Owona Mbuzo Ubalulekileyo

ISAZI semizila yemfuza uFrancis S. Collins wakha wabuza lo mbuzo: “Ngaba ukho ezingqondweni zabantu umbuzo obaluleke njengothi, ‘Ngaba ukho uThixo?’” Ibalulekile le nto ayithethayo. Kaloku ukuba uThixo akakho, loo nto ithetha ukuba abukho obunye ubomi ngaphandle kobu sibuphilayo yaye akukho mntu wongamileyo ofanele asixelele ukuba yintoni elungileyo nengalunganga.

Into ebangela ukuba abanye abantu bathandabuze ukuba ukho ngokwenene uThixo kungenxa yokuba izazinzulu ezininzi azikholelwa kuye. Noko ke, iimbono zabantu abaninzi zikhe zingabi yonyani, njengoko siza kubona kwinqaku elilandelayo.

Okubuhlungu kukuba, iicawa ezininzi ziye zafak’ isandla kule ngxubakaxaka ngokufundisa izinto eziphikisana nolwazi lwezenzululwazi olwaziwa nanguthathatha. Umzekelo woku luluvo olungekho zibhalweni lokuba uThixo wadala ihlabathi kwiintsuku ezintandathu ezibunjwa ziiyure ezingama-24, kwiminyaka engamawaka ambalwa eyadlulayo.

Abantu abaninzi bathi besakuva ezi mfundiso kunye neentanda-bulumko eziphikisanayo, basuke bayeke noko kufuna inyaniso ngokuphathelele ubukho bukaThixo. Kodwa ngaba ikho enye into esinokuxakeka yiyo, ebaluleke nenemivuzo ngaphezu kokufumana impendulo echanileyo yalo mbuzo ubaluleke kangaka? Ewe kona kuyinyaniso ukuba akukho namnye kuthi owakha wabona uThixo yaye sasingekho naxa kwavela umhlaba nezinto eziphilayo. Ngoko ke, enoba sithi ukhona okanye akakho uThixo, iimbono zethu zibangelwa lukholo oluthile. Lukholo olunjalo olo?

Ukholo Lwenene Luxhomekeke Kubungqina Obucacileyo

Ukholo—enoba lungakanani—luyinxalenye ebalulekileyo yobomi bethu. Siyavuma ukusebenza kuba silindele ukuba siza kuhlawulwa. Sityala imbewu kuba siqinisekile ukuba iza kuhluma. Siyabathemba abahlobo bethu. Yaye siyayithemba imithetho elawula indalo. Sifanele ukuzikholelwa ezi zinto kuba sinabo ubungqina bazo. Ngendlela efanayo, ukukholelwa kubukho bukaThixo kuxhaswa bubungqina.

KumaHebhere 11:1, iBhayibhile ithi: ‘Ukholo . . . bubungqina obucacileyo bezinto zokwenene nangona zingabonwa.’ Enye inguqulelo yeBhayibhile ithi: “Ukholo. . . kukweyiseka bubukho bezinto ezingabonwayo.” (IBhayibhile YesiXhosa) Ngokomzekelo: Masithi uhamba ngaselunxwemeni lolwandle uze uve umhlaba unyikima. Emva koko ubona amanzi olwandle ebuya umva. Uyaqonda ukuba oku kuthetha ukuba kuza itsunami. Ukunyikima komhlaba nokubuya umva kwamanzi “bubungqina obucacileyo” bento eza kulandela, amaza olwandle. Ukuyikholelwa kwakho le nto iza kwenzeka kukwenza ubalekele kwindawo ekhuselekileyo.

Nalo ukholo kuThixo lufanele lusekelwe kwizibakala ezicacileyo nakubungqina obungenakuphikiswa. Kuxa kunjalo kuphela uThixo aya kuba ngumntu ‘wokwenene’ kuwe. Ngaba kufuneka ube sisazinzulu ukuze ukwazi ukuhlola ubungqina obunjalo? UVladimir Prelog owawongwa ngembasa kaNobel wavuma ukuba nkqu “nabantu abawongwa ngembasa kaNobel, abamazi ngaphezu kwabanye abantu uThixo, unqulo kunye nobomi emva kokufa.”

Intliziyo enyanisekileyo kunye nokuthanda inyaniso kufanele kukwenze uhlole bonke ubungqina uze uvumele obo bungqina bukukhokelele kwicala elifanelekileyo. Bubuphi ubungqina onokubuhlola?

[Umfanekiso okwiphepha 3]

Umfama unokholo lokuba imbewu iza kuhluma