuneka unqunyulwe. UKhieu uthi: “Ndandifun’ ukufa.”

MHLAWUMBI nawe uyazi ukuba ukubandezeleka akukhethi mntu. Iintlekele zemvelo, ukugula, iziphene, ugonyamelo nezinye iingozi zinokwehlela nabani na, naphi na nangaliphi na ixesha. Imibutho enceda abantu iye yenza konke okusemandleni ayo ukuze ithintele ukubandezeleka okanye incede abantu ababandezelekileyo. Kodwa ngaba iye yaphumelela?

Makhe sihlole umzekelo omnye—imizamo yokuphelisa indlala. Ngokutsho kwephephandaba iToronto Star, iintlekele zemvelo ziye zashiya abantu abaninzi bengenamakhaya yaye bengenakutya. Noko ke, eli phephandaba lithi “imizamo yemibutho enceda abantu abalambayo iye yaphazanyiswa lugonyamelo.”

Iinkokeli zezopolitiko, ezentlalo nezonyango ziye zazama ukuphelisa ukubandezeleka kodwa azikhange ziphumelele. Amacebo okuphucula imeko yezoqoqosho akakhange ayiphelise indlala. Izitofu ezithintela izifo, iipilisi, iindlela zokutyanda ezihambele phambili azinakukuphelisa konke ukugula. Amapolisa namajoni akakwazi ukuphelisa okanye ukunqanda ukwanda kolwaphulo-mthetho olunobundlobongela.

Kutheni kukho ukubandezeleka okungaka? Ngaba uThixo uyikhathalele intlungu abakuyo abantu? Izigidi zabantu ziye zafumana iimpendulo ezithuthuzelayo zale mibuzo eBhayibhileni, njengoko siza kufunda.