“Bhalela UAnton!”
● UAnton, iNgqina likaYehova elikwishumi elivisayo, wayehlala kwilali yaseSchelkan ekumaphandle aseStavropol’ Kray, eRashiya. Xa wayesemncinane kwafunyaniswa ukuba uneDuchenne muscular dystrophy, isifo esinganyangekiyo esenza izihlunu zibe buthathaka nesidla ngokumbulala umntu onaso ngaphambi kokuba abe neminyaka engama-20 ubudala. Wathi esiba neminyaka esithoba ubudala, wabe uAnton engasakwazi ukuhamba nokuphakama.
UYevgeny nenkosikazi yakhe uDiana badibana noAnton ngoxa babetyelele ibandla lamaNgqina. UDiana uthi: “UAnton wayebuthathaka ngeyona ndlela emzimbeni kodwa ukholo lwakhe lwalomelele. Ekubeni umkhuluwa wakhe wayebulewe seso sifo eneminyaka eli-19 ubudala, uAnton wayesazi ukuba kwakusele kumbovu ukuba naye asweleke. Sekunjalo, wayonwabile yaye enethemba.”
UDiana nomyeni wakhe bakhuthaza uAnton ukuba ashumayele nakwezinye iilali ezithe qelele ngokubhalela abantu balapho iileta. Ngowama-2005, wabhala iileta ezimalunga nama-500 waza wazithumela kwiilali ezikufutshane. Noko ke, wadana xa kungazange kubekho namnye umntu ophendulayo. Sekunjalo, uAnton waqhubeka ebhala iileta yaye wathandaza ecela uThixo ukuba amncede akwazi ukushumayela nangona enempilo enkenenkene.
Xa wayefunda iphephandaba ngeny’ imini, uAnton wabona ileta eyayibhalwe yinkosikazi eyayigula yaye ifuna ukuthuthuzelwa. UAnton wayibhalela’ ileta yaye inxalenye yayo yakhutshwa kwelo phephandaba. Wathi: “Ukufunda iBhayibhile kundenza ndibe nethemba nangona ndinesifo esinganyangekiyo. Ndiyakuthanda ukubhalelwa iileta yaye ndisoloko ndizilinde ngamehlw’ abomvu.”
Le nkosikazi eyayihlatywe umxhelo yile leta, yabhalela eli phephandaba. Ileta yayo yapapashwa phantsi komxholo othi “Bhalela UAnton!” Le nkosikazi yachaza indlela eyayiwaxabisa ngayo amazwi acatshulwe eBhayibhileni awayebhalwe nguAnton yaza yathi: “Masimncedeni uAnton! Masimbhaleleni. Lo mfana ufuna ukuthuthuzelwa!” Kwachazwa neadresi ka-Anton.
Iileta eziya kuAnton zaqalis’ ukufika kwiposi encinane yelali yakhe—ibe kwakufika ezimalunga nama-30 ngemini! Zazivela eRashiya, kwimimandla yeBaltic, eJamani naseFransi. Wafumana amakhulukhulu eeleta ezazivela kubafundi beli phephandaba. UDiana uthi: “UAnton wayengawuval’ umlomo! Ngoku kwakukho amakhulukhulu abantu awayenokubabhalela aze abaxelele iinkolelo zakhe.”
UAnton wachitha ixesha elingaphezu konyaka ebhalelana naba bantu yaye encokola nabo ngeenyaniso eziseBhayibhileni. Njengokuba izandla zakhe zazisiya zisiba buthathaka, uAnton wayedla ngokucela abanye ukuba bambhalele. UAnton wasweleka ngoSeptemba wowama-2008 eneminyaka engama-20 ubudala. Nangona wayebuthathaka emzimbeni, ukholo luka-Anton nokuthanda kwakhe ukushumayela kwamvulela ithuba lokuncokola namakhulu abantu.