Okwenzeka Ehlabathini
Udliwano-ndlebe oluye lwenziwa yiBritish Broadcasting Corporation kubantu abali-13 000 abakumazwe angama-26 lubonisa ukuba “ubuqhophololo yeyona ngxaki kuthethwa ngayo kakhulu ehlabathini.” Noko ke, ubuhlwempu kwathiwa yeyona ngxaki yehlabathi ibalulekileyo.—IBBC NEWS, YASEBRITANI.
“Iicawa zaseUnited States zifakela iGPS kumfanekiso oqingqiweyo wosana olunguYesu. Kwiminyaka yakutshanje kuye kwanda kakhulu ukubiwa kwale mifanekiso iqingqiweyo.”—ITHE WEEK, YASEUNITED STATES.
“Ikomiti ecebisa iFood and Drug Administration [yaseUnited States] ithi abantu abanesifo sokudinwa ngokugqithiseleyo bafanele bangavunyelwa ukuphisa ngegazi kuba kukrokrelwa ukuba esi sifo sibangelwa yintsholongwane eyingozi.”—ITHE WALL STREET JOURNAL, YASEUNITED STATES.
Ukukhanya Kubulala Iintsholongwane Ezinenkani
IYunivesithi yaseStrathclyde, eGlasgow, eScotland ize necebo elitsha lokunceda izibhedlele zibulale iintsholongwane ezinenkani, zisebenzisa ukukhanya. Le ndlela intsha yokubulala iintsholongwane isebenza bhetele kunokucoca.
Ukugawulwa Kwamahlathi Nesifo Seengcongconi
Ukugawulwa kwamahlathi ashinyeneyo kuthiwa kuye kwanegalelo ekwandeni kwesifo seengcongconi ngama-50 ekhulwini. Batsho njalo abaphandi abaye bafunda inkcazelo ekwiindawo zempilo zaseBrazil ezingama-54 kunye nemifanekiso yesatellite ebonisa ukugawulwa kwamahlathi. Ingcongconi ebizwa ngokuba yiAnopheles darlingi yeyona ithwala esi sifo kuloo ngingqi. USarah Olson umbhali ophambili wale ngxelo uthi: “Iingcongconi zifumana indawo yokuhlala kule ndawo ingenamithi, ivulekileyo nenamadama.” Abantu abaninzi abaye bafunyaniswa benesi sifo seengcongconi bahlala kwiindawo ekuye kwagawulwa amahlathi kuzo.
Isquid Esibhabhayo
Ubungqina beefoto bubonisa ukuba kukho iintlobo zesquid ezikwaziyo ukubhabha. IScientific American ithi, iingcali zebhayoloji zithi, “isquid esincinane esiziimitha ezingama-20 siyakwazi ukuxhuma kangangeemitha ezimbini phezu kwamanzi size sibhabhe umgama ongangeemitha ezili-10.” Ukuze sikwazi ukwenza oku, isquid sincedwa kukufunxa amanzi size siphinde siwatshice ngamandla. Iifoto zibonisa ukuba xa sibhabha sisebenzisa amaphiko aso afana naweentlanzi.