Imbono YeBhayibhile

Yintoni Efunwa Ngumzali?

YIYIPHI kwezi zilandelayo ongathanda ukuba umntwana wakho abe yiyo?

A. Afane nawe.

B. Umvukeli ofuna ukwenza yonk’ into ongayithandiyo.

C. Umntu omdala okwaziyo ukwenza izigqibo zobulumko.

Abanye abazali abafuna abantwana babo bakwazi ukwenza izigqibo zobulumko baye bazame ukubanyanzela ukuba bafane nabo. Baye bazame ukumnyanzela umntwana ukuba afane nabo yaye banokude bamkhethele nento afanele abe yiyo ebomini. Uba yintoni umphumo? Umntwana uye athi akufumana inkululeko ethile, enze yonke into abangayifuniyo abazali bakhe. Phofu ke abazali abaninzi abafuna abantwana bafane nabo baye bafumanise ukuba ekugqibeleni baba ziindlavini ezingafuni kwanto ethandwa ngabazali babo.

Isizathu Sokuba Ungaphumeleli Xa Uzama Ukulawula Yonke Into Eyenziwa Ngumntwana Wakho

Ufuna umntwana wakho akwazi ukuzenzela izigqibo zobulumko xa emdala. Kodwa unokuyenza njani loo nto? Nants’ into omele uyazi: Ukulawula yonk’ into ayenzayo akuzi kukunceda. Makhe sithethe ngezizathu ezibini zoko.

1. Ukulawula yonk’ into eyenziwa ngumntwana kuchasene nezibhalo. UYehova uThixo wabadala abantu baba nenkululeko yokuzikhethela. Uyabavumela abantu ukuba bazikhethele indlela abafuna ukuphila ngayo, enoba ilungile okanye imbi. Ngokomzekelo, xa uKayin wayenomsindo yaye efuna ukubulala umninawa wakhe uAbheli, uYehova wathi kuye: “Ukuba uyaguquka wenze okulungileyo, akusayi kuphakanyiswa yini na? Kodwa ukuba akuguquki wenze okulungileyo, isono sibuthumile ngasesangweni, sikhanuka wena; yaye ngaba wena uya kusongamela na?”—Genesis 4:7.

Phawula ukuba nangona uYehova wamnika icebiso elicacileyo uKayin, akazange amnyanzele ukuba alithobele. NguKayin owayefanele azikhethele ukuwulawula okanye ukungawulawuli umsindo wakhe. Sifunda ntoni koku? Ukuba uYehova akabulawuli ubomi bezidalwa zakhe ukuze aqiniseke ukuba ziyamthobela, nawe awufanele uzame ukulawula ubomi babantwana bakho.a

2. Isikhuni sidla ngokubuya nomkhwezeli xa abazali bezama ukulawula yonk’ into eyenziwa ngumntwana. Makhe sithi unovenkile uzama ukukunyanzela ukuba uthenge into ethile. Okukhona ezama ukukunyanzela ukuba uthenge kokukhona usala. Enoba ubufuna ukuyithenga loo nto, inokukucaphukisa le nto ayenzayo. Ufuna ukwahlukana naye ngokukhawuleza.

Kunokwenzeka into efanayo xa uzama ukunyanzela imithetho, iinkolelo nezinto ezinqwenelwa nguwe emntwaneni wakho. Ngaba uza kuzamkela? Akanakufane ayenze loo nto! Eneneni, indlela omphatha ngayo isenokumenza ayicaphukele imithetho yakho. Amaxesh’ amaninzi, abantwana badla ngokuvukela xa abazali bezama ukulawula ubomi babo. Yintoni onokuyenza?

Kunokuba uzame ukulawula yonk’ into eyenziwa ngumntwana wakho okanye umnyanzele ukuba aphile ngemithetho yakho njengokuba wawusenza xa wayesemncinane, mncede abone ubulumko bokwenza izinto ezilungileyo. Ngokomzekelo, ukuba ungumKristu mbonise indlela ekuza kumnceda ngayo ebomini ukuphila ngemithetho kaThixo.—Isaya 48:17, 18.

Njengokuba usenjenjalo, nawe yiba ngumzekelo. Yiba luhlobo lomntu onqwenela ukuba umntwana wakho abe nguye. (1 Korinte 11:1) Yenze icace imithetho ophila ngayo. (IMizekeliso 4:11) Ukuba umntwana wakho ufunda ukumthanda uThixo nemithetho yakhe, uya kwenza ukhetho lobulumko naxa ungekho.—INdumiso 119:97; Filipi 2:12.

Mfundise Ukusebenza

Njengokuba bekukhe kwatshiwo kwiphepha lesi-2 leli phephancwadi, imini yokuba umntwana wakho okhulileyo ‘ashiye uyise nonina’ iyeza—yaye kuwe isenokubonakala ngathi iyakhawuleza. (Genesis 2:24) Njengomzali, ufuna ukuqiniseka ukuba uyakwazi ukusebenza, nto leyo eza kumnceda akwazi ukuzimela. Makhe sithethe ngezinye zezinto onokumfundisa zona ngoku esahlala ekhaya.

Imisebenzi Yasekhaya. Ngaba umntwana wakho uyakwazi ukupheka, ukuhlamba nokuayina impahla, ukucoca nokuqoqosha egumbini lakhe okanye ukuhlamba imoto nokulungisa izinto ezimbalwa kuyo? Ukukwazi ukwenza izinto ezinjalo kuya kunceda unyana okanye intombi yakho xa sele inomzi wayo. Umpostile uPawulos wathi: “Ndiye ndafunda ukwaneliseka, phantsi kwazo naziphi na iimeko.”—Filipi 4:11.

Ukukwazi Ukuzenzela Abahlobo. (Yakobi 3:17) Ngaba umntwana wakho uyakwazi ukuhlala ngoxolo nabanye abantwana? Ngaba uyakwazi ukuzilungisa ngoxolo iingxabano? Ngaba umfundisile ukuba nembeko nokucombulula iingxaki ngoxolo? (Efese 4:29, 31, 32) IBhayibhile ithi: “Bekani abantu bazo zonke iintlobo.”—1 Petros 2:17.

Indlela Yokusebenzisa Imali. (Luka 14:28) Ngaba unokumfundisa ukusebenza, ukuceba ngaphambi kokuba asebenzise imali nokuphepha ukungena ematyaleni? Ngaba umfundisile ukonga imali ukuze athenge izinto eziyimfuneko, ukungathengi ngokungxama nokwaneliswa zizinto ezikhoyo? (IMizekeliso 22:7) UPawulos wathi: “Ukuba sinesixhaso nesambatho, masaneliswe zezo zinto.”—1 Timoti 6:8.

Abantwana abafundiswa ukuba nembeko nabafundiswe umsebenzi bakulungele ukuba ngabantu abadala. Abazali babo bawufezekisile umnqweno wabo!—IMizekeliso 23:24.

[Umbhalo osemazantsi]

NGABA WAKHA WAZIBUZA?

● Uyintoni umnqweno wakho njengomzali?—Hebhere 5:14.

● Yintoni ekuza kufuneka azikhethele ukuyenza umntwana wakho xa sele emdala?—Yoshuwa 24:15.

[Imifanekiso ekwiphepha 25]

Yiyiphi kwezi ongathanda abe yiyo umntwana wakho?

Afane nawe . . .

Umvukeli . . .

Umntu omdala okwaziyo ukwenza izigqibo zobulumko