Unokulwenza Njani Uxolo Nabanye?

IBHAYIBHILE ithi xa ichaza abantu: “Bonke bonile baza basilela kuzuko lukaThixo.” (Roma 3:23) Ekubeni bonke abantu abangaphezu kweebhiliyoni ezisixhenxe abaphila kulo mhlaba bengafezekanga, asinakukuphepha kwaphela ukunyathelana iinzwane. Sinokulwenza njani ke uxolo kwezo meko?

IBhayibhile isinika icebiso elihle. Ichaza uMdali ‘njengoThixo woxolo,’ ogama linguYehova. (Hebhere 13:20; INdumiso 83:18) UThixo ufuna abantwana bakhe basemhlabeni bahlalisane ngoxolo, ibe usimisela umzekelo kule nkalo. Xa isibini sokuqala samonayo, sisonakalisa ulwalamano oluhle naye, wakhawuleza wathabatha amanyathelo okuzixolelanisa nezidalwa zakhe ezingabantu. (2 Korinte 5:19) Cinga ngezinto ezintathu onokuzenza ukuze ube seluxolweni nabantu.

Xolela Ngesisa

Ithini iBhayibhile? “Qhubekani ninyamezelana yaye nixolelana ngesisa ukuba nabani na unesizathu sokukhalazela omnye. Kanye njengoko uYehova wanixolela ngesisa, yenzani njalo nani.”—Kolose 3:13.

Yintoni elucelomngeni? Mhlawumbi ‘unesizathu esivakalayo sokukhalaza’ ibe ubona kufanelekile ukuqhawula ulwalamano nalowo ukonileyo. Usenokuma ngelithi nguye omele eze kucela uxolo kuwe. Kodwa xa engayazi into yokuba ukonile, okanye uvakalelwa ukuba nguwe omonileyo, loo ngxabano iya kuhlala injalo.

Yintoni onokuyenza? Thobela icebiso leBhayibhile ngokumxolela ngesisa loo mntu, ngakumbi ukuba leyo yingxaki engephi. Khumbula, ukuba xa uThixo ebenokuzibhala phantsi iimpazamo zethu, besingenakuze sime phambi kwakhe. (INdumiso 130:3) IBhayibhile ithi: “UYehova unenceba nobabalo, uzeka kade umsindo yaye unobubele bothando obuninzi. Kuba yena uyakwazi ukuyilwa kwethu, ekhumbula ukuba siluthuli.”—INdumiso 103:8, 14.

Cinga nangomzekeliso weBhayibhile othi: “Ingqiqo yomntu ngokuqinisekileyo imenza azeke kade umsindo, yaye kuyinto entle kuye ukukubetha ngoyaba ukunxaxha.” (IMizekeliso 19:11) Ingqiqo isinceda sibone okungambi, siqonde izizathu zokuba abantu bathethe amazwi athile okanye benze izinto ezithile. Simele sizibuze oku, ‘Ngaba umntu ondonileyo ebediniwe, egula okanye kukho into emcinezelayo?’ Ukuqonda ezona zizathu ziqhuba abantu, iimvakalelo nemeko zabo kunokukunceda ungacaphuki gqitha utsho ukwazi ukunyamezela iimpazamo zabo.

Yiya Kuloo Mntu Nithethe

Ithini iBhayibhile? “Ukuba umzalwana wakho wenza isono, yiya usidandalazise isiphoso sakhe phakathi kwakho naye ninedwa. Ukuba uyakuphulaphula, umzuzile umzalwana wakho.”—Mateyu 18:15.

Yintoni elucelomngeni? Iimvakalelo ezingakhiyo njengokoyika, umsindo nokudana zinokukwenza ungafuni kuya emntwini ukuze nicombulule ingxaki. Usenokuzama ukufuna inkxaso yabanye ngokubachazela ngaloo ngxaki, nto leyo enokuyenza ibe mandundu ngakumbi.

Yintoni onokuyenza? Xa kuvela ingxaki enzulu ube uziva ungenakuyibetha ngoyaba, yiya kuloo mntu nithethe ngayo. Zama ukuyisingatha ngolu hlobo:

(1) Ngokukhawuleza: Musa ukuzilazila. Ukuba uyazilazila, loo ngxaki inokuba mandundu. Zama ukusebenzisa eli cebiso likaYesu: “[Ukuba] uzisa isipho sakho esibingelelweni, uthi ulapho ukhumbule ukuba umzalwana wakho unento ngakuwe, sishiye isipho sakho apho phambi kwesibingelelo, uze uhambe uye kuxolelana nomzalwana wakho kuqala, wandule ke, wakubuya, unikele isipho sakho.”—Mateyu 5:23, 24.

(2) Ninedwa: Kuphephe ukuthetha nabanye ngaloo ngxaki. “Gweba ibango lakho kunye nedlelane lakho, uze ungalityhili igqugula lomnye.”—IMizekeliso 25:9.

(3) Ngoxolo: Kuphephe ukuzama ukufuna ukuba ngubani ochanileyo nongachananga. Eyona nto uyifunayo kukwenza uxolo, kungekhona ukungqina ukuchana kwakho. Zama ukuthetha ngawe endaweni yokuthetha ngomnye umntu. Mxelele ukuba wena ‘uye wakhubeka kunokumxelela ukuba yena ukukhubekisile!’ IBhayibhile ithi: “Masisukele izinto ezisingisa eluxolweni nezinto ezakhayo komnye nomnye.”—Roma 14:19.

Zeka Kade Umsindo

Ithini iBhayibhile? “Musani ukubuyisela ububi ngobubi nakubani na. . . . Kodwa, ‘ukuba utshaba lwakho lulambile, luphe ukutya; ukuba lunxaniwe, lunike into yokusela.’”—Roma 12:17, 20.

Into elucelomngeni? Ukuba imigudu yakho yokuqala iwa phantsi, usenokufuna ukuncama.

Yintoni onokuyenza? Yiba nomonde. Abantu abafani. Bambi kuthatha ixesha ngaphambi kokuba behle; abanye basasebenzela ukubonakalisa iimpawu zikaThixo. Qhubeka ubaphatha ngobubele nothando. IBhayibhile ithi, “Musa ukuzivumela woyiswe bububi, kodwa hlala uboyisa ububi ngokulungileyo.”—Roma 12:21.

Ukuze senze uxolo nabanye, simele sizame ukubonakalisa ukuthobeka, ukuba nengqiqo, umonde nothando. Kubaluleke ngokwenene ukuba seluxolweni nabanye!

NGABA WAKHA WAZIBUZA?

● Yintoni enokukunceda uxolele omnye umntu ngesisa?—Kolose 3:13.

● Yintoni enokukunceda uye kuthetha nomnye umntu nilungise ingxaki?—Mateyu 5:23, 24.

● Kuthekani ukuba imigudu yakho yokwenza uxolo iwa phantsi?—Roma 12:17-21.

[Amagama acatshulweyo akwiphepha 11]

“Ingqiqo yomntu ngokuqinisekileyo imenza azeke kade umsindo, yaye kuyinto entle kuye ukukubetha ngoyaba ukunxaxha.”—IMIZEKELISO 19:11