“Ndiyabulela Ngolu Ngcelele Lwamanqaku!”
● Abantu abasehlabathini jikelele bayawaxabisa amanqaku kaVukani! anomxholo othi “Khanikhe Nizikhumbuze Njengentsapho,” kwiphepha 30 nelama-31 kwinkupho nganye. Imifanekiso nemibuzo, amakhadi eBhayibhile, imifanekiso efanele ikhangelwe ngabantwana nezinto ezenziwa yintsapho yonke ziyafundisa yaye kumnandi ukuzenza. Nazi ezinye zezinto eziye zathethwa ngabafundi:
“Ndiqhubela abazukulwana bam ababini isifundo ngeeleta. Ndiye ndibathumelele umxholo othi ‘Khanikhe Nizikhumbuze Njengentsapho,’ ukuze babhale iimpendulo zabo baze bazibuyisele kum. Abazukulwana bam bayasithanda isifundo sabo yaye ndibabhalela iileta ndize ndibacacisele ezinye zeengongoma ekuthethwe ngazo. Enkosi kakhulu ngolu ngcelele!”
UV. C., waseUnited States
“Kutshanje, ngaphambi kokuba alale unyana wam oneminyaka emihlanu uye wandicela ukuba ndifunde naye umxholo othi ‘Yintoni Engekhoyo Kulo Mfanekiso?’ Ndawufumana saza sawuxubusha. Unyana wam waphulaphula njengokuba ndandifunda ibali elichaza lo mfanekiso eBhayibhileni. Ngoku ufuna ukufunda rhoqo ngorhatya. Mna nentsapho siyanibulela ngokunceda abantwana bethu bathande iBhayibhile.”
UM. F., waseFransi
“Xa ndandikwisikhululo sebhasi, ndadibana noDavid oneminyaka eli-12 ubudala kunye noJennifer yena oneminyaka emithandathu. Utata wabo wandibona ndinika abantu uVukani! waza wathuma aba bantwana ukuba baze kuwucela nabo. Ngoxa uyise nonyana wakhe babefunda eli phephancwadi, uJennifer nam sasibuka imifanekiso yeentaka nezilwanyana. Sasincokola ngazo zonke izinto ezintle uYehova uThixo asenzele zona. Xa safika kwiphepha 31 senza umxholo othi ‘Bantwana Khangelani Le Mifanekiso.’ Njengokuba ndandizama ukukhangela owokuqala, uJennifer watyhila ngokukhawuleza waza wawufumana. Sazama ukufumana owesibini nowesithathu yaye naleyo yafunyanwa nguye kuqala. Eneneni, uJennifer wayefuna ukukhangela yonke imifanekiso eyayikooVukani! abalishumi! Ekugqibeleni uJennifer wacelela utata nobhuti wakhe ooVukani! ababini. Ukubashiya kwam, babengawuvali umlomo bencoma la maphephancwadi.”
UM. C., wase-Ecuador