Oko Kufunekayo Xa Ukhwele Indlovu — IWatchtower LAYBRARI EKWI-INTANETHI

Oko Kufunekayo Xa Ukhwele Indlovu

NGUMBHALI KAVUKANI! EINDIYA

NJENGOKO umqeqeshi weendlovu eziphekela ukutya kufuphi noMlambo iNarmada, ushiye umntwana wakhe phakathi kwamanqina endlovu nomboko wayo. Incwadi ethi Project Elephant ithi, lo mntwana uzama ngazo zonk’ iindlela ukusuka apho, kodwa “isebenzisa umboko wayo, le ndlovu iyamfunqula ize imbeke apho abeshiywe khona nguyise. Uyise uyaqhubeka epheka eqinisekile ukuba umntwana wakhe ukhuselekile.”

Kudala iindlovu zisebenzela abantu ukususela kwiminyaka yama-2000 B.C.E. Mandulo ubukhulu becala iindlovu zaziqeqeshelwa imfazwe. Kwi-Indiya yale mihla ziqeqeshelwa umsebenzi. Zisetyenziswa kwiinkampani zokugawula, kwimisitho yonqulo neyemitshato, kwizibhengezo, kwisekisi yaye zikwasetyenziselwa ukungqiba. Zenziwa mbuna njani ezi ndlovu? Yaye ziqeqeshwa njani?

Ukufundela Ukuqeqesha Indlovu

EIndiya kukho amaziko amaninzi alungiselelwe ukunyamekela amathole eendlovu abanjisiweyo, alahlekileyo nawonzakele endle. Elinye lamaziko liseKoni kwilali yaseKerala. Apho la mathole aye aqeqeshelwe umsebenzi. Okokuqala kufuneka ithole likwazi ukumthemba umqeqeshi walo. Kubalulekile ukuba alondle ukuze likwazi ukumthemba. Ithole liyalazi ilizwi lomqeqeshi walo, yaye xa elibiza ukuze lifumane ukutya, liya kuye libaleka ukuze lifumane ubisi nentlama yamazimba. Kuqaliswa ukuqeqeshwa amathole xa sele eneminyaka eli-13 ubudala. Yaye xa eneminyaka engama-25 ubudala aqalisa ukusetyenziswa. Urhulumente waseKerala wamisela umthetho wokuba iindlovu zimele ziyeke ukusebenza xa zineminyaka engama-65.

Ukuze akwazi ukukhuseleka umntu xa ekhwele indlovu, umele abe uqeqeshwe kakuhle. IElephant Welfare Association of Trichur, eKerala ithi lo mntu umele aqeqeshwe ngokucokisekileyo kangangeenyanga ezintathu. Xa eqeqeshwa akafundiswa ngendlela yokuyalela iindlovu nje kuphela. Ukwafundiswa nangemikhwa yeendlovu.

Kuthatha ixesha ukuqeqesha indlovu esele ikhulile. Emi ngaphandle kwendawo evalelwe kuyo indlovu, umqeqeshi uye ayifundise ukuthobela imiyalelo. EKerala, umqeqeshi usebenzisa imiyalelo engama-20 ukwalathisa indlovu ukwenza umsebenzi ofunekayo. Maxa wambi uye atsho ekhwaza okanye ayixhokonkxe ngentonga ukuze ikubone oko imele ikwenze. Xa iye yakwenza oko ibiyalelwe kona iye ivuzwe ngokuthile. Xa umqeqeshi eqinisekile ukuba indlovu imbuna uye angene kwindawo evalelwe kuyo aze ayiphulule. Oku kubangela ukuba le ndlovu ikwazi ukumthemba lo mntu, aze naye ayithembe. Emva kwethutyana inokukhutshwa kodwa umqeqeshi umele alumke kuba isendlongondlongo. De ibe mbuna, iye ibotshelelwe phakathi kweendlovu eziqeqeshiweyo xa isiya kuhlanjwa okanye iphuma nje.

Emva kokuba indlovu sele ikwazi ukwenza oko ikuyalelweyo, umqeqeshi wayo uye ayikhwele aze ayixhokonkxe ngeenzwane okanye ngezithende zakhe. Ukuze iye phambili uye achukumise iindlebe zayo ngoobhontsi. Uyimisa ngokubeka izithende zakhe emagxeni ayo. Ukuze ingadideki iye iyalelwe ngumntu omnye kuphela. Indlovu iye ikwazi ukuqonda yonke imiyalelo xa sele kudlule iminyaka emithathu okanye emine iqeqeshwa. Emva koko ayiyilibali. Nangona ingqondo yayo incinane xa ithelekiswa nomzimba wayo, isisilwanyana esikrelekrele kakhulu.

Ukunyamekela Indlovu

Indlovu ifanele igcinwe yonwabile kwaye isempilweni. Kubalulekile ukuyihlamba imihla ngemihla. Kusetyenziswa amatye nekhasi lekhokhonathi xa kuhlanjwa isikhumba sayo esomeleleyo kodwa esithambileyo.

Emva kokuba ihlanjiwe kulandela isidlo sakusasa. Umqeqeshi wayo uye ayilungiselele intlama yengqolowa, amazimba kunye nefula. Ukutya kwasemini kuquka uqalo, amagqabi esundu, nengca. Ikuthanda nakakhulu oko kutya xa kufakwe iminqathe nommoba. Iindlovu zichitha ixesha lazo elininzi zisitya. Zifuna malunga ne-140 eekhilogram zokutya kunye ne-150 eelitha zamanzi suku ngalunye! Ukuze alondoloze ubuhlobo, umqeqeshi ufanele azanelise zonke ezi mfuno.

Imiphumo Yokuphathwa Kakubi

Indlovu yaseIndiya inokusebenza ukusa kumkhamo othile. Iindlovu zinokubajikela abaqeqeshi abaziphethe kakubi okanye abathetha ngqwabalala nazo. Iphephandaba laseIndiya iSunday Herald lathetha ngenkunzi yendlovu enamabamba lisithi “yaba ndlongondlongo . . . ekubeni abaqeqeshi bayo babeyiphethe kakubi. Le ndlovu yaqhubeka ingalawuleki . . . kangangokuba kwafuneka ukuba itofwe ukuze ilale.” NgoAprili 2007, i-India Today International yanikela le ngxelo: “Kwiinyanga ezimbini ezidluleyo, iindlovu ezinamabamba ezingaphezu kwe-10 ziye zandlongondlongo kwimibhiyozo; ukususela kuJanuwari kunyaka ophelileyo, kuye kwafa abaqeqeshi abangama-48 ngenxa yezi zilwanyana zindlongondlongo.” Oku kudla ngokwenzeka ngexesha laxa zifuna ukudibana nemazi. Nyaka ngamnye, ngeli xesha, inkunzi ithi ivelise incindi yedlala eninzi. Ngenxa yoko iba ndlongondlongo kwezinye iinkunzi nasebantwini. Eli xesha linokuthabatha iintsuku ezili-15 ukuya kwiinyanga ezintathu.

Elinye ixesha apho indlovu iye ingazinzi khona kuxa iye yathengiswa okanye ibe nomqeqeshi omtsha. Ulwalamano olukhoyo phakathi kwendlovu nomqeqeshi wayo wangaphambili lunokubonakala nangakumbi ngoku. Ukuze incedwe yamkele olu tshintsho, umqeqeshi wayo wokuqala uye ayipheleke ukuya kwikhaya layo elitsha. Baye basebenze bobabini de lo mqeqeshi mtsha aqhelane nale ndlovu. Xa kunokufa umqeqeshi wayo ize ibe nomqeqeshi omtsha, imeko iba maxongo nangakumbi. Kodwa ke, iye iyiqhele le meko ize iyamkele.

Nangona abaninzi besoyika esi silwanyana someleleyo, xa siqeqeshwe kakuhle siya kumthobela umqeqeshi onobubele. Xa iphethwe ngobubele, indlovu inako ukushiywa okwethutyana ngumqeqeshi wayo ingabotshelelwanga. Usenokushiya incam yentonga phezu konyawo lwendlovu ngoxa enye incam isemhlabeni, aze ayiyalele ukuba ingayi ndawo. Indlovu iye ithobele. Njengoko kukhe kwaboniswa ekuqaleni kweli nqaku, iyamangalisa kwaye iyachukumisa intsebenziswano ekhoyo phakathi kwendlovu nomqeqeshi wayo. Ngoko ke, umqeqeshi olungileyo unokuyithemba indlovu yakhe.

[Ibhokisi/Umfanekiso okwiphepha 18]

INDLOVU NOMNTU—IMBALI ENDE

Kudala abantu bafuya iindlovu. Mhlawumbi oyena mntu udumileyo embalini owafuya iindlovu nguHannibal, injengele yaseCarthage. Kwinkulungwane yesithathu Ngaphambi kweXesha Eliqhelekileyo, isixeko saseCarthage esiseMntla Afrika, sasisilwa neRoma kwiimfazwe ezaqhubeka inkulungwane yonke ezazisaziwa ngokuba ziiMfazwe zePunic. UHannibal wahlanganisa umkhosi eCartagena, eSpeyin, efuna ukuba uye kulwa neRoma. Waqala wanqumla iPyrenees ukuya kungena kwindawo eyaziwa ngokuba yiFransi ngoku. Iphephancwadi iArchaeology lithi, emva koko, wenza “elona yelenqe lobugagu elalikhe lenziwa ngumkhosi embalini,” kuba umkhosi wakhe wamajoni angama-25 000—owawuphelekwa ziindlovu zaseAfrika ezingama-37 kunye nezinye izilwanyana ezazithwele izixhobo—wanqumla iiAlps wayokungena eItali. Kwakufuneka banyamezele ingqele, ukukhithika, ukuwa kwamatye namaqela abantu abanengcwangu ababehlala entabeni. Olu yayiluhambo olwalunzima kakhulu kwiindlovu. Bonke bafa kunyaka wokuqala wokulawula kukaHannibal eItali.

[Inkcazelo]

[Umfanekiso okwiphepha 17]

Umqeqeshi uhlamba isikhumba sendlovu esomeleleyo kodwa esithambileyo

[Inkcazelo]

[Inkcazelo Ngomfanekiso okwiphepha 16]