“Andizange Ndife”

● Ngaba uyawazi lo mbongo? Ngaba wakha wawuva uculwa? Kula mashumi eminyaka adluleyo, lo mbongo uye wathuthuzela abantu ehlabathini lonke. Ziliqela iimbongi ezahlukeneyo ekuthiwa zabhala lo mbongo. Abanye bade bathi ngumthandazo owenziwa xa kungcwatywa umntu wohlanga lwamaNavajo. Ngethetho yesiNgesi, lo mbongo awudumanga ngemiqolo yawo yokuqukumbela ebhalwe ngasentla kodwa udume ngomqolo wawo wokuqala, othi: “Musani ukuma ngasengcwabeni lam nize nilile.”

Kwiminyaka embalwa edluleyo, lo mbongo kwenziwa ngawo ingoma ebalaseleyo kwelaseJapan kodwa ke amazwi awo ababhida abantu balapho. Kaloku abantu baseJapan badla ngokuya kumangcwaba ezalamane zabo ukuze babonise imbeko kuzo ekubeni bekholelwa ukuba zisaphila. Ngenxa yokuba amazwi ale ngoma efundisa okwahlukileyo, abantu abaninzi baye bazibuza lo mbuzo, “Baphi kanye kanye abantu abafileyo?”

Sele kuyiminyaka amaBhuda aseJapan eqhuba imingcwabo nemilindo. Kodwa inkoliso yamaBhuda ayikwazi ukuphendula umbuzo othi: Baphi abafi? Kwakhona, ayikwazi ukuphendula imibuzo ethi, Ngaba abafi bezinye iinkonzo neentlanga baya ndaweni nye? Kutheni abafi bengaphenduli?

Abantu abaninzi bathi azikho iimpendulo zale mibuzo yaye kuyinkcitha xesha ukuzama ukuzifumana. Sekunjalo, usenokuzibuza ukuba, ‘Kwenzeka ntoni kuthi xa sisifa?’ Unokuzifumana phi iimpendulo? IBhayibhile ithi uThixo wadala indoda nomfazi bokuqala befezekile waza wabanika umyezo omhle ukuba ube likhaya labo. Babeza kuphila ngonaphakade kumhlaba oyiParadesi ukuba babethobele uThixo. Kodwa ke abazange bayenze loo nto.

Ngenxa yoko, uThixo wabohlwaya. Wasigxotha esi sibini kwikhaya laso eliyiParadesi waza wayeka ukusixhasa. Wachaza imiphumo yokungathobeli kwaso, esithi: “Ngokuba uluthuli, uya kubuyela kwaseluthulini.” Umntu wenziwa ngothuli yaye ekugqibeleni—xa esifa—ubuyela kwaseluthulini.—Genesis 2:7; 3:19.

Indoda esebenza kwelinye ingcwaba elikhulu laseKofu eJapan ithi: “Iivazi ndizifaka engcwabeni zizele qhu luthuli namathambo. Kodwa emva kweminyaka emalunga nemihlanu, ndizifumana zithe gabhu. Emva kweminyaka elishumi ndifika kungekho kwanto kuzo.” Imizimba yethu yenziwe ngezakhi ezisemhlabeni yaye emva kwexesha ibuyela kwasemhlabeni. Ngoko yintoni esalayo?

Nangona ingekho into esiphinda siyazi xa sisifa, uMenzi wethu okwaziyo ukubona naxa ungqatyana omnye esifa, uyasikhumbula. (Mateyu 10:29-31) Njengoko ethembisile, uza kusivusa aze asenze siphile kwakhona. Uza kusibiza xa silele ukufa.—Yobhi 14:13-15; Yohane 11:21-23, 38-44.

Ukuba ungathanda ukwazi okungakumbi ngalo mba, bhalela abapapashi beli phephancwadi yaye baya kukuphendula okanye uye kwiwebhsayithi yethu ethi www.watchtower.org.