Ukunyaniseka Kuzisa Impumelelo Yokwenene
“Kwanaxa umntu enentabalala ubomi bakhe abuphumi kwizinto anazo.”—Luka 12:15.
UKWAMKELA umvuzo kubalulekile ebomini. UThixo usinike imbopheleleko yokuba sizinyamekele size sondle neentsapho zethu.—1 Timoti 5:8.
Noko ke, kuthekani ukuba ukufuna imali nokuthanda izinto eziphathekayo kuqalisa ukuba yeyona nto ibalulekileyo? Kuthekani ukuba kuba yeyona nto uyiphilelayo? Kuba lula ngabo bazimisele ukuba zizityebi ukuwela kumgibe wokunganyaniseki. Basenokuqonda sele bengene engxakini ukuba ukunganyaniseki akuzisi mpumelelo yokwenene. Ngaphezu koko, iBhayibhile ithi ukuthanda imali kubangela iintlungu ezininzi.—1 Timoti 6:9, 10.
Makhe sithethe ngabantu abane abathi impumelelo yokwenene ithetha okungaphezu kokuziqwebela nje ubutyebi.
Ukuba Nesidima
“Kwiminyaka eliqela eyadlulayo, ndakha ndaba nodliwano-ndlebe neny’ indoda eyayifuna ukuthenga i-inshorensi exabisa isigidi seedola. Ndandiza kufumana amawaka eedola ukuba ndandiyithengisele loo inshorensi. Yathi ukuba ndifuna iyithenge, kuza kufuneka ndiyinike isiqingatha semali endandiza kuyifumana. Ndayixelela ukuba loo nto ayikho semthethweni.
Ndayibuza ukuba ingamxelela na umntu ongathembekanga iinkcukacha zayo eziyimfihlo nezezimali zayo. Ndayibeka yacaca indlela endiwubona ngayo lo mbandela, ndaza ndathi kuyo inokuqhagamshelana nam ukuba isafuna ukusebenzisana nam. Ayizange iphinde ibuye.
Ukuba ndandivumile, ndandiza kuqalisa ukuphila ubomi bokunganyaniseki yaye isidima sam njengomKristu ngesasimke namanzi. Ngendandibe likhoboka lomntu owayefuna ndinganyaniseki.”—UDon, waseUnited States
Uxolo Lwengqondo
Njengokuba kubonisiwe kwinqaku lokuqala lolu ngcelele, uDanny wayethenjiswe intywenka yemali ukuba wayenokubhala ingxelo ebaxiweyo ngomzi-mveliso ababeza kusebenzisana nawo. Wenza ntoni?
“Ndambulela umphathi waloo mzi-mveliso ngesidlo awayendenzele sona, ndaza ndayibuyisela kuye imvulophu eyayinemali. Kodwa wandicenga esithi ukuba umzi-mveliso wakhe uyaluphumelela uhlolisiso lwethu, uza kundihlawula imali engakumbi. Ndasikhaba ngaw’ omane isicelo sakhe.
Ukuba ndandiyamkele loo mali ndandiza kusoloko ndinexhala lokubhaqwa. Kamva, umphathi wam weva ngale nto. Ndavuya kakhulu kuba ndingazange ndixoke. Ndacinga ngencwadi yeMizekeliso 15:27 ethi: ‘Owenza ingeniso ngokungekho sikweni uyizisela ishwangusha indlu yakhe, kodwa othiya izipho [okanye izinyobo] uya kuhlala ephila.’”—UDanny, waseHong Kong.
Ulonwabo Lwentsapho
“Ndingumakhi wezindlu. Bendinokubaqhatha lula abantu endibokhelayo ndize ndingayihlawuli nerhafu. Kodwa intsapho yam izuze lukhulu ngenxa yokuzimisela kwam ukunyaniseka.
“Ukunyaniseka akupheleli nje emsebenzini okanye eshishinini, kunoko kubandakanya zonke iinkalo zobomi bomntu. Ukwazi ukuba umyeni okanye umfazi wakho usoloko enyanisekile kuThixo kunenza nithembane. Iqabane lakho liziva likhuselekile kukwazi into yokuba akulali neli uvuke neliya, kodwa usoloko uthembekile.
Unganelona shishini lakha lalikhulu ehlabathini kodwa usoloko uneengxaki zentsapho. Ekubeni ndiliNgqina likaYehova, ndiye ndafumanisa ukuba ukuthobela imigaqo yeBhayibhile kukunceda ukwazi ukwenza izinto ezibalulekileyo ebomini. Ndiba nexesha lokuzonwabisa kunye nentsapho yam, ibe andiphazanyiswa sisimo sengqondo seli hlabathi esilawulwa yimali nakukubawa.”—UDurwin, waseUnited States
Ubuhlobo Obuhle NoThixo
“Emsebenzini ndikhe ndithunywe ukuya kuthenga izinto zenkampani. Ngamanye amaxesha abantu endithenga kubo baye bandicebise ukuba ndisihlise ngomlenze isaphulelo senkampani yethu. Kodwa oku bekuya kuba bubusela.
Andifumani mvuzo ungako, ngoko imali eyongezelelekileyo ibinokundinceda. Kodwa ayikho into eyogqitha ukuba nesazela esicocekileyo phambi koYehova uThixo. Ngoko ngalo lonke ixesha ndithenga ndilandela umgaqo okwincwadi yamaHebhere 13:18 othi: ‘Sinqwenela ukuziphatha ngokunyaniseka kwizinto zonke’”—URaquel, wakwiPhilippines.
[Ibhokisi/Imifanekiso ekwiphepha 9]
Indlela Enyanisekileyo Yokuqhuba Ishishini
Lizwe ngalinye linemithetho yalo eyahlukileyo elawula amashishini. Noko ke, iBhayibhile inokunceda bonke abantu banyaniseke kumashishini abo. Usomashishini onyanisekileyo umbona ngezi zinto zintandathu zilandelayo:
Unyanisekile
Umgaqo weBhayibhile: “Musani ukuxokisana.”—Kolose 3:9.
Uyazigcina izithembiso zakhe
Umgaqo weBhayibhile: “UEwe makabe nguEwe, uHayi wenu, abe nguHayi.”—Mateyu 5:37.
Uthembekile
Umgaqo weBhayibhile: “Ungalityhili igqugula lomnye.”—IMizekeliso 25:9.
Akanamaqhinga
Umgaqo weBhayibhile: “Uze ungamkeli sinyobo, kuba isinyobo siyabamfamekisa ababona kakuhle.”—Eksodus 23:8.
Uyabacingela abanye
Umgaqo weBhayibhile: “Zonke izinto, ngoko, enifuna abantu bazenze kuni, yenzani ngokunjalo nani kubo.”—Mateyu 7:12.
Ishishini lakhe lisemthethweni
Umgaqo weBhayibhile: “Nikani bonke oko kubafaneleyo, lowo kufuneka irhafu kuye, mnikeni.”—Roma 13:7.
[Ibhokisi/Imifanekiso ekwiphepha 9]
Indlela Yokuliqhuba Ngokunyaniseka Ishishini
● Zazi Ezona Zinto Zibalulekileyo. Ngokomzekelo, yiyiphi eyona ibalulekileyo kuwe phakathi kokuba sisityebi nokuba nesazela esicocekileyo phambi koThixo?
● Hlala Unezigqibo Ozenzele Zona. Cinga ngeemeko ezinokukulingela ekubeni unganyaniseki uze uzenzele isigqibo sento oya kuyenza xa zivela.
● Yenz’ Icace Imilinganiselo Ophila Ngayo. Xa uqala ishishini elitsha, xelela abo usebenza nabo ngemilinganiselo yakho.
● Cela Uncedo Lwabanye. Xa usesilingweni cela icebiso lomntu onemilinganiselo efana neyakho.
[Umfanekiso okwiphepha 8]
Ukuba unyanisekile, uyakuba noxolo lwengqondo