Indlela Yokunceda Abanengxaki Yokuxhalaba
“Intliziyo yam ithanda ukungongoza ngamandla, ndibile xhopho de kube nzima nokuphefumla. Ndisuka ndinkwantye, ndibe nexhala ndidideke nasengqondweni.”—uIsabella, okwiminyaka engamashumi amane ubudala nonegxaki yokuxhalaba.
INKXALABO ingachazwa ngokuthi “kukoyika okanye ixhala.” Ngokomzekelo, ngaba wakha woyikiswa kukujongana nenja exwaye inkathazo? Kuthekani xa loo nja ikuyeka? Ngaba alipheli na elo xhala? Yintoni kanye, inkxalabo?
Xa uguliswa yinkxalabo, apho uhlala uxhalabile naxa kungasekho nto, ikuxhalabisayo, loo nkxalabo inokuba yingxaki. IU.S. National Institute of Mental Health (NIMH) ithi, “Ngonyaka, ingxaki yokuxhalaba ichaphazela abantu baseMerika abamalunga nama-40 ezigidi, kwabaneminyaka eli-18 nangaphezulu.” Cinga ngoIsabella, okhankanywe ekuqaleni. Ukuba nengxaki yokuxhalaba efana neyakhe kunokuba nemiphumo ebuhlungu.
Akupheleli nje apho, banokuchaphazela kakubi nabo uhlala nabo. Kodwa ke, zikho iindaba ezimnandi ngale meko. Incwadi ethi NIMH ithi: “Zikho iindlela zokunyanga esi sigulo yaye uphando lubonisa ukuba kukho indlela ezintsha ezinokunceda abantu abanale ngxaki baphile ubomi obonwabisayo.”
Intsapho nabahlobo zinokumnceda lowo unengxaki yokuxhalaba. Njani?
Indlela Yokunceda
Mxhase: UMonica, onengxaki yokuxhalaba kuquka ipost-traumatic stress disorder, uthi xa echaza ubunzima ajamelana nabo: “Abantu abaninzi abayiqondi ingxaki endinayo.”
Ngenxa yoko, abantu abanengxaki yokuxhalaba basoloko besoyika ukungaqondwa kangangokuba bazama ukuyifihla ingxaki abanayo kwabanye. Oku kunokubenza bazive benetyala itsho ibe mandundu imeko yabo. Ngoko, kubaluleke gqitha ukuba iintsapho nabahlobo babaxhase.
Funda ngale ngxaki: Eli cebiso libaluleke ngakumbi kwabasondele ngakumbi kubantu abanale ngxaki. Oku kunokuquka ilungu lentsapho okanye umhlobo osenyongweni.
Hlalani nithuthuzelana: Umthunywa wevangeli wenkulungwane yokuqala uPawulos wabongoza abahlobo ababekwisixeko samaGrike, iTesalonika ukuba ‘bahlale bethuthuzelana baze bakhane.’ (1 Tesalonika 5:11) Oku singakwenza ngamazwi nangendlela esithetha ngayo. Kufuneka sibonise ukuba sibakhathalele abahlobo bethu, size siwaphephe namazwi anokubenzakalisa.
Cinga ngabahlobo benkwalambisa abathathu bakaYobhi, ethiywe ngegama lakhe enye incwadi yeBhayibhile. Mhlawumbi uyakhumbula ukuba, ephazama loo madoda atyhola uYobhi ngokuthi ubandezeleka ngenxa yezono zakhe azifihlileyo.
Ngoko kulumkele ukumkhathaza lowo ugulayo. Phulaphula ngenyameko. Zibeke ezihlangwini zakhe, kunokucinga ngendlela ovakalelwa ngayo wena. Musa ukungxama ugqibe ungekeva kakuhle. Yiloo nto kanye abayenzayo abahlobo bobuxoki bakaYobhi, ibe ngenxa yoko babizwa ngokuba ‘ngabathuthuzeli abanenkathazo.’ Bamdandathekisa ngakumbi!—Yobhi 16:2.
Kubaluleke gqitha ukubaphulaphula ngenyameko abantu abanale ngxaki. Bavumele bakhululeke ukukhupha imbilini. Oku kunokukunceda ubaqonde bhetele. Imiphumo yoko inokuba mihle! Unokubanceda baphile ubomi obunenjongo nobonwabisayo.
[Ibhokisi/Umfanekiso okwiphepha 27]
Ukuqonda Iintlobo Zengxaki Yokuxhalaba
Kubalulekile ukuqonda iingxaki zokuxhalaba, ngakumbi xa kugula amalungu entsapho okanye abahlobo bethu. Qwalasela ezi ngxaki zintlanu zilandelayo.
Ukonganyelwa Lixhala, Khumbula uIsabella okhankanywe ekuqaleni kwenqaku lethu. Akaphazanyiswa nje kukucinga enoba uza kuhlaselwa yile ngxaki kusini na. Uthi, “Ndihlala ndicinga ukuba ndiza kuphinda ndibe nayo le ngxaki.” Ngenxa yoko, abantu abanale ngxaki bayaziphepha iindawo abakhe bahlaselwa bekuzo. Kwabanye kuba nzima nokuphuma emizini yabo okanye balwe nale ngxaki kuphela xa kukho umntu abamthembayo oza kuhamba nabo. UIsabella uthi: “Xa uwedwa kunzima ukuyoyisa le ngxaki. Ndomelezwa nguMama; kuba nzima xa engekho ecaleni kwam.”
Ingxaki Yokoyika Ngokubaxiweyo Umntu onengxaki yokoyika ngokubaxiweyo iintsholongwane okanye ubumdaka unokuba nomkhwa wokuhlamba izandla rhoqo. Ngokuphathelele ingxaki efanayo, uRenan uthi: “Ndisoloko ndicingisisa ngeempazamo endizenzileyo, ndizihlolisise ndigocagoca indlela endizenze ngayo.” Loo nto ibangela ukuba ufune ukuxelela abanye ngezo mpazamo. URenan usoloko efuna ukuqinisekiswa. Kodwa amayeza aye amnceda wakwazi ukulawula le ngxaki.a
IPost-Traumatic Stress Disorders (PTSD) Kutshanje eli binzana liye lasetyenziswa ukuchaza iimpawu zokuphazamiseka kwabantu emva kwentlekele ehlasimlis’ umzimba eye yenzakalisa okanye yabasongela. Abantu abanengxaki yePTSD bothuka msinyane, bacaphuke, bangabi nazimvakalelo, baphelelwe ngumdla kwizinto ezazikade zibonwabisa, de bayeke nokuthanda abantu—ngakumbi abo babesondelelene nabo. Abanye baba ndlongondlongo, babe nogonyamelo, baziphephe iimeko ezibakhumbuza iintlekele yabo.
Ukoyika Ukuba Nabantu Le yindlela abachazwa ngayo abantu abaxhalaba ngokugqithisileyo nabazoyikiselayo kwizinto zemihla ngemihla. Abanye boyika indlela abajongwa ngayo nokugwetywa ngabanye. Banokuxhalaba kangangeentsuku okanye iiveki ngaphambi kokuya kwisiganeko esithile. Uloyiko lwabo lunokude lubaphazamise emsebenzini, esikolweni okanye kwezinye izinto eziqhelekileyo kube nzima ukwenza nokugcina abahlobo.
Ukuxhalatyiswa Yinto Yonke, Le yingxaki anayo uMonica, okhankanywe ngaphambili. Ugqiba imini yonke “exhalatyiswa zizinto ezingephi,” nokuba akukho sizathu kwaphela. Abantu abanale ngxaki bahlala besoyika ukwehlelwa yintlekele yaye baxhalabele impilo, imali, iingxaki zentsapho okanye ezomsebenzi. Banokuxhalatyiswa kwakukucinga ngendlela oluza kuhamba ngayo usuku.b
[Imibhalo esemazantsi]
a UVukani! akakhuthazi hlobo luthile lwezonyango.
b Lo mbandela ungasentla usekelwe kwimpapasho yeNational Institute of Mental Health of the U.S. Department of Health and Human Services.
[Umfanekiso okwiphepha 26]
“Hlalani nithuthuzelana”