Liya Kukwenza Ulahlekelwe Yintoni Ishishini Lakho?

UMFAZI kamongameli welizwe elikuMzantsi Merika wamangalelwa ngokunikisa ngamakhulu amawaka eerandi ngokwezivumelwano kwiinkampani ezazisekwe ngamalungu entsapho yakhe. Umrhwebi wezahlulo zamashishini eIndiya oneminyaka engama-38 ubudala wabanjwa waza wathatyathelwa indawo yakhe yokuhlala etofotofo neenqwelo-mafutha ezingama-29 kuba emangalelwa ngokubandakanyeka kwisenzo esilihlazo esibandakanya ibhanki nokuthengiswa kwezahlulo zamashishini ezixabisa isi-5,8 samawaka ezigidi zeerandi. KwiiPhilippines, amawaka abahlali besinye isiqithi baziphilisa ngokuvelisa iivolovolo ezingekho mthethweni. Ingxelo ithi, ukuze baqhubeke nolu rhwebo lunengeniso, ngokuqhelekileyo banyoba abasemagunyeni ukuba bangaphazamisi.

Ewe, ukunganyaniseki nokuqhatha kwezoshishino kukho ehlabathini lonke. Yaye ngokufuthi abantu ababandakanyekileyo balahlekelwa zizikhundla nasisidima, kunye nemali.

Kuthekani ngawe? Ngaba ubandakanyeke eshishinini? Okanye ngaba ucinga ngokuqalisa ishishini? Liya kukwenza ulahlekelwe yintoni? Ngokuqinisekileyo, ukubandakanyeka kushishino kuya kukwenza ulahlekelwe kokuthile. Oku akuthethi kuthi oku kuyinto embi. Noko ke, kububulumko ukubala iindleko ngaphambi kokuzibandakanya kwingozi yoshishino okanye ukwenza izigqibo ngokuphathelele elo sele likho. (Luka 14:28) Ibhokisi ekwiphepha 31 ibonisa ilahleko ethile ekuya kufuneka unikele ingqalelo kuyo.

Kuyacaca ukuba, ukubandakanyeka kushishino akuyondlwan’ iyanetha. KumKristu, kukho iimbopheleleko zokomoya nezeemvakalelo afanele acinge ngazo. Ngaba unokuhlangabezana nelahleko uze uhlale ulungelelene ngokomoya? Ngaba ilahleko ethile ingaphaya koko unokukwamkela ngokweemvakalelo? Yiyiphi imigaqo enokukunceda ugqibe ukuba yiyiphi ilahleko eyamkelekileyo yaye yiyiphi engamkelekanga?

Gcina Imali Ikwindawo Yayo

Imali iyafuneka ukuqhuba ishishini, yaye kuthenjwa ukuba ishishini liya kuzisa imali eyaneleyo ukuxhasa intsapho kabani. Phofu ke, usukelo ngokubhekisele emalini lunokugqwetheka ngokulula. Kunokungenelela ukubawa. Ebantwini abaninzi, yonke enye into ibekelwa ecaleni apho kubandakanyeke imali. Kanti, omnye umbhali wencwadi yeBhayibhile yeMizekeliso, uAgure, wavakalisa imbono elungeleleneyo xa wathi: “Musa ukundinika ubuhlwempu nobutyebi; ndihlafunise isonka endisimiselweyo.” (IMizekeliso 30:8) Waqonda ukuxabiseka kokwaneliseka yimali eyaneleyo yokuzixhasa—wayengafuni “intywenka,” njengoko bambi besitsho kushishino.

Ngoko ke, ukubawa kunokwenza ubani alibale ngalo mgaqo xa elo thuba libizwa ngokuba lelokuphumelela lifika. Umlungiseleli ohambahambayo wamaNgqina kaYehova kwilizwe elihambele phambili wanikela ingxelo ngalo mbandela. Inkampani ethile ifuna imali eza kuyityala yanikela uluvo lokuba abo batyale imali babeya kuyiphindaphinda imali yabo ngokukhawuleza, mhlawumbi kwiinyanga nje ezimbalwa. Esi sisulu sokufumana imali sakhokelela ekubeni abantu abaninzi batyale imali. Lo mlungiseleli uhambahambayo uthi: “Bambi babesijonge ngamehlo abomvu. Abazange babuze imibuzo ngokwaneleyo, yaye baboleka imali [ukuze bayityale].”

Ngokwahlukileyo, abantu ababini baya kuhlola iiofisi zale nkampani ngaphambi kokutyala imali. Isicelo sabo sokubona izixhobo zemveliso sakhatywa. Oku kwabenza bakuthandabuza ukunyaniseka kwale nkampani. Kwangqineka kuyinkuselo kubo, ekubeni kwiiveki ezimbalwa ukususela ngoko, uhili waphuma ezingcongolweni, yaye abantu babanjwa. Cinga nje ngoko kulahlekele abo bangazange benze phando kuqala. Abalahlekelwanga yimali nje kuphela, kodwa mhlawumbi kwanangabahlobo ababoleka kubo kodwa abangazange bababuyisela xa eli yelenqe laphanzayo. Kwimicimbi yemali, hayi indlela ekububulumko ngayo ukusebenzisa umgaqo okwiMizekeliso 22:3: “Onobuqili ubona into embi, azifihle; ke zona iziyatha ziya kugqitha kuyo, zihlawuliswe”!

Bambelela Elizwini Lakho

Kuthekani ukuba ishishini alinangeniso njengoko ubulindele? INdumiso 15:4 incoma umntu obambelelayo kwizivumelwano kwanokuba ukwenjenjalo akunangenelo kuye: “Ofunga, angajiki, nokuba kubi kuye.” Kulula ngobani ukubambelela emazwini akhe xa izinto zimhambela kakuhle. Kodwa iba luvavanyo lwengqibelelo xa ubani eza kulahlekelwa ngokwasemalini.

Khumbula umzekelo oseBhayibhileni ukususela kwixesha likaYoshuwa. AmaGibheyon enza ubuqhetseba ukuze izikhulu zakwaSirayeli zibe nokwenza umnqophiso nawo yaye zingawatshabalalisi. Enyanisweni, ayeyinxalenye yohlanga olwalugqalwa lusisisongelo kuSirayeli. Xa eli qhinga labhencwayo, “oonyana bakaSirayeli abababulala, ngokuba izikhulu zebandla zibe zifunge uYehova.” (Yoshuwa 9:18) Nakubeni eli qela lalisuka kummandla wotshaba, ezi zikhulu zavakalelwa kukuba kubalulekile ukugcina ilizwi lazo. Yaye kamva iziganeko zabonisa ukuba oku kwamkholisa uYehova.—Yoshuwa 10:6-11.

Ngaba uya kubambelela kwizithembiso nezivumelwano zeshishini lakho kwanokuba izinto azihambi njengoko ubulindele?a Ukwenjenjalo kuya kukwenza ufane ngakumbi noYehova, osoloko ebambelela elizwini lakhe.—Isaya 55:11.

Nyaniseka

Ukunyaniseka kufana nesilwanyana esisengozini, okanye esingekhoyo kushishino lwanamhlanje. Bambi kumashishini afana nelakho basenokusebenzisa iindlela zokunganyaniseki ukwandisa ingeniso yabo. Basenokunganyaniseki kwizibhengezo zentengiso. Basenokuba igama lenye inkampani baze balibeke kwimveliso yabo. Okanye basenokubhengeza imveliso ekumgangatho ophantsi njengekumgangatho ophezulu. Zonke ezi ziindlela zokunganyaniseki. Abo benza oku bafana ‘nabangendawo’ abo ngokutsho kuka-Asafu, ngokucacileyo ‘bandise indlela yabo yokuphila,’ ngobuqhetseba.—INdumiso 73:12.

Ngaba wena, njengomKristu, uza kusebenzisa undlela mnyama? Okanye kunoko ngaba uya kukhokelwa yimigaqo yeBhayibhile, enjengale: “Asonanga mntu, asonakalisanga mntu, asiphanganga mntu”; ‘sisuke sazilahla izinto ezifihlakeleyo eziziintloni, asihambanga ngobuqhetseba’; “ngamasikizi kuYehova amatye ngamatye; nesikali esikhohlisayo asilungile”? (2 Korinte 4:2; 7:2; IMizekeliso 20:23) Khumbula, owavelisa ukunganyaniseki nguSathana uMtyholi, ‘uyise wamaxoki.’—Yohane 8:44.

Bambi basenokuphikisa bathi: ‘Kunzima ukuhlala kushishino ngaphandle kokuba ubani asebenzise iindlela zokunganyaniseki njengoko abanye besenza.’ Kulapho umKristu anokubonisa khona ukholo lwakhe kuYehova. Ukunyaniseka kubekwa eluvavanyweni xa kusenza ulahlekelwe kokuthile. Ukuthi umntu akanakuziphilisa ngaphandle kokunganyaniseki kufana nokuthi uThixo akabakhathaleli abo bamthandayo. Ubani onokholo lokwenyaniso kuYehova uyazi ukuba uThixo unokubaxhasa abakhonzi bakhe nakweliphi na ilizwe yaye nakweyiphi na imeko. (Hebhere 13:5) Liyinyaniso elokuba, ubani kusenokufuneka aneliseke yingeniso encinane kunaleyo isenokufunyanwa ngabanganyanisekanga, kodwa ngaba oku asikuko okufanele kwenziwe ukuze kuzuzwe intsikelelo kaThixo?

Khumbula ukuba, ukunganyaniseki kufana neboomerang ethi, xa igityiselwa, ibuyele kumgibiseli. Ukuba usomashishini ufunyaniswe enganyanisekanga, abathengi nabaxhasi ngokufuthi baya kumshiya. Usenokubaqhatha kube kanye, kodwa usenokuba ugqibelisile. Kwelinye icala, usomashishini onyanisekileyo ngokuqhelekileyo ufumana intlonelo yabanye. Lumka ungaphenjelelwa yingqiqo yobuxoki ethi, ‘Ngumkanja ongaqhathiyo, ngoko kufanelekile.’ Umgaqo weBhayibhile uthi, “Uze ungalandeli isininzi ukuya kwenza izinto ezimbi.”—Eksodus 23:2.

Masithi iqabane lakho ekukudala usebenzisana nalo kwishishini alingomKristu okholwa naye yaye alisoloko libambelele kwimigaqo yeBhayibhile. Ngaba bekunokuba kokufanelekileyo ukusebenzisa oku njengesingxengxezo xa kwenziwe okuthile okungekho ngokwezibhalo? Khumbula imizekelo enjengeka-Adam noSawule. Kunokuba baphephe isono, banikezela kwingcinezelo esuka kwabanye baza basola izinxulumani zabo. Enjani imiphumo ukuba mandundu abajamelana nayo!—Genesis 3:12, 17-19; 1 Samuweli 15:20-26.

Baphathe Ngokufanelekileyo Abo Ukholwa Nabo

Ngaba ikho ilahleko ekufanele kucingwe ngayo xa kusenziwa izivumelwano zoshishino nabo sikhonza nabo uYehova? Xa umprofeti uYeremiya wathenga intsimi kwidolophu yakokwabo eAnatoti kumza wakhe, akazange amnike nje imali aze amxhawule. Kunoko, wathi: “Ndakubhala ke encwadini, ndayitywina, ndangqinisa amangqina, ndayilinganisela imali ngesikali.” (Yeremiya 32:10) Ukwenza izivumelwano ezinjalo ezibhaliweyo kunokukuthintela ukungaqondani okunokuphakama kamva ukuba iimeko ziyaguquka.

Kodwa kuthekani ukuba umzalwana ongumKristu kubonakala ukuba uye akakuphatha kakuhle eshishinini? Ngaba ufanele ummangalele kwinkundla yamatyala? IBhayibhile icace gca koku. UPawulos wabuza: “Kukho na umntu kuni, enendawo ngakomnye, onobuganga bokummangalela phambi kwabangemalungisa, angammangaleli phambi kwabangcwele?” Kuthekani ukuba loo ngxaki ayiconjululwanga ngokwanelisayo ngokukhawuleza? UPawulos wongezelela wathi: “Seninciphile ke kanye ngokokuthi nimangalelane. Yini na ukuba ningathi kanye nivume ukoniwa? Yini na ukuba ningathi kanye nivume ukulunyukiswa?” Cinga nje igama elibi oku okuya kulibeka kwintlangano yamaKristu ukuba abangaphandle beve ukuba amaKristu okwenyaniso alungisa imbambano kwinkundla yamatyala! Ngaba kwiimeko ezinjalo kungenzeka ukuba ukuthanda imali kuye kwanamandla kunothando ngomzalwana? Okanye ngaba kunokwenzeka ukuba ubani uthotywe isidima sakhe waza wacinga ngempindezelo engqondweni yakhe? Isiluleko sikaPawulos sibonisa ukuba kwiimeko ezinjalo kunokuba kokulunge ngakumbi ukulahlekelwa kunokuya kwinkundla yamatyala.—1 Korinte 6:1, 7; Roma 12:17-21.

Kakade ke, ikho indlela engokweZibhalo yokusingatha iimbambano ezinjalo phakathi kwebandla. (Mateyu 5:37; 18:15-17) Ukunceda abazalwana ababandakanyekileyo balandele amanyathelo acetyiswayo, abaveleli abangamaKristu basenokunikela isiluleko esithile esiluncedo kubo bonke ababandakanyekileyo. Kusenokubonakala kulula ukuvumelana nemigaqo yeBhayibhile ebudeni bengxubusho enjalo, kodwa emva koko ngaba ngenene uya kubonisa ukuba ubuphulaphule ngokusebenzisa isiluleko esinikelweyo? Uthando ngoThixo nangamaKristu esikholwa kunye nawo luya kusishukumisela ukuba senjenjalo.

Ngokuthandabuzekiyo, ukuba neshishini kuza kukwenza ulahlekelwe kokuthile. Siyathemba ukuba izinto oya kulahlekelwa zizo ziya kuba zezifanelekileyo. Xa ujamelene nokwenza izigqibo okanye nayiphi na imeko ethandabuzekayo, khumbula ukuba kukho izinto ezininzi ebomini ezixabiseke ngaphezu kwemali. Ngokugcina imali ikwindawo yayo, ukugcina ilizwi likabani, ukunyaniseka, uze uqhubane namaqabane akho ezoshishino ngendlela yobuKristu, sinokuqiniseka ukuba ishishini alidli ixesha nemali ngaphezu kwemfuneko yaye kwangaxeshanye, sinokulondoloza ubuhlobo, isazela esilungileyo, nolwalamano oluhle noYehova.

[Umbhalo osemazantsi]

[Ibhokisi ekwiphepha 31]

Izinto Ishishini Lakho Elinokukwenza Ulahlekelwe Zizo

Ixesha: Ukuqhuba ishishini likabani phantse ngamaxesha onke kuthabatha ixesha kunokusebenza njengomqeshwa wenkampani. Ngaba oku kuphazamisa ucwangciso lwakho, kushiye ixesha elilinganiselweyo lemisebenzi yokomoya ebalulekileyo? Ngaba uyavuma ukuba, unokukwazi ukucwangcisa imicimbi yakho ukuze uchithe ixesha elingakumbi ekwenzeni ukuthanda kukaThixo? Ukuba kunjalo, kulungile. Kodwa lumka! Oku akukho lula njengokuba sithetha.

Imali: Ukuze wenze imali kufuneka imali. Lifuna malini ishishini lakho? Ngaba sele unayo loo mali? Okanye ngaba kufuneka uyiboleke? Ngaba unokukunyamezela ukulahlekelwa yimali ethile? Okanye ngaba ilahleko iya kuba ngaphezu koko unokukunyamezela ukuba izinto azihambi kakuhle njengoko bekulindelekile?

Abahlobo: Ngenxa yeengxaki eziphakamayo kwimisebenzi yemihla ngemihla, oosomashishini abaninzi balahlekelwe ngabahlobo ngenxa yamashishini. Nangona usenokukwazi ukwenza abahlobo, ulwalamano lusenokuba buthathaka. Kuthekani ukuba aba bahlobo ngabazalwana bethu abangamaKristu?

Isazela Esilungileyo: Indlela eqhelekileyo yokungena kushishino kwihlabathi lanamhlanje ithi “akukho nkwali iphandela enye” okanye “Ndinokuyifumana njani ingeniso?” Ngaphezu kwama-70 ekhulwini abaphengululi kuhlolisiso olwenziwa eYurophu bathi isazela sinendawo encinane okanye asinayo kubomi bezoshishino. Akumangalisi ukuba amaqhinga, ukunganyaniseki, nezenzo ezithandabuzekayo kushishino ziye zaqheleka. Ngaba uza kuhendelwa ukulandela oko kwenziwa ngabanye?

Ulwalamano Lwakho NoYehova: Nasiphi na isenzo esinxamnye nomthetho nemigaqo kaThixo, nakubeni siqhelekile kwezoshishino, sinokulonakalisa ulwalamano lomntu noMenzi wakhe. Oku kunokumenza alahlekelwe lithemba lobomi obungunaphakade. Ngaba oku ngokucacileyo akunakuba ngumphumo obuhlungu kumKristu onyanisekileyo ukujamelana nawo, kungakhathaliseki ukuba ziziphi iingenelo zezinto eziphathekayo?

[Imifanekiso ekwiphepha 31]

Yintoni eya kunceda ukuthintela ukungaqondani okunokuvela kamva? Ngaba sisivumelwano esenziwa ngokuthembana okanye sisigqibo esibhalwe phantsi?