Ubomi Obungenakubandezeleka—Isithembiso Esinokuthenjwa

“[UThixo] Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:4.

NGABA esi sithembiso sinokuthenjwa? Khawucinge ngesinye sezona zilumkiso zokuqala ukunikwa umntu. UThixo wathi kuAdam, ukuba uye akathobela uya “kufa ngokuqinisekileyo.” (Genesis 2:17) UAdam wafa kanye njengoko uThixo wayetshilo. Ukufa kwakhe kunye nokufa nokubandezeleka okwazuzwa ilifa ngabantu bubungqina bokuba uThixo unokuthenjwa. Ngaba sikho isizathu sokuthandabuza ukuba isithembiso sikaThixo sokubuyisela iparadesi emhlabeni siza kuzaliseka?

Kwakhona khumbula iimpawu zikaThixo ebekuthethwe ngazo kwinqaku elandulela eli. Umnqweno wethu wokuphelisa ukubandezeleka ubonisa ukuba noThixo unovelwano, uthando nokusesikweni. Ukongezelela, izinto ezenzeka ehlabathini kunye nezimo zengqondo esizibonayo zingqina ukuba lisondele ixesha lokuba uThixo aluthabathele kuye ulawulo.—Funda ibhokisi ethi “Ziya Kubakho Nini Na Ezi Zinto?”

Yintoni eyenza ukuba uYehova uThixo afaneleke ngaphezu kwakhe nabani na ukuphelisa ukubandezeleka kwabantu? Cinga nje ngendlela aye wasebenzisa ngayo uNyana wakhe uYesu ukuze enze amalungiselelo okulungisa oyena nobangela wokubandezeleka.

Umntu wazikhethela. Ukhokho wethu uAdam wakhetha isono esaba nemiphumo ebuhlungu kuyo yonke inzala yakhe. Umpostile uPawulos wabhala wathi: “Yonke indalo iyagcuma kwaye isentlungwini.” (Roma 8:22) Isicombululo sikaThixo silungile, sinenceba engenakuthelekiswa yaye silula ngeyona ndlela. AmaRoma 6:23 athi: “Umvuzo isono esiwuhlawulayo kukufa, kodwa isipho uThixo asinikayo bubomi obungunaphakade ngoKristu Yesu iNkosi yethu.”

Umntu ofezekileyo uYesu Kristu akazange enze sono. Ukufa kwakhe kwisibonda sentuthumbo kwavulela abantu ithuba lokukhululwa kwisiqalekiso sesono nokufa. Ngoku sinethuba lokuphila ubomi obungunaphakade kwihlabathi apho singayi kwenza sono nampazamo. Abantu abaxhaphaza abanye abayi kubakho kuba “abenzi bobubi baya kunqunyulwa.”—INdumiso 37:9.

Iintlekele nokungafezeki. UYesu Kristu uKumkani omiselwe nguThixo unamandla okulawula indalo. Ngenkulungwane yokuqala ngaphambi kweXesha Eliqhelekileyo, uYesu nabapostile bakhe babehamba ngesikhephe xa “kwaqhambuka isaqhwithi somoya omkhulu, yaye amaza ayentlaleka esikhepheni, kangangokuba isikhephe saphantse sazala ngamanzi.” Xa abafundi bamcela ukuba abancede, uYesu “wavuka wawukhalimela umoya waza wathi kulwandle: ‘Yithi tu! Uzole!’ Wadamba umoya, kwabakho ukuzola okukhulu.” Abafundi bakhe bamangaliswa koku baza bathi, ‘ude athotyelwe ngumoya nalulwandle.’—Marko 4:37-41.

Xa kulawula uYesu abantu abathobelayo ‘baya kuhlala ngonqabiseko baze bangaphazamiseki ekunkwantyiseni kwentlekele.’ (IMizekeliso 1:33) Ezo ntlekele ziquka nezo zemvelo. Ngaphezu koko, ukuphathwa kakubi komhlaba, ukwakha izakhiwo ezingakhuselekanga nokungayazi kakuhle indlela esebenza ngayo indalo kunye neempazamo ezenziwa ngabantu aziyi kubakho. Akakho umntu oya kwenzakala kuba eye waba sendaweni engafanelekanga ngexesha elingafanelekanga.

Xa wayesemhlabeni, uYesu wathetha ngenye inkalo yolawulo lwakhe eza kuphelisa konke ukubandezeleka okubangelwa ziintlekele. Wathi, “Ndim uvuko nobomi.” (Yohane 11:25) UYesu unawo amandla okuvusa izigidi eziye zabulawa ziintlekele. Ngaba liphupha nje eli? Siqinisekile ukuba uYesu uza kukwenza oku kuba xa wayesemhlabeni wabavusa abanye abantu ababefile. IBhayibhile ithetha ngezihlandlo ezithathu apho uYesu wavusa khona abafi.—Marko 5:38-43; Luka 7:11-15; Yohane 11:38-44.

“Umlawuli weli hlabathi.” UYesu Kristu uthunywe nguThixo ukuba “amtshitshise lowo unamandla okubangela ukufa, oko kukuthi, uMtyholi.” (Hebhere 2:14) UYesu wathi: “Kungoku ukugwetywa kwalo eli hlabathi; umlawuli weli hlabathi uza kuphoselwa phandle.” (Yohane 12:31) UYesu uza ‘kuyichitha imisebenzi kaMtyholi’ ngokuyisusa impembelelo yakhe emhlabeni. (1 Yohane 3:8) Cinga nje ngotshintsho oluya kubakho ebantwini xa umoya kaMtyholi wokunyoluka, ubuqhetseba nokuzingca ungasekho!

[Ibhokisi ekwiphepha 9]

“Ziya Kubakho Nini Na Ezi Zinto?”

Abalandeli bakaYesu bambuza: “Ziya kubakho nini na ezi zinto, kwaye uya kuba yintoni na umqondiso wobukho bakho nowokupheliswa kwenkqubo yezinto?” (Mateyu 24:3) Impendulo kaYesu nezinye izibhalo eziphefumlelweyo ezabhalwa emva kokufa kwakhe, zisichazela oko kuya kwenzeka xa lisondele ixesha lokuba uThixo aphelise ukubandezeleka.a Thelekisa ezi ziprofeto zingezantsi kunye neemeko nezimo zengqondo ezixhaphakileyo namahlanje.

● Iimfazwe—Mateyu 24:7; ISityhilelo 6:4.

● Indlala nezifo—Luka 21:11; ISityhilelo 6:5-8.

● Ukonakaliswa komhlaba—ISityhilelo 11:18.

● “Abathandi bemali”—2 Timoti 3:2.

● “Abangathobeli bazali”—2 Timoti 3:2.

● “Abathandi beziyolo kunokuba bathande uThixo”—2 Timoti 3:4.

AmaNgqina kaYehova angakunceda ubone ukuba sele kumbovu ukuba ukubandezeleka kuphele. Thetha namaNgqina endawo ohlala kuyo. Aza kufunda iBhayibhile kunye nawe ekhayeni lakho okanye kwenye indawo ekhethwe nguwe.

[Umbhalo osemazantsi]