Umboko Wendlovu

● Abaphengululi benza ingalo yerobhothi enobuchule besandla nebhetyebhetye. Intloko yabayili kule nkampani yezixhobo ze-elektroniki—ithi, le ngalo intsha “igqwesa nantoni na ekhoyo ngoku kwishishini loo matshini.” Bancedwa yintoni ukuze benze le ngalo yerobhothi? Le ntloko ithi: “Yindlela owenziwe ngayo umboko wendlovu.”

Khawucinge ngoku: Unobunzima obumalunga neekhilogram ezili-140, umboko wendlovu kudala wachazwa “njengeyona nto ibalulekileyo neluncedo kwizinto ezininzi emhlabeni.” Lo mboko, uyimpumlo, umbhobho wokufunxa amanzi, uyingalo okanye isandla. Ngawo, indlovu iyakwazi ukuphefumla, ukusezela, ukusela, ukubamba okanye ukukhupha isandi esikhulu njengexilongo!

Kodwa akupheleli apho. Umboko wendlovu unezihlunu ezimalunga nama-40 000 eziwenza uye nakwiliphi na icala. Ngencam yawo, indlovu inokuchola nengqekembe yemali encinane. Kwangawo, indlovu inokuphakamisa umthwalo omalunga neekhilogram ezingama-270!

Abaphengululi banethemba lokuba xa besenza iirobhothi bexelisa umboko wendlovu, oko kuya kubanceda benze iirobhothi ezibalaseleyo kwimisebenzi yasendlwini nakwiindawo zengqesho. Omnye ummeli wale nkampani sithethe ngayo uthi: “Okokuqala embalini sivelise irobhothi eyahluke ngokupheleleyo kwezinye eza kunceda abantu bakwazi ukusebenzisa oomatshini ngaphandle kwengozi.”

Ucinga ntoni? Ngaba umboko wendlovu wazivelela? Okanye ngaba wadalwa?